又到馬拉松

又到一年一度渣打馬拉松.已經影咗咁多年,坦白講熱情有啲消減,影來影去都係差唔多,唯一唔同係可以試吓全片幅在夜晚既表現會好過APS-C幾多.

老人家唔捱得,都係揀啲唔駛咁早起身既位置就算喇.最終派咗去西隧入口,好吖,我去過一次都唔錯,照舊搭通宵小巴去到旺角再轉的士.點知度度封晒路,搭咗75蚊,結果只係佐敦站掉低我,行餐死仲幾乎遲到,新機真係差好遠,F1.8, iso 3200將快門谷到1/200秒.終於可以影到個人sharp而背景又唔會太黑既相,尤其係對焦,有信心得多,接近一半中,A77既話幾乎冇張得.

捱到就快天光,個天藍藍地好過淨係得街燈,iso 都可以降翻去 1600.

跟住就係等全馬既黑人跑手,全世界都係等呢張相,冇行開或者瞓着既話應該唔會灟,事關佢地到之前仲會有開路電單車,計時車,同埋電視台直播車,本來大家各就各位,你唔阻我,我唔阻你相安無事,點知大家狂影之際我前面原本坐低地面嗰個人突然企起身擋住我,原來佢要擰轉頭影電視台採訪車正面,你仲有冇自私啲呀?可能佢都知自己衰,一點完即刻雞咁腳走.好在之前影得冇咁大既都有啲中啫,裁裁都用得.

影完男子組黑人到女子組,又係前面有加開路電單車的,不過上年都係,唔知點解架電單車係好近啲運動員既.變咗好難影正面,甚至側側地影都有啲阻,我就聽到有人大聲爆粗鬧.  @@

今日除咗條恐龍之外(俾人阻住影唔到).就好似冇乜特別鬼馬裝扮.美國隊太求其喇,連盾都冇.

原本諗住上天橋影吓好多人既畫面,可能時間尚早,硬係好疏落,唔等喇,要行西隧過對面海順便影西隧裏面.由於入口係斜落,有利影到後面好多人既畫面.

行餐死終於出咗西隧.啲人開始抽筋,影吓佢地先

呢個畫面其實唔出得街,因為要企上路肩先可以咁高角度影,實際上係禁止的,我都俾人叫翻落來,不過影相既嘢大家知啦.行遠小小冇人見到又上過 :P

春秧街第二擊

除咗大水管,春秧街都有第二擊. 上次去春秧街影電車見到附近天橋好多白鴿,但當時最長只有支85mm,貪得意影張幾張飛鴿,勁裁之後竟然都唔係太差喎.決定帶啱架生再來多轉專登影白鴿.

雖然係戶外,但由於四邊都係大厦遮住晒,陽光沒法直射,全程都係光線不足下影的,但快門又不能夠太慢,我帶咗70-200mm F2.8同埋135mm F1.8,最後都係要135mm,開盡光圈先夠光,實際上已經用到Iso 1000. 冇數次練習後終於開齋.

呢隻鴿不停咁擔啲建築廢料飛上飛落.變咗容易捉到佢路,睇怕佢係築緊巢.

由於勁裁既關係,真係差一吋就一吋,這張裁到接近100%,用85mm影既話應該掉得,就算影得比較大隻既,都係135mm壓倒性勝出,除咗放大率之外,85mm支鏡紫邊太勁,就算軟件開到盡除紫邊,放到咁大高反差位都係死得.

呢張既姿勢幾搞鬼.

講開又講,我一向幾反對特登影細啲然後裁相.今次固然係器材問題唔裁唔得.如果用Canon機再加佢支200mm f1.8應該會正好多.不過有時片幅夠大又冇咁易出界,尤其我等老人家手腳唔協調.呢張其實隻白鴿幾邊吓,用APS-C影多數會出咗界.依家就仲用得.但部機都要對焦點分佈夠闊先有用.否則都難逃一刪.

大水管第二擊

上次去大水管影完火車意外發現後面既位都可以影吓日落,而且屋企過去好快,搭兩個站行一陣就到.在一個啲雲好似都有機既下午就走咗去試試運氣.

啲雲真係分佈得幾靚,等到差唔多日落就上去水管個鐡籠度影,點知個太陽又係走得勁快,早好多就俾雲遮住,唔緊要啦,可以影吓啲雲,真係奇怪,呢個秘位竟然都有人來,冇計,厚住面皮啲喺佢旁邊set石膏手,上次我已經視察過,鐡籠地下係網線結構,不利用腳架.嗰個人唔知係咪怪我冇同佢打招呼,期間耐唔耐就搖吓個鐡籠,真係被佢玩死,好在唔駛長曝.原本諗住影幾張翻去夾,最後用一張出幾個曝光量就搞掂.單張既好處係唔驚有嘢郁既地方有鬼影.雖然用圖層夾相都唔會好似HDR咁周圍都係鬼影,但活動物體在夾線區上就會有問題,而左邊的樹葉就正正係死穴.諗住等吓有冇火燒雲,結果係冇既.

補地

相信大家都聽過所謂退地,即係將一件物由相片圈選出來,咁就可以隨意搬去另一張相,又者背景所做既改動唔會影響到佢.有時可以搞餐死甚至係冇可能搞得到………

前排去西貢影鷹發生咗一件事,好難得有一隻飛得勁近,依我性格我係唔會特登影細啲再靠事後裁相構圖的,可惜……老人家手腳慢,結果就係呢個怪雞構圖,一般認為留白應該喺隻雀前面,雀放正中間係被認為入門級先會做的,咁死火喇,影咗成半日影得最大隻就係呢張,冇理由就咁刪咗佢呱?裁相又因為爆得滯冇乜空間搞………

唯有試吓挑戰退地既相反補地,即係無中生有加翻啲空間去前面,印象中有網頁講過,但原來冇講點搞,搵咗一輪好在有一個介紹內容感知既網頁有講差唔多嘢,簡單按幾個掣,張相前面就多咗一忽.

不過新增既空間係冇內容,傻的嗎?點會有內容?唔係架,依家啲軟件好勁,真係識得估啲內容上去架,不過我冇,唯有靠自己填上去,咁個天空乜都冇都唔難搞既,用印章複制旁邊內容都冇乜難度.

再裁翻啱比例,一陣間就搞掂 :)

西貢碼頭BIF

生態攝影界一直視影BIF為最高景界,甚麼是BIF?全寫係Bird in fly.即係飛行中既雀鳥,絶對係對器材同技術既大挑戰,尤其係細隻雀仔爆水捉魚嗰吓,啲人可以影極都唔厭. 不過礙於冇長焦大砲,影極都係失敗多.早排睇咗本介紹攝影景點既書,話西貢碼頭用300mm影鷹都夠長,咁我有500mm咪爆框都得,雖然光圈細啲,但出猛太陽快門都夠呱?咁就去試吓.

騙人的,300mm怎可能夠長?500mm都要裁很大.幸好鷹有時飛得好慢,撞多幾張都有啲得.但直射陽光好硬,稍有陰影遮到鷹既面部基本上可以刪走.對焦其實唔難,由於天空乜都冇,開晒啲對焦點碰吓運氣就得.

呢隻黐住碼頭既就難搞啲,好多時會對咗後面,不過都冇計喇,唔得閒轉來轉去,而且縮小對焦區有辣有唔辣,手腳慢小小就甩晒,要手動扭翻轉頭,乜嘢事應該都發生完晒.

除咗鷹,仲有白鷺,飛行速度非常快,但頗線性,唔好太騰雞其實係夠時間準備的,不過佢地好鐘意飛去遊艇嗰邊,要襯佢未背光就好影.針冇兩頭利,正光又白色的羽毛好易爆光,事後將Highlight推到盡先救翻小小.

仲有海鷗添,聽講呢個品種唔係咁多地方有,但實在太細隻喇,裁到幾乎100%,只可叫做紀綠相.

既然啲白鷺咁鐘意飛去遊艇嗰邊,咁我就走去碰吓運氣,咁做另一原因係多啲正光位.真係有喎,灰鷺仲好,冇咁易爆光.襯佢降落遊艇前狂影咗一堆,最後真係只得一張比較成功.

黃昏光線開始變弱,翻去碼頭磨多陣到太陽落山就走,呢個時候忽然鷹既數量大增,據說係漁民劏魚後直接把內臟掉入海,啲鷹走來搵食.真係有啲飛到好近,我估話300mm都影到就係呢個時候.可惜光線變弱又搞到好難影,而且多數鷹集中在遊艇那邊,變咗大背光,你話如果可以租隻船埋去就實影爆卡都得.我都唔執輸影翻隻張翼既先收工.

街舞

朋友話荃灣大會堂有票可以睇跳舞,順便走去睇吓可唔可以影相.

開場之前大會宣布不準拍照,但係我見好多人攞晒長炮等影相,陣間睇吓情況點先,果然係冇乜人理,照影,咁....我梗係跟大隊啦,原來係街舞表演,少年組冇乜高難度動作.影吓佢地隊形算啦.

其他隊伍我都唔係好影到個氣氛,其中一個原因係現場好暗,開足F1.8光圈,iso 3200都係得1/125秒快門,動作大一點都矇.

話咁快第一部份團隊舞就完咗,跟住係每隊派出幾個單挑.一人跳一段然後由評判foul人.識幾多就好攞晒出來,所以多咗好多翻騰動作,好彩燈光又光咗小小.

用頭轉彎既招牌動作,坐在後面既就係評判.

評判都會親身表演一part,增加說服力嘛.

幾十人係咁一路跳,初初好剌激,搞搞吓就開始悶.好不容易終於搞完,中場有幾位靚女表演歌舞調劑一吓.之後原來係單挑決賽,睇怕都係同剛差唔多,又係收工既時間喇.