麒麟山

去古洞水塘時聽見人講有條路係上山,翻去查吓應該就係麒麟山,唔太高可以去吓.

呢張心形水塘係去古洞水塘時影的,因為我決定反方向去,會近啲.

終於上到頂,好多低雲,幸好都叫做影到日落,奇怪,好似唔多夠wide咁既,哎呀,上次用魚眼設定咗APS-C模式唔記得轉翻,改正翻個日落都落完喇 :(

順便影埋個夜景,特登zoom出啲唔駛影到好似一堆光點咁.諗住突出啲條彎路,後尾諗翻可能都係影wide啲靚啲.

估唔到啲雲咁低個天都有啲紅喎,今次記得熄咗個APS-C模式,影翻正常wide.

兩探龍鼓灘

我覺得去龍鼓灘係好遙遠的.去到屯門站都仲要搭四十分鐘巴士.仲慘過去大澳.朋友告知最近有堆花好靚,又對住日落方向,遠就遠啦.

果然係好遠.依家去屯門已經好過以前,去上水搭小巴還可以,但巴士真係要四十分鐘有多.好不容易去到,好彩有日落,加埋花都幾靚.走時朋友帶我到蝴蝶站搭輕鐡去石排輕鐡站,旁邊就係小巴站,可以避咗巴士繞路嗰段,起碼快半個鐘.後尾查清楚,原來另一號小巴可以直接去到蝴蝶站,連輕鐡都慳翻.

既然唔太遠,決定去多次上皇帝巖影日落加夜景.由沙灘上去只需廿分鐘.太陽比較偏側,配唔到成個大景,冇計,zoom近啲.

順便影埋個夜景,可以轉一轉構圖,影有煙窗嗰邊,村既燈光好暗,除非等到全黑先夠光,只好事後執執佢.

又入坑

最近部機個Mon開始神神地,初初以前用完反Mon冇壓翻緊,大力一按多咗一忽藍色,好在只係畫面邊緣.有點擔心佢就快出事,而Sony終於推出咗可以用到石器時代扭螺絲對焦鏡既轉接環.就決定去搵定部後繼機.

個接環得兩部機可以支援,最貴既A1唔駛諗,即係侷揀A7 R4,想買嗰陣又出咗部A7 R4A,只係個Mon靚咗就貴一千蚊,猶豫咗幾個星期,個價跌到只差300,咁就A7 R4A啦.

為咗用得翻舊鏡,要無端端多舊嘢,都幾樣衰.接下來就係試吓係咪真係用得翻晒啲鏡,結果.....有三支用唔到.180mm微距,200-500mm直情彈出唔支援警告,乜都郁唔到.200-500就算喇,反正唔係用咁多,微距就慘喇,仲諗住新機多像素好裁啲.而家變咗舊機一定唔可以死,因為無反係冇出過180mm微距的,俾錢都冇得買.仲有支Sigma 50mm對焦古古怪怪,移來移去最後都係唔中,要用只可以手動對焦.原本諗住對焦點闊咗可以開盡F1.4用,依家又冇行.最得益就係支300mm F2.8同埋支24-70mm,終於可以用到外圍對焦點.唔知係咪我全部都係舊鏡,我發覺個全畫面眼部對焦唔係太可靠,時中時唔中,都係要縮細對焦範圍先準.

諗住買部機就算唔花咁多錢,點知條快門線又改咗接頭設計,仲要貴到死,山寨貨都要二百幾.依家侷住影微距就一定要帶舊機,影人仲煩,要帶兩部機.因為舊機要唔好咁操勞,否則佢壞咗就冇得影微距.

添食中國舞

影完京劇諗住收工,點知領隊話睇到單張知道晚上有民族舞表演,仲問埋主辦單位不如幫佢地影吓相好唔好,佢地又答應咗,問吓有冇人想影,我見佢地啲海報幾靚又一場來到,好自然咁就答應咗.

呀....好似冇海報咁大堆頭,而且不出所料,係有戴口罩的.唔緊要,當普通跳舞影.

第二隻舞仲要係得獨舞.

終於有水袖,係全晚最精彩,玩咗好多慢快門,可惜都唔係好成功.

呢隻舞都唔錯啦.

玩遮畫面都幾豐富,現場係唔止三個人的.用85mm可以影晒但啲人會好細粒.

又係得一個人,玩多啲慢快門.不過都要補翻幾張快快門,陣間炒晒冇貨交.

終於有一張用到135mm都可以影晒成隊人.除咗咁啱佢地要走埋一齊之外,仲要咁啱台前冇人頭遮住,呢度個台係比較低,前排觀眾係會遮到個台的,好多相我都要事後執走佢.

最後一隻舞喇,又係啱啱可以影晒成組人.

再影京劇

上次影過的京劇好精彩,今次一見到有新劇目就立即報名.

今次有兩個劇目,首先係林沖夜奔,呀......黑背景加黑衫真係夠晒黑夜Feel.而且.....成場得一個人做戲.冇乜好影.好彩都仲有啲跳躍動作.

希望第二場貴妃醉酒會好啲啦.大堆頭人多啲畫面豐富啲.不過好似齋講多,好靜態,我見領隊都停晒手.事實上這是一個攝影班項目,佢地主要係試多重曝光,要畫面有移動物體先有效果.

好不容易捱到飲酒的畫面,都係冇乜大動作,但就睇到演員拗腰.

再影吓成排人一齊行,都冇乜特別畫面喇,比較失望的一次拍攝.

淋坑山

這是個即興出發的好地方,雖說在天水圍,可山不高,路也不險,沒太多體力及技術的考慮.

很多分支路都可以上山,跟跟吓我都冇跟,只一味向山上行進,好快就到頂,不過原來橋喺另一面,唔緊要,行過去都好近.今天雲層比較低,看來是不會燒天了,竟然.....搞搞吓喺我頭先過來嗰邊燒.走過去恐怕趕唔切,就白白放棄咗.柳暗花明又一村,跟住到呢邊燒,雖然麻麻地,好彩冇趕過去又兩頭唔到岸.

影個近景睇清楚啲蠔排.實在應該帶航拍機來,角度會靚好多,不過懶,同埋日落低光影完都係爛,搵日好天朝早來算啦.陣間又手忙腳亂乜都影唔到.

最後影埋條橋,好可惜日落位置唔係好就到,只好影個普通夜景.路太多都唔記得咗邊條路上來,只係一味向下走,去到山腳變咗繞圈,好彩又俾我出到去.

種瓜得豆

聽聞利安後山再出現之前新出現既蝴蝶,距離我都唔係好遠,一於去探吓.

蝴蝶有,不過都係普通嘢,唔通要上山,係就係有個絲帶位,跟佢越行越入,但全部兩旁高樹,似真係行山既山路,睇方向可能可以去到馬鞍山,冇乜結果,去翻公園影蟲,咪睇佢好似成牌板咁好平,要成個背脊清晒都要夾相.

蟲其實都唔易搵,好不容易先見到呢隻乜色都冇既嘢.環境超暗,要挑戰1/60秒快門,好彩有欄杆借吓力先成功.

諗住影蝶變咗影蟲,又有消息古洞有新蝶,又去種瓜.新蝶真係有,有呱?我好似未影過呢種蝶.新係新但好似唔係好靚.

舊蝶都影來充吓數,位好似都有啲特別.結果都係影埋啲無謂嘢添.當行吓山.

影交尾

朋友通知有秘位可以影長尾藍交尾,日日都有幾對.為咗確保我影到,仲見到先見我出發,幫我睇住,真係唔話得.

要超過一個鐘先到達,而對長尾藍真係仲交緊尾.慢慢影到靚為止.

影完正光影背光,其實我係比較喜歡這張的背景色.夠晒光猛同鮮色,可惜下面嗰隻翻到屋企睇先知道係爛咗小小.

目標已達,又到食飯時間就去食咗飯先啦.出到門口見到有咖灰交尾,冇理由唔影埋啫.雖然之前都影過,不過今次停既地方不同.而且好定不用花太多精神.

食完飯翻來對咖灰竟然仲喺度,呢個時候附近又發現咗呢對異形,之前影佢都係強光下,眼睛留下很難看的多邊形光點及極大反差,今次在樹陰下可以影到純橙色既眼睛.有利有弊,樹陰即係暗,有啲唔Sharp.而且影得一次佢就飛走咗,殘念.

城門水塘排洪

連續兩個八號風球帶來大量雨水,大潭排洪已經影咗,係時機去影城門水塘.

城門水塘同其他水塘唔同,佢排洪係用一個大灟斗咁既設置,上次冇水來已經試過24mm係唔夠wide的.用盡都只可以啱啱影晒個灟斗.已經帶埋重型腳架諗住橫置中軸伸部相機出欄杆影,去到先知係妄想.好似影蝴蝶咁,成村人排晒隊,出腳架肯定俾人打.侷住手持,不過可以爬上鐵閘頂影,離灟斗遠小小,角度也較好.

之後就係換魚眼再影過,我沒有比24mm更wide既鏡,除咗魚眼先可以影埋個日落.之後夾硬拉翻直啲線同勁裁就搞掂.解像度會差啲都冇計喇.

駁翼手術

上次去大澳一心影珍灰影得麻麻,反而最大收獲係影到珐灰交尾.

係影咗好多張,不過最鐘意都係影得最大隻同光線最平均嗰張,可惜....就咁睇好似冇乜問題,兩隻都清.

但一放大,就睇到左邊嗰隻塊翼係有啲矇,達唔到可以睇到一條條毛既程度,好在早有準備,影嗰陣己經專登影多張對焦翼尾清既相,諗住重施故技做景深堆疊.

點知一夾...錯晒位,似乎電腦係用咗條尾部份對準,但影相過程中對蝶應該郁咗.

由於我只係想要左面嗰隻既翼清翻,於是決定手動搞搞佢,先將預備疊上去嗰張改成50%透明,咁就可以人眼睇位,只要左面隻翼既花紋對正就可以,要留意用滑鼠或者鍵盤移係冇得轉角度的,只可上下左右移.要轉的話只可估角度轉咗先再搬埋去,唔啱位就要再轉過.好在都唔係想像中咁難.

之後用筆刷擦翻隻翼出來,再補補崩咗個小小就大功告成喇.