愛笑的model

連日落雨,搞到原本去石澳影都要臨時改做室內, 室內又唔駛俾場租,領隊諗到賽馬會藝術中心,我之前同同事去過一次,冇乜特別靚景,不過就唔驚落雨,算啦好唔好都一餐.臨出發領隊話佢有事要早走,問我可唔可以頂佢個位,都冇乜特別嘢做,安排吓位置就可以,冇所謂啦,不過去到門口貼住話不準攝影團體在此影相,點算……

中伏唯有偷偷摸摸搵地方,參考臥底電影,第一時間諗到天台,原先估計落雨仲驚天台有冇頂,點知曬到燶,要搵有陰影地方先掂,否則唔頂得幾耐.啱啱有啲枱凳,可以叫model坐下,佢幾好笑容,消耗咗唔小電力.

天台周圍白牆好單調,侷住要轉位,唔敢去到樓下咁揚,夾硬搵啲走廊位就算,希望撞唔到食蕉,Model又擺出招牌笑容,背景就雜咗啲,但大家都影得幾高興.

有來過既人知道7樓有塊小草地可以去,政府地方就係咁奇怪,會有個唔用來收租既空間,唔理咁多又可以影到model既笑容.

仲加埋鬼馬動作.

通常每次活動model都會換一次衫,一來唔駛咁悶,二來順便休吓息.不過今次model帶咗成喼衫,咁就換多套啦,事實上都冇乜地方好影,打發吓時間,結果又係走翻去草地.今次坐住笑.

時間差唔多,走去走廊影多幾張就收工,最後都要整個鬼馬動作.

影手球

手球其實好難影,睇翻以前啲相幾乎全部係垃圾,近排成日落雨,咁啱又睇到呢個活動,決定再向難度挑戰.

九龍公園比賽多數冇王管,攞支135mm喺場側影咗一陣,死火,唔係好夠長,而且由於要影正面既關係,好多時都被背住既運動員遮咗,就算影守門員都係同樣問題,變咗只可以影中場爭奪,龍門後面又落晒網.影影吓我見有人在網格中隊支鏡出去影,我自然有樣學樣,好彩支85mm拆咗遮光罩都夠細.蒙古隊幾肯飛吓,雖然最後係大比數輸咗.

手球難影係好難估邊個最終會攻門,佢地會不停將個波交來交去擾亂對方,失驚無神就起手.但真係睇到起手先影多數已經攻完,所以只係估估吓.佢呢吓動作比較慢我先影到.

最後我決定只捕一個位,對焦點亦縮窄到一點擴展至5點,開始冇咁亂,另外一個難度就係飛起既動作好快,快門用到1/500秒,甚至1/640秒都成日矇,最後我開到F1.6光圈,ISO 2000去爭取到1/800秒快門.如果舊機再配支70-200mm F2.8得嗰1/160秒快門真係有機會一張相都冇.不過70-200mm咁大支都隊唔到出去影啦.韓國仔好勁,喺呢個位攞好多分,我幾次都影到呢個位進攻,證明死守一個位方法有效.

去到女子組,香港對日本,又係強弱縣殊,日本隊基本上每個球員都可以有能力射門,就算底線都可以出翻來起手,好彩我預咗,唔係都影唔到.反之香港隊嘛….最邊嗰兩個我唔知佢地作用係乜,只係好機械化咁人地俾波佢佢就回傳,基本上鏡頭同埋對方球員都完全可以無視佢地.

唔夠人快最好夾手夾腳,團結就是力量,一於俾波過唔俾人過.搞搞吓有啲似打攬球.

跟住又係香港對日本,係男子組,不過香港命運都係一樣被人數,技術基本上唔同班,呢吓連我都被佢呃咗,原來唔係射波,只係假動作引守衛失位,我影完掛住睇相佢先真係射波.不過射嗰吓應該都被龍門擋住影唔到.

除咗技術,身形其實都輸埋,我見日本仔成日都可以人群中夾硬爆入去起手,反之香港隊想夾硬來就成個彈開.之後仲有比賽,不過要趕翻屋企食飯就早啲收工喇.

大電視戲院

一向戲院都係用投影機技術,以前商場或者會議廳要大畫面都一樣,唔好處就係要熄燈,不過咁又會搞到黑媽媽,睇唔到手上既嘢,開會就真係好唔方便,所以好多時都夾硬開小小燈,搞到畫面淡晒色.亦越來越多地方改用大電視代替投影機.原來不知不覺間Samsung已經整咗塊大LED屏幕俾戲院用.上年首爾裝咗第一塊,估唔到今年香港已經有,我呢啲貪新鮮既人自然要去感受吓.

乜依家啲戲票咁貴,兩個人連埋手續費要270蚊.租碟可以睇到16隻.貪新鮮冇計,冇錯平時商場都有啲好大個LED屏幕,不過用佢來播戲就死得,是關好粗睇到一粒粒.新城市廣場呢間戲院用既係2.5mm間距既LED,4K解像度,坐最尾第三行,完全睇唔到一粒粒,計一計數就知道屏幕闊10.24米.據我所知暫時全部都係咁.實際上係好細吓,只合迷你戲院.事實上間戲院都好細.來到最重要既畫質,無需多解釋,就等於一部4K OLED電視.優點係超高亮度及對比度,理論上開燈睇都得,最深刻就係開場做Demo既放烟花畫面,由於係自發光的關係,黑色係純黑,用投影機的話點都有小小灰.來到真正電影畫面,原來最大限制並唔係顯示技術,反而係拍攝技術,黑白分明既畫面就睇到光位同暗位分開得好好.暗位細節完全唔受高光位影響,但如果本身成個畫面都暗,拍既時候已經拍到灰晒,咁顯示既畫面一樣係灰晒,開場嗰一幕就係咁.至於4K解像度睇落去其實同屋企差唔多,唔好誤會,我屋企冇4K器材,只有全高清.可能係屏幕呎吋關係,我一向都覺得戲院睇係矇過屋企睇.今次個畫面就真係夠sharp喇.

南嶺,天井山影蝶

上年春季去南嶺雖然大部份時間落雨但都影咗幾個新品種,今年知道有人搞6月尾去第一時間就報名.

吸收咗上年假期出發趕唔到高鐡既經驗,今次寧可請多一日假早一日去,順利趕及中午前到達,食完晏就可以影蝶,呀,講灟咗,南嶺其實宣布咗封山,所以呢半日只可以在公園外圍影吓,好不容易見到隻枯葉,搞來搞去啲位都係麻麻,最後呢個超遠位,加咗2x增距都仲係好細粒.夾硬影,最後只可以係咁,其實都見到有幾種未見過既,但啲位總係好衰,頭一日就咁就冇咗.

來呢啲山旮旯地方食真係唔好太高要求,估唔到住都好慘,因為橙屋關閉咗,要求其搵間,個冷氣…搞到我要棵睡,今日原本要去天井山,不過導遊話試吓搏大霧睇吓得唔得,實情係佢識得看門口既人,打個招呼就入咗去,不過有攝像頭既地方例如好正既停車場就唔可以落車,今日有啲運,一大早就遇到好罕有既黑紫蛺,仲要停定人人有份.

之後離群去搵食就見到佢,其實第一日都見到,但太遠影唔到,估唔到今次係太近,景深太淺,想調節一下但已經俾佢飛走咗.

呢隻叫飛龍,個名好猛,但其實好cheap,周圍都係,同東方菜粉咁上下常見度.

呢隻叫素色蛺蝶,算罕有,多數見到係開翼,從頭頂影落去,認真麻麻,唔講唔知,有太陽曬蝴蝶係會合翼,所以團長出動佢既熱能電筒,真係work,大家都影到合翼.之後就係開車去天井山,住既地方靚得多,最緊要係夠冷氣,不過,老闆娘搵我地笨.唔客氣坐埋來食飯不特止,仲係咁同我地劈酒,唔夠再來兩Jar,完全冇問過我地,之後睇翻張單原來係要收錢的.

滿懷希望入天井山,不過好靜,就只見到呢隻豹紋盛,呢個位個個都覺得唔好,我又覺得幾特別,之後又換咗位,影完又影,影完又影.......

最後決定出出面水氹影吓就翻南嶺,再搏多次,呀….其實除咗熱能電筒仲有一招,就係飲完水之後會產生既肥料,導遊仲帶咗一枝一年既珍藏,果然十分有效,倒咗一陣就有蝴蝶來吸,呢隻平時好活躍,好難影得清的,依家可以慢慢影到好為止.

又來多隻有尾既,估唔到水氹收獲仲多過公園裏面.之後就係翻南嶺,因為導遊識既人明天唔當值,用翻舊方法係唔得,所以要走山路由後門偷渡,條山路超級崎嶇,有兩次落咗坑唔夠力過,要推車先脫險,萬一都唔得都唔知點算,最後冇事,不過今晚住既民宿真係,冇冷氣,冇水沖厠,要自己搬盤水去沖厠,冇士多,冇厠紙,連毛巾牙刷都係一次压,房燈膽壞咗要拆門口嗰個用住先,總之就係乜都冇.基本上係民居臨時借間房你住.

其實有兩間房有冷氣,不過唔夠分,咁一於晏啲瞓去黐啲冷氣涼吓,順便捉咗隻蜉蝣入房影透光.喜歡影蟲呢度就正喇.隨便屋外既牆已經有十幾種物種,我地放隻蜉蝣在電視機面set腳架影,搞到成點幾鐘,雖然冇冷氣,但山區入夜又唔熱喎,仲有小小涷添.

昨晚冇乜點瞓,雖然唔熱,但啲床單好似唔多乾淨,同房嗰張仲有啲漬,今日就帶住熊貓眼去偷入南嶺,一早出發,後門冇人,搞掂,冇錯係見到目標,但硬係唔停同位唔靚.出埋肥料都唔掂,可能上天聽到我地既心聲,搞咗一輪之後居然來咗大量仲要肯停,人人都影到,同房仲開埋Live view慢慢影,好可惜,我影的時候陽光直射,眼上留低不好看的光點.

仲有呢隻最後都稍肯停下,襯機影埋佢,實在太暗不得不用閃光燈.要留意呢個品種對光好敏感,用TTL的話預閃佢會跳一跳,影出來就會矇.要手動輸出閃燈,一閃就影咗,佢跳都唔怕,歡樂既時過得特別快,又係時候趕高鐡翻香港喇.

華富雞疍仔

一直都好想去呢度影日落,事實上今次係第三次來,頭一次諗住華富村有幾大吖,乜資料搜集都冇做就盲中中走去,結果係搵唔到.第二次確定咗位置一樣都係搵唔到,原來係要水退先會露出來.真係好難架,又要水退,又要好天,又要唔駛翻工,夾咗幾個月先夾到.

多得電視台講一講,去到已經有十幾人卡咗位.好在放腳架位置係亂石,總會有啲唔係咁好放既位冇人,如果係沙灘應該就會腳架貼腳架冇晒位,不過想放前啲低角度就唔得喇,會入咗其他人畫面.今次水退係到極點,得0.7米,成舊雞疍仔露晒出來,反而覺得浸多小小會好啲,或者一米高左右,日落又係冇乜睇頭,最後就只可以係咁.

冇乜好搞,影多啲個天,都係唔靚,早啲收工.終於還咗心願,事實上個景只係普普通通,一次就夠.

荃灣龍舟競渡

唔知幾時開始,影運動等於慢快門,等於Pan鏡,最後呢樣先鬼異……等於可以矇.我呢啲老派人係唔識得咁高深既嘢.幾有動感都好,起碼都要有個位sharp.就好似件食物買相幾好都要食得入口先叫食物呱?

上年被誤導搞到影唔到,今年再來去過. 帶咗70-200mm同埋200-500mm去肯定包晒所有焦距.實際用起來係200差小小,換咗200-500mm都只係用到二百幾就夠.人玩我又玩,我都試吓慢快門,為咗隆重其事,仲帶埋支超笨重既鋁合金腳架來.大太陽的關係,又冇減光鏡,最慢只係做到1/50秒.

 

 

要個人sharp其實幾高難度,因為個頭除咗爬完嗰吓停一停,大部份時間都係上上下下咁郁的,於是我諗到影sharp個龍頭,我發覺龍舟移動其實幾慢,1/50秒唔係好有移動既感覺,不過都冇計喇,一來太光慢唔到,而且再慢失敗率太大喇.不過出來效果好似都唔係咁出,只係啲人矇咗.

 

到大龍出場我才終於知道原因,原來係啲人爬得唔夠快,只要夠快就會見到後面啲人嗰種充滿力感既效果,但係全部矇晒我覺得冇意思,所以我安排一條有龍頭既船喺前面,龍頭比較容易影sharp佢.

 

 

較了全片幅之後發現一個問題,唔係原廠鏡既話外圍對焦點唔俾用,好似頭先大龍嗰張相係影唔到,要侷住影細啲再裁.又或者好似呢張咁只可以對焦較中間物體.玩咗半朝收獲麻麻,下午又背光,出年再見.

 

日與夜的結合

早前細山試新嘢失敗咗,今次襯住有小小好天搵個近既地方再試,可以搭車到唔駛爬山又有日落,就中港城啦.

新嘢其實係要將夜景結合晚霞或者日落,今日咁啱有日落就結合日落啦,原理好簡單,就係做一次雙重曝光,將夜晚既燈光貼在日落因光差大而產生既剪影上面.就可以人為提早開燈時間喇.首先在日落時間針對天空曝光,前景越黑越好,咁當着燈相貼上去先唔會撞色.睇網頁原來菲林年代都有相同做法.黑色地方就係菲林未曝光既地方.

之後就係等夜晚,同樣原理,個天越黑越好,反而唔係要magic hour,所以要等晏小小,不過又要顧埋海面,否則會添黑一片,最穏陣既方法係magic hour嗰張都影埋,起碼可以用圖層砌翻出來.等待既時候就好似練緊蓋世神功咁,千萬唔可以郁到支腳架,否則就會走火入魔要下次再影過.當中真係有個媽媽帶小朋友走埋來睇日落,個小朋友跳來跳去我真係好驚,只好牛咁眼咁睇住,不停顧住支腳架.

然後到最關鍵部份,就係混合圖層,只要選變亮就會得到這個效果.細心睇的話會發現海面係兩隻色,因為日落個海都係非常光,做唔到剪影,但大厦遮住嗰邊就黑晒,結果就係咁.

呢個時候要做一個決定,究竟個海係跟日落定係跟夜晚,照計跟日落會真實啲,似係日落時間已經開咗燈,但夜晚個海就靚啲而且唔會有因為大厦遮住而黑晒嗰部份,同埋易搞啲.最後我決定跟晒夜晚,由於唔駛搞大厦邊緣,只要擦到地平線,好容易就搞掂.另外其實天空邊緣同埋雲朵係夾雜咗啲夜晚既籃色,再用筆擦更正埋佢.之後再修直翻啲大厦就大功告成.

縮水侏羅紀

網上見到呢個活動,幻想吓暴龍下面好多人,好似暴龍走入市區咁既畫面應該幾正,天氣唔好最啱去呢啲.

去到商場入口點解唔見隻暴龍既?綑邊走咗一圈都係冇,入去睇吓宣傳海報,原來喺5樓,有啲不祥預感.果然,隻暴龍頗細隻,只係高過啲人小小,絶對冇想像中同電影咁大隻.我呢張已經係繞去後面影,前面離得仲遠,只影到一大堆人遮住隻細細龍仔.

 

就算排隊入去都唔係辦法,只能用wide鏡低抄,變晒形,背景一樣係好亂,唯有上樓上睇吓用高角度會唔會好啲.都係唔掂,一係好遠,夠近就影頭頂,而且背光搞到後面白晒.見到個籃色波波嗎?啲人就係排隊玩呢個.

由於諗住影好多人既畫面所以冇帶長鏡,隻三角龍想影大隻啲都唔得,不過其實影得大都係唔靚.

冇計喇,走翻去側面角度,遠就遠啲,但影到好多人同條龍,都係嗰句,條龍大啲就好喇.

合氣道演練

雖然我唔知合氣道係點,但打功夫應該會係幾特別體驗,睇網上資料係類似太極咁以力打力,以柔制剛既武功….

 

 

這其實唔係一個比賽,係合氣道班既練習,老師會先做一次示範,然後學生互相練習,為咗照顧我地拍攝,老師會總共做四次示範,四個唔同方向,確保每人起碼有一次拍攝機會,這招是靠拉對方既手令佢失去重心跌到.

 

 

甚至可以將對方撻到,好似柔道咁.

 

 就算有武器都唔驚,照撻.

 

 

除咗撻,仲可以鎖死對方令佢唔郁得,由於針對人既弱位,唔駛好大力,女人都可以制服到大隻佬.

 

 

不過…真實係冇可能咁輕鬆,見老師示範撻人直情唔駛力,甚至單手都可以成個人打個空翻,嗱,我覺得係假假地,根本係被撻嗰個收到訊號,自己出力打跟斗的,當然你可以講俾人扭住隻手,自己都侷住要打跟斗避免隻手被扭斷啦.但硬係覺得唔夠真實感囉.

 

 除咗體術,仲有刀術,不過都係貪得意囉,香港邊度搵把武士刀.

 

棍術比較實用啲.起碼攞支掃把柄都可以頂一下.

又柔道攝影

要說比較喜觀的運動攝影項目,柔道算是其中一項,好多項目來來去去就係得幾個輕典畫面,柔道招式千變萬化,影到唔同招式同影到唔到蝴蝶一樣咁開心.

 

自從運動攝影協會唔多搞活動之後,影柔道就得翻捷青盃同三叔體育節,捷青盃啲運動員實在太細個,好難會有乜高難度投擲技,得翻體育節仲值得一去,唔好講咁多,整吓背負投先,不過唔成功.呢招幾乎係每個人必學.成功的話亦好好視覺效果.

 

 

初初影柔道會影好多鎖技,即係鎖死對方令佢痛苦投降,又或者唔郁得一定時間而勝出.難度比較低,入門者多用,亦因為咁,太容易影變咗冇乜可觀性,我已經唔會影慳翻啲快門數.只影投擲技一場其實冇幾多次機會,遇到仲要啱啱對住你,又要啱焦距,影一日多數十張要得既都冇.呢張古古怪怪都係夾硬來.

 

 

有啲似我上年影過既畫面,不過叫乜招我就唔知,雖然係半空中既畫面,但只係似向前推倒對方,都係差咗啲藝術性.

 

 

巴投畫面幾有性格,而且維持時間比較長,係較容易影到既畫面,我發現好多運動員都有一個吾好習慣,就係出招時合埋眼,一來中間有乜變化就唔知應變,二來.....我張相冇咁好睇.

 

 

呢位有水準呀,冇合埋眼的,招式都好古怪,似巴投但係又打側投的,原本有一張可以睇多啲出招者既面部,但被人投嗰個掂咗地冇咁靚,最後只要呢張.

 

 

好清脆好清脆既背負投,全場掌聲,室內光線暗快門始終唔能夠太快,本來有一張成個人喺半空的,矇咗好可惜,如果方向相反結果就唔同,雖然快門都係一樣,但出招既動作冇咁大,只會矇咗空中嗰個.最後講啲感想,好多人成日話器材唔重要,最重要係後面嗰個袋,我覺得要睇吓影乜啦,以前用APS-C相機,對焦成日甩,高ISO又唔得,肯定要個人到晒地先影到.