郵輪碼頭航拍

之前我都一直想搵個高位影郵輪碼頭,魔鬼山係可以,但太遠而且角度麻麻,好似唔多突出到佢獨特既設計.

依家好喇,真係搵唔到位就航拍,雖然影像質素就差啲,勝在構圖自由度大.日落或者夜景光線夠氣氛,代價就係要就時間,原本觀塘碼頭就望到諗住一飛就到,要咁構圖原來都要飛好遠吓的.仲有唔係一味高就好.依家開始要飛低啲,近啲增加透視感.影完青衣發覺,航拍的話太陽入鏡冇乜好處,一來細sensor細寛容度唔夠,太陽位置只係死白一片,就算HDR由於冇得收光圈都唔會影到星芒效果,索性等太陽落晒先影仲好.

之後就係等夜景,當然要先回航換舊充飽既電,一舊電冇可能由日落等到夜景,飛出去既時候經過好多船的地方,順便影埋.

最後就係影埋郵輪碼頭啦,影夜景要講啲運氣,風細曝光時間去到兩秒都冇事,有風的話試過1/2杪都矇,尤其係近景,所以都要影多幾張搏有張中.

錯失火燒天

網上見到有人在龍翔道影到一張有大彎路車軌都幾靚,於是又走去搵吓資料,有個講遊車河既網站提到有個好似差唔多既位,咁就跟佢去啦.原來正正就係龍翔道觀景台高啲既豪宅出面,個畫面唔太似,應該來錯地方.

既來之,則安之,照影囉.日落冇耐突然火燒天,仲要係燒得好勁嗰隻,真黑仔,今日去影日落就好啦.上一次黑仔係去長洲,又係燒到FB炸版,不過我當時得支85mm.今日燒既程度係背住佢都有啲,我好小影咁多天,不過地景好似冇乜睇頭.

慨嘆過後就影夜景啦,前面就係馬路,影得太wide條馬路比例好誇張,最後zoom到35mm先好似正常翻小小.

用到70mm好似仲正常啲,都係麻麻,下次要搵啱位再影過.

烏溪沙沙灘

網上見到人地在烏溪沙沙灘影到有啲似千島湖咁既效果,覺得都幾靚,人有我有,又去複制一翻,不過烏溪沙沙灘好大喎,邊個位先啱呢?去Goggle Map又唔係好搵到類似既相,咁應該都係較唔就腳既地方啦,於是就去咗比較遠既渡頭灣村嗰邊,好似唔多對路,搵極都搵唔到,已經係水退,食白果.

只好第二日再去翻近馬鞍山站嗰邊,其實我之前來講影人像,又真係唔多覺有個咁既位,唔通又白果?一路向渡頭灣村方向行,行到都見到渡頭灣村終於俾我搵到,個水氹似乎係有人特登砌出來,水退時啱啱困住咗啲水,日落時啱啱做到千島湖咁既效果.

一場來到影埋夜景,日落方向冇乜燈光,轉九十度影啲大厦,冇等到個天變晒藍,一來早啲走,二來冇晒光啲石頭會好黑.

靈渡寺影蝶

有消息這裏蝴蝶大爆發,而且有一隻新蝶叫瑪灰,好大誘因去一次,不過真係好遠,好遠,好遠,要講三次,先要搭巴士去元朗,再轉巴士到新生村,再行半個鐘.

終於來到但似乎冇乜蝶,只有啲爛爛地既中環蛺,可能啲龍眼已經冇得七七八八,蝴蝶冇嘢食,山長水遠入到來搞咗一陣都差唔多中午,食埋個包冇乜轉機就走啦.終於小東西出現了,上次去鹿頸我都見到佢.不過當時用盡洪荒之力都影佢唔到,停埋晒啲鬼鬼怪怪位,今次係平地但頗暗,開到F5.6光圈都要1/80秒先夠光.景深極淺,影到好細隻都要夾兩張,再想影大啲就飛走咗.

整得兩整仲落埋毛毛雨,暗上加暗,見到我未影過既牛肉乾,可惜又係停埋啲亂石度,仲要前面有草阻住,好麻麻.

下午多咗蝶出來,終於見到唯一一隻目標蝶,點知右面幾乎爛晒咁滯,靚位都冇用,只好集中影左面,停地面又斜斜地都冇計.

終於有隻比較大隻啲既蝶,應該係來食半乾既龍眼.冇預咗搞到咁晏,水已經冇晒,侷住走,出到去開始變大雨,好彩走得快.

航拍青衣夜景

見人地影青衣北海岸夜景好鬼靚,有船,有汀九,重點係不是在青衣公園就咁水平影,啲船黐埋一堆,係高角度影到一排排船好靚.經過研究一翻,應該係居屋天台或者高層影的.我有三個選擇,一係潛入居屋,但依家咁情況,咁做太敏感,成功率都應該好低.一係就去附近山頭睇吓有冇位,但其實我好似試過.應該有位都有嘢遮住,得翻最後一個方法,就係航拍.

去到青衣東北公園視察環境,同估計冇錯,零零舍舍突出來嗰座居屋應該就係拍攝點,居屋唔同公屋,樓梯係密封的,唔識人就只好上天台.附近山玻亦真係影唔到.既然鎖定航拍就航拍啦,取景後發覺架航拍機就真係飛正居屋位置出小小.首先影日落,唔同上次大角咀,有山的關係,個太陽消失前係好光,唔知點解HDR整出來好怪,侷住一張過夾硬拉曲線.光位係救唔翻.

然後就係首試夜景喇,究竟咁凌空可以頂幾耐呢?網上話兩秒都試過得.今日冇乜風我又試吓,都要開到ISO 400先夠光.由於電話睇唔知係咪真係得,我又影咗幾張ISO 800,一秒快門既,至於ISO 1600就無謂試喇.同埋唔好誤會腳架模式可以幫到,佢只係限制飛行速度等拍片時可以慢慢移動.翻到屋企睇相都真係幾爛. Jpeg已經變晒油畫,用raw執暗位都頗多noise,細細張就好,不能放大.

再探雞疍仔

上次去影雞疍仔唔好彩撞到攝影群組,被迫後排政擊,又撞啱水退,再去多次. 

天色都係麻麻,好多雲,但我比較擔心又撞到攝影群組多啲,好彩,去到只有一位大叔,不過雞疍仔上有個人釣魚,期望佢唔會釣到日落吧.最多到時叫佢借一借囉,結果又係啲雲壞事.只好隨遇而安.我原本想再退後小小影多啲雞疍仔,不過已經同大叔平排,好奇怪佢好似對雞疍仔冇乜興趣,佢係企邊位影日落,理論上只見到個海.

日落位勁多雲黑媽媽,但側小小有啲紅,冇咗太陽位置既限制反而可以影晒成塊雞疍仔.唔知係咪水漲,仲有啲浪湧埋來,為畫面增加一點動感,呢個時候其實好暗,要開大光圈同加高ISO令快門不致太慢搞到海浪化到變晒霧.

影廟街

呢度我一路都冇去影,因為我其實唔係太喜歡用直度影風景.不過聽講過多兩年油麻地停車場就會拆,即係就冇可能喺呢個位影到廟街.反正唔遠就去影咗佢.

網頁教人去三或四樓影,但跟據我經驗應係越高越好.於是去頂樓,一定要搭電梯,樓梯聽講有啲係封咗行唔到.或者行車路都得,不過就會遠啲.同埋係要用長鏡,否則條街會好幼,我用到135mm,襯住兩邊既樓未黑晒就影,不過事後好多人都話兩邊黑啲會好啲喎.

剛才係我比較喜歡既角度,因為有一邊大厦係直線,但見網上個個都係對正中間,咁我又影埋佢囉.

時機不對

見人影到上環文武廟有啲光射入去好靚,想去依樣影翻張.

我估中午正頭頂入光最正呱?事實上好似唔係,廟頂正中係有一片帆布擋住,冇計喇,只好就咁影吓好多塔香.廟內其實好窄,我呢張用盡24mm同埋貼牆用埋反mon先有咁效果.

冇咗斜射光,我都冇心機再影啲香,就隨便影吓啲燈.

再影埋一行佛,就完工.

離開時見到門口有架人力車加上好多假櫻花,都唔錯,就順便影埋,此行冇乜滿意收獲,但勝在唔駛點行.當消磨吓時間.

就來冇得玩

最近網上睇到原來2020年(即係今年)第四季就會立法規管航拍機,到時重過250g既機型都要實名登記,要考牌及買第三者保險.我地玩吓啫,攞幾千蚊一年買第三保太破費呱?而且聽個考個牌都唔平.所以如果仲想玩只可以鎖定Mavic mini,重249g,啱啱夠輕.

咁轉用Mavic mini就掂晒?最多抗風能力差啲.但原來現行指引都好辣.機場五公里範圍自然唔俾飛,連維港兩岸,大嶼山北部沿岸,大攬涌至荃灣沿岸及青衣一帶,人多擠迫既上空,都係唔俾飛的.夜晚又唔俾飛,我一路以為高度限制係三百米都搞錯咗,係300呎,即係得90米.咁去到大帽山飛出去又如何?原來係唔可以水平飛既,要一路跟住山勢向翻下,保持到地面係90米以內.到時如果法例真係咁,睇怕都冇乜地方好飛,所以有得玩好玩.

北角村攝影

呢個地方交通十分方便,有船由香港仔直到,係去榕樹灣既中途站.可惜船期真係,一係四點半, 一係就五點五十分,照計五點五十分都趕得切影日落既,但由於未去過,唔知要行幾耐,就決定四點半啦.

半個鐘就到,搞到要等二個幾鐘.影相位好近,不過入去條路都幾崎嶇,要柔繩咁滯.呢個地方係以前景有好多突出既石塊出名,明明都睇咗係水退日先來,都好似唔係好多石,太陽又衰啦,一早就俾雲遮住,水都未退到最低,日落就變得好普通囉.

想早走都冇用,要八點十分先有船,個夜景麻麻都侷住影埋佢,但我部機唔知做乜鬼個B快門用唔到,搞得幾搞日落嗰邊個天居然變紅,咁就轉方向啦.叫做唔駛得一張相咁齋.