追逐山東艦

 山東艦訪港,襯熱鬧去影吓,嘩,七點幾就封海咪要好早起身?

前一晚夜瞓咗,趕到去已經見到隻開路既救火船入港,快速拔機都趕唔切喇.好彩有朋友通知我機位,趕到第一艘驅逐艦,可以配埋南丫島三個煙窗.

華富村呢度超近,又剛好正光,話咁快第二艘驅逐艦又到,同第一艘其實差唔多.

咦,竟然又有救火船,失而復得,影佢一定係移動中先有,泊定咗就冇得影.

又係驅逐艦,呢艘比較細,尾部連直昇機都冇.

終於遠處見到主角,死喇,一路都用100-400影得好開心,主角咁長會唔會爆框架?終於證實咗係會,冇計只好影一忽大隻啲.只有更豬,事後打開相機袋原來我有帶24-70,唔夠瞓忘記咗換鏡.

收機去厠所之後走人啦,行行吓見到原來仲有一艘包底的,好在攞得切機影埋.呢艘仲應該係最大的.之後碰到同路中人佢話有個住客帶佢上18樓影好正,甲板飛機都影埋,真係恨死我,之後發覺停車場樓上都好正,又高啲又遠啲,早啲搵到就唔駛爆框啦.

北區微型藝術展

這個說是專做成北區的事物,睇宣傳會有新展品,而且地點十分近,就在上水站旁邊上水滙,快閃一吓冇乜成本.

有好多新展品係影唔到好的,包括細細個膠箱包住個大警崗,要離遠影反光到爆及背景變晒巨人,特寫個警察又冇乜意思,大埔火車站博物館都係相同情況,寶芝林勉強可以影,其實背景都係穿崩.

花檔唔係好代表到北區啦,但係比較易影.

北區真係咁多舞獅嗎?今次我改變咗策略,唔追求所有物件清晒,只著重主體近距離的物件,咁嗰圈圍住主體既模糊會冇咁嚴重,事後用印章工具印走佢都比較唔需要咁精準.以呢張相為例,如果後面幅牆要清埋就會好多地方穿崩.唔係大作唔值得花咁多功夫.

玩具店呢啲真係冇心代表性,區區都有啦,只係易影.

今次最想影係呢個魚燈舞,啲安排係怪怪地,影埋條欄杆,而且同真既一樣,係冇乜章法的,求其走來走去就算係跳咗舞 :P

追逐白腹海鵰

好耐冇去西頁碼頭影鷹,今日去到竟然多人到冇晒位咁滯,原來最近有白腹海鵰出沒.

西頁碼頭個位有點高,影細細隻既海鷗捉魚夠近既變咗影頭頂,遠既又太細粒,點都冇畀錢上船影咁靚.所以我主要目標其實係鷹.又大隻又飛得慢,總會有收獲.

不過唔知點解數量小咗好多,得翻一兩隻,記得以前係影到唔影,依家要等,旁邊啲人話以前漁民劏完魚啲內臟會直接掉落海引來好多海鳥搵食,依家唔準所以靜晒.背光關係影到黑媽媽,好彩後制救得翻,天就冇咁藍喇,搵食靠自己,原來佢都捉到隻百爪魚類物體.

夜鷺都好親民,飛來飛去畀你影,但碼頭嗰邊背景比較雜.

又話冇內臟,啲人話應該係由坑渠流翻出來畀佢執到,睇來條魚都幾大.

千呼萬喚始出來,全世界一擁而上,大炮放腳架既都變晒手持,我仲諗住佢好似海鷗咁細隻費事影,原來好大隻架,因為係海鵰唔係海鷗.只係轉咗兩個圈就走咗,好彩都影到.其實佢又唔係好靚,只是比較小有.

慢快門影劍道

劍道好衰,戴住面罩睇唔到表情,如果影唔到支劍變形或者一啲動態模糊,會變咗兩個擺pose影硬照咁.

今次係第一次試慢快門影劍道,跟跆拳道一樣,都係先鎖定1/100秒快門,就當高速快門咁影.成功率還可以.

不過現場環境就麻麻,評判席在後面背景好花.又搵唔到其他位置影,只好夾硬影.最鐘意大家一齊劈.

真實中唔係成日劈的,好多時都係雙手舉高鬥推.

閃身避過一劫,期望下次搵到乾淨背景.

追逐並蒂蓮

塱原濕地公園傳出有並蒂蓮,聽講十分罕有,於是個個都去集郵.我原本打算去影荷塘日落,都帶埋支長鏡順便去影吓佢.

地點好易搵,雖然有好多個荷花池,只要見到最多人嗰個就係,幸運地並蒂蓮就在池邊,乜鏡都可以影到大特寫,花是未開狀態,原來係因為陰天問題,有人話朝早有太陽時係開的,有人已經來咗幾次等最佳狀態.我講陰天,即係日落又冇行,今日影得一張相.

鳳凰木拌鳥

今年鳳凰木開得特別靚,大景都影過,唔知會唔會有雀仔呢?太和橋就有一個位可以水平影到,一於去試試.

一早去到靜英英,見冇乜行就行去廣福天橋睇睇,記得嗰度都好多鳳凰木,但冇咁近,點知未開花,諗住翻屋企算數,再經過太和橋見到佢,位置仲幾好,嗱嗱聲攞機,好彩趕得切,之後佢都冇再出現過.

其他雀真係冇乜,麻雀就最多,呢隻好近,近到背景都可以變成紅色散景.

直觀咁諗,隻雀畀好多花包圍住就最正,其實唔係的,咁會搞到好花,隻雀反而隠咗形,始終背景要乾淨先好,花就留在旁邊吧.

更慢快門影賽龍

之前用1/50秒影成功率都好高,今次要再試慢啲.

先設定1/30秒,成功率低咗好多但還可以,大龍比賽先會有速度感,要打醒十二分精神,可以睇到一號龍同其他龍速度有明顯分別.有個運動員講大龍場場都係一樣架喇,一定係一號龍贏.

中龍慢好多,只好影個勢,實力有啲參差,不過一前一後構圖都幾豐富.

入到決賽大家實力差不多,可以影到成排龍船.

大龍決賽果然一樣,又係一號龍跑出,因為其實全部大龍就係得四條.影完之後覺得同1/50秒其實差唔多,最緊要都係啲人要爬得夠快.

慢快門影跆拳道

一直都覺得跆拳道好悶,你地見到飛身旋轉踢嗰啲場面係做戲先會有,出咁大招費力之餘都好大風險,所以來來去去都係得左右開弓係咁踢,諗深一層,咁咪啱影慢快門囉,個頭唔多郁但係影到腳影.

快門唔敢太慢,先試1/100秒,成功率可以接受,決定就咁影,最常見既互踢.

踢中頭係最高分的,所以攞獎既相通常都係影到踢頭,佢呢吓其實係踢過龍再勾翻轉頭.

反身踢有時可以另對方失預算,不過呢吓冇乜力度.

反身踢如果失敗就好容易失重心整跌自己,但可以唔放棄,照踢.

幾乎係冇人用拳的,我覺得叫跆腳道合適啲,小有的出拳畫面,今次成功率都唔錯,下次可以試再慢啲快門.

長鏡的景深堆疊

之前用微距鏡由於焦距只有180mm,手可以頗定,只要扭動對焦環影幾張就做到景深堆疊,成功率頗高,但如果用100-400mm影由於焦距長唔係咁隠定,手持手動對焦有時會失焦,影幾張既話好易有啲唔中.所以一路都係影單張.

問題始終要解決,既然自動對焦可靠就用自動對焦吧,這隻網絲冇合晒翼,對焦頭部翼會矇.

之後要影其他部份,我方法係改變對焦點位置,手勢關係,構圖郁晒,之後再影多幾個位,基本上係圍住邊位影,除非中間凹咗落去,否則應該夠相夾.

心諗移咗咁多位都未必會成功,不過最後又得喎,一共用咗四張.其實我試過唔郁對焦點就咁移部相機影,如果距離唔係太遠都會成功的.

細看香港微型藝術展

又有微縮展,今次有新展品但地點遠咗啲,要去到山頂淩宵閣,幸好係免費.

比想像中小人,可能係比較遠既關係,啱晒可以慢慢影,呢個馬會模型夠晒賣廣告,可惜玻璃太貼,反光無可避免.

新模型山頂鑬車,其實係做埋成個白加道車站好靚的,不過背景超花,所以只好影架車既特寫.

又有新嘢廟街,背景都有小小穿崩,幸好前面既反光不太嚴重.

啓德新場館,係做得好仔細,但係個玻璃箱好貼,要像真只好特寫裏面,最衰頭頂有幾支光管,反光避唔到.

最後影埋個金魚館,係啲膠袋我覺得幾靚.最遺憾係影唔到天壇大佛個景,做得好靚但又係背景超花,可惜朋友唔肯同我去,個模型喺二樓冇乜人,有人幫我攞背景布應該都冇人阻.