實戰手持景深堆疊

終於都有機會試吓實戰,蝴蝶交尾係經常唔夠景深,一隻都已經有問題,兩隻就更加唔夠.一般做法係影到好細粒然後夾硬裁大佢,或者索性細粒啲講構圖.不過唔啱我口味.

雖然交尾唔多郁,但十幾人排隊影不成文規定係每人限影三張,最多博矇影夠五張就要俾後面既人影,我既做法係每隻蝶對焦眼睛影兩張,翼尖搏矇影兩張.當然要手快,唔好對焦都搞一大輪,由於隻蝶都算大,我發覺左右一張已經夠,呢張對焦左面蝶眼睛,好明顯睇到身體及另一隻蝶係矇的.

呢張對焦右面蝴蝶眼睛,咁啱就係第一張矇咗既地方都夠景深,唔駛再合成翼尖.

跟住做合成,好似幾OK,其實係有問題.

放大睇,觸鬚部份多咗啲嘢.應該係蝴蝶冇小花生子咁四正,條鬚不在同一平面,即使對焦唔同部份都有一部份係景深內.合成時會被當係需要部份而顯示出來.

網上有教其實可以自己續個圖層搵翻需要既部份抺翻佢出來,不過我暫時唔係好掌握到,決定改用我既方法,就係特登整矇唔應該清既地方先合成.

做埋另外一張.

再合成,終於冇咗啲怪鬚.最後講講究竟應該扭對焦環定係移部相機改變對焦位置呢?影微距唔同影其他距離,扭對焦環係會頗大程度改變物件放大率的.原本對焦地方係1:1,一對後小小已經唔係.咁移動相機似乎先啱.網上睇過,係相反,移動相機背景夾出來會一層層,而且離你遠既物體放大率細咗其實係好自然,只係自己諗多咗.

大庵影珍蝶

最近好多人貼珍蝶交尾相,我再睇翻好多年前影既珍蝶相,真係好唔掂,決定去影多次.

係人都知道影珍蝶係去川龍,不過原來已經冇喇,變咗要去大庵,仲好,巴士一落就到,諗住水尾,求其影吓單隻就算,點知去到冇耐真係有交尾.又十幾人圍住,有位師兄話人小喇,上個星期有成三,四十人.影咗一輪之後先發覺有一隻係爛架,好在另一面冇爛,又要排隊再影過.

搞搞吓又多一對,冇死,不過啲人又開始搞擺拍,夾硬搬埋佢地一齊,其實咁都冇乜美感啫.

邪惡冇極限,啲人要玩倒影,我唔係好贊成咁搞,但啲人擺咗唔影又好似好嘥,雖然係靚,但我貼FB都唔敢係公開,費事俾人鬧.

個個掛住影倒影,我就影居然冇乜人影既交尾,慢慢俾心機影靚佢.個個影飽之後好在都擺翻佢地去草堆,否則啲人路過實搞死佢地.

臨走影翻張單隻,今日掛住影交尾冇乜搵單隻,真係好求其,背景好唔掂.

再探牛潭尾

上次去牛潭尾影鬍鬚仔發覺嗰度其實風景都唔錯,反正山不高,就去多次吧.

今次隨咗影日落夜景之外,就係要航拍錦繡花園,上次影康樂園太近反而唔靚.今次試吓遠小小飛埋去.而且夠空曠,可以再試吓飛高啲.終於飛到342米,已經超過咗法例規定既300米,可惜....又係訊號弱,飛唔到埋啲.而且逆光,好淡色,又失敗.

轉個方向原來影到漁塘.有啲似丫髻山.反而靚過錦繡花園.

航拍玩完,等日落,上次來以為唔啱位,估唔到側側地都影到,可惜今日個天又係清水疍,而且啲水有啲濁.整色整水,用提早開燈大法加點燈光.

最後是等埋個夜景,普普通通但都幾多樓,幾熱鬧.雖然航拍好方便,但講畫質始終係相機好啲,尤其係低光.

解開封印

話說之前航拍一路忍受飛得唔夠高既問題,我明明見人地好似飛得冇咁低喎,係咪我個型號係咁呢?上官網查吓個spec竟然係可以飛到500米高.再翻公司問吓人,其實入Menu就咁改就得架喇,你想再高啲都得,但就要搵人改機.

改完設定當然要試飛,近排天氣認真衰,日日都係灰矇矇,求其去屋企後山影吓康樂園.結果飛到120米又係出警告.不過夾硬飛係飛到,但係飛到200米又話訊號弱,乜咁煩架,可能又係俾啲樹擋到.行山徑既關係,路兩邊係有樹,我都搵咗一輪先搵到個位直線升高係唔會撞機的.冇計啦,影翻張Goggle地圖.

轉過去影埋另外一邊,得啲樓冇乜特別.

想要影多啲除咗飛得高,仲可以飛後啲,但就要飛翻低啲,訊號強度應該係一個半球體,遠咗就要低翻啲,低啲既另一個好處係可以影埋個天,似翻風景相.

手持景深堆疊

影微距成日都遇到景深唔夠既問題,收光圈都唔能夠完全解決,同時會有唔夠光問題,上網睇過係可以靠疊相合成幾張唔同對焦位置既相,不過一來要目標物好合作,二來要出腳架保證唔會啲相位置唔夾.影蝴蝶既話,用腳架幾近冇可能,實俾人鬧爆.早前網上睇到有人教用手持方法,效果竟然OK喎.於是我又去試吓.

今次由於要影大放大率,小薑子唔啱用,搵來小花生子.平時就係咁喇,前面清楚,後面啲邊就矇咗.

對焦後面嗎,又到前面矇咗,已經係用緊F11光圈,再細開始會影響銳利度.

終於手持影咗六張,用自動合成試一試,果然唔掂,起晒鬼影.而且光位都因為疊得太多次變爆光.

之後改用自動對正既功能,我唔明白疊相時點解冇呢個選項而要分開來做,咁就照做啦,做完可以睇到主體對正咗,邊位就錯開晒.

跟住裁一裁外圍,合成,搞掂,效果幾好.如果上次影鬍鬚仔用呢個方法可能就唔駛個咀矇咗,隻蝶唔郁,又唔太多人排住隊影,不過呢啲機會都唔係成日有,希望遇到啦.記得初初 Nikon 出D850有自動景深合成我仲同人拗要用腳架,睇來我誤導咗人添.

影水珠

近排乜活動都停晒,天氣又成日都係陰陰暗暗咁,要搵啲嘢喺屋企就玩到既.

一路都想喺屋企影用水珠做放大鏡既相,咁就可以Set晒腳架一個人慢慢影,又唔驚有風,呀.....影係唔難既,最難係要的起心肝起個壇.又要買幾個座枱鉗,又要買針筒,又要買花,想效果好仲要買甘油.只係玩一次要簡化,花唔買喇,用會發光既電視機代替,電筒都慳翻.座枱鉗用曬衫夾加膠紙搞掂.針筒就改用眼藥水樽.純水比用甘油做的水珠細,要盡量加大放大率,頭一轉影到2:1失敗了,忘記了水珠是魚眼鏡,影到我做座枱鉗既凳仔.而且可能放太大有啲震,算數再改改個壇,加翻塊黑布,影翻細啲1.4:1,再裁到APS-C模大小,完成.

其實水滴係向下的,不過折射後會反轉咗所以我轉翻向上,如果想影到水珠向下就要先反轉影想,影多一張幻彩詠香江,影完先發覺其中一滴水有粒大塵,PS都搞唔掂,冇計拉,裁走佢.

唔夠高,唔夠遠

我記得第一次帶我細佬去玩Mavic pro就係大攬涌水塘,千島湖真係好靚但陸上限死咗位置,對航拍可以拍出的畫面好期待.

之前舊位係低位,要盲飛好似頗危險,都係付出小小體力行去清景台放比較放心.照例勁多人,我一起飛就飛盡高等架飛機冇咁嘈.對正影好似同企喺度影差唔多,高到120米似乎冇乜大幫助.

之後就係飛去右面影個長位大景.可能係右面有啲樹,比預期早出現咗訊號弱既警告.死火,唔夠遠喎,影得三幾個島.得翻一個辦法,反而係降翻低啲.不過效果都係麻麻,有啲失望.

無奈返航,再影下啲島既特寫,最後原來要降落都幾難搞,周圍都係人,搵唔到平地,我要好慢,好慢,架機直情飛到接近啲人頭頂,先有人知我要降落留出小小位俾我.

九龍坑山攝影

疫情嚴峻,就算去行山都要搭車,不過其實我家附近就係九龍坑山,行過去都得,唔駛搭車,之前我其實都上過去兩次,一次去到個位影康樂園夜景就算,一次以為到頂但冇嘢影,但其實嗰度只係玉秀峰,未有耐到九龍坑山山頂.今次決定要攻頂.

天氣都有啲涼,但越行越熱,行行吓兩件厚衫都除晒,得翻件底衫,呢個山都算山旮旯,估唔到都好多人,仲要九成都唔戴口罩,仲要好多嘢講,大噴飛沬,所以見有人迎面來我就擰轉面等佢地過咗先再行,同方向既就盡快爬佢地頭.超多樓級先到山頂,果然視野開揚好多,冇乜嘢阻擋,可是景都係麻麻,隨便影張日景.

呢度有日落,不過係背面,食之無味都食啦.

最後就係等埋個夜景,隨住太陽落咗山越來越涷仲越來越大風,加埋有啲汗,涷到打冷震,迅速着翻兩件厚衫都唔係好頂得順,點算好,咁辛苦行上來唔影走人似乎好嘥,但個景又唔係好靚,陳間涷病咗一個唔好彩染埋新嘢就大吉利是,終於放低部機,走去冇咁當風位避避,跟住跑來跑去熱身.真矛盾,其實我應該留翻啲力落山喎.半個鐘好快過,嗱嗱聲影完落山,又熱到除淨件底衫.

追逐鬍鬚仔

驚蟄己過,又到蝶季,其實未到驚蟄我已經見到有人影到鬍鬚仔.我去咗兩年都食白果,第一次唔識路,第二次隻蝶冇出,只影到小三.今次又去搏搏.

天陰陰搞咗成朝蝶毛都冇條,終於有朋友叫開飯,我第一次見佢,原來咁細隻,但冇太陽既關係一路都冇合翼,搞搞吓仲走埋,去山頂標高柱睇睇,嘩,見到好多蝶........不停咁飛.即係有得睇,冇得影,搵到悶朋友話不如走,反正唔合翼都唔慌影得靚.好啦搵埋另外個朋友打聲招呼就走啦,呢個時候出翻啲太陽,鬍鬚仔又出現,仲合翼及出鬚添,依家先知原來要出太陽先會咁.人小小可以就啱焦平先影,夠光可以收光圈增加景深,但收到F11都仲差小小,最後都要影細小小再裁翻大景深先夠覆蓋整隻蝶.

為咗睇清楚佢匹鬚,我整咗呢張,只係靠裁相得來,我原本想影盡1.4:1,但係隻蝶怕閃光燈,一閃就走,得一次機會之餘分分鐘搞到走咗其他人冇得影實怨死我.收到F11嘴部個尖尖都未夠景深,睇來就算開閃燈收到F16都未得,一定要疊相先搞得掂.

終於唔駛食白果,貪心啲再上標高柱睇睇,有兩隻雙尾灰開始會停吓,我未影過係極想影到,但次次都停埋啲古古怪怪位,影極都唔係好得,終於等到個好啲位.後面都係有草架喇,只好事後整矇佢,又到有風,狂影咗幾十張,翻到屋企真係得一張得.

航拍三門仔

每次去大陸經過深圳灣大橋見到海面一排排蠔田都好想影低佢,無奈喺架車裏面角度好差,突然靈機一動,三門仔嗰啲水上屋都有類似效果,用航拍效果該唔錯.

今次真係好天喇,又係有咁高飛咁高去到118m,水上屋就在旁邊,影翻張谷歌地圖先.

就咁得啲屋唔得既,要襯翻個景,硬係覺得啲屋唔係好密,都冇計喇,好天有好天既問題,好難擔高頭睇住架飛機,光線實在太剌眼.

豪宅比華利山就喺附近,順便影埋佢,都係太騰雞,爆框得滯,應該飛後小小先影,呢次之後我將相片拍攝比例由4:3改咗16:9.雖然4:3係原始比例,睇到raw實際影到乜.但係我一般會裁翻做我鐘意既3:2,一時大意會唔夠裁,16:9既話只要影到比較貼,變翻3:2就多數啱啱好.

成日驚驚青青小學雞唔掂,我今次安排咗長途飛行,就係飛去慈山寺用特別角度影個觀音.搵個位直望個觀音,換舊新電就出發,其實都係小學雞思維諗住直去直翻唔會迷路.飛咗一陣間架飛機已經太細睇唔到,全靠睇電話上顯示,真係好遠,飛咗好耐個觀音仲係好細粒,又冇研究過點用sport mode飛快啲,只好耐心慢慢飛,距離700米左右時有警告,飛行機已超出目視範圍,請小心飛行,吓!超出咗好耐啦.飛呀飛,去到一公里多啲又有警告,訊號接收弱,請小心飛行,死火,未夠近喎,搏多小小啦,終於我真係飛到埋個觀音度,但原來咁近反而唔靚,wide鏡既關係,搞到前面啲屋大得好交關,最後我選咗遠啲影裁大佢.都係麻麻,唔敢搞咁耐,陣間真係冇訊號架飛機走咗就豬喇.

回航好順利,只要觀音反方向飛就得,見到距離越來越近表示操作正確.回程見到有景又影吓.不過最後都係懶得搞用自動回航,反正佢只會降到30米高都應該好安全,我唔想一回航就用佢,因為一路咇咇聲好鬼煩.同埋最後落地都會先停咗佢,基本上見到架飛機自己續小慢慢移啱先降落仲有信心.