2017年6月27日 星期二

鳳園夜攝

次次去松仔園夜攝都要行嗰條長命斜.夜攝又多架生鬼咁論盡.鹿頸冇車又去唔到.燃起咗要搵個就腳地方既念頭.嵐山起咗之後,去鳳園多咗好多車,去或者翻都易好多.一於就.........


其實我咁做唔知有冇觸犯法例.因為鳳園實際上係要買票先入得去的,但買票既地方咁夜又已經休咗息,咁開放時間之外入去又理論上應該唔得.原本諗住淨係古家園一帶巡吓,但係啲狗好煩,係咁吠,侷住要行入啲.未入到裏面已經見到好多呢啲白色小東西,一時間都搞唔清邊度係頭,邊度係尾.


平時都冇留意,原來裏面好多閉路電視的,我估冇事冇幹唔會有人翻睇啲錄像呱?小心啲,盡量唔好照到自己個樣.夜晚會多咗好多飛娥類既東西飛來飛去.但形態靚既唔係咁多.多數頭細身大,又唔多合翼,除非爆頭,否則就係一個白色三角形,呢隻好細,影盡1:1先有咁大,當晚其實落完雨,從水滴上可以見到LED燈及閃燈的倒影.


物種都唔比傻仔園小喎,青蛙叫個不停,草蜢,八星虎甲蟲都有.不過位唔靚,背景好難搞.見到呢啲大嘢本該好開心,唔駛對焦對餐死.代價就係好難將佢從背景抽離.爆頭又成日俾佢對前腳遮住.


第一次見到龍眼雞就係鳳園,今日又見翻佢.影大嘢背景一定要夠遠,否則就好似剛才咁.


唔知係咪影得全身多,我發覺我手冇以前咁定.加咗1.4X之後成日唔中,之後要練習多啲先得,暫時既方法就係除走個1.4X.好耐冇試過呢種膚淺影法,重溫吓先,哎呀....陰公豬哦,原來前腳斷咗的.之前冇留意,佢眼下面有粒好似瘡咁既結構.


唔通佛祖又想玩我,影影吓竟然行雷閃電.陣間新聞紙報告有人深夜在鳳園被雷劈,就算唔死得都成世冇面見人喇.都係嗱嗱聲影埋隻肥蟲就走人.行行吓聽到好似開始有雨滴聲添,弊弊弊,呢度唔似得傻仔園咁有個亭可以避雨執嘢,陣間要開住遮執嘢都唔敢諗會衰成點,哎呀,都話咗玩我架啦,臨到出口竟然見到有隻手掌咁大既飛娥,應該係南嶺見到嗰隻品種,影唔影埋好呢?掙扎一輪都係算喇.陣間打水戰就..........

2017年6月22日 星期四

中伏青山

呢排真係冇乜運仔,中伏芭蕾舞之後又再中伏.話說突然間有幾日超好天,上天文台網頁竟然見到大嶼山能見度係50公里.呢個係從來未見過既數字,原本都計劃遲啲有人陪先去青山.但咁既機會我驚一錯過咗可能會要後悔一生.


冒住34度高溫會中暑的危險帶咗1.8公升水,再仿傚駱駝,上山之前飲定大量水,從屯門站經青山寺上山,跟據資料呢邊上比良景村上近接近一個鐘.查實屯門站到青山寺嗰段路都幾遠,值得花小小錢坐的士去到寺門口慳翻啲體力.彷彿是無盡的梯級,來到山腰,其實個景都唔錯.如果怕辛苦的話喺度影也無不可,但最可惜係會影到好多電線桿既電線.能見度沒想像中高,但都算唔錯.


上山既難度評價頗兩極,網站去到四粒星,但係有行過既人又話好容易.見到呢舊嘢即係已經捱到接近攻頂.綜合一下我的感受,全段路皆為斜路及梯級,沒有浮沙碎石,沒有剷林,沒有極險要需要手足並用的路段,係易行的.最高難度係海拔583m既高度,平時三百幾米都已經頗吃力,再chur多二百米真係腳震.流汗流到全身冇一吋地方係乾既.


點解話接近攻頂呢?實際最高點係呢個發射站裏面,標高柱同拍攝點亦都喺嗰度,諗住咁辛苦既地方冇乜人會上來,實際上非常熱鬧,見到成十幾人.連遮太陽既亭都冇晒位.


唔緊要,標高柱嗰度有發射站擋住,冇太陽曬住之餘仲頗陰涼,放定腳架順便試吓構圖,天氣不如想像中高清,算可以咁啦.


仲有半個鐘先日落,唔知點解日落方向好大煙霞,否則山脈配上日落都唔錯,一於留在原地等夜景,影過啲又試吓.


忽然有啲唔對路,好大風,搞乜鬼,成個景白晒,原來有啲雲吹咗埋來,再睇吓遠處嗰舊嘢,唔係咁大整蠱呱?臨到要影嗰吓先來啲咁既衰運.


祈求啲雲陣間會吹走.可能平時都冇乜燒香,佛祖都要玩吓我,雲不散之餘反而越來越密,頭先搞亂咗既構圖都冇辦法重整,對焦都睇唔到,只好見到稍清楚就盲拍,可惜光線暗都未曝完光又已經有雲遮翻.濕氣越來越重,搞到啲架生想滴水咁,而且好涷,涷到打冷震,磨到7點半知道再磨都冇用,只好懷着極差的心情,拖住極疲累的身驅,行翻583m落山翻屋企啦 :(

2017年6月16日 星期五

中伏芭蕾舞攝影

印象中芭蕾舞應該都頗單調,淨係成日用腳尖跳舞,咁未影過都要影吓既.之前都參加過這個機構的活動,都係交30-50張相就得,而且我見佢地攝影班學生多,要求頗低,矇矇地都冇所謂.上次影中國舞走嗰陣俾張咭佢抄咗啲相就完事,不過做嘢過得人過得自己,我事後都揀過執過再交過100張我覺得OK既相.


先講好的方面,大會既攝影席真係冇得頂,會覺得好被人專重,係觀眾席前面既5至7行中間位置,同參賽者成水平,仲要係評判前面,普通中距鏡頭就影到,唔駛出大炮,其他比賽跟本冇可能,只會被安排在一二角,冇雷公咁遠既位置,你影唔影到就閣下自理.很典形的芭蕾舞架式.


今次報名後先講交相要求,要求每隻舞要交15張相,仲要跟大會場刊編既號碼每隻舞開Floder上載,這實在頗厭惡的,一睇場刊,嚇咗一跳,兩個半鐘內有60隻舞,即係要交900張相.每隻舞得兩分半鐘,即係每十秒就要影到一張交得既相,減埋出場me me mo  mo,影到背面,唔中焦,矇咗,焦距唔啱既,應該每3秒就要影到一張先掂.嘩,超人都唔得啦.唔理喇,只好一見正面就狂影,行行企企都殺.坦白講,我第一隻舞由於焦距唔啱要換鏡,已經唔夠相.


仲有更大鑊,原來唔係所有參賽者都到齊的,諗住到時只靠順序開Floder就會搞錯,即係又要每隻舞開始之前對編號,我已經好忙喎,搞到倒瀉籮蟹,原來都有男生跳芭蕾舞的,但佢啲服裝比較似跳中國舞.


開場時有啲涷,慶幸有帶風褸,不過越影越熱,大概係心情緊張的關係吧,到後期已經好想快啲完,真係好攰,呢個參賽者幾積極,動作大開大合,可以提提神.


平時呢啲斜得咁緊要既畫面我通常都唔要的,今次要充數都照殺.終於捱到完場,一共影咗二千三百幾張相.即係連拍三張要有一至兩張交得先夠數,我知道有啲人會為求夠數同慳功夫,會就咁揀啲(甚至唔揀)比較好既Jpeg就算數,我實在做唔出,之後揀相同執相過程簡直想死,平時連拍差唔多既我實唔要,今次都要keep咗先,細粒既都要裁來用,一翻努力下只得三百幾張,都係唔夠數,算喇,唔夠好過交垃圾,忙中有錯,仲搞亂咗啲Floder俾收相嗰位師兄咋形,其實要咁多垃圾做乜呢?收相嗰個都希望見到10張8張靚相多過一大堆垃圾呱?呢啲做按快門機器既活動下次唔好搞我.

2017年6月12日 星期一

影拔河

呀........想像吓都知道好悶,就咁一條繩兩隊人鬥拉.但係我未影過,而且體育館好近好屋企,影一陣即走都唔駛俾車錢.


一條長蛇咁唔係好知點構圖,就用正面影個特寫吧.問題來喇,原來好遠的,圍欄圍到好開,影正面用135mm改埋APS-C模式都唔夠大,只好再裁多小小啦.


咁側面影囉,只夠影一個人,一人多就變成一條長條,人好細,照計鬥力好辛苦架,唔知點解好多組都好含蓄喎,唔通知我影緊相唔想咁醜陋?其實成場得我一個人去影咁大把.難得有人咁盡力,等我影咗你個辛苦樣先 :P


食飯時間,叫老婆攞個1.4x增距俾我加長支135mm再影正面先,全開光圈下起晒光暈,要收到起碼F5.6先用得,估唔到咁差喎,乜唔係靚鏡可以全開架咩?算數,影完龍頭影埋龍尾.似乎冇乜特別.


死心不息翻屋企攞支70-200mm F2.8來影,呀.........影完我覺得用135mm裁相好似仲靚.可能快門慢咗冇咁sharp呱?仲有一個難處係好多人一用力塊面就向天,唔係好影到佢正面.


哎呀,真的愛死這個運動員,全場以佢既表情最肉緊,最有娛樂性.影來影去都係差唔多,早啲翻屋企.

2017年6月7日 星期三

昂貴大佛點燈

幾次去影昂坪大佛都係大背光,山長水遠就冇再去試,除咗細心研究吓可以搵到正確時間會有正光之外,另一個方法就係影夜景,包冇背光,上網查過資料,只有初一,十五先會開燈,諗住日日都開燈,隨便搵日去就會得個桔.但係幾點會開燈就點都搵唔到.陳間又變咗不是影佛的李節就.......唯有搏吓啦,真係山長水遠架,入東涌搭機場巴士十幾蚊,東涌入昂坪又十幾蚊........弊,灟咗睇巴士時間表,原來尾班車翻東涌係七點十分.未天黑喎,點算........


去到東涌唔係掉頭走呀,盲目咁上咗去,最多堅持到最後一刻囉,燈原來一早就開住,白白的天空加上微弱燈光的大佛超級醜陋,冇理由影啲咁既嘢翻去呱?等多陣睇吓點啦. 過咗尾班車除咗露宿一宵或者行夜山出去之外,其實仲可以搭的士既,但如果截唔到就好大鑊,話口未完有的士入,問問佢先,去東涌大約幾多錢?百鬆啲啦,又唔係好貴喎,但頭先搭巴士好似好遠咁.司機大佬咁你可唔可以等到七點半左右我影埋相來接我?咁要等好耐喎,你而家即影即走啦,唔搭的士冇車走架喇.咦,佢好似唔多老實,明明仲有尾班車未走.跟住又有車入,問佢攞咗電話,影完就搵佢.


其實我都係十五,十六,如果效果唔係太差都係臨尾班車前影一影就算喇.仲有10分鐘就尾班車,如果呢個效果OK就可以慳翻百幾蚊.內心鬥爭咗一陣都係搭的士啦.當時旁邊有班長者攝影班,真係想叫佢地夾份搭的士,但佢地阿Sir講到無謂嘥錢咁,費事柴人地台啦.


只係等多15分鐘,呢個先係我要既光嘛.諗住順便影埋門口個牌坊,點知居然熄燈,算啦,執嘢走.先係七點二十分,如果尾班車遲15分鐘開就可以趕得切.最後係坐咗178蚊的士,第一個的士佬個百鬆啲都真係好鬆.橫掂使咗咁多錢,唔爭在去埋全美國最出名既餐廳食翻個.........磨菇芝士安格斯漢堡餐,要可樂,炸薯條轉粟米杯吖,唔該.

2017年6月2日 星期五

藝術體操四缺一

好耐冇影過藝術體操,襯住體育節又去重溫吓.


早上既項目真係好悶,只有球操同徒手操.咁都算喇,仲要係小學初級組,花式簡單到不得了.仲要超多人參加,不停重覆差唔多一模一樣既動作.影到幾乎瞓着.


當天開三邊場,即係評判嗰邊只留給大會攝影師,其餘位置小咗影正面既機會,咁機會唔駛好多既,成日比賽溜溜長,話唔定有啲動作要其他位影先靚,呢個跳躍動作係預見的,因為所有參賽者既套路都係倒模一樣.最大問題其實係背景,無論邊個位影都好,背景都係一大堆人.呀.......花到冇眼睇 @@


好不容易捱完小學雞組,到精彩既圈操,多件道具個人點都多啲變化.


話咁快已經點幾,死啦,又唔知有冇食飯時間,又已經幾肚餓,唔理得咁多,嗱嗱聲去食個快餐即翻吧. 人不在半空,圈在半空都不錯.


半個鐘就搞掂個肚.好彩仲玩緊圈操,不過原來係最後一個,跟住係頒獎.......早知影埋先去食飯啦.可能大會都知過晒鐘,只係搞咗半個鐘就開始棒操.棒操嗰兩支棒成日要掟來掟去,比較容易影到棒在空中的畫面.


影埋成個人跳起,好險,差小小就出界,預咗裁就會安全啲,但就唔係我風格囉.


來到繩操,條繩係非常難估計佢位置的.只好盡量在個人面前留多啲空間搏一搏.


不知不覺已經五點幾,幾時先到最精彩既帶操架?點知...........係冇架,原來要聽日先有,變咗四缺一添.冇計啦,早啲翻屋企囉.