失望馬場

 攞翻啲舊相發覺影跑馬影得唔係咁好,搵一個賽草地日子諗住再影過.順便試埋Pan啲馬.

一心一意諗住去天橋居高臨下的靚位,點知.......封咗,仲有食蕉守住,睇怕又係反修例運動的結果,冇計啦,只好下面企高小小再舉高部機影.基本上只有彎位跟之後一小段直路可以影到有腳.姿勢咁唔穏定玩唔到慢快門喇,只有好普通既高速涷結.

之後影埋個彎位,我見有人有攞梯來,不過唔高得幾多,我見冇乜好影,影咗兩場就收工.

再探坪洋白茅

原本影白茅應該係三四月,但最近Facebook好多人放相,好似都幾密就破例去一次.

上次來以為只有入口一塊,原來行入啲面積大得多,而且俾我搵到有兩個小山玻,可以高炒影大景,首先影張順光既,呀....其實啲草唔夠密,一用wide鏡就現晒形.

影日落先係最大目的,如果啲稀疏白點變成一大片白色就靚喇,只好等啱時候再來過啦.

其實利用低角度係可以做出好多白茅既假像,但係就冇咗大景嗰種感覺.

有小小燒天順便影埋佢.

開始入黑,快門變慢有啲變霧既感覺都幾得意.

紅磡站停車場攝影

又係搵啲舒服方便既拍攝位,今次係紅磡車站停車場.

一到就即搭電梯上頂樓,諗住越高景觀越好,點知......想影既方向俾廣告Banner遮晒.唔通要收工?咪住,可以落兩層試吓,Banner唔會遮到落地下呱?結果去到六樓係避開到,不過好多鐡枝阻住,要除咗遮光罩先申到支鏡出去,一切搞掂,等待最佳光線來臨,影影吓竟然着射燈,仲直接照在鏡頭上面.費事攞光罩喇,用手擋住就算數.搞掂收工.

獅子山攝影

其實作為香港行山人,冇理由連獅子山都未去過,但網上睇到啲景唔係好靚,啲人又講到勁危險會搞出人命咁滯,所以一路都冇去,終於啲起心肝,最多危險就半途放棄啦.

係官方行山徑,路徑明顯又多數係樓梯,其實冇乜危險,政府啲嘢乜都戴咗頭盔先,不過就真係幾消耗體力,行極都行唔完咁.幾經辛苦終於來到獅子頭.可以望到獅尾有人坐在石邊影相.

跟住影個大景,跟在慈雲山影的角度差唔多,網上睇過飛鵝山既相原來都係差唔多.

另一面係好多樓,得過密字,好似冇乜美感.

大埔海濱影白鷺

早排有去開釣魚的同事話我聽見到大埔舊碼頭有好多白鷺跟住啲船搵食,即係我上次特登搭船去深涌影嗰啲.近排爆得咁勁,呢度可以夾硬行去.人都安全啲.

地點是知道了,可是不會整天都有咁多白鷺呱?唔理咁多,三點左右去到,等咗大半個鐘都冇船,但大埔海濱公園嗰邊有人玩滑浪係有好多白鷺追,咁不如就過去影啦,翻屋企仲近啲.不過滑浪離岸頗遠.500mm都要裁頗多.

過咗四點小小,竟然真係有船埋碼頭,趕唔切食回頭草喇,遠影啦,太遠喇,搞唔掂,好彩佢停冇耐又駛出來,把握機會,都幾多白鷺.

跟住大船停咗海中心,冇晒白鷺,影吓細船都好.

之後仲有細船埋碼頭,用盡500mm再裁啦.

知道四點左右有船,搵多日3點45分來多次近影.噢,3點40分離遠已經見到有船埋碼頭,唔係呱?9秒9都係趕唔切.而且另外兩隻船已經迫咗喺度,仲開始落繩做連還船.諗住食白果之際,有隻船要改位移咗出來,又引來大批白鷺,今次超近,不單止唔駛裁,仲要200mm都爆晒框,搞到隻船鬼咁大隻.

影翻張淨係白鷺,嘩,我估幾乎成個大埔既白鷺都來晒咁滯.

白鷺梗係唔係來襯熱鬧啦,係因為船搞起的浪花引到啲魚浮晒上水面容易搵食,影張佢地捉魚先,不過得單隻好似同剛才既相有啲格格不入.

長洲西堤

聽說呢個都係一個影日落好地方,以往去長洲就只知道去北眺亭影東灣.有人話都影到日落,但我估要就啱季節,起碼我就影唔到.

水路都幾遠,去到中環仲要搭40分鐘船,碼頭附近好多漁船,呢度配理日落就一流,可惜佢並唔係日落方向.

去西堤的路並不遠,約15-20分鐘就到,途中見到個位都有一兩隻疏落既船,陣間搵唔到好位就翻來啦,結果去到盡頭係有座山頂住,日落會好高就遮住,無奈只可影正光相.

唯有走翻去之前冇乜船嗰個位,草草完成今日任務,仲可以趕到6點20分既船,可惜係慢船,只係比7點鐘既快船早20分鐘到中環.

蝌蚪坪攝影

又搵到一個市區近近地影日落地點,半個鐘都唔駛就上到來.

景就一般啦,有啲似深水埗嘉頓山,市區樓景.可以睇到沙田水泉澳村.

睇翻日落方向,都係幾悶既樓景,咁近不能太高要求,又係熟識的清水疍.

估佢唔到,個天又有啲爆紅,這個不是改動白平衡既人做效果,我覺得為咗個天靚,夾硬搞到成張相變橙色係好怪的.但這次現場睇真係咁紅.

最後影埋個夜景仲趕得切翻屋企食飯.

大尾篤船仔清水疍

天氣好好,好到一舊雲都冇,燒天應該冇行,唔值得行餐死,一於去車到即影既大尾篤.

我之前來過一次航拍.飛得太高啲船會好細粒,結果只係高地面小小,咁我不如地面用大機影靚得多.雖然有腳架,但啲船仔係郁得好勁的,任何曝光合拼方法都係不可行的.只可以靠相機寛容度硬拼.所以我揀咗白色船仔嗰邊影,會比較易推翻光,暗色底既就好難搞得好.唯一可以合拼既係個天冇接觸到船既部份.最後就係咁喇,好彩都幾多船,個清水疍冇咁覺眼啦.

火燒蠔殼山

又打風,搵個矮山上去搏吓,影日落都係高小小有個地景好過平地高炒.雖然要去到元朗,但巴士到博愛醫院行冇遠就到登山口,上到山頂都唔駛半粒鐘.

果然又中,日落冇耐就開始燒天,火燒天咁既構圖啲人應該會覺得我黐線.係人都盡量影多啲個天啦,可能係心理作用,我覺得旁邊兩個年青人用好奇怪眼光望我.呢個大叔支鏡竟然係水平唔係向天???

今次燒天持續時間比較長,我原本想等到天黑着多啲燈先改變構圖,終於都忍唔住影多啲個天,有啲後悔,雖然個天係幾靚.但那窄窄像一條線的地景始終有啲不是味道.冇乜立體感.早知就等耐啲等多啲燈着影靚第一張.

跟住我作出更奇怪既舉動,就係冇等個天燒完,急急腳走咗去反方向影夜景.本來燒天咁靚應該下次先來影呢個夜景.但我已經郁咗構圖,又未必會短期內再上來就想一次過影埋佢.我不敢望那兩個年青人了,呢個黐線大叔竟然影夜景唔影燒天.

慈雲山雲隙光

這地方其實都幾費腳骨力,幾乎全部係樓梯,不過就最啱我,唔會跣,唔會迷路,付出多一點氣力實在不算甚麽.

終於到了樓梯盡頭,再去就係上發射站的普通泥路,今日既雲有啲空隙,透出所謂耶穌光,可惜時間早,大厦又未開燈,但唔影又驚陣間冇咗,之前影HDR一定係開腳架,懶之下我試吓手持再用PS對正,結果係搞得掂.

時間尚早,行去發射站睇吓位置會唔會好啲.證實係冇嘢睇既,好多樹阻住,去翻樓梯盡頭,樓梯側邊係好多樓既景,今日主力唔影佢啦.

原本想等到接近開燈先影個耶穌光去夾,不過越等越唔對路,光開始變小,嗱嗱啉影咗先再等開燈,今次真係要開腳架喇,冇可能手持等半粒鐘,開燈後光線好暗亦都會手震.

火燒馬草壟

打風天,預感會有火燒天,但又唔係十分有把握,適宜去啲唔好咁辛苦既地方.馬草壟之前影HDR失敗咗,只靠單張推光,今次就算冇燒天都可以用全片幅影翻靚啲.

秋天既太陽側埋一面,影地面偏重既構圖反光會有啲怪,日落啲雲又好似幾靚,就改用咗天空為主既樣圖.

之後就係等夜景,點知等等吓天空既厚雲居然變紅,應驗咗預感,其他在場既人都好開心,之後既夜景反而因為太多雲而唔靚.

誤打誤撞畢拉山

早前去咗一轉紅香爐峰,登山口到頂只係十多分鐘,可能由於太方便,上到去已經成堆人,冇晒位放腳架.得翻好多草阻住既位,夾硬影咗翻去都係剷晒.

只好平日去多次,一時失魂魚錯過咗上山頂個位,越行越唔對路,正想翻轉頭之際竟然發現另一個入口,有啲崎嶇,好彩路程短及有勞工手套,上到來竟然包場,不過角度有差,望唔到會展,再望翻過去紅香爐峰,估唔到都係好多人,隨遇而安影翻個日落先.

大厦大背光一啲太陽光都冇,唔多啱我口味,我比較喜歡斜逆光有小小光到,好自然用提早開燈大法夾夾佢.

後尾我發覺太陽落咗山後既紅霞仲靚過剛日落嗰刻,於是我用同樣方法夾咗另一張,仲自然.

秀茂坪影車軌

見人影得幾靚我又想去影,原本都唔知喺邊度,好彩放大張相睇到個商場係寶達商場,只要去對面搵個高位就搞掂啦.觀塘站係直情有小巴直達寶達商場,對面原來有條好幾層樓高既天橋,得來全不費功夫.

天下着微雨,真係啱晒呢度,因為有頂.天色暗啲燈早咗開,由於構圖中沒有天空,唔駛等個天變藍已經可以開始影,有預感欄桿會好高,腳架又會頂住貼唔到邊,影得wide欄桿就會入鏡,所以帶埋迷你石膏手來,果然用得上.即刻開始影,十分鐘都唔駛就影完,早早地去食飯.

昂船凹二重夾

去這個地方的資料不多,網上只搵到一個,話因為要行馬路邊危險所以唔公開.只好自己搵地圖,最正路既Goggle Map竟然直情冇呢個地方.好彩中原地圖有.路線都好簡單,翔東路旁邊就係登山口.而所謂馬路邊亦都係指翔東路.

好快就到咗,仲有成個幾鐘先日落,搵個陰位打住機等.日落冇雲遮,但就比較清水,簡單做個HDR.

之後就係等夜景.天清無雲,好容易影到好藍既天.但硬係差咁啲,冇錯就係前景好黑,冇乜街燈既關係,就算用B快門都谷唔光個前景.

又試吓用提前開燈大法,結果只係換咗個天同海,草光咗小小,但暗既地方依然都係好暗.

最後我諗到不如用日落HDR嗰張夾夜景.只取奇燈光及車軌,終於啱心水.

之後仲可以影埋欣澳站嗰邊夜景,但由於要保證夜景個天空夠黑夾相先唔會出事,已經錯過咗最好既時機,只好夾硬影光個天再夾,效果變咗麻麻地.

首次飛甩

影完煤氣廠覺得幾得意,雖然我知道發電廠冇煙噴冇咁好玩,不過南丫島發電廠好似冇乜好位影,應該幾啱用航拍.

天色灰沉沉,日落又冇行,但我都飛出去練習吓路線先.睇以為好近,原來要飛好耐吓先到的,影到三支大煙通.冇日落,冇藍天真係冇乜睇頭.

順便轉個方向影吓島上面景物,都係好一般.之後我想飛去正面影個全景,真係勁遠,呢個時候....訊號弱,請調整天線角度,未夠遠哦,再搏多小小,卒之,畫面變成定格黑白,死火,飛甩我其實都試過,上次影鳳眼籃出事後個鏡頭唔郁得,但當時距離近,可以靠目視自己回航,今次都唔知去咗邊.只好靠自動回航,好在,聽到引擎聲,執翻身彩.

到咗夜景既時刻,剛才陰影仍在,都係唔好飛咁遠,就咁高高地影側面算數.實在係好暗,ISO 400都要用到兩秒,只好狂影多幾張,最後都有兩張中.

上白泥影蝶

朋友通報上白泥有美姬灰蝶出沒,我沒有影過,雖然比較隔涉,但都決定去一趟,而且仲可以順便影埋花燈街.

由於要影花燈,架小巴又取消咗一班車,去到已經係中午,大家已經連美姬交尾都影埋.唔緊要啦,單隻美姬好多,不過原來幾乎全部停在暗位,唔夠光之餘好易黑底.幾經波折,先影到一張個底比較光猛既.

之後都係差唔多,影到冇乜心機,去出面睇吓,見到佢,好似係普通嘢但都排晒隊.難得有黃花襯.

有訊號山下有美姬倒影,於是成班人湧晒落山,諗住排隊都唔得,隻蝶轉來轉去,只好圍住佢碰吓運氣,轉到啱焦平就影,我運氣比較差,到我影時形態唔係咁靚,但點都好過超暗位影.

翻上山,竟然有交尾,又排隊影餐飽,自從加入咗景深推疊既技術之後,我覺得最大作用就係影交尾.因為兩隻蝶個頭點都有小小距離,就算其中一隻點啱焦平都好,另一隻都可能會矇,單張得一個做法就係影到好細再裁大,但裁得多畫質會好爛.依家就兩隻都可以數毛,而交尾兩隻蝶係好定,可以慢慢影清楚.

差唔多要走,否則會好難搭車,見到佢飛出來,扒地影埋佢,弊,唔記得裝咗1.4X,幾乎爆框,不過影完又覺得幾合我風格.