紅磡攝影

冇諗過紅磡有甚麽景可以影,有朋友帶路就去一趟.拍攝的地點是對住車站大堂的天橋.位不太多,應該只能容納6至7個人,朋友提醒我要用魚眼,正好讓塵封的它出出勤.弊.....由於魚眼有180度視角,所以必須伸出欄桿外才不會拍到欄杆內的地面.諗住用兩支腳义出外面再用一支腳頂住地下,點知裏面支腳伸盡都唔夠長.唔係呱?唔通冇得影?結果找來攝影背包應急增高地面,雖然軟軟地,都好過冇.

起好壇,跟住就係到點影法.目標係影車軌再加背景,最搶眼當然係最近行車線既車軌,但好不幸冇乜車行.於是我打算用影星軌既方法儲車軌,保險計,襯天色最靚既時候影咗個天先.然後再慢慢儲車軌,即使天黑晒都冇影響,右邊地面好像比較暗,等我減慢快門影光啲先.中途睇吓啲相,有啲都唔sharp,應該係支腳架唔係好穏,啲車行過有小小震都會矇.聽天由命吧.
影咗十幾張,最內線有車入的只有兩張,好不幸地,其中一張係矇的,而最大鑊既係影個天嗰張錯咗位夾唔到,可能係我較快門時郁咗.幸好現場光差其實唔係太大,其他相既天空部份冇爆,可以壓暗佢出翻個天,由於想個天藍啲,仲特登將色溫降低小小.最後只得三張相可以用來夾,效果麻麻地,如果再去我估要帶塊啜啲既布放在腳架同欄桿中間或者會隠啲.

誤影單車球

由於在單車館舉行,未去之前仲以為係場地單車賽,即係李慧詩玩嗰種,去到先知係花式單車加單車球.冇所謂都影吓.

 

幾鐘意來單車館影相,唔計比賽項目,呢度應該係全港最光既室內運動場,比其他場光一級甚至更多.而且射燈色溫幾接近太陽光.唔駛搞白平衡搞餐死,講翻比賽,單車球係好似踢足球咁,將個波踢入對方龍門就得分.每隊得兩個人,可以用手但不能持球,影吓爭球先.

 

 

場地間到好細,拍攝同觀眾席都貼實場邊咁滯,85mm都經常爆框.但係在角位影角球就差唔多距離,呢種場面經常發生的,其實並唔係咁難影得到.最難就啲裁判好鐘意阻住你....

 

 

射罰球都經常有,有時會飛起接,都幾得意,單接既可觀性就低啲.

 

 

以輪代腳其實都幾難平衡,自己一個人控球啲運動員都冇乜問題.但爭波就好易失平衡,經常搞到瞓低,坦白講,架車咁多一枝枝嘢突出來,真係好危險,是但插中邊度都可以好嚴重後果 @@

 

 

當日比賽勢均力敵,法定時間平手,再加時都係平手,終於要射...唔知幾多碼球分勝負.立即換定支135mm狂影.... :P

 

 

大尾篤影日落

上次去影汲水門大橋只去到左手面,啲橋墩有小小黐住唔係咁靚,對面馬路又唔俾行,諗住今次搵吓右面護土牆有冇啲隠蔽位置可以偷偷地鼠過去右面影,最多唔得既話就改去花瓶頂影日落囉,臨出門口先醒起………哎呀,花瓶頂應該係影日出先見到青馬橋的.冇影唔係天氣問題,係方向唔啱.偷渡槓龜率又好大.臨急臨忙唔去得遠,就求求近近地去咗大尾篤.

太近變咗好早就來到,碼頭個景都算中規中距啦,搵唔到更好位就來呢度影,咦,有條效遊徑喎,官方時間一個鐘,分十二段,每段一個生肖,噱頭嘢,不過話唔定有觀景台,決定上去行吓,話咁快就到第一景,登登登登,船灣淡水湖………不過只係見到平時去影星既水壩.仲要鬼死咁多樹遮住,舉盡部相機先影到小小.

好快就去到觀景台,可直望八仙嶺,整個八仙嶺日落都好喎,政府啲觀景台唔知點解硬係好多樹圍住,八仙嶺要加多八棵樹先影到日落,罷了,去翻山下面等,原來燒烤區呢度都影到八仙嶺,仲冇咁多樹阻住,觀景台真垃圾.可惜呢度角度唔係咁啱影日落.

除咗燒烤仲有其他嘢玩喎,怪唔之得周圍都係人.

最後疊埋心水等日落,想搵多啲船做前景啦,搵來搵去都係得一隻,後尾仲飄走埋,好彩唔係搞HDR,否則變晒鬼船.個太陽又係好高就俾山遮住喇.今次試咗新既夾相方法,用圖層搞既話始終超黑既山同超光既天空既夾線係會有小小問題,一係天空有啲光邊,一係山有啲黑邊.推shadow冇咁易有邊(其實推得太勁都會有),不過會搞到畫面好灰,而且暗位好大noise.今次做法係先用推shadow處理最難搞既夾線位,即係用天空啱光暗既相先夾一張推shadow都幾勁既相,咁即使擦過龍都唔會點起邊,之後再覆蓋地面下去,由於邊位已搞咗,可以唔駛擦咁貼避開起邊問題.效果我覺得都幾自然.遇到啲好光暗分明既夾線好過就咁擦.

四探馬草壟

第一次去多雲遮咗太陽冇日落,得翻夜景,第二次超大煙霞,係就係冇乜大光差,直出都得,不過好似影霧景咁,第三次萬里無雲,結果係駕車既朋友遲到.去到太陽已經走咗 :(

今次都冇諗住去,只係上次去蛇嶺搵唔到路,睇完中原地圖再搵,點知條路又係俾鐡閘封咗,見仲有時間就改為行去馬草壟,原本好多雲都冇諗住有日落,好彩啲雲夠高,咸疍被遮完之後又出翻來.算是意外收獲.馬草壟光差分佈十分複雜,靠圖層夾相係搞唔掂,最後只可以靠推陰影位再配圖層盡量搞.由於太陽仲好高已經被大厦遮住,個天仲係太光.我係等太陽唔見咗,個天冇咁光再影多張,之後先夾相露個太陽出來.大厦太岩殘好難搞得好,推下陰影就算.漁塘係點等都係啲水光過草好多,又係推陰影,不過我都影咗一張係地面既夾上去.

一場來到梗係影埋夜景,我發覺上次影得太Tight,今次影多啲個天,而且上次太心急走,個天未夠暗,由於之前誤打誤撞知道料壆村有小巴走,唔駛行一個鐘出去,一於等啱光先影.最後由於深圳嗰邊燈光光過漁塘好多,要影多張夾埋,構圖亦改小小,因為我覺得下面嗰點燈光有啲趣味性.坦白講影夜景容易得多亦靚得多,不過日落係另一種風味既.　

戶外閃避球

好彩見人影過戶外所以問一問,知道係戶外我就唔帶咁多定焦鏡喇,一支70-200mm就搞掂.戶外光線充足唔駛影得咁慘呱?

 

比賽在學校的操場進行,唔知係咪知道係小學比賽,竟然冇人報名,得我一個人影.唔緊要,戶外應該唔怕冇相交呱?來個開波先啦,原來又係男外混合比賽架,冇辦法,一隊波十幾個人唔係咁易湊得夠腳.

 

攻擊一樣容易影,1/800秒快門多數都sharp.要波在半空中影多幾張都唔難撞中.

最難搞依然係影防守,上次等佢剩翻冇乜人先影嗰個方法竟然行唔通,規矩唔同咗,唔駛冇晒人先輸的,到咁上下就會點吓邊方人多就算贏.冇辦法,侷住撞下.睇咗一陣,最近波嗰個通常會係目標.所以專係捕住佢.

原來人面對一些快速迎面而來既物體時,係會不由自主咁變出古怪表情的,這個很有趣 :P

哈哈,如果佢地事後睇翻啲相會有乜感想呢? :P

 

普通夜景

買咗新腳架要實際試吓佢既穏定性,我覺得乜架生都好,最好避免重要時候係第一次用,你覺得理所當然冇問題但就出現問題既情況係經常會遇到.例如唔識用快拆板,唔識較開合模式,長鏡極限用幾高等等…….

其實測試只要喺屋企對住條街影吓夜景已經搞掂,呀…..我都會,咁出街可以試埋攜帶性嘛 :P. 一時間冇乜好地方,出開旺角,順便去就近既龍翔道觀景台,搭87B,豐力樓落,行幾分鐘就到.不過……景就好一般,前面好多樹好阻吓.只可從樹隙中間影出去,淨係影到啲樓都冇乜構圖.這情況啱晒可以用長鏡避開啲樹.感覺得負重都好盡吓,開始有啲唔係好穏,但總算影到清楚既相.

轉個角度,其實都係差唔多.用長鏡冇乜前景,欠缺立體感.

Magic hour轉眼就過,嗱嗱聲換支短鏡影張多小小景既就收工.呢度有一度好係有厠所,可以洗個面先走,如果有埋小食亭可以補給就更好.

一場來到,影埋個現場環境,三個東菇亭有頂,就算落雨,如果唔太大都可以避得吓,唔駛照淋.