大東山尋芒草

大東山的芒草很有名,一直都冇去只因聽聞好多梯級,要上得好辛苦.

終於下定決心上一轉,朝早明明係好好天,去到山腳就陰天,差唔多到頂仲變埋大霧,一場來到,就算冇嘢影都攻吓頂,柳暗花明,再上啲霧散咗,就咁路上已有芒草,影翻張逆光先.

一直行冇留意到原來上山頂要左轉,給果誤打誤撞去咗二東山,見到爛頭營,坦白講有啲腳震,順光影麻麻地,見到太陽已經俾山遮咗一半,仲要極速走過去爭取最後一道逆光.

一走過陰影就火速set腳架,個山咁高,但其實成個山頭都係人.原來依家啲人都幾好體能,芒草事實上係未夠時間的,仲未出現絮化,只係一支支咁.

見仲有時間,決定走入芒草堆影張冇人既,地上是有路的,但似乎是芒草生得太密遮到冇晒路,要撥草尋路,費好大氣力先搵到舊石影到張冇人既.

終於玩到冇光,係時候回程,上到來手機訊號好弱,一直同朋友失去聯絡,原來佢識得左轉上山頂,咁同佢在上山頂左轉位置會合啦,點知原來仲見到日落,清水疍冇乜睇頭,芒草也因為冇逆光變得好淤色,只係好過冇.

錦田河攝影

見到人地影錦田河影到窿窿加日落幾靚,於是又想去翻印一份.不過又係好似華富村雞疍仔咁衰,一定要水退先影到,仲要低過一米.睇翻天文台,今年又放假又啱水退條件既得翻一日,但個天又唔係好爭氣,日日都陽光普照偏偏呢日就係陰陰天,唔理喇,當探吓路啦.

拍攝地點在南生圍污水泵房,坐的士最妥當,到咗再行入小小就係,唔係好對路,點解咁多草阻住既,我見人地唔係咁嗰喎,睇真啲原來要爬出欄杆到下面亂草堆.哎呀,原來草下是淤泥,腳架既腳好易陷咗入去,唔係好穏陣.呢個構圖應該得一個腳架位,最多兩個.咁既天氣都係得個搞字,唯一好處就係一張過唔夾相都得.走都幾大鑊,冇的士要硬行,好彩行半個鐘就出到大路有車走.

珠海攝影

每次工作經過珠海見到大劇院都好想影佢,所以去完澳門就決定去一日.

山長水遠冇咁嘥淨係去影大劇院呱?預咗用觀光巴士L11去幾個景點,第一個係景山公園,坐吊車上山影大景.點知…….又出閘脫腳.公園關閉,冇計,行一個車站去影珠海漁女,呢個時候差唔多中午,頂光麻麻地,我特登影埋下面啲人熱鬧啲.

原本想就咁行一個站去海濱影燈塔,但咁熱最後都係搭巴士,幾遠都係一蚊.好曬但個天又唔藍,真唔抵.

個燈塔仲可以在愛情郵局餐廳樓上影,角度好啲,齋影唔多好意思,叫杯珍珠奶茶順便休息吓,餐廳內有兩個大心,樓下仲有個郵箱可以扮寄情信,啱晒鐘意打卡既人.仲擺咗支腳架俾你地夾電話自拍,唔駛驚唔夠手長.

終於要搭車去大劇院站,途中會經過得月舫,係類似珍寶海鮮舫咁既酒樓,有諗過影佢同大劇院一齊,但唔係好就到,就咁影吓佢,未開燈認真麻麻.

搵來搵去都冇乜好位影大劇院,日落又唔啱方向,終於搵到個位影日落,天氣又係…

好喇上主菜,奇怪,做乜啲燈開得咁古怪,個細貝超光,大貝冇光咁滯,連終點都脫腳,算啦早啲收工. 

點知行到出的士站個大貝忽然轉咗紫色燈,雖然都係麻麻地,唔影埋又有啲可惜,估唔到仲有激光添.

超短花期

星期四在網上見到盛屋村有鳳眼藍花海,星期六天氣預告又好天,一於去打吓卡.

未去己經有人講花期好短,我估兩日唔會差好遠呱?網上又有人話星期五去都已經謝咗好多,只好睇緣份啦,終於………果然見到中間有啲已經枯咗,我估係呱?我唔係好識.不過都算係咁啦,叫做有啲一點點紫色. 算做都有相.

之後就係日落,呢個方向更加小花,而且位唔多,試過走去一個連放腳架都冇既位,花仲小,走翻轉頭已經冇晒前面位喇,有小小草遮都算喇,求其紀綠吓啦,估唔到兩日已經咁大變化,唔怪得好多影到啱時刻既風景相都係出自已退休人仕.

新竹reload

年頭先去完新竹,照計應該去吓其他地方,點知老婆話要去多次.原來係佢想帶佢啲朋友一齊去.收到,即係又係血拚之旅.腳架都可以留翻喺屋企.唔通叫人等我影日落夜景咩.

不過咁,我都安排咗一日去影吓季節限定既柿子海.九月至十二先有,因為有所謂秋天既九降風,嘩,做乜超多人,新竹應該冇咁多人個喎,原來係雙十假期呀,避咗十一黃金週計灟咗雙十.算啦人多熱鬧啲,就係為咗呢個畫面,係咪好奇怪唔見旁邊有路啲人點走人去.謎底就係下面,啲柿子盤係高過人頭的,下面點行都得,園主仲特登安排咗啲梯俾遊客爬高突個頭出來,同埋俾攝影人爬高影朋友.果然有生意頭腦.

跟住就係老婆指定要去既內灣老街,其實都係賣嘢食,有啲遊戲玩咁,似夜市,我地都玩咗射箭,不過女性似乎冇乜興趣,一味叫你地玩啦,我地買咗一日票,95台幣,可以任搭內灣線,所以行完老街就去咗合興車站,呢個別號愛情車站,有個心囉.

仲有小火車玩,車程好短,得一條直路,旨在影吓相,有專人幫你影的,我俾人影完就走去影人.架火車會噴煙都幾得意的.由於一個鐘頭得一班車,搞到未去晒啲景點就趕住走.其他站都唔去.

預咗星期一再去老婆好鐘意既17公里海岸玩電動單車,諗住冇咁多人.真係………..冇人呀.原來已經過咗雙十假期,咁啱魚市場係公休日.好在單車舖有開,一於包場,今次要完成晒17公里,超大風呀,帽都吹甩晒,原來後段都經過好多攝影點,呢度係高尾濕地,可惜唔係日落時間.

仲有我上次計劃咗影夜景既豎琴橋,可惜又唔係Magic hour.

沿路上都會寫住你行咗幾多公里,包唔會行錯路.終點係一座塔,打完卡就係原路掉頭走,冇得繞圈的,由於唔駛爬頭,好快就行晒,但又好似差咁啲挑戰性.

環境微距

唔知大家有冇發現用手機影蝴蝶係同微距鏡唔同.微距鏡由於長焦距,如果背景唔係太近,好容易就可以化晒背景,令到畫面好乾淨,焦距越長效果越好.反之,手機因為係廣角鏡,即使蝴蝶影到好大隻,依然會見到好多周邊事物.於是有一派反其道而行,專用魚眼影微距,要做到昆蟲加景.

理論就好簡單,實踐起來係非常困難.首先接近目標已經超難.蝴蝶幾近冇可能,其他會行會走既都好大失敗率,於是我揀咗夜晚來實驗,蜻蜓大大隻啱晒,魚眼鏡放大率冇微距鏡咁大,我用到最大放大率,支鏡有好幾次撞到隻蜻蜓都係唔多夠大.問題二,魚眼裝唔到鏡頭前照明既LED燈,就算裝到都冇用,實入鏡.結果回歸最初,單手攞電筒照明.問題三,魚眼視角太廣,支電筒稍為隊前啲都入鏡,仲有打背景燈腳架又入鏡,而且範圍太廣,背景燈又照唔晒.....退而求其次,加個1.4x增距冇咁wide好控制啲.多次努力下就係咁,蜻蜓在鳳園路上.針冇兩頭利,如果朝早影就小咗好多照明問題.

再搵吓又係蜻蜓,今次角度比較易搞,不過影出來又好似冇乜環境feel.由於我太貪心,又帶埋微距鏡搞到倒瀉籮蟹,之後掛住影微距就冇再試,睇來我要搵一次淨係帶魚眼鏡先得.

白芒攝影

想去白芒影小蠔灣車廠好耐,尤其港珠澳大橋開了之後,白芒應該係對正佢,至於有冇樹檔住就唔多肯定.聽說山勢很平緩,不辛苦,不過最重要係冇乜車到,要由東涌行3.2公里先去到登山入口,唔理咁多慢慢行,行極都未到,終於個幾鐘先去到白芒村,死喇,登山入口呢?好在前小小就已經有樓梯上山,行行下唔對路,好似反方向,仲落翻山咁既,哎呀,原來係拜山路,無端端嘥咗半粒鐘.原來再前啲先啱.

雖說平坦,但都好長路程,終於差10分鐘趕唔到日落,好在個日落位都唔係好靚.專心影夜景,我爬到上最高舊石度取景,其實低小小都有位,但石上可以順便影埋機場嗰邊,車廠加埋港珠澳大橋幾唔錯,冇橋就差好遠.除咗咁影,我覺得仲可以用長鏡特寫車廠,加埋車軌都應該幾好.

順便影埋另外一面,雖然係機場加人工島,但影出來硬係怪怪地,最後決定淨係要人工島就算,腦海湧出一個想法,下次搵支長鏡影一忽機場加飛機升降光軌應該幾得意.但就要留得夜啲先夠光軌,又係時候收工,落山再加3.2公里平路,辛苦死,但點都唔夠上之影青馬橋先上樓梯咁慘.

再殘念渡海泳

上次影維港渡海泳好多橙波波既畫面係好壯觀,可惜方向係大背光搞到泳手黑口黑面好唔掂.於是搵搵有冇其他地方渡海泳係正光.終於俾我上年搵到有吐露港渡海泳,睇埋路線圖確定係正光,人算不如天算,撞正山竹,乜都打爛晒,大會驚危險就取消咗,今年冇事又好天,應該有收獲呱?

諗住搏矇走去終點影,我睇翻之前網上影片係可以的,不過去到格局好唔同,終點大大塊布寫住終點,泳手穿過塊布為之衝線,即係擋住乜都影唔到.只好Plan B走去後面戶外高位,角度係好正,但就好遠吓,賽事十點半開始,爭標組好快就到,半個鐘都唔駛,不過佢地唔係我目標,一個個翻來冇乜好影,又冇橙波波.影特寫又唔夠長焦距.我既相標係暢泳組既滿海橙波波.但係好疏吓同維港差頗遠,最慘係……….佢地游得好慢,來到已經差唔多正午,冇錯係冇背光,不過就係頂光,一樣黑口黑面,宣告又失敗.

試吓用長啲焦距唔要背景建築物都幫唔到好多.就影吓佢個大波波啦,其實佢條繩好阻我,要等大風吹到佢側埋一邊我先影到.不過都冇所謂啦,呢啲相只可以紀錄吓.

塘坑村攝影

這地方一點都唔難搵,只要坐的士到塘坑村,跟水泥路入到見到新起既鐡梯,右手面棵樹有絲帶既就係入口喇,初段行鐡梯,行到盡進入山路再行到頂就係喇.影車軌其實路邊就得,但如果要影埋日落就要旁邊斜坡剷小小草再走出去標高柱.搵到既話,夜景車軌一齊影埋都得,唔駛又行翻轉頭.

今日肯定係清水疍,好過冇,個位最多放三支腳架,咁啱我地係三個人,剛剛好.

齊齊轉晒方向等夜景,點知後面個天忽然好紅,咁又齊齊轉向影埋佢.

終於到夜景喇,我決定影兩個構圖,一個係車軌特寫,85mm加1.4增距,總共要用三張夾埋,一張路軌,一張背景,再加一張係路牌,要睇到啲字唔好白晒.其實現場反差唔係好大,夾硬一張過推陰影同高光都應該搞到.但副作用係暗部好多雜訊同埋降低整體對比度,會搞到張相好似好平版咁.所以即使係咁做都好,我會手工貼翻主體,即係車軌嗰部份上去.

影得張數多既缺點就係嘥時間,幾乎趕唔切換24-70mm,開盡全速先影得切呢個有埋天空既構圖.

整色整水

上次玩完背光夜攝先發覺到原來閃光燈既光係會令到背景偏藍,於是我有新想法不如閃燈加個黃色瀘鏡令到黃翻啲似日出或日落影.

原來鳳園都固定有啲蟲,唔駛下下上松仔園咁勞累,先用普通方法來一張毛毛怪先,陣間食白果都可以靠佢.

又遇到蜘蛛網,呢次小心慢慢噴水,因為懶冇喺屋企試咗效果先,只攞咗Sony原廠跟燈送既黃罩,死火,一試超黃,唔似日出日落而反有啲似夜晚街燈.只好夾硬較翻低啲色溫就就佢,幸好呢種蜘蛛透明度幾好,前面燈唔駛開好大,細心睇其實見到個散景好大支閃燈.

終放見翻上次驚到整爛網既蜘蛛,今次好小心慢慢飄啲水落去.呢個品種好處係個網好密可以影到較多幾何圖形,但隻蜘蛛就唔透明喇.結果一閃變咗外星藍蜘蛛,都幾得意由得佢,雖然唔透明,但金光圍住佢效果都幾唔錯.

普通到唔普通既草蜢.但今次用新方法影,佢身上既細毛剛好可以增加背光效果,閃閃發光幾有意思.時間差不多,睇來下次可以試吓用錄色瀘光罩整個超勁錄底.