2020年9月28日 星期一

應吓節

今天的計劃是去白泥影蝴蝶,要在元朗搭小巴,帶多支wide鏡順道去近期大熱既大橋街市影吓燈籠應吓節.

一早去到己經有四個人影緊,影吓側邊啲金魚燈籠熱吓身先,角度斜斜地,於是我多影咗三張唔同對焦位置翻去做景深堆疊.

跟住就係難度最高既正面全景,實在冇可能等到冇人,只好用埋佢地做構圖.

影高啲等下面啲人小啲又得唔得呢?都係唔多行得通.

見有人喺對面影,我又行過去試吓,仲差,燈既數量差好遠,呢個時候開始多人,係時候收工,大家中秋節快樂.

2020年9月20日 星期日

去夜攝

呢排又限聚,又落雨,宅到爆,夜攝冇咁多限制,解吓毒.


都冇乜期望,求其搵啲嘢玩吓疊景深.果然有蜻蜓,不過係背脊對住我,唔緊要,我就影你頸部結構.佢好細隻,影到1:1再開埋APS-C模式個頭都係得一半.原本可以加埋個1.4增距.不過咁會超難影.景深超淺要疊多好多張,而且穏定性好差,分分鐘會失敗.現在1:1好容易影咗4張就成個頭清晒.


草蜢應該實有既,有之餘居然係交尾,我太注意後面嗰隻個頭要清,結果只影咗三張,兩張係兩隻草蜢個頭,一張係前面嗰隻既大腳,欠咗交尾嗰度,好彩唔太矇,同後面隻腳矇咗.想再補佢地已經郁咗.


有蟲仔水珠,都要影頭中尾三張先掂.


草蜢食草,只影到一張佢就轉好古怪角度,冇辦法,個大脾矇咗.收獲咁小其實好大原因係早走咗,以往都影到11點,依家9點就走,年紀大唔想捱咁夜.


2020年9月13日 星期日

龍翔道大波板

經過龍翔道錯失火燒雲既慘事後,要去捕鑊影大波板車軌,今次我坐多兩個站巴士去到澤安村先落車,據我估計,拍攝地點應大約在澤安村後面,行行吓去咗一堆豪宅,但越行越唔對路,越高就越遠離目標,行翻轉頭.原來龍坪道有條好細既分义路可以去到龍翔道路邊.正正就係拍攝點.


呢條路有車入到來,只要行出鐡線網就可以影,另一個位置就係爬上公園鐡線網外圍,照計越高越好,不過又變咗俾下面遮咗最近既路面小小,而且會影到好大幅黑色既牆,最後都係決定下面位影,唔知點解冇乜車,就算夾相車軌都係比較疏落.


2020年9月8日 星期二

航拍煤氣廠

煤氣廠其實頗近我住的地方,去過影但還顧四周,可以高處影既應該都係私人地方.冇計,只好飛入去.


咁想去影係見到佢好多管道幾得意,同埋有啲管會噴煙,用飛機影就啱喇,專登飛埋支煙通度影,失敗,個天太光同啲煙黐晒底,只好飛高啲用廠景去突出啲煙.


跟住影一影個全景.


其實影日景只係探吓路,我主要想影夜晚開晒燈同埋可以用個天做背景睇到啲煙.平時要等到個天好藍先開始,但煤氣廠啲燈好光,個天仲有小小光就要開始.試過只係用ISO 200,唔知係咪飛得近好似好易矇,最後都係用翻ISO 400,搞到好多雜訊.


順便影埋個大景.


最後就係影噴煙,點解要朝早來一次先就係天藍既時間係好短,上到去要即刻知道飛去邊個位置.唔練習一次先搵得位來個天已經黑晒,呢張其實都好敏水.由1/5秒快門加到1/2秒先夠光,銳利度都差咁啲.


2020年9月2日 星期三

東涌影蝶

想去影蝶但又唔想坐小巴或者的士,因為好似都好危險.結果傻傻地坐巴士入東涌,成個鐘頭車仲要行餐死.


行到公厠位,呢度我記得係影一點灰既位置,真係有好多喎.不過路邊人來人往,停定冇耐都未就得到位又俾人嚇走咗,搞咗一大輪都影唔到張四四正正既,算數入大草地影,有好多幻紫班,隻蝶好普通,不過我又係未影過一張四正既,佢地硬係停定咗都會轉來轉去,一見到啱焦平就要好快手影完.


見路上有隻都係黑媽媽既以為又係幻紫班,睇真啲個咀係尖既,好彩夠大隻又都算肯停,增加多一種收獲.


天氣極熱,水飲得七七八八,又係時間回程,經過石灘見到佢,要影呀,我之前影過不過係爛既,今次呢隻好完整.