沙灘手球

同時有兩個手球活動,普通室內手球同戶外沙灘手球.室內有冷氣影得舒服但光線暗,不過最終決定影戶外係全因一句宣傳,運動員如果轉身先射波會有加分,咁代表有足夠時間反應,可以影到成個人飛起既機會大增.

果然係曬到死,好處係超易影,運動員攞到波唔會即刻射,轉一轉身先夠晒時間對焦,影到成個人飛起.

為咗虛化背景,我開到F2光圈,已經用到ISO 100,快門竟然係1/3200秒.咁既動作室內好難唔矇.

要影埋個波離手,攻守一齊飛就最正.

 對面龍門都要影吓,原本用200mm會比較適合,支鏡對焦唔多夠快,最後換成135mm裁相.

由於要轉一轉身先射波,即使影對面都可以襯轉身嗰刻影到正面跳起.

鹿灰入手

死心不息又去鳳園搵鹿灰,爛既始終唔得完美.

一於又去古家園,真係見到佢,個位都可以啦,望到個天比較爆光,好彩仲有小小綠,焦平差小小,兩張夾埋都搞得掂,得來全不費功夫,睇真啲原來附近仲有兩隻,乜一係就多成咁,見到有人入來同佢講有鹿灰,點知佢都費事影,已經變咗普通蝶 :(

 潛入中藥園見到隻薑弄,都好影埋佢.

出翻一期見到金斑交尾,仲係靚位,可惜朵花就比較爛,影完又見到另外一對交尾,今日乜事幹?

今日人群係集中在入來的路上,目標係新蝶齒翅蟯,終於出現呀,個位就真係,要爆林兼爬玻先去到,距離仲有點遠,我自己一個就唔會影喇,成班人排晒隊就大膽咗,其實都唔多靚,不過新嘢冇計.

 去埋神仙樹位睇吓就走,冇鹿灰但係有隻普通大蝶,都好加多張收獲.

慢快門影劍擊

劍擊實際上是個頗沉悶的運動,兩個人攞住支鐡線拮來拮去,又好小好似劍道咁埋牙鬥擘,但我要完成我另一項用慢快影的運動.

去到見到個大台,今次冇死,終於可以有個乾淨既背景,結果........只係發夢,個裁評係常駐中間既,只有襯兩個選手偏離佢又追唔切先偶有機會影一張,高速快門都要等運到,慢速炒埋又有排等.

最前嗰條賽道裁判又係阻住,於是我將目標放喺距離第二條賽道,裁評雖在背面,但要等最近賽道啱啱在右邊博火,呢隧又啱啱在左面博火,唔好阻住先有得影

主台前面係運動員休息地方,唔知點解會咁安排,佢地忽然想睇比賽企起身就會遮住你,最理想就係有運動員邊移邊打,有啲玩衝動一移到中間博一劍就完就會完全影唔到,因為條計分柱啱啱遮住.

死火,搞搞吓背景版嗰邊冇晒比賽,侷住挑戰亂到七彩既大場,盡量用移動整化個背景啦,就快夠時間又落後一方會瘋狂衝前博劍,我就最喜歡.

雖然有啲偏背面,都好過就咁企喺度拮.

錯位大澳

去大澳實在太遠,要成二個幾鐘先去到,唔係有特別目的真係咪搞,今次影會約去大澳有新位可影到水鄉加日落,應該唔係虎山呱?雖然虎山係咁上下路程,但應該影唔到水鄉,仲安排埋晚飯,影完夜景唔駛再捱多一個鐘車出東涌食先的起心肝再去.

新拍攝位置原來在上大澳墳場的分义路上,十五分鐘左右就到,咦,原來我來過架喇,不過係高得多既大北山,嗰陣個太陽直情去咗港珠澳大橋嗰邊,今次好小小,夾硬裁到16:9先見翻有啲水澳,如果要見晒啲柵屋就會變到一條長條.

最後用翻正常比例影埋個夜景就去食飯喇.

黃大仙舞龍

十一黃金週期間黃大仙廟有舞火龍及舞夜光龍活動,火龍仲係薄扶林村嗰條,唔駛去咁遠影.七點開始,去黃大仙中心大快活食個早鳥晚餐,六點到正面位置已經被攝影發燒友霸晒,只好企側邊位.

終於開始喇,唉.....又係好多特權人士在欄內影,我等只能在隙縫中找小小機會,無舞火龍有不成文規定一定係要慢快門,諗住穏陣啲用1/50秒,條龍實在比較慢,冇乜活力,再下降到1/30秒,唔敢再慢喇,實在冇乜幾多時間係啱位,右邊既黑影特權人士好快又遮住,夾硬來搞到好似斬龍頭咁.

唔駛搖拍都有收獲架,不過背景就會黐晒底.原本話有兩場,諗住等一陣啲人走咗再企正面位補考,點知第二場係改咗遊行去出口廣場,迫到爆就放棄喇.

夜光龍影過好多次,利東街又燈籠,又噴煙都影過,原本都冇諗住去,咁啱朋友問有冇節目,咁就去啦,畫面真係亂過亂世佳人.今次噴煙好求其,冇將滅火筒塞入龍口,就咁在旁邊噴就算,而且龍頭係面向主家席,唔關我地事.

試吓慢快門整矇個背景,夜光龍快過火龍好多,只敢用1/50秒,真係得一張可以,其他炒晒.

之後又係走出街,畫面就冇咁多燈籠咁豐富喇,影埋個慢快門就走人.

慢快門影攬球

朋友有門路可以去啓德青年體育館影攬球,但係......十五人,仲要係女子,肯定悶到爆.可是我有一個大膽既想法,未試過用慢快門影,正好可以咁玩.

我支石器時代300mm F2.8對焦太慢,冇錯入光量及散景冇得頂,但要佢一路追焦咬實主體佢係做唔到,既然玩慢快門就唔駛咁大光圈,100-400mm可以變焦對焦仲快得多.一來就係頂頭大熱菲濟對西班牙.你睇幾硬淨,簡直不動如山.

第二場忽然多咗好多人影相,原來係香港隊對巴西,我發覺我大部份相焦距都係用到400mm,所以我都見到頗多有錢人用400mm F2.8.

巴西隊出陣.,又係用到400mm,基本上只有差不多衝到底線先會用100mm.

冠軍之爭係菲濟同荷蘭,十五人真係好難影,走兩步就被人推跌,然後黐埋一舊,好難有走多幾步,所以一接到波就預佢交波,個波變咗一pet添.

菲濟始終係頂班,比較多見到佢走甩冇扑低.最後贏埋冠軍.

夜場先發覺新場燈光真係好正,十足單車館咁夠光,又唔黃,同以前地獄般既燈光係天壤之別.薩摩亞球員啲髮型好特別,本來呢張就唔合格,中焦唔係攞住個波既球員,但又幾有動感.

再追續鹿灰

上次只影到爛鹿灰有點不甘,襯好天又去過.唔係咁好彩呱?居然未入到鳳園就已經在入口見到隻冇爛既鹿灰.佢個位要爆林,爆就爆啦,幾乎就位就飛走,唔緊要,經常發生,點知搞得幾次,可能嫌我煩住佢,一嘢飛咗上高位,冇得影.

可能上天見我太慘,安排隻成日飛唔停既黃裳鳳停我前面,雖然係背光,執執都用得.

行去針葉位影埋隻曲紋紫先,幾乎實喺度,唔會食白果.

旁邊居然有虎斑交尾,有塊葉遮住唔係咁好,想繞去背面佢就飛走咗.

上次有人話中藥園有鹿灰,走去探吓,其實呢度係唔係畀入來的,不過似乎冇乜人理,真係有呀,仲停靚位添,可惜又係爛架,心灰意冷去翻上次影到鹿灰嗰個位,鹿灰就冇喇,但有蜻蜓交尾,好過冇.

有啲旁邊運,有散仔上花,原本係黑底,等一陣再翻來轉咗位有綠底.

時間差唔多要走,去多轉二期冇嘢就走,見到有人係咁搵部機仔狂影,原來係蛇目蛺交尾,今日都有啲交尾運喎.

再探馬草壟

馬草壟已經去過幾次,連火燒天都影過,都冇打算再去,不過最近影會搞活動就當去聯誼吓,原來上次去已經係五年多前.初初計劃係七月去,不停落雨結果拖到九用先成行,當天包咗架小巴,直接去到警崗位置,小小斜路都慳翻.

粗略估計有一半人都係去玩航拍拍片,我就係影相派,雖然冇燒天,有日落及靚雲已經好好,冇食白果亦都唔駛清水疍,一格格既漁塘甚麽漸變灰都係盞搞,必定要HDR先掂,記得以前HDR啲鬼影事後搞餐死,依家Light room個除鬼影功能真係超勁,完全唔駛自己慢慢續忽搞,一按完成.

夜景以為有機會燒天,最後都係失望,只有小小紅紅地,草草收場.

追逐鹿灰

傳出消息鳳園鹿灰出現,鳳園一下子熱鬧起來.初初要影佢要走到出谷埔咁遠架.

鹿灰唔見,但有常駐既燕鳳,影佢飛好睇時機,要佢不停陪徊先得,今次好彩,影咗幾轉就遇到好位,可垂直影到佢,背景又唔太雜.

紐灰很常見,但其實都幾靚的.

一轉身又見到燕鳳,開翼很小見,尤其唔係停地下,背景也乾淨.

都唔記得有冇影過,總之影埋.

終於見到鹿灰喇,可惜......有一邊係爛的,而且個位真係......對正焦平就會遮咗條尾,侷住斜斜地影三張夾,影係影咗,但見唔到兩條尾疊住都係差啲,希望再遇到唔爛既.

中個尾彩,有勾翅交尾,真係超佢型,爆框咁滯,佢地非常合作,可以就到100%焦平影,最後一張過唔駛夾相.

關於Auto ISO

菲林時代,感光度由菲林決定,入咗菲林係冇得中途改,數碼化之後,除咗光圈,快門,多咗一個ISO要考慮,亦發展出好多奇怪設定.

首先係有次影壁球,有人係用快門先決加Auto ISO,因為係室內,咁其實同用M mode都冇乜分別既,相機基本上都係全開光圈先會搞個ISO,好小會意外縮咗光圈,唯一唔同係如果運動員着深色衫或者淺色衫有機會張相光暗唔同咗.

有個只用光圈先決既朋友同我講,Sony機既Auto ISO唔好用,成日調到個快門好快而用咗比較高既ISO,我真係覺得Sony既工程師好無辜,如果佢設定咗慢快門而張相矇咗一樣係畀你鬧,唔知你影緊乜既情況下快門調高啲都好合理啫.其實你自己都知想用幾多快門,點解唔用M mode設定埋呢?等Auto ISO調光暗係咪合理啲?

最後一種情況是在影蝴蝶時發現的,主體細經常會遇到景深不夠及手震問題,多數人都已經懂得用M mode控制晒光圈同快門,光圈要收細增加景深,快門要快一點減小手震風險,光暗就閉上眼交給Auto ISO,陽光普照下通常都冇問題,但一去到暗位ISO就會好癲.