九肚山攝影

呢輯相其實影咗好耐,硬係覺得食之無味,棄之可惜,春天成日都係大霧,一唔係就煙霞,去飛鵝山影雲海又好似唔係好大機會,咁呢度未去過,而且好似冇乜人去過咁就去呢度啦.網上講呢個地方既資料唔多,都幾冷門吓,所以都唔知是否難行.入口都係靠Google map斷估,結果過咗龍都係搵唔到,搞咗一陣好彩終於見到引路絲帶.原來地圖真係啱,唔怪得老婆成日話我對眼係用來裝飾.

原來都幾索氣的,行咗都幾耐先到山頂,景觀就一般啦,加上空氣又好矇吓,初初仲有啲雨,只好盡吓人事.現場得兩個位放腳架,但就得一個人企位,好彩我部機有反mon,企側邊都可以取景,否則就要盲拍.最後結果就係咁.

一場來到,另一個角度都影吓啦,靚就唔靚架喇,當行吓山.

京,崑劇攝影

見到其中一個劇目係霸王別姬,睇到楚霸王做型我就諗起之前有人影過好似有噴火場面,應該好正.

去到都有啲唔好意思,呢個係攝影班活動,中間前面對正舞台嗰幾十個位霸晒做攝影位,只留翻側邊及較後位置俾其他觀眾,呢啲位真係俾錢都未必買到.一開始都係文戲講講講,不過連埋妹仔有五個人做算唔錯架喇,好多都係得兩個人一碌葛咁企喺度唱架咋.仲有一樣唔好意思就係啲連拍聲,咁靜真係好剌耳,我估有好多1DX mark 2同D5囉,其實文戲唔駛咁啦,我單張都唔敢影得咁密.

期待既武打場面冇乜點出現,霸王戰嘍囉都係點到即止.

跟住就係一味霸王同虞姬喺度依泣,奪命狂講,真係悶到噴汁,後來虞姬舞吓劍先冇咁難頂.

話咁快就到虞姬自刎,咦,噴火呢?哎呀,我記得喇,噴火係鐘馗,唔係楚霸王呀,雖然個樣就差唔多.

仲有一場希望多啲打,奸角都幾型,起碼有武器應該唔會齋講呱?

主角同奸角對打,都可以的,只係我影得唔多好.

玩吓慢快門,之前嗰場虞姬舞劍我都有玩,失敗晒,我見旁邊啲攝影班學生用到好慢快門,把刀轉到成個圈咁,效果一流呀,如果塊面sharp到既話.

主角都幾落力,又打又跳,呢張其實嗰人影咗喺右邊唔係咁靚,好在得佢一個個場又係淨黑底咁滯,好容易就可以用補地補救.

又去C3動漫展

停咗一輪冇去,因為佢冇咁多cosplayer影,但睇翻動漫嗰啲,其實背景都係花到七彩,實際都係冇乜用,所以今次專誠去影吓公仔,貪佢冇咁多人.

都多人,但起碼唔駛排一個鐘隊入場,一入去就見到好大座SD高達三國志,好艱難等到冇人阻先影,但背景實在太亂,都唔知影咗乜,反而龍珠個門面條龍幾靚,都要等好耐先等到冇人阻.

跟住入埋去睇,上次影唔到條龍今次都係影唔到,點收光圈都係得小小清,睇來要出腳架疊相先掂,呢個龜波氣功對龜波氣功場景幾華麗,可惜背景太細,露晒底,但唔要又好嘥,只可用我既欄技術慢慢補補佢.

悟空配火焰背景都幾有氣勢,現場豐富好多,為咗唔穿崩,只選一忽,吸取之前經驗,一定要唔穿崩張相先耐看,否則索性唔影算數,影完都未得架,仲要翻去抺走啲透明支架.

剛才門口三個巨型既太亂,呢度小模型反而仲好,有埋背景,係中間嗰隻俾三把劍遮咗啲光有小小美中不足.

影完啲陽剛味咁重既,係時候影吓女仔公仔,呢對啱啱好,合晒比例,背景又乾淨,係頂光呢樣比較差,但夠光猛,縮到F11都夠快門速度手持.

原本都冇諗住影cosplayer,咁啱大會有得俾人影就又影吓,趕唔切裝閃燈,夾硬照影啦,居然有一張撞到人地既閃,輸出又啱啱好,其他嗰啲剷晒佢,好彩決定唔裝埋燈先影,想裝燈再影已經話bye bye,之後另一個位有得影,但就要Like page睇廣告,仲要排隊,都係咪搞.

咦,又有得影,好多人,迫唔到埋中間影,只好側側地夾硬影,唔甘心下場又影過,今次冇咁多人去到中間位喇,不過可能model驚閃親對眼,工作人員宣報唔準用閃燈,變咗大背光得來前面又唔多夠光,好核突,放棄,用翻之前側側地嗰啲搞搞佢又OK喎.

至於唔係大會既就超難影,背景勁雜之餘一定個個鬥wide,呢張都唔例外,影完前面,左面都有人,右面有背包,就咗好耐就到冇遮住cosplayer先影,翻去再P走晒佢地.

影得一張相

滿天煙霞又冇乜室內活動,就近去鳳園行下,呢排四弄風頭好勁,搞到好多人.坦白講,除非靚位停定定排隊續個輪,否則爭位下都好難影得好.結果綠弄真係出,成堆人莫講話影,連擠埋去都好難,搞搞下又真係肯停喎,不過葉底位置又極刁鑽,要單腳影咁滯,落埋閃燈搞到眼有大光斑又唔啱焦平,結果都係去垃圾桶.

行來行去都冇嘢影,無意中見到佢,影咗兩張得一忽既相之後佢突然擺出呢個pose,影咁耐蜥蝪都未試過可以影晒成條尾,個位都幾暗,最弊佢喺路中心,人來人往,影咗幾張已經有位師姐埋來睇我影乜,好嘢大家分享,輪住影吓,點知佢朋友見到佢開心得滯,大步走埋來同佢say hi,即係嚇到隻嘢跌咗落下面.唔好意思都冇得影喇.睇翻啲相,冇張sharp,最勉強得一張,夾硬加sharp佢啦,影咗成日就係得一張喇.

求人不如求己

依家度度搞夜景人像都一定跟埋LED燈照明,好處係唔駛識用閃燈,啱晒自然光派,可是為咗照顧大眾口味,一般都較到好光,有啲人好鐘意,用低iso都可以有較快快門速度,尤其用變焦鏡既,可能最大光圈得F2.8,甚至F4我都見過.問題來喇,夜景背景跟本冇咁光,結果就搞到背景黑媽媽,再加曝光個人又爆晒.閃燈既話你跟自己口味較到幾光都唔關我事,但連續光就侷住大家一條船.

早排去咗個新影會搞既活動,雖然貴小小,但主持人自己唔影,只負責攞LED燈,實在太好,之前嗰個會實在太離譜,主持人仲影得多過我地.佢仲問我地支燈既光度啱唔啱,我立即話太光,結果佢由50%輸出改到47%.實際上我心水係減一半,即係25%,冇可能啦,其他人實唔肯過我,結果就係咁,背景好暗.

 

 

以夜景人像來講,如果係旅行相既標準都OK既,但差咗啲力感.唔爭在大工程啲用軟件搞搞個背景佢,Photoshop其實好聰明,只要將陰影推高暗位就會光咗,我見有啲網站都係咁樣教人.問題又來喇,model身上都有深色位置,會被認定係陰影位,結果搞到個對比度好低,加翻對比背景又會暗翻,最後效果硬係好唔自然,一係唔搞,一係搞好啲,推光一級再出多張相玩合成,可以睇到model爆晒光.

 

 

之後就係好似搞風景相咁兩張疊埋再用畫筆抹走唔要既部份,你可能會覺得個人邊界岩岩殘殘點抹呀?當然冇一般整個漸變都搞得掂既風景相咁易,但亦唔係想像中咁難,實際上唔駛好準,唔同大厦同天空,出小小界實際唔係咁覺.都係幾分鐘就搞掂,效果都呃得吓人啦.

 

 

小插曲,有一個位太迫人,主持人侷住行遠小小,幸好佢唔記得較翻光之燈,結果反而啱晒我,一影出來背景已經夠光,唔駛搞餐死,張張都係咁咪好囉.題外話,其實呢啲LED燈好傷眼的,閃燈都話閃一下,咁光連續係咁照住真係會盲,我見model都照到流晒眼水,唔敢直望支燈,不過為搵食冇計.

 

愉景灣沙灘攬球

無意中見到呢個活動,冇乜其他地方好去,順便可以睇吓啲有錢佬地方.

個沙灘好大,分別有好多個沙灘攬球場同一個投球場,投球太斯文唔啱我,都係影攬球就算,不過……點解全部都係小朋友來架,即係攬仔,個個pan到矇查查嗰種,我唔想影啲咁既相喎.唔同普通攬球,沙灘攬球個場細好多,用135mm都夠,所以我專登全開光圈玩淺景深.

雖然都係有衝撞,但係同大人,尤其係男子比,力緒差好遠.

就算達陣都係比較論盡,冇乜力感.

好快到中午,要醫肚,行去市集得一檔買薄餅,薄薄一塊齋塗牛油都要30蚊,果然富貴,好彩有窮人救星7仔.三文治36蚊,好過食薄餅.仲可以補充食水,一路食一路好多工人哥哥入來裝免費熱水,7仔多得佢地唔小.翻到去終於有年紀大小小既比賽,活力都係麻麻,好彩都有啲扭抱動作.

都好悶吓,硬係冇乜埋牙,可能呢個運動員聽到我心聲,達陣之後特登送多吓飛身俾我,多謝晒.之後竟然係比斯文更斯文既非撞式攬球,好心唔好整咁既怪雞運動出來啦,都係時候走人喇.　

渣打馬拉松自由影

服務多年的攝影會終於連最後一個項目渣打馬拉松都唔搞,冇乜所謂,其實我影賽跑都麻麻,冇乜特別,又暗又要早起身,唔影就罷.不過朋友又話好想影要我陪佢,勉為其難就去啦,不過唔好咁遠,好難搭車嗰啲地方,於是就決定影旺角同埋柯士甸就算,上年去柯士甸度度封晒路的士都去唔到,搞到最後行餐死.去旺角最好,有東鉄直到唔駛轉車.今年地鉄改善咗好多,15分鐘一班車,有位坐,記得有年旺角去銅鑼灣用咗個半鐘,旺角站人龍已經頂到過對面月台,半個鐘一班車,去到金鐘又係咁,搞到遲晒大到.

要影運動員正面最好係彌敦道轉出亞皆老街彎位,你識咁諗電視台同傳媒都識,一早已經霸晒啲位,仲欄住唔俾你地搏矇走埋去阻住晒,後排遠距離攻擊盞搞,只好走前啲搵吓有冇路邊位側側地影啦.結果就搵到奧海城出面落腳.唔駛交相冇乜壓力,費事影到背景黑麻麻,用盡F1.8, ISO 3200,1/160秒盡可能吸多啲現場光.結果就係咁,好可惜,堆黑人我係對唔中焦嘥咗.

之後就係行翻轉頭到街市附近既天橋影吓好多人既畫面,記得嗰年影呢度落晒雨,暗到死,想收啲光圈都唔得,點知今年都係落雨,雖然冇咁大,都係咁暗.

諗住轉場啦,朋友又話黃格幾得意,想影慢快門,咁就等多轉啦,點知最後一組要8點先開跑,等足45分鐘.

跟住就係奧運站搭一個站去九龍站再行去柯士甸,點知搵極都搵唔到,侷住去翻西隧入口天橋影吓好多人.由於運動員要繞一大個圈先入西隧,雖然等咗45分鐘,但馬拉挑戰組先過咗冇耐.如果唔等嗰45分鐘分分鐘趕得切影黑人,日光日白把握就大好多,雖然角度唔係好靚.

一場來到,影後都影吓啦,過埋西隧好快就到維園終點.

好似冇乜好影,決定去下面迫吓睇吓有冇騎呢打扮既人執多兩張,唔算好騎呢,冇選擇都殺.

好極,仲有豬仔,佢都知大家想影佢,慢慢跑俾你地影個夠.影埋佢差唔多喇,雖然同以往影既相差唔多,不過今次既版權係自己,啲相點用都得.

室內滾軸溜冰攝影

上次影咗室外,今次挑戰難度比較高既室內賽,室內最大問題係唔夠光,不過用慢快門該唔驚,返而對焦比較慢係致命傷.另一個問題就係可能會好迫,因為室內賽有機會用晒成個場,觀眾可能要貼住跑道睇,最後我都冇帶到50mm,如果咁近影來都冇意思.

 

現場真係好迫,要坐在通道上先就到用85mm影,好彩又冇乜人理,我試過貼後牆但實在太多人在前面走來走去,甚至有人停喺度睇.三邊係觀眾,一邊係評判,要影出彎位,所以要對正背景較乾淨既評判位實質上只有一到兩個,好彩又冇人同我爭喎,初段比賽啲人比較散,只好揀啲姿勢比較好既.

 



輪到多人群揪既長途賽,這是拍攝重點,會好容易影到一大堆人,缺點係戰況未必有短途賽咁激烈,有時運動員表情會比較hea.甚至有時會雙手扶住膝頭哥好似減速咁.

好彩既話可以影到運動員擺手,除咗似加速外,亦可利用手部模糊增加一點動感.

壓軸係接力賽,後上的可用力推一推接力既,不過……接力點得一個,變咗分散全場既攝影人全部聚晒一齊,擠迫情況可想而知,沒有更衰,大會加咗個圍欄在接力點前,最外線基本上係貼住圍欄過,魚眼都唔夠wide.我見有人斜斜地影,但係就變咗只可以高速涷結.我得支85mm,只好專心影最內線,都幾乎爆框,而且好易被另外幾條線遮咗,有啲人明知你影緊,但見你前面有位都會照攝埋來,最後只可以影到咁.

影煙…………花

早兩年話影煙花要中午就去排幾個鐘頭隊已經覺得好誇張,上年已經提早到朝早7點先有位,今年仲誇張,要早一晚排通宵.影張相啫,唔駛去到咁盡呱?我呢啲老人家真係頂唔順,雖然有朋友話幫我霸埋位,唔好意思既,下次搵你幫手排你唔去咩?好好彩有朋友話佢既ICC煙花位票有多,係啲公司禮物,唔去都係嘥,咁又冇所謂,商人知道有需求就會諗計,據聞普通人要消費滿一定金額先換到張票,海運停車場同對面海海港中心都有類似安排.

個位其實麻麻,前面有個花槽頂住,同海運差好遠,要zoom到70mm先唔會影到側邊啲物件,左下角啲草就冇計喇.襯個天仲藍影定個底先,好衰唔衰,隔離位師兄踢到我支腳架,再影已經冇咁藍.之後就係咁吹風吹個幾鐘,比起去文化中心霸位已經好好.終於等到8點.影一張睇吓設定啱唔啱先,都算唔錯.陣間高啲大朵啲既應該更好.

第二張有啲唔同色,冇第一張咁好,翻去先剷走佢.

咪住,做乜忽然間咁多煙?簡直遮晒啲煙花呀,情況越來越嚴重,跟住已經淨係得翻啲煙同埋放堙花既響聲,大家都放晒手等收工,估唔到最初嗰兩張就係唯一既兩張.我估對面海順風會好得多,我原本構圖都冇咁tight預咗影高空既煙花,依家咁空虛,只好裁一裁佢.

維園年宵拍攝

一直都想去呢個位拍攝維園,例如燭光晚會,不過一路都唔知點去,咁啱見朋友出維園年宵既相,問問佢就知道拍攝位置是停車場樓上,大安旨意,雖然係日落位,但啲樓咁高應該都冇乜好影,影埋日落個維園肯定細到唔認得.決定差唔多日落先上去,呀……原來唔同一般停車場,只得幾個小窗望到維園,頂樓已經冇晒位,每個小窗都塞咗兩支腳架,只好落一層,好彩仲有兩個窗未有人,我一埋去已經見到另一個人來緊,遲多兩分鐘都冇晒位,好險.

個窗好細,用三腳架既關係,相機係會後過隻窗小小,一定要zoom出小小先唔會搞到窗框入鏡,原本都冇問題,我都諗住影大啲維園,但嗰日超幸運地有火燒天,咁又wide啲好喎,我見旁邊啲人開始收貼兩隻腳等相機可以貼窗,如果只係曝光時間長小小,單張過其實都可以,但我要夾相,不單要等半個鐘以上,途中仲要搞光圈,快門,白平衡係非常高危,十之八九會郁到.再一次好運,中軸橫放之後居然啱啱高過隻窗小小,可以用一個非常穏定既狀態伸部相機向前.正猶豫究竟影晒個天放棄維園定係要埋維園但影小啲個天好呢?卒之,支腳架幫我揀咗,原來中軸橫向後係頂住唔可以向上較角度的,終於用到28mm就啱啱影晒維園同咁既天.

之後梗係要順便影埋夜景,亦係我最初既構思,zoom到35mm維園可以大翻啲.

最後就係大特寫個維園啦.真係多人到爆,好彩我只係影唔係行.