將軍澳跨灣大橋

新開通梗係要去影佢開燈,我咁諗既時候已經慢咗一步,FB已經被洗板.咁有咁好,可以睇吓人地邊個位影靚啲.咁多個位我覺得最靚係華人永遠墳場,角度最好.調景嶺站行入去都好遠,跟住仲要爬樓梯先去到紀念花園既高位,啲考子賢孫都真係要有翻咁上下體力先掂.一路都有好多位可以冇遮擋影到條橋,不過行高啲又好似靚啲,行吓行吓終於去到頂.

網上有人話用200mm焦距,有人話用70-200mm,穏陣計我帶咗85mm,200mm同1.4x增距,最後係85mm加1.4x影.Magic hour大約在6點15分左右.不過半圓位係未開燈,唔知點解有咁既安排.侷住食風等到7點先完成任務.

海洋公園光影頌

唔駛錢有Show睇啱晒我呢啲孤寒鬼,代價當然就係要排隊啦,原來有兩度閘,早到的話第一度閘既員工會同你講正式入場時間係六點,入到去係盞迫,不如周圍行吓先,千萬唔好俾佢昆到,否則其他照入既人就會排喺你前面.

開閘唔好咁斯文,要目標明確立即跑去最前面,只有第一行先影到相,頭盤係跳舞表演,都熱鬧既,不過其實係比較普通.

終於捱到開場,所謂光影頌其實係用投影機照啲圖案出來,唔好諗住用腳架,換鏡都唔駛諗,基本上係全程被人群夾住好似三文治饀咁.高ISO再推光暗位就搞成咁,事實上有腳架快門也不可以太慢,因為圖案係郁來郁去.但就可以夾個背景上去.唔駛咁花.

除咗激光出圖案,仲有激光直接射,睇吓對岸就知人多成點.

另一個賣點就係水幕做投影幕,用兩部投影機投兩行字,可知亮度要求極大.

呢個大戲投影就差啲喇,完全唔中焦,矇查查.有啲浪費大好設備.

最後來一個激光大爆發就完場.

應吓節影燈飾

咁耐都冇乜興影燈飾,主要係覺得好亂,冇乜特色.今年近近地去應吓節.

主要係想影呢啲字啦.要用魚眼影先有氣勢,要唔斜話,其實得一個位置最啱,有人喜歡得個天黑晒先影,咁啲字就會冇大厦干擾好似寫在黑板上咁,我就喜歡有啲大厦襯吓似係城市景,

之後就係等個天再暗小小藍啲,呢個時候剛啱有架巴士停正我面前,唔緊要啦,一盞交通燈時間啫.咦,點解唔走既?原來係觀光巴士呀,車長直情休息.........估唔到結局係咁.

滑板攝影

滑板未影過所以都唔係好知架步,好在有Goggle map,大概睇到地形,唔駛實地探場都得.

原來嶺南之風有個極限公園扮街場,拍攝位置就只得一邊高出去的緩跑徑,自由度冇乜,而且要高位影,冇得影水平位置,唔知距離,帶咗200mm同300mm,斷估唔會近到好似室內咁呱?仲諗住會唔會老襯咗咁重攞支300mm來,實際影遠嗰兩條跑道係啱啱好,亦都冇咁影頭項.

比賽係自由發揮兩分鐘.冇話一定行邊條賽道,近嗰兩條就唔係好影到,呢個跣欄杆動作原來唔易的,我見好多人失手.

賽場旁邊有個小型碗場,不過今天只用來練習.

個個動作差唔多,玩吓慢快門,可惜跳起既冇張中,摸索之際原來已經賽完畢,成個過程只係個半鐘左右.

好彩跟住個星期就係碗賽.又好似上次咁帶200mm同300mm,點知好近吓,好彩200mm都算剛剛好,不過如果偏咗小小要裁就有機會爆框.

小見既原地轉滑板.

比賽每人有四次機會,評判會計最高分嗰次,變咗我都有四次機會,呢個位跳得好高.一時不留神會出咗框,不過佢連續做四次,有預知終於都影到.

觀塘站影港鐡

呢個地方見人影咗好耐,就襯天氣麻麻影咗佢,其實有意見話大霧或者落雨更好,可以反射車頭燈既光做成光柱,咁我又未至於咁有心,只係求其搵個日子就去.

拍攝位置要搭電梯上去,放工時間都幾多人排晒隊,視線被一啲繩欄住,要將腳架直接放入花糟,鏡頭突出去先解決到,好彩冇實焦搞我.以為架車埋站可以停定影就錯喇,真係停定既話車頭係出咗畫面.結果試到1/200秒先可以涷結列車動作,要用勁大光圈同高ISO.再用普通設定影張景夾埋.

等多陣原來仲有呢種平頭既列車,試吓再加ISO,月台開始爆光,而且天空越來越暗,冇乜光到架車,係時候收工.

慢快門影滑冰

報了個滑冰比賽影,好可惜高級賽唔得閒,只可以影初級組.

影運動相最基本要求係要清楚,唔好鬆矇,交代到是甚麽運動.例如冇理由影足球唔見咗個波,淨係得成班人跑來跑去.動作精唔精彩都係其次,所以為咗要交相,我都影咗一堆高速快門既相打底.

再進階就係慢快門,利用動態模糊去制造動感.但郁緊既主體用慢快門影好易乜都矇晒,要影好多先揀到啲用得既.在近餐廳一面可以用評判席做背景.背景太乾淨就睇唔到效果喇.

之後可以入裏面,在評判席旁邊影,有人話呢度背景花,但係我影搖鏡就係要呢啲.這個就係剛才企既餐廳做背景.

點解去到依家先試影滑冰用慢快門,唔同有規律既運動,滑冰係耐唔耐先會滑一下,轉圈,擺姿勢嗰啲如果用緊慢快門係得個睇字.今次用咗觀眾席做背景.

以前啲機慢,一秒五張的年代雖然都影到,但成功率好低,依家係易咗好多,連拍多又識得眼部對焦,有人話太多相揀相好麻煩,不過始終有得揀好過冇得揀.

屯門公園爬蟲館

偶然知道有這個館,但係已經冬天,會唔會啲爬蟲已經去晒東眠?唔理咁多,走去睇睇.

以為政府嘢都係拍烏蠅多,點知估錯,超多家長帶仔女來玩,影相都要排隊,影呢啲圈養爬蟲一個大問題係佢地都養到好懶,成日都係喱埋休息,好多時唔知喱咗去邊,就算見到都係一舊,難得見到個蛇頭正面,機會要把握,之後再見佢已是縮埋一舊.

小東西,最啱用微距鏡,但我嗰支係180mm,而室內光線非常弱.快門只有1/10至1/15秒,用咁長肯定手震,如果有百微該不錯,不過我覺得24-70mm其實也好好,放大率有翻咁上下,最多事後裁一裁.

成隻睡羅漢咁又扁又平最好影,咁啱佢個位又有直接燈光到.

全部都喱埋晒,先到室外走走先,有最親民的大龜,手機都影到.

行一陣公園再入翻去,剛才縮作一團的青蛇終於露出小小頭,機不可失.

24-70mm另一個好處係可長可短,玻璃反光極麻煩,鏡頭必要貼實玻璃,連遮光罩都除埋先擋到,當然咁做亦可增加穏定性.用百微的話影大隻嘢因為爆框要侷住後退就搞唔掂.

原本影背脊冇乜好影,可能佢知我影佢擰咗小小過來,千載難逢的機會.其實來呢度都要預啲時間等,我搞咗咁耐依然有啲物種冇浦頭影唔到.

無端端去咗影蛇頭

諗住去添馬公園影吓個天空之鏡啦,以為好易搵結果係搵極都搵唔到,日落都過咗,就傻傻地行去中環打算企天橋影個摩天輪都好過冇啦.沒有更黑仔,摩天輪旁邊有工程,一架架吊雞車擋住.......

冇計,擰轉頭影吓後面個蛇頭,好彩個天都有小小紅.幾分鐘就影完,去食飯.

蝶季尾聲

天氣轉涼,係時候影多轉,唔想山長水遠就去山寮啦.

估唔到都有好多人喎,個個都想影忘憂同鋸粉,忘憂已經影過,鋸粉則從來未見過.有人發現咗呢隻小蝶,我影過不過失咗手,今次終於影翻,影蝶圈叫做加一.

呢隻都影過喇,咁今次佢噴水又可以影吓,可惜對翼有啲斜,直嗰張又冇噴水喎.諗住只係碰碰運氣,估唔到都有點收獲.

東洋山睇芒草

朋友想影芒草但又唔想上大東山咁Chur.咁就同佢坐的士上飛鵝山觀景台附近再行十五分鐘去東洋山啦.

芒草就冇大東山咁壯觀架喇,勝在唔駛點行,啱老人家.借幾個人做Model先.

最密就係呢堆,側光下都有啲閃閃發光既感覺.

網上話行遠啲有舊兔仔許願石啱打卡,我興趣不大,但見佢附近芒草幾密,就花小小時間行過去睇睇,結果因為角度問題係乜都睇唔到,不過就可以見到白沙灣景色.如果有長鏡天氣好影吓夜景都唔錯.

同朋友夾定影埋個逆光芒草加山景就去觀景台影日落.時間越來越小,等唔切喇,太陽高啲都照影,靠事後暴力執相啦.

去觀景台話遠唔太遠,不過都唔可以叫做近,但日落都幾叫人失望,煙霧大到,好在入夜後好啲,原本諗住行落山,點知行咗一陣竟然有的士,慳翻啲腳骨力.

馬灣涌村

冇乜大計劃,求其搵個唔駛點行既景點影吓日落,可能季節唔啱,日落竟然早咗40分鐘,去到已經俾個山遮住,只好等晚霞,睇資料可以用棚屋做前景,實則並不怎樣,灘上既船好近,畫面塞到滿滿,搞咗一輪,索性放棄咗間棚屋,搵啲船做前景就算,其實三門仔仲靚.....

有啲薄雲但始終唔多紅,諗住草草收場去食飯算數.等等吓又有啲紅喎,反正啲船景都冇弓特別,影多啲個天先,等吓又紅啲,有啲意外收獲,現場真係咁紅,甚至更紅,我並冇太多整色整水.

挑戰吊手岩

經過婆髻山一役,有一輪都唔敢咁進取,不過近排見到人地吊手岩影既相好靚,又燃起了鬥志.有好多路都上到吊手岩,網上講呢條係比較容易,而且我唔會上到頂,希望處理得到.....

一到山路入已經有告示牌話山路危險,切勿前進,咁危險但係又唔封咗佢喎,去到最後一段有個位直情要爬上去,又有告示牌,前面曾發生致命意外,明明唔驚都俾佢嚇親,實際上又唔係咁危險,只要小心啲就冇事,不過就真係好艱幸,視野方面有兩個方向,先影咗冇咁特別既方向,以個天為主角.

跟住即刻影埋主要方向,由於我要等着燈夾埋上去,剛才嗰張就被迫唔等開燈喇.

意外收獲,日落之後個天變得有點紅,影完又要捱翻剛才條路落山.跟住對腳又痛咗一個星期.

慢快門影龍舟競渡

香港真慘,呢個季節先有得影龍舟,班官都唔知幾時先有正常思維.言歸正傳,香港仔係影龍舟好地方,比賽比較近岸,唔駛出大炮.不過都煩咗一陣,原本200-500應該最Fit,中遠距都包晒,可惜佢唔支援新機,上次就係啲對焦點唔夠搞到好難構圖.帶300mm係得,但好似要帶埋200mm同埋135mm,仲有腳架,頂唔順.........

一時諗多咗,又唔駛用大光圈,200mm加個1.4x甚至2x都得啦.輕好多,我帶埋135mm去,不過最終都係唔駛用,全程200mm加1.4x就影晒.熱身唔好太慢先,先用1/100秒試吓,其實點解要用慢快門?因為高速快門係Sharp,但水花拉得唔夠長,唔好睇.

之後減慢到1/60秒增加動感,呢個速度啲人好難唔矇,目標只可以係船身清晰.

大龍係唔同啲,場面夠壯觀.

其實水花主要係集中喺爬既人度,但龍頭部份太長,加埋個唔多郁既鼓手,冇乜幾多位放,索性唔要龍頭,單單個鼓清就算.

影咗幾場之後,我發覺1/60秒成功率都唔錯,好小會一張都影唔到,其實可以再挑戰慢啲快門,不過嗰日好曬,已經係ISO 100再收到F10光圈,再慢真係要加減光鏡先得.

呢個位影咗兩張都中,一張鼓手係清但船身冇乜水花,最後都係鐘意呢張多啲.

霹靂舞比賽

商場內的比賽,肯定唔會係閉門,普通人都可以參觀.有冷氣,可以食埋飯先慢慢行過去.

不過.....劃出既地方肯定有限,觀眾席超近,地下加擋板,再加喇叭,大會攝錄機,都已經冇乜位望到入去,加埋自己友企到前一前睇,觀眾席變咗休息位,乜都睇唔到,大會攝影個位都唔駛恨,原本對住Banner夠晒代表性,但個個楝晒喺度,背景肯定花到無倫,無奈要侷住上樓上用長鏡影.

斜影會搞到個視角好怪,個人有啲似瞓喺度,不過都好過同後面黐晒底.

影完單拖會有對賽,其實都係噱頭來,即係一人睇住另外一人跳,之後互換角色,最後評判俾分,淘汰一個,時間冇慳到但就唔多公平,萬一兩強相遇原本銀牌都會變咗唔入圍.動作太多,我專揀啲人倒轉既.如果兩個人走得夠近,200mm剛剛好.

對霹靂舞來講,唔用手都係好平常.而呢個角度係要樓上先影到.大會攝影只會影到一前一後.

如果兩個人走得太開既話,200mm會影唔晒,好彩我都有帶135mm,直情頭不著地都得.其實當日係有女子賽的,不過佢地個個都係對晒評判跳,而好奇怪評判後既樓上係唔俾人企的.