影攬球賽

朋友通知有攬球賽.........不過係最迫人既15人,見冇乜地方好去,都去玩吓啦.

一共只有三場比賽,首先出場係男子賽,影個最容易影既攬人畫面.個動作唔難影,最難係佢地唔好先攬埋一堆.

要襯光線夠,盡量影啲跳躍畫面.

第二場係女子賽,亦係最容易攬埋一舊既比賽,加埋雜亂既背景,真係冇眼睇.

好難得有個啱啱好射程影到既界外球,好多時一係爆框,一係太遠,今次幾乎唔駛裁,到呢度發現Sony改咗機背對焦掣,以前可以一按停咗個追焦,依家冇咗,搞到唔可以對定焦等,幾乎嘥咗個咁好機會.

最後一場打夜戰,光線超暗,志在參與,慢快門都有慢快門好,可以見到隻腳既動感.

呢張有啲幸運成份,對到焦又啱啱跳到最高,快門慢啲都唔矇.

鷹巢山自然教育徑

又去懶人地方,入口就在石梨貝水塘附近,全程容易行.

不過影相位得一個,而且好普通,淨係得啲樓.

添馬公園發光玫瑰

花展太迫人,走去影吓死物.這個景其實之前出過,當時冇影.

五點半就開燈,不過唔多睇唔到,天太光,之後天色變暗就開始明顯但天空依然太光,所以先影吓冇天空嗰邊.

終於等到天夠暗,就影張有紅又有藍,最多花既構圖.啲花發光會有光差太大既問題,唔係花爆光就係周圍黑晒,而且因為近既花太近,會有景深唔夠既問題.於是要HDR再加景深合成去處理.由於HDR要不停改光圈快門,好易郁到部相機,我設定咗用包圍曝光同電子快門,要郁既只有對焦環,果然事後連對正都唔駛.

紅色花似乎好易爆飽和度,決定走出啲只影藍花,花小咗但確係易啲出到啲紋.

長征長排頭天池

這個計劃了很久,要好天又要大水退,仲要係星期六或日.總係好難滿足晒所有條件,等了又等,卒之等到九星連珠,龍穴大開之時先成行.網上資料由鹿頸出發來回要五個鐘.加埋我唔識爆林,靠綑邊嗰段要多三倍時間,最後連埋開餐,用咗六個鐘先搞掂.網上話一路跟住荔枝窩方向路牌就得,去到榕樹凹村我都係咁做,越行越唔對路,但手機冇訊號,冇得靠Google map,直至去到高位先發覺去咗鎖羅盆方向,要行翻轉頭,白白浪費咗時間同體力.過程中我係直情搵唔到爆林入口,只係一直綑邊,不過.......都係要爆林,綑邊路線有啲位個地係林林地,除非諗住對鞋行完就唔要,否則都係要爆入側邊小小在樹叢中穿插,唔同既係睇住海岸線,唔會迷路.

好不容易見到架生锈剷泥車,即係冇行錯路同就快到.死火,24mm唔夠wide,唔想玩駁相,終於斜斜地搵到個高位影得晒個天池.因為網上見到既構圖都好扁,我特登帶咗支單腳諗住進一步升高部機.不過睇來唔需要,係好咗啲啲,相信平地用效果會明顯得多,但唔值得攞咁重.影完就好快啲走,要襯住水漲前離開綑邊位.

放相後有去過既人問我係咪水小咗,我估係我影得細咗,再放多張有人比對既,我估都要50人先夠圍一個圈.

公庵山食風

得知要影西部通道全景要上公庵山.搭小巴老人院落車好快就到登山口.路一點唔難行,有人用木板做晒樓梯級,山也不高只係二百多米,但最後一段應該係越野電單車賽道,好多碎沙,頗跣,要小心慢行,最好有勞工手套萬一跣到都唔駛擦傷手.

風好大仲要用到200mm,試咗一陣發覺搞唔掂,快門一長就矇.幸好搵到個草堆凹咗入去擋到風先解決到.Magic hour大約六點四十五分,一般橋樑都係捱到七點就開燈,西部通道係衰啲要七點半,唔係做定功課我都以為佢唔會開燈,肯定七點就走人,依家要捱多半粒鐘.呢四十五鐘都幾難捱,屈在草堆對腳會屈壞,出面又超大風,沙地亂咁走動又危險,侷住係咁郁對手等冇咁涷,時間一到嗱嗱聲影咗就落山.出大馬路的小巴班次好密,等咗一陣就有.

機場櫻花園

早排呢度搞到爆晒人,要人流管制.連Google Map都新增咗呢個地方名,我都襯熱鬧去影吓相思仔.有諗過不如近近地去粉嶺影,但紅花風鈴做背景已經影過,櫻花就未,為免重覆,遠就遠啦.

死火,冇帶帽,天陰陰諗住唔駛戴都得.點知曬到爆,好在搵到個位有遮陰,否則變黑人.代價就係在欄杆裏面,唔怕曬企出面可以近啲.有藍天比陰天死白好得多.

今次用咗300mm加1.4x增距,裁得都幾盡,應該係加2x好啲既,但一冇陽光就會好粗,陰影處反差冇咁大,感覺好雜亂.

想見到多啲櫻花隻相思多數要細隻啲,要有啲取捨.

其實冇乜技術可言,啲相思走來走去,睇清楚姿勢先影分分鐘已經走咗,總之一見有就狂影,構圖其實都冇,我全部係中心點對焦,反正影出來好細粒,後期先慢慢裁啱構圖.