炎夏松仔園

呢排真係熱到黐線,跟據我既認知,越熱應該越多蛇蟲鼠蟻出沒,講係咁講,但咁熱去影蟲真係會死人,結果係搵晚去夜攝.

夜攝雖然冇太陽但就帶多好多嘢,比朝早多一支閃燈(即係兩支),多一組引閃,多支腳架當燈架,多個環型補光燈用作照明,同大量後備AA電,非常論盡,行快啲都唔得.唔知係咪物極必反,好似乜蟲都冇咁,往年大爆發既竹節蟲一隻都冇,只有草蜢,草蜢同草蜢,連厠所都靜英英,但瞓覺的菜粉倒見到幾隻.不過我已經影過啦,靈機一觸,未影過爆頭,趕緊接個2X影到盡大,但景深唔係好包到成隻眼,退而求其次,影到1.4:1就算,都算好大啦.

夜攝唔掂咁去多次早攝啦,真係熱到死,不過有正嘢,呢隻嘢我估都應該見過好多次,但背景咁乾淨就好小見,通常都係喺地面啲亂葉度,戰戰競競咁影咗一堆,佢突然整咗個下巴出來,梗係狂影啦,啲人見我影佢地又影埋一份,大家都好有禮貌,用電話既自覺唔走埋來,你話如果撞到嗰位用24-70mm既師就真係慘情.

至於蝴蝶嘛,都係冇乜,可能太曬驚曬傷,不過撞撞吓又俾我見到隻都幾小見既白弄,可惜位就頗衰而且佢郁來郁去,又開翼又合翼搞來搞去都唔係好影到.終於定小小就係正光位,佢又白搞到好黑底,冇計又唔敢郁佢只好事後搞.但實在太黑點搞都係麻麻地.

諗住走啦,點知又見到隻網絲,不過佢一係扒地,一係就走埋啲雜草度,搞來搞去只係得上葉既叫做比較好,但都唔平得晒,變咗一半矇咗.成日就係得咁多喇,睇來太熱都係唔適合出來影蝶.

世界舞蹈日

工作的地方接近九龍公園,有時午餐時間會走去睇吓當月有甚麽節目,咁啱見到呢個,啱晒又有得影.

節目表話上午開始,原來上午係預習,下午先係正式表演,一於喺觀眾席高角度影吓啲人練習先.

之後就係落場影,如果諗住正式表演先影就嘥料喇,除咗氣氛之外,預習其實係同正式表演冇分別的,但係就可以亂來,扮識既走埋去影相,我見到有影會都係冇記者證都扮傻,呢啲高興節目保安都唔多理.咁正中得一兩個位既位置正式表演時肯定係大會攝影霸咗.依家任影,雖然都好多家長用電話爭位.

全日最精彩我覺得就係呢班小朋友既爵士舞,襯有機會影多幾張.

芭蕾舞其實係比較悶,我又回憶起上次要交1000張芭蕾舞相既惡夢.

終於等到正式表演,原來係要招呼佢,唔怪得要綵排咗先咁誇張,問心嗰句,佢都係應酬緊你地,俾吓面.一如所料,正式表演唔可以扮傻走去前面影相,亦人多到企都冇位企,只可以側邊搵長鏡遠射.啲相好一般.

中國舞淨係影到佢地出場,表演時遮得太緊要完全影唔到.

中國舞,爵士舞,芭蕾舞,民間舞排山倒海咁輪住上,一陣間就搞掂,再來張大合照,特首就同你地講Bye bye.

原來跟住係外來隊伍表演,唔知特首咁唔俾面佢地會唔會有唔好感覺呢?小朋友跳蝴蝶舞都幾好睇,不過就梗係冇頭先咁大堆頭啦.

中國舞都好一般,似中秋綵燈會嗰啲.

呢個最求其,只係幾個人笑住口行來行去咁,似係街坊會太極班嗰啲,唔怪得冇乜人睇.之後仲有集體教跳舞,亦係時候收工喇.

粉嶺女子高球賽

朋友話粉嶺高球場有比賽開放公眾參觀,都好喎,去睇吓有錢人地方,而且唔駛着有領衫同可以着牛仔褲.

個場真係好靚,絶對唔輸滘西洲.因為有事趕唔切開場,我去到既時候朋友已經去到第七個洞,行餐死先會合到佢地,其實第一個洞仲有人打緊,做乜佢地唔等埋我?全因佢地目的係來棒場,香港的奧運代表,相同目的既人都唔小,成堆人好似明星粉絲咁跟住呢一組.

另一個目的就係來影吓靚女,對於揮桿打波的畫面由於難度太高,朋友間冇乜興趣,唔郁既就啱晒.企位都好自由,只係打波嗰吓會有人示意唔好出聲,唔好走來走去影響運動員.好彩相機快門聲可以接受.

粉絲朋友係咁跟住偶像,問題來喇,我地攞住咁多架生唔夠運動員行得快,次次去到都已經打完咁滯.我只好襯經過見到其他組比賽順便影吓.呢啲畫面其實唔難影,對定焦試多幾次自然知幾時按快門.

咁搞法唔係好掂,變咗淨係影靚女,去到一個可以影到正面開波既地方,就提議不如駐守呢度啦,影咗咁多偶像都夠啦,影吓其他靚女嘛,好彩佢地又冇問題,當日有位攝影朋友用我見到流晒口水既300mm F2.8, 呢個位我用200mm多一點已經滿框,但佢企得仲前過我,再聽埋快門聲,佢總是在揮捍之後先按快門的.就知道佢係要拍嗰種半身好型既揮捍後照片,即係高球用品店門口嗰種.即係呢張咁,但佢係半身.

定點等清閒好多,一組開完波差唔多要等10分鐘先有另外一隊到.即係每10分鐘有三次機會,咁當然影吓靚女都得既.

多次嘗試後,終於拍到波在半空的畫面.而且影到運動員側面,唔同之前既只影到頭頂,幸好廣告牌唔係太近,否則同白波黐晒底咁就得個桔喇.

點到即止空手道

咁多種搏擊項目中,空手道照計限制最小,唔會好似跆拳道咁淨係用腳,唔似拳擊咁淨係用手,唔似柔道咁淨係撻,但唔知點解,睇人地影既相硬係好似就住就住,總之就係唔多精彩.

去到會場,咦,全部都係打套拳,唔係呱?成日都係咁就走得,問吓工作人員有冇對打,好彩係有,不過要晏啲,玩吓手機先,終於等到搏擊,先係女子組,感覺唔係好積極進攻,埋牙唔夠兩秒又分開.

女子組得幾組,好快就到男子組,都係好奇怪,大家似乎只在一招,打中就算,分開又再打過.唔係好對路,似乎比賽規則就係咁,打中就有分,但唔準連砌,所以打中就要收手,要好清楚打俾評判睇,最好嗌多吓代表打中,連打變咗評判睇唔切.

咁搞法即係玩掂到,都唔駛理係咪夠力度,技術性擊到更加幾近冇可能,除非唔小心一招就搞掂.跳起都冇用啦,出唔到佛山無影腳.

對住多數只係衝埋搏一下既畫面,呢個起尾腳叫做比較特別.

中肚唔知計唔計分呢?睇網上規則話好似唔可以求其掂到,要清脆,有力的表現先算.

決賽分勝負好清脆,一方被撻到,撻人既佔咗上方,做出葉問式出拳手勢就搞掂,唔駛真係打落去.

蛻變了的福岡

睇翻啲舊相,原來上一次去福岡已經係十年前.究竟依家有冇大變化呢?之前搵到既好嘢食執咗未呢?

為咗避開復活節旺季,無奈錯過了花期,花都唔係冇既,有啲仲好密添,不過就單丁幾棵咁囉,成大片就冇喇.去舞鶴公園問人邊度睇夜櫻啦,冇喇,不過有燈光秀.都好啦,好彩都仲有啲,所謂燈光秀其實只係有唔同既燈着吓熄吓咁.都好幫我照光啲櫻花.

由於住大壕公園附近,第二朝又走去睇吓,都係疏疏落落,算數,放棄再去搵櫻花睇.

第二站去門司港,諗住上展望台影翻個夜景點都唔會食白果呱?車站旁邊就係火車博物館,真火車頭其實架架差唔多,反而有驚喜係室內展館有個全福岡鐡道模型好靚.可惜好難影到夠景深,如果俾用腳架就好喇.

時間尚早,走去影吓例景香蕉人,哎呀,好後悔冇帶支500mm來呀,海上好多海鷗飛來飛去,飛得又慢又近,黃昏時間光又靚,用135mm加1.4增距再開埋APS-C模式都係好細粒,好失落.

來到十拿九穏既觀景台夜景,只要唔落雨就一定有景,玻璃反光我最多用風褸擋住,但………邊個負責抺窗架?啲水漬一點點,日景都唔係好覺,夜晚街外燈光一照,慘慘慘,一點點現晒,應該事後都搞唔掂.點算?開大光圈囉.開到F4都仲係一點點,最後搞到開盡F2.8,其實都有小小,亦都睇到支鏡開盡光圈邊位唔多掂,冇計喇,勉強完成咗佢.

今天來一個叫做海之中道既綜合遊樂地方,睇介紹有動物區,水族館區,仲有兒童遊樂區,觀海區,好似乜都有咁.裏面原來好大,一入園就係租單車舖,唔租車跟本冇可能去到要去既地方.園內處處花草都幾清新,假裝影花其實影吓日本女仔先.

動物之森有好多細細個圈養區,135mm加1.4x再開APS-C模式都勉強夠影,好小見小松鼠,仲係幾隻做同一動作添,之後繞晒成個園區咁滯都搵唔到水族館,花海都冇去到,兒童區又頗細規模,搞來搞去似乎只係入來踏單車同食拉麵 @@

福岡都有大佛,坐幾個站就到,四周見到啲綠色既五指楓葉.秋天來應該幾靚.

最後講吓食嘢,十年前好抵食既蟹通價錢已經同蟹道樂睇齊,食完好肉赤,壽司亭已經變咗其他店,不過誤打誤撞去咗中洲區既梨花園食燒肉.出奇正,和牛雖然貴,但好多時只係食到成口油,牛肉味係唔夠美國安格斯咁濃,呢度唔知係咪醃得好,我地點咗每人5900丹既套餐(中洲店限定)居然好有牛肉味,配合埋剛好既油脂,真係極正.