2016年10月31日 星期一

影波波

一直想影一次渡海泳一直又冇去.呀………唔係大會攝影,冇得在船上影,起點影只可以影後.就算終點都應該要隔九里遠,影特寫冇乜可能,只可以影吓個海好多人咁,咁啱天文台話落雨搞到取消晒啲約會,點知又鬼咁好天,就去呢個睇吓點…


既然起點實係影後就去終點啦,一如所料,面向終點位係欄住既,幸好都有觀眾區(有啲比賽真係好離譜架,例如西貢龍舟競渡咁,全部睇到既位置都劃晒俾乜乜會,物物會,好似個海俾佢咗租咁).雖然位置麻麻,只可以睇到賽道中間部份.比賽好似馬拉松咁分爭標組同Hea組.爭標組其實好疏落下,一個個咁到終點.鏡又唔係好夠長淨影一個,效果麻麻.


用長鏡勉強可以影到終點位.到達的運動員排晒喺浮台上.朝早斜射既陽光好靚,色濃又沒有太多難看的陰影,同Hea組唔同,身上沒有浮泡,號碼就直接寫在身上,該是避免浮泡有阻力影響表現.


之後Hea組開始到達,多咗橙色波波,即時色彩繽紛,其實唔駛咁早來,爭標組都冇乜好影,除非可以上船影.


跟住就係要影好多波波,側光影再影wide啲就會得翻中間一條線咁,唯有逆光影.啲人黑晒都冇辦法,亦都唔係越wide越好.冇錯wide啲係可以影到多啲波.但就會變得好疏落,所以要攞個平衡.


雖然是Hea組,其實都好辛苦的,當晚新聞都有報導當日有暗流,我都聽到啲人講,乜游來游去都好似冇郁過咁既.咁又係喎,好似停咗喺度俾我影咁.見有啲人個樣已經好辛苦,睇怕可能完成唔到比賽喇.如果有人游咗好耐,諗住就快到,點知突然隻腳掂到嘢………原來係起點,咁真係會好傷心哦 @@


有啲人直情游吓背泳浮吓水,休息一陣先再算,游背泳渡海,要影 :P

其實除咗咁就冇乜大變化架喇,一路都係有啲波波郁緊咁囉,順便影吓啲工作人員.哈哈,波波散景仲要係橙色架,影蝴蝶影好耐都冇乜可能遇到 :P

2016年10月26日 星期三

樂遊高雄

係呀,又再去,已經係第三次去.原本想去未去過既花蓮.睇完旅遊書之後覺得除咗個海洋公園同金針花海之外就冇乜特別.金針花海又應該未係時間,交通又唔係好方便,而高雄,剛有左營萬年季,舞火獅,放烟火...........呵呵.


今次舉辦左營萬年季的地方是蓮池潭,但確實舞火獅及放烟火的時間唔確定,網頁說活動有一整個星期,平日只有夜晚有活動,假日早晚都有,旅程中又係假日就只有頭一日,所以一落機去酒店放低行季就去.表演唔多見,淨係好多賣嘢食攤位,有啲似朝早開既夜市咁,唔緊要,我有Plan B,就係影龍虎塔夜景,新腳架大派用場.點知拍攝位置係在木橋上,一有人行過會非常震,冇可能用長曝,走前小小到水泥地又好多人遮,侷住夾硬影,25秒唔掂,6秒都唔掂,最後唔理得咁多喇,天全黑都搞唔掂就會白果,終於開大光圈,稍提高ISO,用2秒連拍,最後真係得一張可以,早知揀淡季來好過.


除咗腳架,我仲帶咗好小會帶既魚眼來,其中一個目的就係影美麗島站既光之穹頂.除咗魚眼,應該都好難影得晒呢個景.呢度都唔駛好特登來,就在捷運站裏面 :)


影完相要去玩吓,持登搵咗資料來草衙站太魯閣購物玩樂中心玩小型賽車,未玩過要先上堂,講到鬼咁危險,又話撞爛架車要賠,搞到我唔敢去咁盡.不過我都上到當日頭15名架.個榜不計總成績,只計最高圈速,就算跑完一個圈就抄車都有機會上榜首.除咗賽車,仲有其他機動遊戲,打棒球等,續樣計錢,冇乜人玩,唔駛點排隊,此外嗰度仲有商場食肆.可以消磨一日都得.


晚上又係影夜景既時候,漁眼另一個計劃就係影新光碼頭呢個景,好奇怪,天文台話日日都有雨,但其實日日都幾曬.偏偏下午又會變到成天都係雲.原本實食冇黐牙既夜景竟然由籃天變成白天,更加搞鬼係當個天黑晒,已經執晒嘢想走既時侯竟然着燈,噢......不是影碼頭的季節 @@


原來淨係捷運站直達都去到好多地方,睇旅遊書橋頭糖廠冇乜睇頭.就係睇吓啲已經廢置既火車呀,廠房呀咁......實際上都係,但原來去遠小小有騎馬玩同埋.......小型賽車.呢度啲車冇太魯閣咁靚,而且冇放滾架,冇安全帶,賽道上既防撞欄亦只係一堆車呔.但價錢就只係一半,終於又同老婆包場玩咗轉 :P


今晚要搵個穏陣既地方影夜景,就係85大樓觀景層喇.比起星架玻,佢有玻璃擋住,要處理反光,但佢入場費好平,而且.........可以用腳架.四面都係景都唔知影邊忽好添.最後影有海既兩個位啦(Magic hour得幾分鐘),真係好手忙腳亂,又要攞住風褸遮反光,又要攞快門線,仲要攞手機睇B快門時間,終於用埋口先掂.最後.......慘,有一張竟然遮唔晒啲反光 :(


呢日要去都幾遠既田寮月世界.可以搭捷運去到尾站南崗山再轉公車,但公車班次好疏,9點之後就到11點.唔想煩包咗的士入去.個司機做埋導遊講我地知點行.我冇聽佢講一去就去咗門口介紹既胘月觀景台,確實係廢的.除咗舊嘢幾得意同有個日昱之外,景觀係麻麻....


行翻轉頭去一個叫做觀景台既地方,呢度就似樣啲,角度算幾好,可惜個天好灰,後期點搞都唔藍,我發覺呢度好似冇乜人打理.入口處顯示所有觀景台啲路都係有危除封咗的.唔通一場來到淨係入口個湖行個圈就走?而事實上啲路真係有問題的,胘月觀景台條樓梯可能打風,有棵樹跌咗落來,要捐過去.觀景台仲離譜,有一忽俾山泥仲歪咗.都係夾硬過.......


我估個司機等咗我地幾個鐘都係想我地搵翻佢回程,咁我地都好識做既.佢中途仲車咗我地去阿公店水庫,不過我就覺得冇乜特別,除咗有條橋之外個水庫就係一池水咁囉.
唔記得講吓間酒店添,佢叫康橋商旅,早餐勁豐富,要肉有肉,要菜有菜,有包有疍,雪糕都有,除咗冇生蠔同魚生之外,同食自助餐真係差唔多.而且夜晚有點心,係食得飽嗰隻,如果冇乜要求可以慳翻一餐,我地就晚晚都來食紅豆豆腐花.仲有呀,有免費自助洗衫添呀.

2016年10月20日 星期四

水運會攝影

游水係影過,不過今次有啲唔同係影室外.夠光可以用快快門影成功率一定會高好多.天文台最鐘意玩人,預報係落大雨,搞到又要帶遮又要帶雨衣(泳池邊唔俾用遮,吹咗落池會好麻煩),結果呢……曬到爆.


由於超多人去影,要25人一組分三段時間落池邊,其餘時間只可在觀眾席上影.我一向準時,被編到第一組.弊……中招,頭段係兒童組,咦…點解唔係去跳台,而係池中心落水既,原來係25m呀,沒有比這個更差 @@


真係想死,游得慢不特止,實力仲好參差,有啲直情唔夠氣完成,有都游到散晒,好難得先影到兩個平排既畫面.


沒有最慘,第一組時間話咁快就完,要翻上觀眾席,觀眾席仲要係對住左面,個個游捷泳都係右面呼吸.即係冇得影,睇住B組影青年組狂影真係爆血管.好在仲有幾場背泳可以影吓.唯有寄望下午可以抽到好籌啦.


皇天不負有心人,原來呢班人比較懶(忙),好多影完上午就走.變咗下午得翻一組,即係唔駛再翻觀眾席.仲可以正面去影蛙式,等我煲到有咁大頭得咁大頭先.再加倒影,再加水花,呵呵.

評判真係唔多通氣,企正終點位,只可以從佢地中間啲隙影,幸好下午人不多,否則分分鐘會爭位.蝶式由正面影雖然好行貨,但又真係咁先靚的,上午影就好啦,依家大背光,事後執餐死.


一直都想影起跳嗰吓,不過一邊係裁判位(都唔知點解咁多裁判位)唔俾企,另一邊既橋又係通道唔俾企.終於等到有接力賽,可以在池的另一邊影跳水,但想影成堆人跳就冇喇,而且有啲項目竟然係在水中接力,真正影既機會得幾次.又開始冇陽光,始終影唔到一張在空中又sharp的.


最後仲有推水泡比賽,呢啲比賽都係得淡笑,冇乜緊張剌激可言,隨便影幾張囉.

2016年10月16日 星期日

不是影橋的季節

青衣自然徑二號觀景亭係出名既青馬橋拍攝地點.咁其他三個觀景台呢?去過一次好似完全冇料到.周圍俾草木遮晒,都唔好講靚唔靚喇,直情景都冇,只可以從樹隙中間睇到小小橋景.但係見人話三號觀景亭都睇到,可能搵吓路都有機........


細心找尋之下原來真係有路,諗住一陣就到,點知原來好遠的.穿過鐡線網唔在講,仲要行斜到死既引水道樓梯.可能冇乜人行既關係,舖滿晒樹葉.一不留神就會跣親.越行越入真係有啲驚出來又迷路.付出係有回報既,對正青馬橋既景真唔錯.可惜煙霞比較大.雖然影到咸疍黃但個天就白茫茫.


再影大小小,然之後就係等天黑影夜景.呢度鬼影都冇隻,有小小恐佈,特別係陣間入黑要搵路走真係有啲驚.不過就唔會悶,因為有無數既蚊陪你.我攞住支蚊怕水好似填色咁塗偏身體每一吋露出既地方@@


死火,天已經越來越藍,做乜橋墪仲唔開燈架.哎呀.....我記得喇,係要七點先開架,越等個天越暗,心中仲存有一絲希望可以夾硬谷光小小個天.終於真係七點先開燈,個天已經黑到墨汁咁,早知唔等啦,成張相得翻黃同黑兩色.藍天沒有了,下次要記得影橋一定要日長夜短既夏天先好來.

2016年10月11日 星期二

陽光燦爛田徑賽

說起來已有很耐沒有拍攝田徑,天文台原來話天陰有雨,諗住又係捱相,點知曬到燶.......


雖說戶外又係日賽多數夠光.但如果計埋焦距同項目就唔係咁講法,擲鐡餅要用到盡500mm要影到半身.而且掟出去嗰吓速度非常快,1/1000都會矇.應對方法可以改為影全身或者谷ISO.當然用500mm F4都得,冇錢既方法就係等太陽曬住,用細光圈都夠速度時影,轉三轉先掟嗰啲真係搞唔掂,用到ISO 800, 1/800秒勉強影到.放大後竟然發覺有一隻眼係太高速而矇咗的.


另一個項目我發覺又係一天陰就影唔到的.跳遠雖然唔駛用超長焦距,快門要幾快都得,但向前飛嗰吓好考驗對焦能力,一天陰慢小小就係影到同影唔同既分別,今日曬到咁真係冇得頼.


睇翻賽程表,標槍,推鉛球同跳高都係冇既,好彩仲有持杆跳,呢個項目好考耐性,枝桿較來較去,等多過影,而且成日失手,搞一大輪先有相,仲要有啲望左,有啲望右,走來走去,同運動員一齊運動.


以往冇乜人玩持桿跳,一陣就影完,今次影到下午都仲有,可惜已開始背光,影埋呢張要去影跑步喇.


影張起步先啦,為咗要8條線入晒鏡,換咗支短鏡,費事用雨部機喇,400米的關係,影完即刻換長鏡都夠時間.不過8號仔好似發緊夢,個個郁晒先識起步.


長跑就係襯佢未散影佢有一堆人.


幸好還有跳欄,否則會全部都差唔多.哎呀,俾隻手遮咗面添.有人講過運動員選手水準高的話係唔駛靠隻手帶個人上去的,影劉翔企在側邊影都影到佢個樣.


影埋接力就收工,今次又係企定定接棒制,冇咗一大堆人跑緊接棒既場面.雖然着晒防曬裝備,但塊面依然深咗色好多.

2016年10月6日 星期四

中伏鐡矢山

拍攝風景時有建築物可以點綴一下,特別是夜景有燈光可以唔駛太多黑位.不過我唔係太喜歡四四方方既,或者實用率係好高,不過美感就……見到早禾居圓形既設計覺得幾有趣,網上路線亦好清晰,而且拍攝點山高二百多米,算矮.啱晒近日唔想咁艱辛既我.


睇地圖既話,鐡矢山是在另一邊的,這個山其實冇名,入口好易搵,就在早禾居旁邊既樓梯登山就得.唔明點解行山人咁憎樓梯.安安全全冇意外又去到要去既地方咪幾好.報應來喇,樓梯只係一小段,好快就到密林.路邊既草仲多過太墩.真係有啲驚陣間走既時候行錯路.報應又來喇,做乜啲路越來越斜,而且好多碎石.但捱到半山點都唔走架喇.哎呀,計算錯誤添,因為日落俾山遮住,時間早咗好多.趕上山頂有啲敏.而且嗰段差唔多俾草遮晒咁滯,入黑走好易迷路,再而且,山頂係睇唔到早禾居的.罷了,呢度影日落都唔係太差.雖然山頂的話可以避開前面堆雜草.原本要在極斜既山路set腳架,最終俾我搵到路邊有舊大石勉強可用,否則一個不留神分分鐘粉身碎骨.


最完美既做法梗係上山頂影完日落,之後嗱嗱聲襯Magic hour之前去翻呢個位影早禾居啦.不過萬一趕唔切咁就蝕大本,都係企定定吹下風等影夜景算喇.落山路程又可以近啲.今日空氣真唔錯,遠景都睇到,真係可以直出唔駛點執,平時遠景多數要暴力PS先勉強睇到.


再影多張大特寫就要走喇.真係好恐佈,我差唔多成程都係半瞓低既姿勢先敢落去,大斜度,會親吻你既雜草加上碎石,每行一步都十分耗勁.勞工手套都幾乎抓唔穏.沒有最衰只有更衰,我竟然真係行錯路,去唔翻條樓梯度而去咗一條旁邊只有非常窄路既小水溪.好在見到不遠就係馬路,行翻轉頭就咪搞喇.小心啲在水邊爬過去啦,一個唔小心,終於踩埋水,幸好都走到唔係掘頭路.出到去發覺成身上下勾滿鬼針草,有排清,呢度竟然係我去過咁多地方之中最高難度級別的,一次就夠,下次咪搞.

2016年10月1日 星期六

再探散頭村

最近跟成日去影蝶的朋友影相,多咗搵特別品種,唔同我以前淨係去鳳園咁齋.今次係去散頭村搵美姬,實際上我唔知係乜來,只係未影過就想影.之前其實去過一次,可是年代久遠,老人家記憶力又差,已經完全忘記咗點去 :P


經歷過上次去企嶺影三弄暗位難以手持既教訓,入手咗輕便腳架之後每次都帶去,但都冇用過,今次終於又見到暗位既馬弄,仲唔影到數毛.可惜係成村人排隊影,即使以最快速度開好壇無奈硬係有風,搞得幾搞俾人鬧只好放棄,搵隻冇乜人吼既common弄玩玩.事實跟想像好大出入.暗位加上有風既關係,快門非常慢,收光圈,低ISO跟本做唔到,搞到成頭大汗,最後竟然係ISO 1600, F5.6, 咁既設定快門只有1/15秒.結論係就算有腳架,暗位都唔係實影到的.


今次唔多駛自己搵蝶影,啲人搵得好快,一見人聚集又可以埋去排隊影,好小停低既黃粉在吸水,咁啱背光我支閃燈又放咗好遠,唔理咁多影吓透光,事後執光個頭小小就算,本想影細隻小小加埋後面啲水既反光做散景,點知佢飛到起近,頂背脊都幾乎爆框.後面啲人又好唔耐煩,求其影咗就算.


其實一入村已經見到好多一點灰,但白色既佢真係好易黑底,影咗好多都冇張鐘意.終於有一隻停在陰位,反差冇咁大,可以拍出背景不是全黑的畫面.但陰位意味住手震,好彩機身可以貼地冇咁震,光圈無可避免要開大,最後用1/60秒拍了一大堆,真正可用的只有兩張 @@.


一點灰的機會繼續有來,停了在之前黃粉嗰個位.加埋陽光照射就可以做出波波散景.影蝶界有個不成文規定,一班人排隊既話就算排到你都唔可以影到飽先俾後面影,因為隻蝶隨時會飛走,只可以影一陣又要去隊尾排過,要影光點一定要有太陽照到啲水,剛剛有雲的話咁你嗰轉又係white do.我好彩,啱啱到我既時候有陽光.不過由於影微距,尤其咁細隻蝶唔可以開太大光圈,支鏡光圈葉又小,結果就係起角散景喇  @@


之前影一點灰已經見到有隻角翅弄蝶,但佢扒地開翼黐晒地,終於在另一個位見到佢,成日俾人話我影得太大隻,影翻細小小先...........實情係佢前面係凹咗落去既地形,埋唔到去支鏡又唔夠長既結果..........我絶對係想影大隻啲架 :P