影婚紗相

已經好耐冇影過Model,這原本是上年的活動,限聚令下一拖再拖咁就搞到三月中,我仲以為安排兩個人影,原來係四個,真係自己呃自己,加埋Model,化妝師,領隊點數都係七個人啦,陣間一人五千蚊就......

影Model好多時都係行行企企,求其搵塊牆又話係景,我都小影咗好多,不過呢個活動話會好似影Pre-wedding咁,有飛紗,有壓光咁又有啲興趣,一開始領隊就幫我地打反光板,效果又幾自然,最主要係方便過用閃好多.

只係一陣間,只係一個位,跟住領隊就閃咗去,求其叫Model去太大陽下就算數,結果一係黑晒面,一係成面影.

一路都係行行企企,講好咗既飛紗好似唔記得咗咁.

原來最尾都會玩一下飛紗,只限頭紗,同預想有啲落差,都好過冇啦,不過壓光就真係冇喇,都估佢咁懶冇可能托支影樓燈出來架喇 :P

小白鷺餐廳天空之鏡

早排搭火車經過見到小白鷺餐廳終於拆咗啲竹棚,決定搵日去影吓佢倒影,上天文台網頁見到微風先去.

水面果然幾靜,行過對面岸可以對正正面影,實際又只係普普通通.

影吓另一面既樹木,只係差幾棵紅葉,否則同流水響都冇乜分別.

這個景很普通是吧?請留意一下左上角的石塊,佢實際係水底下的,這其實是一個倒影反轉的相,可以看到水面有幾平.離開時見門口有一堆鬱金香,只得Wide鏡個景又好似冇乜特別,花展都影過就冇影,點知翻到屋企睇FB先知原來好多人係特登去影的.

我覺得夜晚既倒影應該幾靚,於是又來多一趟,天文台明明話係微風,點解啲水咁鄒既,而且四周是山又冇燈光,黑媽媽淨係得間餐廳都頗平淡.算啦草草影完收工.

影木棉

木棉由於有好多雀鳥會去搵食,影出來內容會豐富好多.以往都有影過,不過天橋高唔過啲木棉樹.多數只可以低抄雀仔肚....

今次搵到停車場旁邊有木棉樹,可以上到四樓,水平影角度靚得多,之前用200-500mm光圈太細,ISO用到好高,今次改用300mm F2.8再加1.4增距影.焦距雖短小小,但入光量大可以唔駛咁高ISO,畫質好啲.最難搞係相思仔,得手指尾咁大,裁好多先睇到佢.

雖說光圈大,加完1.4X得翻F4,再要收一級先sharp得翻F5.6,現場實在係暗,勉強再開大到F5.0,銳利度還可以,都要用到ISO 1000先有1/320秒快門.雀你種類好多,眼見都有接近十種.

大隻既就易影好多,容易對焦亦唔駛勁裁,我呢個快門速度其實好保守,隻雀郁小小都會矇,只好影多幾張搏有張中.

即使ISO 3200都勉強可用,但咁係基於唔裁既情況,勁裁既話其實雜訊都會放大埋.此時開除雜訊係會滑咗,但羽毛上既細節都會變到一 pet pet.雀在花中間幾得意,但就唔夠突出囉.

樹下面更暗,侷住將快門降到1/250秒.

其實今日主要目標係影松鼠,上午一共出咗來三次,都係要用1/250秒搏嗰啲位.總算叫做影到.

將軍澳誇灣大橋

經新聞講一講,近日好多人去影嗰舊預制件,我自然都去襯襯熱鬧,由於舊預制件離岸邊頗遠,最好既方法就係航拍,亦可以就啱日落方向.不過唔知乜事,一起飛已經話訊號有問題,唔理照飛,點知一飛上去部機就直去,大驚按Home,部機竟然立即降落,停咗再按,終於正常翻,都係唔好飛喇,用單反影.

死火,啲圍欄好高,腳架仔開盡都唔夠高,好彩朋友提醒我可以放圍欄上面,條橋未起好肯定唔會開燈,即係要入黑前靠外來光影到夠光.為咗要影多一個角度,冇時間影太多相夾,由得啲船矇.

所謂另一個角度就係對正條橋,天黑得好快,要兩分鐘快門先夠光,反正唔駛再轉位,我就開大光圈,加高ISO影清啲船.搞掂收工,希望條橋完成時呢個位仲有得影啦.

影桃花

最近人人都影花,我又襯熱鬧去影一下.網上見到有人話萬德苑桃花幾靚,順便當行山去咗一趟,呀.....睇地圖好似好近,原來都要畀小小氣力的.

一早來到得我一個人,同棵花影個全景先,都知實係會好亂架喇,只係紀錄吓.其實我覺得會唔會係梅花呀?

跟住開始影特寫,由於棵花後面就係山,好多位都係影到黑底,得翻啲窿隙可以影到淺色底背景.

平時影花特寫好難影到全清,一大堆花如果只係得好小部份清係正常,我今日就試吓景深堆疊整整佢,難度原來都幾高,主要係有風,等到冇風基本上係冇可能.只好將目標降低,盡量一個平面既搞掂就算.

晏小小開始越來越多人,有人抱怨太陽未出來啲花唔夠色,都啱既,不過我反而喜歡散射光所帶來的均勻光線,但係就小咗強光既戲劇性效果,呢個時候亦越來越多人,所以我決定唔等太陽早啲落山喇.

銅鑼灣日落夜景

啱啱行完山,腳仔仲有啲攰,但陽光又幾好,唔出去好似有啲嘥,於是就揀咗告士打道天橋影銅鑼灣日落及夜景.

由於啲大厦好高,日落比預想早,幾乎趕唔切影.不過之後有啲燒天,仲靚過日落,慣常用提早開燈大法去搞.居然出事.畫面中有兩盞街燈既星芒疊到個天,唔夠個天光短咗一忽好古怪,整暗燒天嗰張或者加光夜景都會令個天變成紫色,雖然紫色也無不可,但我比較想個天紅啲,把心一橫,油走部份古怪星芒變成單向.第二個問題係燒天嗰張原來有架車啱啱駛出引起鬼影,可以唔搞既,但啱啱夜景有張可以補上去就試試,色好難夾,叫做搞咗,但海面有小小怪.

影埋夜景係指定動作,冇乜燈光既關係,就咁影個避風塘會好黑,正路做法係加長曝光影多張夠光既補上去,但我想做多一步就係保持啲船唔好矇.加高ISO無可避免,但單靠佢張相會有一忽勁多雜訊,所以要適當開大光圈.最後係開到F3.2,幾乎開盡.之後最難搞係帆船上面既一支支杆,由於啲船會郁,唔絶對蓋過晒係會見到船杆斷開兩截.蓋過晒個天就要夾色,都幾花功夫的.