2018年8月31日 星期五

悶熱丫髻山

一連兩個星期都係唔好天,結果大佛點燈加日落最終影唔成,雖然唔落雨,但能見度極低風景又影唔成,只好去丫髻山碰吓運氣,聽聞有金斑蛺,我雖然影過,不過係爛咀既.


前幾次來都好似冇咁熱,所以只帶咗700ml水,點知好悶熱.冇乜風,上到山已經飲咗1/3. 可能打風的關係,成天都係蜻蜓,好彩蝶都唔小,只不過都係飛來飛去,肯停既就只有佢,好多次停既位都好雜,搞咗好耐先有一張背景乾淨啲既.


朋友好鐘意達摩,佢留意到有個位佢地比較定就叫我影,打飛我真係弱項.既然冇嘢影都要夾硬影,影到蚊滋咁細粒只好靠裁,又係成堆先搵到一張角度比較好同背景乾淨啲既,不過………佢唔係達摩,係柑橘呀,噢.


丫山老友記,幾乎次次都見到佢,肯停但硬係冇辦法再走埋啲,最後只可以係咁,有啲肚餓,食埋個麵包更加乾上加乾,飲到得翻小小水都仲係好口乾,再唔走恐怕中暑,好彩一陣間就落到山腳,飲埋最後一啖水.坐小巴出巴士站再買多支大水飲晒佢.

2018年8月27日 星期一

十武器

武術比賽聽落好似Street fighter咁打餐死,事實上係唔會既,只有一個人耍套路,觀賞度同睇單人跳舞差唔多.而當中既太極拳更加係慢動作,悶死人.要避之則吉.我留意到每次都有所謂競賽組及傳統組,次次都影競賽組,今次我就試吓影傳統組.


事實上我係想影多啲關於兵器既項目.乜乜長拳,太極劍,太極刀都見慣見熟,希望有啲流星鎚,九節鞭睇吓就好喇,一出場又係劍,老實講佢耍得冇乜勁道,不過就頗多跳躍動作,啱晒我,就咁舞劍嗰啲我基本上唔影.


正,有雙短刀未影過,我又專吼佢跳起,不過佢跳得好hea,只係係咁意跳一跳,冇助跑,冇翻騰,仲要收埋雙刀,真係唔多滿意.


睇咗今日日程,呢個場成日都會係器械組,諗住黐實呢度唔郁架喇,呢個兵器超級奇怪,埋身戰應該好大殺傷力,不過……舞到好似太極咁,超慢動作,而且只係行來行去,擺吓架式咁.有啲似睇緊大戲,我唔係好識影.


嘩,青龍偃月刀,舞起來應該好有霸氣,但影起來就有啲難度,把刀好易變刀片位,搞到好似耍槍咁,最後唯有放棄一點動感,影呢個側Pose,睇晒成把刀.


板凳做武器,又唔方便攜帶,又係木做唔多夠硬淨,實用性成疑,不過就容易搵到,隨便納到就用,同執支鐡通差唔多,高手既話樹葉都係武器,舞起來可觀性都係麻麻,有啲論盡.


呢張其實係夾硬裁大,冇計佢喺隔離場,佢未出場前已先聲奪人,嗰堆鐡環一震,即刻全場目光去晒佢度,加上佢又鐘意大嗌,好有效果,原本我都想走過去影,但又驚冇咗依家個位,只好張就一吓.大家如果有睇過星爺既功夫應該會記得呢種武器.


到小朋友出場,以為都係玩玩吓冇乜睇頭,點知跌晒眼鏡,雙槍動作好流暢,而且好快,呢啲先係功夫嘛,打交點會鬥慢?拍晒手掌,不過分數都係同慢鏡嗰啲差唔多,可能只計動作準確度呱?


後生女又係超勁,睇得好開心,呢吓淩空坐低既一字馬睇見都流汗,不暪你說,我後生嗰陣其實都得架.不過依家就………人字馬就得.


又有古怪嘢,雙短鏢,後生仔表現就麻麻喇,硬係冇乜勁度.


最後到後生女既三節棍,又係超精彩,支棍咁論盡都一啲冇click,速度又快,不過分數又只係中中地,我硬係覺得啲評判唔計速度分,咁好唔公平,快比慢容易出錯好多喎.有啲似攝影比賽,往往冠軍嗰張都係矇既.咪話我陰謀論,始終呢類比賽都係老人家多,次次後生仔女贏晒睇怕會小好多人參加.不過啲獎太豬肉個比賽就冇乜代表性囉.

2018年8月22日 星期三

再探西高山

西高山之前已經去過一次,但唔知係咪我支70-200mm跌過既關係,用佢影既昂船洲大橋連維港景硬係得對焦嗰度sharp,其他位置都矇矇地.朋友有腳患,唔可以太操勞,咁啱喇,去多次呢度啦,冇大上大落位,大部份係平地.


記得幾年前剛剛開始上山影景,好多時都係包場,就算碰到其他人都係來行山多,入黑前就走晒,不過今日呢度係滿座,而且好多都係來影相,觀景台自然爆人,連寫住前無去路既位都幾乎冇位,有啲人侷住去觀景台後面既山頭用我地做前景.正常位冇唯有危險啲走出小小舊大石度放腳啦,點知有位人兄竟然話我入鏡阻住佢.以西面來講,我喺你後面喎,就算魚眼都影我唔到啦?不過如果用魚眼45度咁影係可以同時影到我同太陽既.咁你想點?你上來排排企影啦.嘩,你地兩個人企咗向正西最開揚嗰兩個位跟住叫我排排企企你後面,咁你都好意思講得出既?無謂搞到嘈交,我再行前啲有個落山位雖然低啲都有位,就喺嗰度影,之前守規矩冇行出前無去路,原來呢度都有啲前景.呢個時候支鏡wide啲就好喇,要得天要唔到地,最後侷住水平線擺正中間.


之後就係等夜景啦,原本諗住專心一意影昂船洲大橋,Wide景我已經影過,但未用全片幅影過,決定快快手手影埋佢,雖然話快手啫,都要成分鐘一張,仲未計set機時間.稍為改變吓構圖要多小小天.


貪心無上限,影埋對面先,只係差一分鐘個天已經唔同咗色,上次來大煙霞,用多一分鐘都係值得.


真係趕到甩褲,今次仲要換鏡頭,黑媽媽真係論盡到爆,竟然將最複雜既一張相擺最後影,由於唔想啲船太矇,要開大光圈,加高小小ISO影一張,再收光圈用翻ISO 100影個景再夾埋,好彩之前日光日白我已經試啱咗焦距,要再換鏡肯定搞唔切.最後係三張夜景,三張都唔同色.

2018年8月17日 星期五

科學園黃鴨仔

早前巨大黃鴨仔來香港冇去影有啲後悔,我實際唔係想影隻鴨仔,而係好多人去影隻鴨仔既畫面.網路上偶然見到有人在科學園影到隻黃鴨,細就細啲,都去打吓卡.


來到就發現情況唔係咁好,鴨仔放得好近岸邊,變咗一離遠影就會被池邊遮咗對腳,沒有最衰,仲要加埋用繩做既圍欄,又要侷住用wide鏡近抄搞到變晒形.原本諗住夜晚冇乜人影可以用長小小焦距,結果都係難逃宿命,冇計啦照影,本來驚鴨仔冇燈照住後面大厦會太光,帶定閃光燈準備補光,冇估錯鴨仔真係冇照明的,只有巨疍方向既反光,不過後面既大厦係出奇地暗,啱啱好,等到天色夠藍就咁影就得.自然過用閃燈影.


悶啲就悶啲,影埋右手面.要留意雖然隻鴨仔拉晒繩落池底,但實際佢係飄飄吓的.幾十秒咁影實矇,最後要較到1.5秒,仲要撞幾張先中.

快門快既好處就係我夠時間影埋左手面個天都仲未黑齊.之後就係收工喇.

2018年8月12日 星期日

山寮影蝶

之前有見人在山寮影到蝶我又自己去,結果槓龜而回.今次跟人去睇吓有冇搞錯位置.


冇錯搭車都係嗰個地方,不過影相嗰個位原來要爆小小林入去,唔怪得我搵唔到.藍嶺之後,個個都預備啲料引蝶.仲要係發過烤既,真係好臭,搞到好似入咗公厠咁.但好有效,冇耐隻目標蝶忘憂蛺就出現,而且停定享受飲料,大家可以慢慢影.


啲人影到唔影,我又試吓影倒影,不過水唔多夠,效果麻麻地.


影影吓地下嗰啲都開始來,不過………係來好多,冇得食會肚餓,太多就變咗食滯.搞到去咗動漫展咁亂到七彩.而且叭地壓住心口唔係好頂得順.


搞搞吓大家發現可以走落下面水面踩住啲石塊,咁就可以唔駛叭地,企喺度影,不過要隻蝶停啱距離,停啱方向先得.我都走落去影咗隻小黃粉,水向低流.嘩,實在太臭,都係唔好影咁耐,橫掂中午咁熱,早啲收工算喇.

2018年8月7日 星期二

動漫展攝影

已經冇去好耐喇.係就係好多嘢影,但多人之餘現場環境硬係好雜亂,影完啲相冇幾多張要得,今次要留意吓,太亂寧可唔影當睇吓展覽.預早一個鐘到都要排到上橋,室外都幾悶熱,侷一個鐘應該會中暑或者脫水.好彩條龍係一路有得郁,結果去到入咗裏面先停,有冷氣涼.期間有人搭的士去到門口,唔好意思,唔該行翻上橋慢慢搵龍尾.

 
終於入到場,襯住啲人未入齊叫做行得郁,繞場一圈搵啲影相位,可惜呢度已經開始爆人,而由於佢採用排隊入去睇方法,條龍又啱啱喺正Ironman旁邊,想影唔到人只有兩個方法,一係排隊到旁邊用wide鐘近低抄,一係用長鏡影半身,我就選咗後者,背景依然係雜,只可叫做冇人阻.
 
 
蜘蛛俠呢個位最想影,真人大小唔駛唔夠景深,好彩又冇人要影到此一遊,好順利就影咗,唯一唔好係側邊有啲欄桿,幸好呢個世界有PS.
 
 
叮噹有新戲上,好大個宣傳公仔,呢個同Ironman一樣,太多電話黨,只好影一忽.
 
 
大既影完去影吓細既,Ban Dai既高達其實真係正絶全場,種類多又靚,可惜啲場景係背對背,影出來亂到七彩,只好就就角度影一忽,冇乜場景既直情影唔到,嘥晒.
 
 
Transformer就最好,一個大場景,有背景,後面唔會見到人,放晒啲公仔落去,乜位影都唔會穿崩,高位仲有架直昇機,可惜太高,襯唔到啲機械人,如果高逹咁擺就正啦.
 
 
龍虎門同埋風雲啲公仔其實好靚,係第一次除咗漫畫同刀刀劍劍之外既真人模型.老祖宗萬毒心經出招同聶風腳搭火麒麟既模型真係勁靚.可惜又係開四面台,亂之餘又反晒光,終於都搞唔掂,又嘥咗.影翻個聶風頭好過冇.
 
 
咸疍超人有太空場景要影.
 
 
龍珠個場景都好大好靚,不過只得下半部啱影相,上半部又係開四面台,原本第一代七龍珠條龍好靚,又係穿崩累事.
 
 
我最喜愛的Batman,我係指電影,雖然係英雄電影,但Batman係常人,武器勁都係常規.唔似其他超能力英雄好似超人,神奇女俠咁,基本上係無敵,Batman要用比較多腦力去解決問題.
 
 
Marvel個場景又係好靚,不過我唔係太鐘意佢啲電影,唔同能力既角色越來越多,基本上好似Jo Jo奇妙冒險咁已經失咗控.尤其玩埋聯盟之後,好難塑做到同級數既敵人,基本上只係淨翻原子彈炸完都絲毫無損,郁吓隻手就可以爆地球嗰啲敵人.冇晒戲味.
 
年青的回憶哦,我只玩過家用機,我比較怪,係用E.Honda的,砌低過好多Ryu同Ken.呢個角式家用機未有,但係我好鐘意佢既場景,唯一唔好係啲透明支架,個公仔就算啦,連舊氣都有太礙眼,要P走佢,其實想P走埋個公仔既支架,不過搞唔掂.
 
 
動漫展入場票包埋一張唔知甚麼同人祭門票,諗住係影Cosplay位啦,因為動漫個場平時個位冇咗,點知只係賣嘢既,諗住收工啦,原來冇遠有個Cosplay區,仲係免費既,即係唔去動漫都可以來玩.照例人多到爆,事實上我都冇諗過會點影相,背景實係超花,專登睇吓貼牆位有冇機,等咗一陣終於有收獲,影唔到全身喇.可惜佢地打扮比較普通.
 
 
呢個位啲人支鏡幾乎掂到個model.我都試吓迫去最前面睇吓係點,結果zoom到24mm勉強影到全身,不過變咗大腳八.而且後面都係亂七八糟,算數,走翻出來在旁邊高抄一下.就啱手腳冇黐到嘢就影,翻去P走晒啲垃圾.

2018年8月2日 星期四

斜炮頂攝影

越來越唔知去邊影風景喇,淨係得啲山,得啲草就無謂去啦,朋友又話腳有事唔可以太操勞,只可以小行,呢度景唔算好靚,不過勝在唔高,人算不如天算,朋友咁啱有事又唔得閒,咁有兩個人都照去啦.


山就唔高,不過車程就幾遠水路,由新界北去到港島南,好在西灣河搭14號到總站一落就係登山入口.城巴個apps真係好廢,總站寫赤柱廣場.半粒鐘唔駛就登頂,原本想去搵好出名既犀牛石,不過條路好似頗崎嶇就放棄咗,行前小小就到達影相位,日落又係冇行,估唔到太陽搞搞吓又係啲雲度出翻來.但一啲力量都冇,天又冇雲,我反而喜歡金光四射嗰種.而且太陽好側,只可以用一小忽島做前景.
 
 
之後有冇好似虎山既火燒雲呢?係有既,不過得啲啲.只照紅了一小部份海面.好過冇.
 
 
之後等夜景,其實我一向都知道向太陽的方向會比較慢暗小小,如果有兩個景就應該影咗正光嗰邊先,但次次都驚影唔切就放棄一邊,專心影最靚個位,今次下定決心影咗另一邊先,呀……其實真係麻麻,叫做多一張相囉.
 
 
 最後係全日終極目標影個彎位夜景.雖然都係麻麻,等極個天都唔黑,但個海就越來越黑,有啲似去南朗山咁.終於我明白嗰啲係光害,點等個天都係會好光.好啦,用3分鐘快門影光個前景,之後靠後制整翻暗個天算數.