又去影花車

新年日日天氣麻麻,似乎都係得花車比較值得去影.影呢啲活動最麻煩就係要霸位.跟據以往經驗,5點到都頗極限,5點半就要睇運氣,6點多數要後排攻擊,我4點半到但最後都等到5點先埋位.點解?因為要去多轉厠所.之後到10點半都唔可以行開,午餐我一滴水都唔敢飲,真係好傷肝.

花車要8點先在文化中心表演再出發,到海防道起碼8點半,大會都知大家悶,6點就安排有啲表演隊伍熱吓身先.熱完都未夠鐘甚至會出多轉,最先出場實係小丑.

不過有好多係就咁行既隊伍,咁全隊紅衫都幾搶眼既,前兩次都係企反手位,今次揀咗個正手位諗住順手啲,實質上唔係好大分別,其實我最想去廣東道轉入海防道個轉彎位,咁就可以影正面唔會有人阻到,可惜又係俾樂隊霸咗.

大公仔幾時都夠震撼,所以年宵好多攤位都係賣呢啲,小小錢買到大大件,實質只係一塊膠皮,其他都係空氣.

齋行好悶,俾啲表演睇吓好喎,咁先係,彈高彈低搞到啲人嘩嘩聲.

冇乜功夫就要靠服裝,當日好多隊伍都掛咗LED燈,科技改變世界.

好不容易捱到花車出來,個個都好High,實際上啲花車係冇乜睇頭,多數都只係四四方方一舊磚咁.海洋公園算係好啲,有啲公仔同大家打招呼.唔知幾時隊樂隊係走咗,變咗有正面位,但又好衰地在前面較遠處加咗個欄杆(可能驚啲人整親啲隊伍呱?)咁就好難講霸唔霸正面位好,因為有機會俾欄杆遮住,影唔到腳.

等花車其實係等黐住花車出既遊行隊伍,有某啲隊伍係唔會預演的,一定要花車出佢先出,嗱,全世界都係等呢隊,特別係啲鬼佬,High到吹晒口哨.我本來都想影近啲,但係實在唔夠啲電話伸得咁出,最後只可以係咁.

其實唔一定要外國月亮先圓既,本地都唔錯呀,仲有親切感啦

仲有傳統既舞龍舞獅,個個都想摸吓個龍頭加啲好運.話咁快又來到遊行既尾聲.出奇地我唔係太需要去厠所(可能就快脫水),同埋好肚餓,往年經驗係所有附近既食店都會爆人,老婆已經幫我準備咗三文治,就咁搵個地方立吞咗佢又一餐.

細山走錯路

前排天氣涷,上高山的話,等影夜景肯定變雪條,着得衫多除咗上山好熱之外仲加重負擔,都係唔好咁艱辛先,記得經細山去三支香途中經過一個位可以影到油庫及青馬橋.就揀佢做今次目標.

得一條路照計唔會行錯,就係咁邪,竟然搵唔翻個位.唔通行得未夠高?其實嗰個位係咪完全冇遮冇擋我印象都頗模糊,撞撞吓去咗一條分义路,都OK喎,雖然有小小草阻住,不過日落時間就到,費事去搵,就地影就算數.啲草其實幾阻吓.最終zoom到50mm都避唔晒,唔可以再zoom喇,否則變咗特寫.

之後就係等夜景,普普通通咁啦,其實試咗啲新技巧,不過失敗咗無謂多講.

之後就係轉角度影埋有青馬橋嗰邊.又zoom到50mm.但依然有兩條好長既草遮住,易得爬出小小剪咗佢.最後怕死.事後除草的難度非常高.雖然只係兩條草,但好近既關係化到好大片.我見人地用印章工具慢慢續小搞執得好完美.跟住試咗一輪,實在太煩喇.個景唔值得我咁花時間,求其內容感知刪咗佢就算.唔細心睇都OK啦.

微縮藝術展

近排冇乜落雨,但好涷之餘仲有一樣問題,部份地區能見度低.咁唔代表其他地區能見度就高,只係冇咁低.外拍冇計又有人話去影呢啲,咁就去啦.

呢啲展品其實出過好多次啦,好多都熟口熟面,咁又係,整得咁辛苦唔通用一次就拆咩?呢條舞火龍我上次都見過啦.不過今次試吓用全片幅影.事後睇翻好似仲衰,景深太淺唔多掂.即使用到F11光圈,景深都唔夠同時覆蓋啲人仔同龍頭.

好彩係朝早去,而展覽場地又係露天,即係夠光,縮光圈到F13再試,勉強叫做夠景深.但係又變咗好似用電話影咁,都唔知自己想點.

幾乎個個出相都係會出呢個景,淺景深用在一架平面既電車上最合理不過,夠夢幻好似係特登用移軸鏡影實景咁.

除咗景深外,另外一樣好麻煩既係啲射燈,展覽會經常都係咁,又唔係珠寶展覽,淨係要突出隻鑽石介子就話啫,呢啲景個個都係睇成個景架啦.做乜好似全世界得一種燈咁.打到某啲位爆晒,又唔用得腳架影兩張夾埋,真正係考驗你部機既動態範圍.

襯人多混亂,我玩咗個Top shot.有反mon真係好,我見好多人盲拍,其實係好難成功既,我都估唔到原來要伸到好入,幾乎唔夠手長,盲拍多數只會影到半張枱.影大平面夠晒景深,係咪有啲航拍feel?

非常簡單既一個場景,但原來縮到F16光圈都唔夠景深覆蓋個人同啲揮春,全片幅真麻煩,唔緊要,影細小小再裁大就搞掂.坦白講用到F16真係好盡,銳利度明顯睇到差咗.只叫做仲用得.又到新年,借啲揮春同大家拜年,祝大家財源廣進達九江,生意興隆通九海啦.呵呵.

帆船嘉年華

朋友叫我去既時候我同佢講,岸邊冇乜好影喎,淨係影到一隻隻帆船喺海度咁囉.都冇諗住去,放假但天氣好灰,影風景冇乜行,又冇其他地方去,咁就去啦.

 

除咗帆船比賽外,仲有嘉年華,即係有啲表演,有賣嘢食,有賣體育用品,冇賣廣告咁啦. Volvo 有嘢俾人玩,最受歡迎,這個控制剷泥車的攤位可以考驗自己對機械的控制能力.其實我想睇吓有冇人暴力操控,一嘢拉甩嗰塊版,哈.

 



呢個搭車遊戲都幾似過山車慢版,我同朋友都有衝動想玩,不過原來已經派晒籌,下午請早.

章程話11時會有比賽,不過通常都係例遲,現場係乜指示都冇,包括冇觀眾席,不過有講起點同終點都係碼頭呢度,咁喺度捕疍都應該係最正路選擇.終於等到出發,想像中既千帆並舉畫面並沒有出現.只係一隻隻慢慢出,仲要帆都冇開,唔通係計時賽?只好等衝終點啦.

食完嘢好似都係冇乜動靜,章程話兩點有全日主力港外賽,但碼頭啲船都走晒喎,唔通出面係起點,鬥快翻緊來?見冇嘢做,同朋友講不如上天台行吓.好彩咋,原來呢度先睇到比賽,觀眾席都係冇既,邊度睇到就邊度睇啦.最終搵到張長凳做後排攻擊.隻船拗到咁斜應該都係高手來既.

我想畫面盡量多船,好彩係繞圈賽,都俾我影到三隻同時出現既畫面.

旁邊好多大大小小既船為咗今次比賽停喺度,有啲係大會拍攝既船隻(其實一定要上船先影到運動員拚搏畫面,我地遠炒只係搞搞震),更多既係有錢人觀眾席.

坦白講都幾悶,完全感受唔到速度感,船去得更急似乎就快完,跟住真係完咗,點解會知?因為全部觀眾船一齊離開,仲壯觀過真正比賽

摩天輪重開

一直都想去影呢個例景,到真係的起心肝既時候竟然係易手,天真的我以為第二日就會重開,實際一搞就幾個月.坦白講摩天輪冇開燈真係唔好嘥時間影.......

之前試過喺天橋影,其實都OK的,景會有點太近而且四周太多人,今次去咗IFC平台清靜得多,但就勁涷,等到天色差唔多先硬住頭皮出去.普通夜景冇乜難度.只係摩天輪中間既字爆咗光唔係太好睇.不過只要影多張夾埋就得.由於爆光位好工整,非常容易圈選出來,漸變都唔駛.

之後就係9秒9衝去另一面影第二個構圖,天色黑得勁快,已經過咗最佳天色.除咗摩天輪中間既字外,環球嘉年華既燈光都好爆吓.懶得影多張,就用原本嗰張推盡highlight去解決,成張較的話會搞到好灰,所以又係疊相再露出呢忽.

最後就係利用爭取到既時間影埋個大啲既摩天輪喇.

機場維修區

呢度大大話來過四五次,聽人講可以見到飛機由頭頂飛過,好似松山機場跑尾既經驗,但係我就一次都未遇過.聽過係航班編排問題.原本我冇諗住再來,但成班人又話要影相,又話怕辛苦,要去啲車直到既地方,個地方唔係我提議,但難得有人出主意.我附和咗.

冇飛機既話,可以用條橋做前景,影吓日落,不過今日清水疍,當係陪吓朋友囉,有意裁花花不發,竟然第一次見到有飛機從遠處飛來.即刻嗱嗱聲改快個快門涷結架飛機.對焦其實唔駛,咁wide乜都變晒超景深.架飛機郁緊照計唔可以影兩張夾埋.實質又唔係,只要等架飛機完全走晒先影第二張就得.架飛機都真係有松山機場咁近,但降落地方就遠好多而且被鐡線網遮住晒,冇得影.

跟住來到夜景,個景講真不怎樣,天全黑之前仲有一架飛機飛過,要涷結佢唔夠光,影光軌又似乎要搞好耐,朋友冇乜耐性,結果求其影吓條街就算,收工開車去食飯.