航拍白沙灣

難得有日好天,天氣都仲係涷,未敢上山,搵個地方放吓飛機輕鬆啲,白沙灣有車直到又多船就去白沙灣啦.

天有不測之風雲,來到又變咗陰天,唔緊要啦,一場來到梗係照飛,今次唔客氣喇,有咁高飛咁高先得.終於去到118米出警告,你已超出高度限制,原來最高就係咁,所以話唔駛上山靠飛上去其實多數係唔得既.原地就咁影啦,都大景,但啲船好似唔多夠密.

呢個時候擔高頭其實都望唔到架飛機架喇,之前兩次我都係原地升高,見到乜就影乜,只要影完向下飛就一定唔會迷路,今次冒險飛出小小,影張淨係得船既,好似構圖簡潔啲,冇咁亂.

我見人地影匡湖居影得好靚,我原本都想影,但睇地圖要飛越一個山頭,好似有啲危險.但係原來飛到咁高係望到的.見到匡湖居好似招手叫我過去咁,就去啦,始終都唔可以一路都咁小學雞.終於影到.其實我仲想飛埋啲.不過又有警告,風速很高,請降低高度.之前其實睇天文台網頁都知道今日五級風,離岸仲要七級.只係來到唔覺咁大風先照飛,侷住降低小小跟住走,不過……真係迷咗路,睇唔到架飛機冇晒方向感.好彩仲有自動反航,網頁叫人盡量唔好旨意晒佢,一來GPS出錯會唔知飛咗去邊,二來高度會下降到30米,架飛機唔係全方住位有感應器,有機會撞到嘢炒機,我估周圍咁空曠都唔驚呱?最多飛一陣唔對路停咗佢再諗計,吉人天相,慢慢聽到飛機聲先知道冇事.

真巧合,竟然開始落雨,想唔回航都唔得,我就係喺停車場出面嗰小小空地起飛,呢個角度一睇就知係航拍.