種瓜得豆

聽聞利安後山再出現之前新出現既蝴蝶,距離我都唔係好遠,一於去探吓.

蝴蝶有,不過都係普通嘢,唔通要上山,係就係有個絲帶位,跟佢越行越入,但全部兩旁高樹,似真係行山既山路,睇方向可能可以去到馬鞍山,冇乜結果,去翻公園影蟲,咪睇佢好似成牌板咁好平,要成個背脊清晒都要夾相.

蟲其實都唔易搵,好不容易先見到呢隻乜色都冇既嘢.環境超暗,要挑戰1/60秒快門,好彩有欄杆借吓力先成功.

諗住影蝶變咗影蟲,又有消息古洞有新蝶,又去種瓜.新蝶真係有,有呱?我好似未影過呢種蝶.新係新但好似唔係好靚.

舊蝶都影來充吓數,位好似都有啲特別.結果都係影埋啲無謂嘢添.當行吓山.

影交尾

朋友通知有秘位可以影長尾藍交尾,日日都有幾對.為咗確保我影到,仲見到先見我出發,幫我睇住,真係唔話得.

要超過一個鐘先到達,而對長尾藍真係仲交緊尾.慢慢影到靚為止.

影完正光影背光,其實我係比較喜歡這張的背景色.夠晒光猛同鮮色,可惜下面嗰隻翻到屋企睇先知道係爛咗小小.

目標已達,又到食飯時間就去食咗飯先啦.出到門口見到有咖灰交尾,冇理由唔影埋啫.雖然之前都影過,不過今次停既地方不同.而且好定不用花太多精神.

食完飯翻來對咖灰竟然仲喺度,呢個時候附近又發現咗呢對異形,之前影佢都係強光下,眼睛留下很難看的多邊形光點及極大反差,今次在樹陰下可以影到純橙色既眼睛.有利有弊,樹陰即係暗,有啲唔Sharp.而且影得一次佢就飛走咗,殘念.

城門水塘排洪

連續兩個八號風球帶來大量雨水,大潭排洪已經影咗,係時機去影城門水塘.

城門水塘同其他水塘唔同,佢排洪係用一個大灟斗咁既設置,上次冇水來已經試過24mm係唔夠wide的.用盡都只可以啱啱影晒個灟斗.已經帶埋重型腳架諗住橫置中軸伸部相機出欄杆影,去到先知係妄想.好似影蝴蝶咁,成村人排晒隊,出腳架肯定俾人打.侷住手持,不過可以爬上鐵閘頂影,離灟斗遠小小,角度也較好.

之後就係換魚眼再影過,我沒有比24mm更wide既鏡,除咗魚眼先可以影埋個日落.之後夾硬拉翻直啲線同勁裁就搞掂.解像度會差啲都冇計喇.

駁翼手術

上次去大澳一心影珍灰影得麻麻,反而最大收獲係影到珐灰交尾.

係影咗好多張,不過最鐘意都係影得最大隻同光線最平均嗰張,可惜....就咁睇好似冇乜問題,兩隻都清.

但一放大,就睇到左邊嗰隻塊翼係有啲矇,達唔到可以睇到一條條毛既程度,好在早有準備,影嗰陣己經專登影多張對焦翼尾清既相,諗住重施故技做景深堆疊.

點知一夾...錯晒位,似乎電腦係用咗條尾部份對準,但影相過程中對蝶應該郁咗.

由於我只係想要左面嗰隻既翼清翻,於是決定手動搞搞佢,先將預備疊上去嗰張改成50%透明,咁就可以人眼睇位,只要左面隻翼既花紋對正就可以,要留意用滑鼠或者鍵盤移係冇得轉角度的,只可上下左右移.要轉的話只可估角度轉咗先再搬埋去,唔啱位就要再轉過.好在都唔係想像中咁難.

之後用筆刷擦翻隻翼出來,再補補崩咗個小小就大功告成喇.

冰壺盃

疫情期間,室內活動其實麻麻,因為一定戴口罩,睇唔到運動員表情.但呢個項目未影過,走去了解吓都好,而且唔遠,又一城一出九龍塘站就到.

這運動比較靜態,高速快門的話就變咗成班人喺度擺Pose.點都好,都影翻一張正面既,用到300mm都唔夠長,要勁裁,原本諗住加1.4x增距,不過光圈真係太細,好高ISO,最後都係要除翻.

之後就係要慢快門,冰壺最為人熟識就係擦地嗰吓.但係本地賽唔知點解好似唔多會出力擦,個個都係輕輕擦幾下就算,好難得見到有個落力後生仔.

跟住影人出壺,為咗增加穏定度,係跪住推個壺出去的,就咁手推冇乜力,冰面上係有個三角位好似賽跑起跑嗰種借力彈出去的,從後面景物可以睇到運動員係向前移的,大會攝影竟然可以走落冰面度影.

通常睇外地比賽見人地都好謹慎,一定有個擦地既跟住,不停控制住個壺既速度,唔知點解今次唔係咁多,可能只係我小見多怪.

仲有一種係行路形式的.有埋公具,照計點都係低重心精準啲喎,可能咁又有佢既優點.

其實啲壺推到亂晒籠仲好,咁影擦地時經過就會見到週圍既壺矇咗而郁緊嗰隻清,仲有動感.

影殘福

走到入長洲影蝴蝶都算山長水遠,只因上次大澳影唔到福仔,今次來呢度補翻.

朋友資訊係轉彎位,但係搵來搵去都冇,只好走咗去長洲公園碰碰運氣,果然有黑色鳳蝶吸水,顏色就唔係好靚架喇,不過可以玩影佢痾水嗰吓.掛住對焦分散咗注意力,影咗好多轉先影到.

跟住仲有黃蝶仔,佢開翼好靚,有個橙色斑點,但原來合咗翼會變得好普通.

終於搵到朋友搞清楚原來係再行入啲既彎位,呢個時候已經正午,決定食咗飯至入去.估唔到見到斑鳳繞住啲花係咁飛,肚餓都影埋先啦.飛來飛去好難搞,消耗咗好多電力.

飲晒支大水再入多支出發,去到目的地只有兩個影友唔駛排隊,睇來都係水尾,果然係冇乜,來來去去都係兩隻,一隻仲要爛咗一邊,淨翻一隻,原來都係爛爛地,有啲甩皮,仲有啲甩色.

好在另一邊冇甩皮,啲紫花有啲亂,不過顏色幾特別,而且得一隻都冇得揀喇.

榴花峒

上次去愉景灣觀景台好多樹阻住影得唔靚,老虎頭又好似好難行,而且網上啲相全部都集中有老虎頭個山頭在中間,分分鐘去到都會遮住愉景灣.偶然在網上見到榴花桐呢個地方可影到愉景灣全景,一於出發.

上山入口係愉景灣一個屋苑背後,行咗一段之後開始變得崎嶇,原來都唔容易的.好在唔太長就變翻容易山路,再行不遠就見到冇遮擋既愉景灣,不過角度差小小,我知道再行前啲有舊大石可以再高啲角度影,果然唔錯,不過時間尚早,再行過啲搵位影日落,跨過一小山頭原來可以影到機場加日落,但高度不夠顯得機場比較扁.咁影完日落嗱嗱聲去大石度影埋個夜景啦.居然火燒天唔走得住,照計應該等機場啲燈光啲先走,不過等唔切喇,去舊大石度有一點距離,侷住走,仲要急急腳趕路.

時間啱啱好,不過又出問題,好大風,影極都矇,腳架已經係低角度模式都唔掂,只好開大光圈,加高ISO,越急越見鬼,個天黑得好快,快門又變翻長,最後用到F4,ISO 400先勉強影到一張.早知就去低啲,角度冇咁好個位啦,不過嗰度應該又唔夠時間去,火燒天又影唔靚,夜景又唔靚,貪多嚼不爛,兩頭唔到岸添.