把鬼潑水節巡遊

上年咁啱要出外去唔到,今年一於影埋巡遊加玩水.

 

未來過,究竟守街頭定街尾好呢?最後決定街中間,風險最低,終於我知道係由左手面出發,失敗呀,原來可以企正路中心影正面.不過已經走唔郁喇.

 

 

有冇搞錯呀?想側側地影正面都唔得.大會只係預你食蕉過咗用wide鏡影側面,之前以為好正既位反而變咗乜都影唔到,塞翁失馬....

 

 

死火,我得支135mm諗住影正面,依家搞到張張都幾乎爆框,但又唔係好想轉支24-70mm影到亂糟糟.成個隊伍最多動作就係佢喇.亦都慢慢俾你地影個夠.

 

 

側側地都好過冇啦,超花背景就冇得避喇,只好開盡光圈化化佢.

 

 

影半身等佢再矇啲.

 

 

影埋佢之後既隊伍係完全冇辦法影,因為啲人個個走晒出欄杆,跟遊行隊伍溶為一體,亂到七彩,個個鬥wide,影都無謂.諗住等下一隊啦,原來冇架喇,怪唔得只預一個鐘.之後要等一個鐘先開始潑水,但個天已經等唔切開始落雨,我都無謂等早啲走喇.


 

飛燈又出禍

又到可以夜攝既季節,一於帶埋合作慣既Cactus引閃同埋閃燈去松仔園.

唔知點解,近年越來越小蟲,可能係氣候改變,泥涌都變咗冇青苔,冇計啦,唯有將影過既嘢試吓影靚啲.好嘢就唔多見,蛛蜘都仲係周圍都有,佢有個好處係多數有個遠既背景,飛燈好容易就做到靚散景.用引閃搭棚都幾得人驚,引閃加閃燈其實頗重下.雖然相機熱靴係金屬,但引閃腳同閃燈腳居然係膠既.

又見到最想影既飛蛾,始終未影過好完整既梳形觸角,次次唔係景深問題就係角度問題.今次終於成功.再講翻引閃,每次帶好多電芯真係幾煩,尤其夜攝,兩支閃燈,引閃,LED燈,已經有16粒電,仲要加埋士啤電,每次淨係電芯都要帶幾十粒.

冇嘢影只好又影蛛蜘,今次要將支背景燈放到成米遠.一支燈影既話背景肯定全黑,個Cactus引閃有小小延遲,大約半秒,影人關係唔太大,但手持微距就分分鐘由中焦變咗唔中焦,始終手唔係咁定,都冇計.

有小蟲,一嘢影到佢1:1,出奇順利,影咗一張就搞掂,但事實都仲要裁好多先有咁大隻.由於有青蛙叫,我又走咗去影青蛙,在路正中,背景好乾淨,佢地多數在亂草中,但問題係好難走埋去放支背景燈而唔嚇走佢,算數,求其側側地希望都夠效果,死喇,畫面變黑,應該又係接觸出問題,Sony係電子觀景窗,閃燈一唔通就會反影現場光,夜晚即係全黑,通常拉實小小就冇事,不過Cactus引閃個lock位係冇限位的,太大力就會拉過龍,我已經拉攔咗一個,只可用來做接收,今次只係輕力,不過啪一聲,唔係限位爛,係隻膠腳裂咗,變咗搖搖欲墜,冇得影收工.

絶望泥涌

上年四月先去泥涌影日出加青苔,結果係一忽忽好似生廯咁,今年決定要補考,我其實唔係咁鐘意用呢個字眼,因為多數人既所謂補考只係做翻失敗嗰次一模一樣既嘢,所以基本上補幾多次都係會肥.

正因為咁,我要檢討吓上次點解會失敗,應該就係太遲先去啦,所以今年要由三月開始,每個水退的假日都出發監察住,除非青苔期只有三幾日,否則點都應該好過上次.三月頭去係未有,第二個星期都係得小小,第三個星期都係差唔多,睇怕可能都真係咁上下.加上天陰陰,連日出都冇.

冇錯個地係有啲青色,但人地嗰啲係好密的,連突出來既石都好似有塊草皮蓋住咁的,依家又係生廯咁.睇怕可能唔係年年都有,又或者真係得幾日撞正翻工日子,只好放棄啦,實則咁早出去都幾辛苦的,要搭頭班火車再轉亡命小巴.影完先啱啱好食早餐.......

328影曲棍球

有一排冇攞支328出去晒太陽,以往影曲棍球都係用200-500mm影,係好方便,但畫質頗鬆散,仲要小小陰天都唔夠光.依家可以影靚啲.

京士柏真係好,有厠所,有飲水機,有觀眾席,仲有頂,幾hea影都得.我見有人直情開住三腳架,耐唔耐先影兩張.坦白講曲棍球其實都幾千篇一律,來來去去都係用碌棍爭吓波,又或者對方未到就一棍打走個波.328中焦既解像力真係爆燈,我影影吓都慣晒全開光圈影,爭取最散散景.

淨係得兩個人爭波太悶,影啲一堆既,全片幅來講300mm事實上有啲短,我試過加1.4x,解像力還可以,但追焦就好差,慢之餘成日唔中,都係留翻來影唔多郁既嘢算喇.

都係爭波畫面,但比較肉緊,原本由F7.1(用200-500我唔會全開光圈)升到F2.8應該夠用有突,但佢係定焦,作戰範圍有限,所以入射程我就希望中,唔好搏,快門最慢都1/1000秒,結果陰天既話ISO都試過去到1600.

影到人飛身,呢張就係ISO 1600先有1/1000秒,唔好以為咁快實清,其實叭地前影到兩張都係矇,到地減速先影到清.

好小影到龍門真係救球,因為多數都被後衛救咗又或者成堆人阻住影唔到,呢張其實都救完,不過見到成堆人又有啲水花就照影啦.

嗰日泰國隊好掂,大數對手,完場時竟然有觀眾走去派錢,有五百蚊咁多呀.

俾Goggle玩死

要對大家講聲唔好意思,上次冇咗頭像冇咗名以為衰事已告一段落,沒有最衰,只有更衰,依家連留言都唔得,明明登入咗入到文章又要登入,登入又出翻來,我已經變咗個外人,如果搞唔掂恐怕就要從此告別大家,放棄寫Blog習慣喇.

影浮屍

心血來潮,要搵日放工搭船過去影呢舊嘢,可惜佢係停香港嗰邊,停九龍直情行過去影就得,上海運停車場都見到佢,不過就太遠.

 

諗住星期四來應該冇乜人,原來都唔小,尚算可以行到最前面,下面實在太近,我得24mm影唔晒成隻公仔,而且我想快快門影一張公仔再慢快門影靚對面海.個公仔疊到啲樓會搞唔掂.好彩附近都有啲高位,但一係角度唔好,一係好多嘢遮,嘩,遮咗半隻公仔咁滯.

 

 

大會都知個個想對正自拍,封咗中間個台要限制人流,出幾多入幾多,排咗一陣就入到,對正係好得多,影到最wide影埋前面啲人比較吓個公仔有幾大.

 

 

此行目的係為咗影夜景,入得來就唔出翻去喇,都係等半個鐘,咁早開腳架阻住人自拍唔係幾好,差唔到啱天色先走埋去嗱嗱聲影幾張.人算不如天算,冇錯公仔係做到唔黐大厦,不過嗰兩隻船就唔到.只好將就將就,ISO 200,快門盡量慢希望可以收多啲光圈,最後1/2秒,F5.6.事後幾乎唔駛執,個公仔有射燈射住,超光,只要等到個天一樣光影就得,再黑小小反而搞唔掂.星期五睇新聞,原來隻公仔竟然提早走,如果放假先影就影唔到喇.