清人

聖誕期間聽聞愉景灣有飄雪表演,個背景係教堂都算靚,好過在樓中間亂到七彩唔知影咗乜.

教堂場景正中間有棵樹,要喺佢前面影的話要超廣角影到斜晒,我寧願後小小斜斜地用長小小焦距好過,不過咁前面就會好多人喇.

一直等等等到天黑,過咗六點都冇飄雪,原來平日係冇架,唔怪得咁小人.當影普通夜景啦,前面咁多人唔靚,影多幾張互相覆蓋清走佢,再拉翻直個透視,搞掂,仲靚過一張過用AI清.

西九煙花

西九聖誕期間有一共八日有煙花放,唔駛迫埋一日,睇怕唔會太多人呱?頭四日都唔得閒,揀咗23號去.觀景台視野比較好,但原來要人潮管制,要上面有人走下面先放人上,咁陣間去完洗手間再入來有機會趕唔切,都係下面影就算.

香港放煙花又光又密,就算有風都會搞到好多煙,可以影到既其實唔係咁多花款,呢隻算冇乜煙同花式都幾得意.

呢隻火力弱啲同彎彎地都特別.

最後來個大爆發,亂過亂世佳人,都好,範圍較大唔駛張張都勁裁.

有一件事好遺憾,一開始時掛住睇曝光啱唔啱,錯過咗HK字樣的煙花,見有時間,26號再來多次,今次有準備早啲唔飲水,臨日落前去一次洗手間就死守觀景台.個煙花好神出鬼沒,已經目不轉睛留意住,但影出來既HK係黐住好多雜火,正在疑惑之際天空突然爆出HK字樣但極短時間就消失,一啲地面射上去既預測都冇.手忙腳亂下只影到幾乎全黑的畫面,經暴力推光5級先有呢張相.

觀景台除咗角度高,仲可以影到樓下既人做小小前景點綴卟,整翻張裁側側小小既.走人其實都好大鑊,係要人潮管制咁一忽忽走的,用咗半個鐘先出到門口.

白鷺湖聖誕倒影

差唔多聖誕節白鷺湖又有搞作,加咗棵水上聖誕樹同埋一個屋頂既聖誕老人.等唔到微風日子影天空之鏡,求其搵日就去咗.

天色有點不好,反正我冇諗住影個天所以都冇乜所謂,快門不能太慢,棵樹浮在水上係會輕微郁動的,也不用等到真正入黑,背景同水反而會太黑唔靚,等到着咗燈影一張就搞掂.

匹克球攝影

呢種新興運動未影過,又係時機去集郵.

玩法同網球差不多,但用咗短拍,矮網,場地只有羽毛球場大小,而且規定頭三板要彈地先準打,之後就可以空中截擊,由於在小學內舉行,背景比較亂,影張跳起抽擊先.

總共有七個場有賽事,事實上幾個細場背景係比較乾淨,不過精彩賽事多數在大場.

另外的細場背景都比較雜亂但都要影吓,我特登帶咗135mm來,日光日白開盡F1.8影,太陽直照時快門去到1/4000秒.

呢吓反手幾有趣.

追波都唔係成日有.

雖然係細場,但呢對組合聽講係台灣一,非常有名,全部人圍晒過來睇咁滯.初初我以為呢啲運動係設計畀長者玩,但打起來都幾講反應的.

潛入塱原濕地

秋天應該又係禾田收割季節,不過塱原濕地好似有工程封咗,朋友話可以試吓潛入去.........我記得上次入去見到啲工人叫我出翻去,今次都有,我地應允之後話係另一邊走,結果當然係冇走到.

禾田仲係綠色,仲諗住啲禾花雀落來食禾之後影佢地成堆飛起,結果都有飛呀,不過就得光線又就唔到背景,得個桔,唯有去池塘影吓啲雀.

臨日落仲可以影埋倒影,至於禾田加日落就冇喇.

景山公園

上次去珠海原本都想上去,點知封咗.一封就幾年,今次再來過.上山同落山可以有幾種方法,吊車上吊車落,吊車上滑道落.我揀咗最平既.........行路上同埋行路落.

冇坐到吊車同滑道,影翻張相紀念吓就算數.

難得可以搵到個位對正滑軌,影到啲車滑落來,距離好遠,幾乎裁到盡.

之後走上山頂看看,用長鏡可以睇到珠海漁女,跟在下面睇又係另一翻景象.

影wide啲可以見到整個海灘,陣間可以影吓夜景.

然後就係今日主菜,俗稱日月貝既珠海大劇院,能見度有點低,亮燈後的景色還是不錯.由於唔知應用多小焦距,就帶咗彈性最大既100-400來,最後用到150左右已經OK.

再影wide小小要多啲景,原本計劃立既走去頭先影海灘個位食埋個夜景,有點歸心似箭,海灘黑媽媽都應該冇乜好影就直接落山,途中見到原來燈光火着的,嘥咗.

福仔情意結

咁耐只去過一次長洲影福仔,時間唔啱既關係,福仔已經殘晒,今次見人出相就把握時間即去.

見到已經有十幾人喺度就知去啱時間,上年只見到兩個人,不過前兩日出現既交尾就冇喇,得翻單隻仲要成日停地下,其他人不肖一影,我就照殺.

之後都係停到歪歪斜斜,好難先肯停爛葉而背景又冇乜雜物.

見冇嘢好影就影吓蟲蟲.

高手話咁影邊靚架,梗係打飛啦,佢都啱既,好彩我都有帶100-400來,隻嘢飛得出奇咁定但超細隻,影到最大再勁裁都係只可以咁,快門唔夠快既關係對翼好似隠咗形.

M+天台

想搵個近近地市區既地方輕鬆影吓日落夜景.記得網上見過M+天台可以影.

去到都要搵,因為我實際唔係好知喺邊度,好在有太陽引路,去佢對面高既地方就得喇.啲欄杆好抵死,跟平台離開咗一段距離,變咗影唔晒下面條彎路,後來搵搵吓原來邊位有一段距離係近啲,搞掂.清水疍日落,冇乜所謂,地景搭夠.

順手影埋個夜景,時間尚早可以影完先去食晚餐.

山寮走走

幾好天唔知去邊好,以前會去鳳園,依家去山寮好似仲方便.

二話不說直入神壇,居然真係有蝶影,以前淨係掛住影大頭,今次影吓全身.

影影吓又有蝶加入,唔上神壇影倒影既話,山寮影蝶都係咁上下構圖.

搞咗一大輪慢慢對正焦平,都係時候走,出去的路邊居然見到佢飛飛吓,以前影過但影唔到全隻清,於是跟佢入咗一塊停車位置對面既草地,來咗咁多次都冇留意有既咁既地方.

咦,有蜜蜂飛得好定,瘋狂連拍.

呢度原來都有幾多蝴蝶飛來飛去,雖然細隻又普通,但企個位都幾靚,值得影一張.

紅花山公園

上次去陌上花公園影粉黛亂子草有啲失望,今次去附近既紅花山公園再影過,其實佢交通仲方便,搭多幾個地鐡站直達,唔駛打車.不過佢淨係得粉黛亂子草,貪多樣既我放棄咗佢.

專科係好啲,啲草密好多,而且佢係一個斜坡,從上而下可以影到廣濶效果,不過背景好多樓,而且如果影到天空會死白.

再影多一個角度.

之後就係影吓人,我特登帶咗支200mm來遠影,哈哈,你影草,我影你.

情侶唔好放過.

陌上花公園

網上見到呢個地方,有粉紅色芒草,狗尾草同狼尾草,不過有點遠,要過關再坐45分鐘地鐵,再打車10分鐘.最難係冇內地電話唔知打車有冇問題,結果係唔得的,膽粗粗坐電單車尾入去.

入到園區即刻見到一大片狗尾草,冇乜人真寧靜.

跟住就係走去搵俗稱粉紅芒草的粉黛亂子草,結果係好稀疏,點睇都只係有啲霧既感覺,有啲失望.

至於狗尾草倒是很多,逆光下較有層次,但個天就會變白喇.

公園其實唔算好大,話咁快就去到公園尾座塔,不過為安全計,來既時候已經加咗電單車司機微訊,咁就唔驚冇車走.

香港單車節

停辦三年再開,睇來冇乜新意,偶爾在網上見到起步點既相好壯觀,集中目標想影翻張.

唔知係咪唔想俾人睇,度度都話唔俾停留,官方觀景席基本上係冇人,啲欄杆遮晒車碌,一心想影相既人開始同啲警員有啲言語上衝突,臨到起步,場面失控,跟本冇人理警員,可惜,起步點改咗去個唔靚位,大失所望.

只好影吓好多車衝過來既畫面.

當天男子組大炒車,處理後搞到冇晒時間,女子組被縮短到得翻一個圈,我影完呢個彎位跟住去影起點第二圈,點知變咗影衝線.

之後到全日水準最高既國際組,人多過女子組好多.

國際組會跑好多個圈,影彎位一張就夠,去翻上次個位玩Pan鏡,今次進步啲執走前面條欄杆,盡量影啲多車既畫面.

帶頭的就是今次冠軍,果然有冠軍相,我有幾張相都影到佢帶頭.

聯合攝影大活動

朋友介紹話有個咁既活動,由幾個影會夾埋搞,價錢唔貴包一餐,仲有抽獎同可以參加攝影比賽.

預咗實係幾十人迫埋一齊影,唔好對相片有太大期望,安排頗混亂,久久未能集齊人開始,幾個人見Model準備好就搵佢走埋一邊影住先.白花幾靚但又有石油氣樽,又有垃圾桶.....

終於開始,有泳裝影,自然係迫爆人.

好在Model夠多,分開吓啲人.

人太多,構圖都冇乜.

就咁影個人冇乜意思,有一個空手道擺拍位,原來破板嗰吓啲煙唔係塵來,係預先灑上去既爽身粉,啲人一味要灑多啲,最後就搞成咁.

呢啲動態既啱我,Model不停做動作,快慢快可以試齊晒.

絕對係最多人聚集既地方,玩水花,沙灘球,水槍,飛碟,最後我覺得乜都唔搞最好.