濕地公園

朋友說沒節目,話不如又去觀塘影小朋友玩水,我去過冇耐唔想去,結果就變了要建議節目,朋友不要辛苦的.我見他問過我哪裡影蝴蝶,又買了微距濾鏡,就建議去濕地公園,有厠所,有地方食飯,怕熱仲可以入室內涼冷氣,合晒佢原則.

話就話唔辛苦,其實都係曬到燶,唔知朋友有冇被騙的感覺.濕地公園個蝴蝶園都幾廢,要收錢但好似乜都冇咁.幾經辛苦終於發現呢隻蜻蜓,以往見親佢都係飛唔停,今次停定定任影係機會難逄,雖然佢唔郁但太立體,景深合成既話要影太多張好易失敗,都係一擊算數.

之後見過一隻爛既紅蛛鳳蝶就冇喇,金班倒是有很多,影過都影吓啦.就係咁收得工.

影蟹仔影日落

搭車冇遠就去到有泥灘的地方影蟹仔.初時仲擔心好難搵,原來通度都係,只係因為大細粒平時冇乜留意佢.

泥灘要扒地可想而知有幾污糟,打算搵匙更搬隻去高位先影啦,係唔得架,都未埋到去啲蟹仔已經損翻晒入泥窿度,成個扒落去翻到屋企老婆實鬧死.只好出動四點法,即係兩個膝頭及兩個手肘,看我的太極起手式.

四點式始終都係斜斜地,背景都係有啲花,出絶招三點式,即係成隻左手落晒地,其實頭都幾乎到地.由於蟹仔舉手只係一出即收,用唔到景深合成,我又鐘意影到好大,結果兩隻鉗係有啲矇.背景總算是冇嘢啦.

蟹仔其實影來影去都係差不多,影一陣就夠,呢排成日燒天就諗住影吓日落.果真有小小燒,個位仲對住慈山寺個觀音像,加啲味精都呃得吓人.

仲有小小紅,撈埋啲餸汁先走.

孖子徑山

呢度個景睇相一般,但作為一個可以睇到日落既高位,仲可以配搭到小小城市景,唔太難行既原則下都可一去. 睇介紹可以由兩個方向上山,一係城門水塘經麥理浩徑六段,但最後十分鐘會頗崎嶇不平,一係由金山嗰邊上,但會多半個鐘路程,咁我呢啲心急人梗係揀快嗰邊啦.

事實上冇介紹講得咁難,只係路面稍為岩殘同大級啲,冇乜浮沙碎石,比起真係難既只係一件疍糕.本來只係求有個日落景,估唔到有啲燒天,意外的收獲.

之後順手影埋另外一個角度既夜景,就咁喺標高柱位影正前方有大樹擋住,行側小小另外有個位冇咁阻.雖說落山好快,但到咗出口其實仲要成半個鐘先行到出小巴站,都唔係話真係咁近.入黑後唔知係咪知道冇乜人搭特登整疏咗啲小巴.明明話10-20分鐘一班,最後要30分鐘先有車,未計我唔係接車尾,見到有車來居然喺出面停低,幾驚又好似上次去馬草壟咁俾佢走咗,猛用電筒閃佢等佢入來.

海達村天橋

電視機報導連接海達村及海盈村天橋一夜之間架好,搵地方影呢條橋好似冇乜,不過條橋咁高又橫誇咁多高速公路,條橋度影個景都應該唔錯.

長沙灣站行過去都有啲遠,去海達村就得,去海盈村會遠好多,亦係起呢條橋既目的,可惜.......社會運動為大部份天橋加上鐵線網,新起既自然係標準設計.好在側邊仲有一小忽係冇網既,仲要係日落位.不過我影嗰日麻麻地,影夜景就算.至於反方向就有太多高樓唔靚.

有鐵線網呢件事都估會有,所以帶埋公司部石器時代既DC仔來做後備,而的確有鐵線網嗰邊個景係靚啲.DC仔因為鏡頭細,可以從鐵線網中間既窿仔伸出去影,仲夠位擺小小角度.雖然景係靚,不過遠古DC仔啲畫質真係仲衰過電話.

獅子會影蟲

好耐冇去過獅子會自然教育中心影蝴蝶,一來比較遠,二來好似次次都冇乜收獲.過咗咁耐又去試吓先.

蝴蝶其實係有既,不過都係普通品種,就冇乜特意去追逐佢地,反而地上見有蟲,佢啱啱停在個位我手肘有支撑向下影的位置.平時好小呢個角度影,今次雖然暗暗地,但姿勢穏定可以用慢啲快門都OK.

來到一個有好多鬚狀植物的地方,超多呢種蝶,超級普通,但我影埋嗰啲都係歪歪斜斜,決定花時間搞搞佢,要影到唔難,但要冇鬚遮住就真係國家級任務,搞咗好耐先成功.

嘩,好大隻,仲啱啱脫咗皮唔多郁,啱晒慢慢影,原本佢啲腳义得好開好靚,但佢吊住郁來郁去,到我影得掂已經縮咗唔小打晒拆扣.

之前都係帶包來食,今次試吓聰明茶座,得四個餐,一個Pizza餐同三個漢堡包餐,配上高糖汽水及熱氣薯格.漢堡包塊肉又高脂,真係唔多啱老人家,好彩有個係雞肉漢堡,終於我淨係食咗個包就算.如果好似麥記咁轉粟米就好喇,出到種瓜的地方,好多唔知係咪果蠅的物體.細粒到死好難搞,搞得兩搞去咗背光位,侷住出閃,咁就弊,眼睛留下一個古怪光點.

呢隻蟲見人地既相就見得多,我係第一次影,佢知我影佢成日擰轉面背住我,又係搞到滿頭大汗先影到,此時都好晏,係時候收工,影蝶變咗影蟲.

三門仔另一景色

次次去三門仔影日落都係用嗰啲浮屋做前景,但佢地好深色,唔同大尾篤啲白色船仔好容易可以推翻光,我記得其實堤壩後面都有啲船仔,用來做前景唔知會唔會好啲呢?

走入村搵,一路都有嘢擋住,再入就變咗去馬屎洲既路,途中只發現近村入口,公厠對出比較開揚小小,但啲船離得頗遠,構圖好空虛.再行過啲,終於發現有一間住家旁邊的種花小空地可以靠近啲船,不過又好似太近,好逼咁,算喇唔再搵.太陽似乎太高就開始消失,冇乜日落氣氛添.

公園影雀

朋友通知公園有靚位可以近距離影到相思,這個不得了,可以唔駛咁辛苦上山又有好嘢影冇理由唔去.

影相位係直接曬到,一路等肯定變人乾,侷住喱埋花槽,見到有相思先走出去.走來走去錯失頗多機會,等待時刻冇嘢做影吓麻雀仔.

係就係耐唔耐會有相思飛落來,不過全部都係去晒花中間,都唔好講背景雜唔雜,影到冇遮冇擋都已經有一定難度,搞咗成朝都冇收獲.食個晏翻來再影,好得多,太陽移咗位可以走出去等,終於等到相思肯出來,搞咗成日就真係得呢一刻有相,雖然有啲黑底.

之後就冇之後喇,旁邊有棵好靚大紫薇花,相思唔會去架喇,影吓其他雀既後尾枕就收工.

影輕鐵

輕鐵有乜好影?其實好多輕鐵車站都頗有特式,而佢比較短既車身令我想影一影佢既搖鏡.

藍地站有一個列車駛出隧道的畫面.原本打算地下用支長鏡影上去,但一來太遠,二來冇可能企正中間影,即使唔介意斜斜地,都會被側個牌擋咗一忽.結果要爬上欄杆,走到貼近個牌,彎腰申出去影.問題係唔係不停有車,要爬定上去等,影完真係腳仔軟.

跟住來到有斜路既建安站,要將條斜影到好斜要盡量用長焦距.諗住用300mm再加1.4X,斜係好斜,不過太爆,影到架車好大,其實可以走出馬路中心再增加距離,不過我係奉公守法既好市民,用翻300mm就算,可以影埋啲,雖然都係有點大,不過再減焦距就唔夠斜喇.

然後係玩搖鏡,經過Goggle Map估算,石排站可以有一定距離影到冇欄杆遮擋既位置,咁啱去到仲有條天橋可以對正水平,不過都係太近,用85mm只影到一忽,用50mm係得,但要勁準水平,側小小都變咗大細頭,最後放棄.

死心不息,搵條打馬路再試影成架車,影係影到,不過市區中心車速太慢,用到1/20秒都冇乜效果.

龍門居站天橋可以影到鳥瞰角度,搭四個站四蚊多啲其實都幾貴,因為真係一陣間就到,等咗一陣就影到三架車同時出現的畫面.

尾站就係去兆康站影夜晚.咁遠又係四個幾,都唔知啲車費係點計.未天黑落樓下食個飯先,市區影相有呢個好處.呢度有欄杆原本唔係幾好,但搖鏡之後矇咗又唔係好覺.諗住天橋唔驚撞到人車速應該快啲,結果都唔快得幾多,可能冇遠就係第二個站,都未加盡速又要減速,最後破極限用到1/15秒.不過另一個原因係好暗,街燈照唔到架車,肉眼睇幾乎係全黑.

殘念飛蝦

上次唔知去影飛蝦攞支微距去自然乜都影唔到.今次改用300mm再加1.4x試試.

用長鏡就係為咗用自動對焦,加咗增距其實有減速度,不過冇計都要加,一來增加工作距離,二來係增加放大率,呢類大光圈長鏡既設計最近對焦距離頗長.近小小會對唔到焦導致影到好細粒,加咗增距幫到啲.裳鳳呢啲咁活躍既唔靠自動對焦好難影,而佢有翻咁上下大隻,放大率可以唔駛咁大都得.

紅珠鳳蝶都夠大隻.

終於到今日主角紅蝦,實在太細粒,差唔多要去到最近對焦距離先勉強有嘢睇,一遠小小就唔掂,但一走得太埋又影唔到,搞到角度靚既反而矇咗.

普通蝦都殺,但佢去埋啲暗地方,又雜,麻麻地啦.其實最想影透翅飛蝦,不過成日都冇出現.

估唔到臨上車有隻牛肉乾影,可以用一用支微距鏡.

格仔山攝影

其實之前已經來咗一次,不過係摸門釘,唔知整乜鎖晒鐵閘冇得入,最近見有人出片我估係重開再來.

好在真係重開,我以為係裝修甚麽,原來係啲格仔甩晒色殘晒,要重新油翻靚佢,咁都好既,影相靚啲,要影晒啲格仔即使用超角鏡近影都會變晒形,最佳方法就係航拍啦.部航拍機好似都好耐冇用.

之後就係望出去既夜景喇,景觀同嘉頓山差唔多,上來既辛苦度都係差唔多.勝在冇難度啦.