2017年5月27日 星期六

新機去水戰

好日都唔參加活動,一參加就話會落雨.好衰唔衰,部A77居然最近瓜咗.用元老A700我又唔係好有信心.侷住用新機上陣@@


好彩早上冇乜雨,天就陰啲.其實好弊的,快門唔夠快之外,對焦失敗率會好高,新機好處係高ISO雜訊控制較好,日光日白照用ISO 1250.跳欄其實好難影,啱距離既欄只有一至兩個,對焦又要求一對即中,以往好多時都冇跳欄相交.新機又幾好喎,成功率高得多.


死火,真係落出小雨點,曾經試過用膠袋做相機雨衣,係好阻的,而且啲水儲埋之後會流來流去,干擾既程度係直情影唔到相.所以今次只帶咗條毛巾來,細雨時可以擋一擋,濕咗都可以抺,大雨既話,我索性走翻入觀眾席算數喇.影標槍正面影太危險,後面影咗都冇用.實際只得一個位,背景雜都冇計.落住小雨搞到我好論盡,好多都錯過咗冇影.


田徑有很多項目,成日都一齊比賽,搞到唔知影邊樣好,幸連地跳高就在標槍旁邊,可以叫兩飛,從深色背景可以睇到,當時下着細雨.呢個時候……男子推鉛球已經比賽完畢,請運動員準備到頒獎台.哎呀…死喇,冇相@@


田徑又點可以冇跑步,要影晒咁多線起跑以往要換17-50mm,依家用70-200mm都勉強影到.好心唔好準備咁耐啦,我仲有好多其他項目要影的.


迎面而來既動作對對焦系統係一大考驗,用A77一定要超好天先會比較有把握對得中.陰天失敗率接近100%,其實A99II都好吃力,三級跳動作比較慢先搞得掂.


來到最難搞既鏈球.換咗機即使500mm都只夠影全身.個天越來越暗,卒之又谷到ISO 3200.A77既話應該可以放棄,改去影其他項目.嘩,準繩度也太差了吧?唔怪得工作人員猛叫我地小心啲 :P


男子推鉛球就冇相喇,好彩仲有女子.背景麻麻,求其影啲交差就算數.


跳遠難度高過三級跳好多,A99II都搞唔掂,可能因為又已經暗咗好多,已經要開到ISO 1600,退而求其次,影吓落地唧起沙塵嗰吓,不過今日既沙塵係一pet pet.


雨越落越大,實在好難再夾硬影,我開始專心避雨,正想放棄入翻觀眾席,男子一萬米既起步既槍聲響起,大鑊,唔俾橫過跑道,一萬米即係幾長?係跑25個圈呀,平均時間係40分鐘左右.死火,要硬企咁耐實濕到扭出水.............

2017年5月22日 星期一

影橋的季節

經過漫長既等待,終於等到七點鐘天都未黑齊既日子,點解要等?睇過我的”不是影橋的季節”就會明白,青馬橋係要搭正七點個橋墩先會開燈的,冇錯唔開都可以照影,但上半部黑媽媽始終不是味道………


唔知係咪腦退化,竟然又行錯路,未去到樓梯就捐咗入啲草入面,好彩又搵到個缺口去翻正途,今次穏陣啲影得個入口,下面其實四通八達,N咁多條樓梯連接,行錯咗真係唔知會去咗邊,入黑就更加弊,時間預得太敏,信不信由你,呢張係第一張相.連小休既時間都冇,就係為咗嗰小小光就要來多次,咁又係,當你乜都冇就影到已經好好,但之後你就想完美啲,仲有我覺得中間堆建築物太光,條路唔突出,後期調暗咗一級.


襯天未黑晒,影多張特寫,個天其實黑得好快,只係幾分鐘….已經太黑喇,個天已經需要後期推光,再遲幾分鐘,就算推光都會係灰色而唔係藍色.OK收工,估唔到前後影咗十分鐘都唔夠就走得.最有效率的一次 :P

2017年5月18日 星期四

亂來的景深堆疊

上次盲中中去坪洋影白芧,點知未係時候變咗影白果.今次掌握可靠資訊先再去多次.天陰陰都對日落冇乜期望,諗住影咗啲白茅海就算,又估唔到矇矇地都算有日落喎,意外的收獲.


問題喇,所謂白茅其實啲白色唔係好出,就咁遠影加埋旁邊啲草,溝出來既效果係一大片淺色既草.睇完會莫名其妙係影緊乜.唯有試吓有咁近得咁近,盡量突出佢地.未試過咁近既前景,平時用細光圈對焦前景就前後都sharp晒既招數唔係好work.要遠景sharp點收光圈前景都係一大片矇.


對焦到前面見到一條條草既話,後面就係矇到係乜都唔知.咪天真諗住計乜鬼超焦距,跟本係嘥時間,你並唔係唔知道對焦邊度,用幾細光圈,而係跟本點都唔會夠景深,夾硬計的話可能會得出F100甚至F500等奇怪光圈值.遇到咁情況有一招叫做景深堆疊,或者Focus stacking.原理係影幾張唔同對焦距離既相然後用軟件合成,軟件會找出不同相片清晰既地方,用佢蓋過其他相片模糊的地方………很遺憾,Paintshop Pro有大量Photoshop既功能,但呢樣係冇既.唯有人手搞,續忽舖上去.


唔太肯定要影幾多張先夠,穏陣啲影多幾張,這時Peaking功能很大幫助,確保每忽紅色顯示位置有重疊應該就冇衰,最後影咗六張.日落時間,天色開始暗,就算景深夠,只要有小小風,快門速度都不足以涷結白茅的晃動,點都會有啲位係矇.我估就算用Photoshop自動功能都可能會穿崩,但……啲草咁亂穿咗崩又真係未必睇得出……呵呵,其實亂亂地都好,即係我搞到穿崩都睇唔出啦.平時我地夾相為咗過渡自然會將個筆刷較到好大,但呢度唔得,因為會整翻矇之前清既部份.要較到頗細吓.我發覺其實唔駛咁多張,三張左右已經可以,完成之後就係咁喇.


橫掂來到,順便影埋夜景,全片幅的線條確實係比較實淨的.

2017年5月13日 星期六

籠中蝶

自從去咗南嶺影咗啲古怪蝶之後,蝶友們又發現國內新大陸,唔同去南嶺要坐高鐡又要過夜咁交關,這個叫青青世界的地方在蛇口,即日來回都冇問題,交通費還可以,落馬洲過關再加六十幾蚊的士就到,如果深圳灣過關更加廿幾蚊就搞掂.當然仲可以坐地鐡.只需幾蚊雞………


點解叫籠中蝶,因為呢度營運手法係會買啲蝶翻來放在有網的蝴蝶屋任大家欣賞,當中有大量平價蝶夾雜小量罕有蝶.代價係80蚊人仔入場費.之前仙湖植物公園都試過,不過後來執咗笠.開齋係呢隻大嘢,平時應該排晒大隊影,但原來啲人話佢隻翼摺咗小小唔靚,啱晒我啦,我要求低,冇人爭就最好.


之前有人話呢度都係大蝶多,淨係帶300mm F4就得,微距都唔駛帶,來到就知有問題,由於我地係假期來,多人到行都行唔郁,要退到老遠影會有好多人在你中間經過,而且通路窄有時退無可退,不過我係冇呢個問題……因為我都冇300mm F4.哎呀………180mm都幾乎爆框,冇計後面頂住又要呢個方向先有綠底.呢張唔貼Facebook喇,陣間又俾人話我膚淺冇構圖 :P


呢隻可能顏色唔靚,冇乜人哮.睇真啲佢原來有啲甩皮.


最後影埋呢個交尾,嘩,呢啲構圖真係去十年都遇唔到一次呀,交尾又上花,後面仲要係黃花底.大家明啦…其實啲蝴蝶幾慘,放得來呢度出唔翻外面應該都係等死,而且內地人都覺得啲蝴蝶係用來玩的,我就見一個父親不停叫個仔摸一下,摸一下.個小朋友在鼓勵下最終起腳踢……園內寫明不準捕捉蝴蝶,用手捉既自然不計其數,更誇張既係出面既店舖竟然有網賣,亦真係有人買入來網蝴蝶,但就冇人理,真係冇眼睇.

2017年5月8日 星期一

唔夠長

入手全片幅之後影低光真係好咗好多.以前暗到幾乎影唔到既都可以夾硬谷ISO谷到影到.不過另一個問題又來喇.冇咗1.5倍焦距增長變咗以前夠長焦距影到既搞到唔夠.針冇兩頭利......

見體育節有獨木舟水球走去影吓.之前都冇影因為觀眾席實在太遠而且角度唔好.又暗,長鏡實唔夠光,今次諗住又用高ISO夾硬來.影知真係太暗喇,就算用F2.8都要谷到ISO 3200先有1/250秒快門,長鏡可以收埋.高炒角度都麻麻地,冇乜比賽感覺.


影影吓竟然有人What我叫我去池邊影,哎呀....原來體育節係一直都可以落池邊影架.宣傳冇講真係唔敢行入去,俾人鬧就唔好,水平角度啲感覺翻晒來,不過泳池咁大,200mm好多位都影到頗細粒.侷住要裁......


裁相真係糖衣毒藥,又唔驚出界,又唔駛就對焦點,連構圖都幾乎唔駛,擺晒中間事後搞就得.A99II又多像素,就算裁到APS-C大細都仲有1700像素,仲多過A700,而且佢雜訊控制又比較好,啲相仲用得.一慣咗就好容易明明支鏡夠長都特登影細啲留翻裁,要告誡自己千萬唔好用壞手勢先得.


講翻比賽,其實唔算太精彩,尤其女子,多數都係十零零,冇乜爭持局面.不過呢啲比賽又可以落池邊影機會唔係咁多,都算值得.


咁有啲位都唔駛裁既,比較翻始終係越裁得小越好,呢個時候有支300mm F2.8就好.我見隔離位師兄就係一部接300mm F2.8,另一部接短啲,不過Sony嗰支成四萬幾,唔會買啦.Sigma嗰支又話唔係好靚,而且都要兩萬,都係發吓夢就算.


貼多張比賽既相,影守門員其實要有啲準備的,佢處於下方,要特登揀嗰部份位置既對焦點先會sharp,平時咁成堆對焦點多數會對錯焦去進攻球員背脊.但好多時啲人又遲遲唔射門,嘥晒啲機會,真係激死.

2017年5月3日 星期三

團體舞

團體舞比較小有,可以影吓好多人既畫面,快門時機未必要好準,不過要影到好多人,好齊,有舖排,難度其實唔低過雙人舞的,係另一種難法.


不過睇賽程表有啲失望,好多比賽隊伍係幼稚園,即係翻騰三週半加轉體360係唔會有,多數都係就咁郁吓手郁吓腳,話係集體舞,原來都係建基於拉丁舞,只不過係集體跳咁解,一如所料,基本上只係跳基本步.


當日有三邊位都可以影,左右兩邊唔會有評判在前面遮住,不過就好似打牌咁對死,大家既背景都係黑媽媽既人頭.正面只可以在評判中間既隙縫影,但背景就乾淨好多,對正大會Banner既仲可以有個光猛既背景.我梗係揀正面啦,寧願得一張合格既,好過一百張冇用既.而且集體舞全部向評判跳,側邊影會好怪,只啱影特寫.


正面除咗易俾評判遮咗側面既角度之外,仲會遮埋前排,本來影小朋友應該低角度影,但係都冇計侷住要高炒 @@


唔想俾評判阻仲有一個辦法,當天每場可以有8分鐘練習時間,係正正式式用比賽個場來練習,所有位都同正式比賽一樣.輸咗都冇得頼唔習慣喇,不過……評判唔阻會有教練阻 @@


終於到中學組唔駛咁悶,我喜歡呢個花式哦.


係喎,要貼吓好多人的畫面,係好簡單只係大家舉舉手,不過就一定要對正,仲要對正中間先會好睇.如果打斜影埋去又或者喺側邊到俾一個遮晒成行人效果就會差好遠.


我朋友話呢組似阿凡達,族長正在作法 XD