十一黃金週期間黃大仙廟有舞火龍及舞夜光龍活動,火龍仲係薄扶林村嗰條,唔駛去咁遠影.七點開始,去黃大仙中心大快活食個早鳥晚餐,六點到正面位置已經被攝影發燒友霸晒,只好企側邊位.
終於開始喇,唉.....又係好多特權人士在欄內影,我等只能在隙縫中找小小機會,無舞火龍有不成文規定一定係要慢快門,諗住穏陣啲用1/50秒,條龍實在比較慢,冇乜活力,再下降到1/30秒,唔敢再慢喇,實在冇乜幾多時間係啱位,右邊既黑影特權人士好快又遮住,夾硬來搞到好似斬龍頭咁.
唔駛搖拍都有收獲架,不過背景就會黐晒底.原本話有兩場,諗住等一陣啲人走咗再企正面位補考,點知第二場係改咗遊行去出口廣場,迫到爆就放棄喇.
夜光龍影過好多次,利東街又燈籠,又噴煙都影過,原本都冇諗住去,咁啱朋友問有冇節目,咁就去啦,畫面真係亂過亂世佳人.今次噴煙好求其,冇將滅火筒塞入龍口,就咁在旁邊噴就算,而且龍頭係面向主家席,唔關我地事.
試吓慢快門整矇個背景,夜光龍快過火龍好多,只敢用1/50秒,真係得一張可以,其他炒晒.
之後又係走出街,畫面就冇咁多燈籠咁豐富喇,影埋個慢快門就走人.
朋友有門路可以去啓德青年體育館影攬球,但係......十五人,仲要係女子,肯定悶到爆.可是我有一個大膽既想法,未試過用慢快門影,正好可以咁玩.
我支石器時代300mm F2.8對焦太慢,冇錯入光量及散景冇得頂,但要佢一路追焦咬實主體佢係做唔到,既然玩慢快門就唔駛咁大光圈,100-400mm可以變焦對焦仲快得多.一來就係頂頭大熱菲濟對西班牙.你睇幾硬淨,簡直不動如山.
第二場忽然多咗好多人影相,原來係香港隊對巴西,我發覺我大部份相焦距都係用到400mm,所以我都見到頗多有錢人用400mm F2.8.
巴西隊出陣.,又係用到400mm,基本上只有差不多衝到底線先會用100mm.
冠軍之爭係菲濟同荷蘭,十五人真係好難影,走兩步就被人推跌,然後黐埋一舊,好難有走多幾步,所以一接到波就預佢交波,個波變咗一pet添.
菲濟始終係頂班,比較多見到佢走甩冇扑低.最後贏埋冠軍.
夜場先發覺新場燈光真係好正,十足單車館咁夠光,又唔黃,同以前地獄般既燈光係天壤之別.薩摩亞球員啲髮型好特別,本來呢張就唔合格,中焦唔係攞住個波既球員,但又幾有動感.
上次只影到爛鹿灰有點不甘,襯好天又去過.唔係咁好彩呱?居然未入到鳳園就已經在入口見到隻冇爛既鹿灰.佢個位要爆林,爆就爆啦,幾乎就位就飛走,唔緊要,經常發生,點知搞得幾次,可能嫌我煩住佢,一嘢飛咗上高位,冇得影.
可能上天見我太慘,安排隻成日飛唔停既黃裳鳳停我前面,雖然係背光,執執都用得.
行去針葉位影埋隻曲紋紫先,幾乎實喺度,唔會食白果.
旁邊居然有虎斑交尾,有塊葉遮住唔係咁好,想繞去背面佢就飛走咗.
上次有人話中藥園有鹿灰,走去探吓,其實呢度係唔係畀入來的,不過似乎冇乜人理,真係有呀,仲停靚位添,可惜又係爛架,心灰意冷去翻上次影到鹿灰嗰個位,鹿灰就冇喇,但有蜻蜓交尾,好過冇.
有啲旁邊運,有散仔上花,原本係黑底,等一陣再翻來轉咗位有綠底.
時間差唔多要走,去多轉二期冇嘢就走,見到有人係咁搵部機仔狂影,原來係蛇目蛺交尾,今日都有啲交尾運喎.
傳出消息鳳園鹿灰出現,鳳園一下子熱鬧起來.初初要影佢要走到出谷埔咁遠架.
鹿灰唔見,但有常駐既燕鳳,影佢飛好睇時機,要佢不停陪徊先得,今次好彩,影咗幾轉就遇到好位,可垂直影到佢,背景又唔太雜.
紐灰很常見,但其實都幾靚的.
一轉身又見到燕鳳,開翼很小見,尤其唔係停地下,背景也乾淨.
都唔記得有冇影過,總之影埋.
終於見到鹿灰喇,可惜......有一邊係爛的,而且個位真係......對正焦平就會遮咗條尾,侷住斜斜地影三張夾,影係影咗,但見唔到兩條尾疊住都係差啲,希望再遇到唔爛既.
中個尾彩,有勾翅交尾,真係超佢型,爆框咁滯,佢地非常合作,可以就到100%焦平影,最後一張過唔駛夾相.
菲林時代,感光度由菲林決定,入咗菲林係冇得中途改,數碼化之後,除咗光圈,快門,多咗一個ISO要考慮,亦發展出好多奇怪設定.
首先係有次影壁球,有人係用快門先決加Auto ISO,因為係室內,咁其實同用M mode都冇乜分別既,相機基本上都係全開光圈先會搞個ISO,好小會意外縮咗光圈,唯一唔同係如果運動員着深色衫或者淺色衫有機會張相光暗唔同咗.
有個只用光圈先決既朋友同我講,Sony機既Auto ISO唔好用,成日調到個快門好快而用咗比較高既ISO,我真係覺得Sony既工程師好無辜,如果佢設定咗慢快門而張相矇咗一樣係畀你鬧,唔知你影緊乜既情況下快門調高啲都好合理啫.其實你自己都知想用幾多快門,點解唔用M mode設定埋呢?等Auto ISO調光暗係咪合理啲?
最後一種情況是在影蝴蝶時發現的,主體細經常會遇到景深不夠及手震問題,多數人都已經懂得用M mode控制晒光圈同快門,光圈要收細增加景深,快門要快一點減小手震風險,光暗就閉上眼交給Auto ISO,陽光普照下通常都冇問題,但一去到暗位ISO就會好癲.
呢排日日落雨,外影都只可以在偶有陽光的落雨天出動.自從去咗花心坑之後,又對影蟲有翻啲興趣,尤其天陰陰,用閃燈冇咗唔夠光既問題,唔駛望天打卦.
搵隻唔郁既蜘蛛開齋先,影原先知呢個品種係未影過.
呢兩隻毛蟲真係細到癲,影到1:1都唔係好夠裁,加1.4x增距再影,由於個位用唔到比較穏定既姿勢影,結果炒晒.
呢條蟲仲高難度,靠條絲寧空吊住,搖來搖去,閃燈又頂唔到連拍,影到真係奇跡,冇比較冇傷害,專影蟲既人通常會用超大型柔光罩,我等懶人就咁祼燈影係會好反光,睇到蟲身有一條白色反光線.
長焦微距鏡有一個好處係稍為怕人既物種都有機會影埋,百微就好大機會嚇走咗佢,但係睇翻大型機頂柔光罩全部都係設計給短鏡用的,原來閃光燈越近閃光線越柔和,怪不得人地影出來好似AI做咁靚,完全冇光斑.
橫掂帶咗腳架,試玩吓用自然光景深堆疊,雖然我成日做,但去到咁細隻係超級難,加咗1.4x之後係勁手震,影蝴蝶頭時影咗幾十張先搵到兩張可以用來夾相,今次有腳架幫助減輕咗手震,但好似影風景咁放開手用快門線影唔多掂,加咗增距手動對焦時有小小回彈,要搵手捉實先準.
