2019年6月30日 星期日

夜探老朋友

又係時候去探吓蟲仔,今次裝備了新買既閃燈去熟習吓.

 
近幾年都係,蟲仔越來越小,我一路行到去亭度都係乜都冇,喺亭度搜尋吓,居然見到好多四腳蛇,可惜全部都係爬緊牆,又冇突出來,只可高抄影背脊,影完都剷咗算,好彩行前啲終於見到有竹節蟲,前幾年交尾都成山係,依家單隻都好似中交合彩咁.新閃燈冇乜時滯,只要啱位,好快就影完.
 
 
之後梗係影埋半身,新燈除咗反應快之外,最緊要係唔駛搭咁大個壇,機頂同平時咁就咁插支燈就得,腳架都小咁舊,穏陣好多,以前真係好驚拗爛個熱靴.
 
 
同竹節蟲玩飽之後就去水池位,上次就係呢度整爛咗個引閃,上天今次居然又安排過隻田雞俾我影,蹲低影咗幾張佢都冇走,為咗獲取最散既散景,決定叭地影,兩張就搞掂.主燈子燈都可以在機頂調輸出很方便.
 
 
搵咗一大輪都冇嘢影,終於先見到隻飛蛾,今次冇咁好彩可以打側影到佢既梳形觸角,只好正面硬幹,縮到F13都係得小小景深,想再影細啲,一陣強風吹過,冇得影.
 
 
睇睇個九巴app,依家落山慢慢行該差不多,再行翻去亭度竟然見到四,五隻好耐都未見過既大蜘蛛,當中只有一隻肯爬落低位,嗱嗱聲影佢一張大頭1:1,然後9秒9跑落山,架生都唔收直奔巴士站,否則趕唔切又要等多半粒鐘.
 

2019年6月25日 星期二

吊環瑜珈

有啲影厭咗就咁行行企企既人像相,見有呢個活動又去試吓.


見佢啲樣辦相係黑底,頭髮黐晒底唔係咁鐘意,就問自己可唔可以帶燈架去飛燈,結果係唔得,只可用機頂燈,都理解既,個個咁搞法邊有咁多地方擺燈架?結果我既諗法係錯既,背景根本就係黑布,係刻意要黑底,點打燈都係一樣.


就咁企地吓嗰啲就唔影喇,費事阻硬碟空間,影樓用閃燈影係唔同一般影法的,全靠閃燈,淨按快門就得.主持人提供既設定係ISO 400(可以理解唔駛支影樓燈咁吃力,快門1/125s(所有機應該都同步到,1/250s好多時要原廠燈先得),光圈F6.3-F7.1(足夠景深,對焦中個身已經可以).實際影我覺得偏暗,我鐘意光猛啲.最終我用咗F5. 中途主持會睇吓我地有冇問題,嘩,做乜你啲相咁光,睇到背景黑布穿咗崩,原來佢原意係個底要全黑.我唯唯諾諾最後都係影到咁光.


固定擺pose又用閃燈照計冇乜難度,影落先知原來都唔係咁固定的,個環會轉來轉去,又會搖前搖後,我用連續對焦都唔係張張得,而且用閃燈又大輸出唔可以用連拍,否則閃燈會過熱同回唔切電,只可以一張張影仲要唔好影得咁密.


影樓燈係靚,但人多用問題就來,一有人狂影其他人就會因回電未完成而曝光不足,主持人叫每人影三張就到第二個影,初初都做到,後尾又係亂晒大籠,有人索性用自己燈,狂影都得.不過咁就變咗直打,同兩支影樓燈一左一右光質差好遠.


Model真係好落力,唔駛休息咁,不過有啲高難度動作要定住每人影三張真係冇可能支持咁耐,結果就係全世界鬥快搶頭一閃,跟住慢小小既都係打空槍.我特登第一下唔影,根本都未擺好pose,搏回電後既第一槍,又俾我搏到,真係得一張,好彩中到焦,之後嗰啲都係回唔切電黑媽媽.最後我想講其實Model可以唔駛着咁小布啦,我只係想影吓個動作,搞到我都唔係好敢貼相.

2019年6月20日 星期四

再探天際100

上到咁高睇到既景係幾靚既,不過價錢真係離晒地,6月做推廣身份證有……唔記得乜嘢字就可以買一送一(其實都仲係好貴),咁就去多次啦.


上次用衣架遮光法都係覺得好論盡,所以今次淘咗個用吸盤既伸縮衣架用來掛黑布,範圍可以闊好多而且唔駛用一隻手攞住,不過唔知點解硬係見到自己倒影.日落好快就冇,冇時間慢慢搞,影咗至算,今日好好彩個天幾清,記得有次來係乜都睇唔到.有埋火燒天就好,世事冇咁理想.


順便影埋個夜景,見到旁邊有人用可以固定在鏡頭既反光板.有啲人仲大塊得好誇張.睇來好似幾work.後來朋友問佢地邊度買,原來係有得借,即係9.9秒跑去借啦.唔好意思,我地得翻最大嗰隻,啱晒,我就係想有咁大得咁大,結果,證實係冇用既.除非鏡頭貼實玻璃,否則經反光板反射既光線仲多過唔用.即刻俾翻佢用自己方法影,始終去唔晒啲反光.之後當然係影埋幻彩詠香江,好出奇今次只係得兩間大厦有激光出,而且係好散同唔多光嗰隻,影完都唔靚.事後回憶翻我上次係有遮住機背的,自己既方法自己都忘記咗,抵死.

2019年6月16日 星期日

一年一度影柔道

自從運動攝影栛會散咗之後,影柔道既機會就得翻一年一度既三叔體育節,其實捷青盃都可以去影既,不過水準差得太多,好多時等成日都冇乜快門機會.


試過搏矇去柔總的比賽,唔知係咪知我地意圖,個場set到好後,安排運動員在圍欄內排隊遮住水平角度,變咗只能夠在樓上觀眾席遠遠咁睇.體育節安排都一樣,但就留空咗旁邊一條行人路,可以喺嗰度影,夠近亦唔會有人阻.開齋先,可惜撻人嗰個被遮住,幸好仲見到個樣.


唔好睇小女仔,有幾吓幾精彩既都係女子組出現,睇唔到樣添,不過動作都幾好.


纏埋一舊,總算有兩腳都離地.


遲咗小小,已經到地,唔到地嗰啲個樣又矇,1/500秒都唔夠快.


今次撻人嗰個冇被人遮住,但係注意力硬係落咗去被人撻嗰個度,應該係只影到側面既原因,冇計,控制唔到.


全日最精彩就係呢一撻,真係估唔到會升到咁高,結果冇咗一忽腳,而且速度也太快,變得唔係好Sharp,早知既話幾大都再高小小ISO.



 

2019年6月11日 星期二

滾軸溜冰嘉年華

打住嘉年華口號都估到一定係柴娃娃玩玩吓小兒科,適合Hea影.


全部都係小朋友同家長就知乜嘢事,一開始係障礙賽,就係要用湯匙裝住膠波繞過雪糕筒鬥快,示範姐姐小啲失手影咗佢就算.


年紀大組別冇直線咁簡單,要走特別路線.射藍同時舉行,結果係影唔切.


進階障礙賽係要穿過欄桿,我發覺我部機係唔夠快對焦.九成都係矇.要嗰啲慢慢過既先影到.


最後係蓮步舞,個頭去咗後面唔知點影好,結果係用咁既角度影啦.


想上二樓用長鏡影翻落來但係又鎖咗唔俾上,好彩有反mon,換支50mm有咁高舉咁高就影到咁喇.比賽一陣間就完,啱晒早啲走.

2019年6月6日 星期四

孫悟空三打白骨精

一直都想去高山劇場影吓大戲.但係要坐樓座呢個問題一直令我卻步.隔成廿行位仲要係樓上,即係焦距要有135mm兩倍多啲先影得翻全身.200-500mm得F6.3光圈影室內死得.依家有300mm F2.8就衝啦.


編咗個又邊又後既角落頭位俾我.好在坐唔滿,終於我去咗比較中間既最後一行,個位窄到連放攝影包都冇位.我仲要換鏡,邊搞得掂,幸好最後一行後面有小小空間夠放個袋,咁就搞掂.開場要交待劇情,係咁奪命狂講,都幾悶,孫悟空出場又唔打跟斗,冇乜影既意慾.直到孫悟空最終被唐憎趕走,拜別師傅嗰吓先有得影佢跳起.


旁邊位師姐一直擔心影唔晒成個台,因為佢用APS-C機,最wide得70mm,即係等效105mm,咁我仲驚,我得支135mm,不過其實我冇打算要影晒成個場,因為除非個景搭到好高啲人又會上去做戲,否則影晒成個場就即係一排蟻仔加個投影機投出來既背景,呢個叫個比較值得用wide小小既景,齊天大聖坐咗上龍座.


終於都等到半場休息過後唐憎三個徒弟決戰壞人,坦白講,300mm有啲爆框,啱兩個人打,人多就交代唔到,沙悟淨都可以打下嘍囉.


豬百戒都唔執輸,仲一打三,好彩佢地後場打,可以影到多啲人,呢部份全打,氣氛爆燈,掌聲雷動,跟本所有人,包括影相都係為咗呢幾分鐘.


孫悟空發威喇,一跳全部士兵踢開晒,死火唔夠wide影得一忽,冇計個孫悟空大個啲囉.現場光好光,動作唔大嗰啲200-500mm都影得掂,但跳起呢吓328都係僅夠,除非唔介意矇矇地.


終於要決戰白骨精,打到金剛棒都甩手.


邪不能勝正,搞掂.


歡樂既時光過得特別快,咁精采既打鬥一陣間就完喇,又係時候講再見,一齊出來謝幕,好彩135mm都影得晒.

2019年6月1日 星期六

千島湖新路

之前去大攬涌水塘真係搵命搏,大熱天時要手腳並用,飲幾多水都唔夠.所以之後我一直都唔敢帶人去.最近網上睇到政府起咗新路,全程水泥路咁滯,又燃起再去的念頭,可惜幾乎個個星期都落雨.好難得有好天就決定衝啦.


明明好咗兩日天,搞乜鬼朝早起身竟然超大霧,時間都預咗就照去啦.新路唔駛再手腳並用,全部係家樂徑,但就遠咗好多.舊路入口仲要行成個鐘先到,新入口在麥理浩徑181至182之間,大大個牌寫住千島湖清景台,唔驚搵錯路,舊入口開始先係最難既部份,新入口唔駛5分鐘就到觀景點.呢度更正面望到千島景,打卡最正,影影吓竟然有小小陽光,啲水變得超綠.不過新位在中間位置,想影個由頭到尾既全景就要舊位先得.


啲消息都傳得好快,嗰日咁既天氣居然都成山頭係人,來回都見到好多人,打卡都要排隊.