2019年2月27日 星期三

渣打馬拉松自由影

服務多年的攝影會終於連最後一個項目渣打馬拉松都唔搞,冇乜所謂,其實我影賽跑都麻麻,冇乜特別,又暗又要早起身,唔影就罷.不過朋友又話好想影要我陪佢,勉為其難就去啦,不過唔好咁遠,好難搭車嗰啲地方,於是就決定影旺角同埋柯士甸就算,上年去柯士甸度度封晒路的士都去唔到,搞到最後行餐死.去旺角最好,有東鉄直到唔駛轉車.今年地鉄改善咗好多,15分鐘一班車,有位坐,記得有年旺角去銅鑼灣用咗個半鐘,旺角站人龍已經頂到過對面月台,半個鐘一班車,去到金鐘又係咁,搞到遲晒大到.


要影運動員正面最好係彌敦道轉出亞皆老街彎位,你識咁諗電視台同傳媒都識,一早已經霸晒啲位,仲欄住唔俾你地搏矇走埋去阻住晒,後排遠距離攻擊盞搞,只好走前啲搵吓有冇路邊位側側地影啦.結果就搵到奧海城出面落腳.唔駛交相冇乜壓力,費事影到背景黑麻麻,用盡F1.8, ISO 3200,1/160秒盡可能吸多啲現場光.結果就係咁,好可惜,堆黑人我係對唔中焦嘥咗.


之後就係行翻轉頭到街市附近既天橋影吓好多人既畫面,記得嗰年影呢度落晒雨,暗到死,想收啲光圈都唔得,點知今年都係落雨,雖然冇咁大,都係咁暗.

諗住轉場啦,朋友又話黃格幾得意,想影慢快門,咁就等多轉啦,點知最後一組要8點先開跑,等足45分鐘.


跟住就係奧運站搭一個站去九龍站再行去柯士甸,點知搵極都搵唔到,侷住去翻西隧入口天橋影吓好多人.由於運動員要繞一大個圈先入西隧,雖然等咗45分鐘,但馬拉挑戰組先過咗冇耐.如果唔等嗰45分鐘分分鐘趕得切影黑人,日光日白把握就大好多,雖然角度唔係好靚.


一場來到,影後都影吓啦,過埋西隧好快就到維園終點.


好似冇乜好影,決定去下面迫吓睇吓有冇騎呢打扮既人執多兩張,唔算好騎呢,冇選擇都殺.


好極,仲有豬仔,佢都知大家想影佢,慢慢跑俾你地影個夠.影埋佢差唔多喇,雖然同以往影既相差唔多,不過今次既版權係自己,啲相點用都得.

2019年2月22日 星期五

室內滾軸溜冰攝影

上次影咗室外,今次挑戰難度比較高既室內賽,室內最大問題係唔夠光,不過用慢快門該唔驚,返而對焦比較慢係致命傷.另一個問題就係可能會好迫,因為室內賽有機會用晒成個場,觀眾可能要貼住跑道睇,最後我都冇帶到50mm,如果咁近影來都冇意思.

 
現場真係好迫,要坐在通道上先就到用85mm影,好彩又冇乜人理,我試過貼後牆但實在太多人在前面走來走去,甚至有人停喺度睇.三邊係觀眾,一邊係評判,要影出彎位,所以要對正背景較乾淨既評判位實質上只有一到兩個,好彩又冇人同我爭喎,初段比賽啲人比較散,只好揀啲姿勢比較好既.
 


輪到多人群揪既長途賽,這是拍攝重點,會好容易影到一大堆人,缺點係戰況未必有短途賽咁激烈,有時運動員表情會比較hea.甚至有時會雙手扶住膝頭哥好似減速咁.


好彩既話可以影到運動員擺手,除咗似加速外,亦可利用手部模糊增加一點動感.


壓軸係接力賽,後上的可用力推一推接力既,不過……接力點得一個,變咗分散全場既攝影人全部聚晒一齊,擠迫情況可想而知,沒有更衰,大會加咗個圍欄在接力點前,最外線基本上係貼住圍欄過,魚眼都唔夠wide.我見有人斜斜地影,但係就變咗只可以高速涷結.我得支85mm,只好專心影最內線,都幾乎爆框,而且好易被另外幾條線遮咗,有啲人明知你影緊,但見你前面有位都會照攝埋來,最後只可以影到咁.

2019年2月16日 星期六

影煙…………花

早兩年話影煙花要中午就去排幾個鐘頭隊已經覺得好誇張,上年已經提早到朝早7點先有位,今年仲誇張,要早一晚排通宵.影張相啫,唔駛去到咁盡呱?我呢啲老人家真係頂唔順,雖然有朋友話幫我霸埋位,唔好意思既,下次搵你幫手排你唔去咩?好好彩有朋友話佢既ICC煙花位票有多,係啲公司禮物,唔去都係嘥,咁又冇所謂,商人知道有需求就會諗計,據聞普通人要消費滿一定金額先換到張票,海運停車場同對面海海港中心都有類似安排.


個位其實麻麻,前面有個花槽頂住,同海運差好遠,要zoom到70mm先唔會影到側邊啲物件,左下角啲草就冇計喇.襯個天仲藍影定個底先,好衰唔衰,隔離位師兄踢到我支腳架,再影已經冇咁藍.之後就係咁吹風吹個幾鐘,比起去文化中心霸位已經好好.終於等到8點.影一張睇吓設定啱唔啱先,都算唔錯.陣間高啲大朵啲既應該更好.


第二張有啲唔同色,冇第一張咁好,翻去先剷走佢.


咪住,做乜忽然間咁多煙?簡直遮晒啲煙花呀,情況越來越嚴重,跟住已經淨係得翻啲煙同埋放堙花既響聲,大家都放晒手等收工,估唔到最初嗰兩張就係唯一既兩張.我估對面海順風會好得多,我原本構圖都冇咁tight預咗影高空既煙花,依家咁空虛,只好裁一裁佢.

2019年2月12日 星期二

維園年宵拍攝

一直都想去呢個位拍攝維園,例如燭光晚會,不過一路都唔知點去,咁啱見朋友出維園年宵既相,問問佢就知道拍攝位置是停車場樓上,大安旨意,雖然係日落位,但啲樓咁高應該都冇乜好影,影埋日落個維園肯定細到唔認得.決定差唔多日落先上去,呀……原來唔同一般停車場,只得幾個小窗望到維園,頂樓已經冇晒位,每個小窗都塞咗兩支腳架,只好落一層,好彩仲有兩個窗未有人,我一埋去已經見到另一個人來緊,遲多兩分鐘都冇晒位,好險.


個窗好細,用三腳架既關係,相機係會後過隻窗小小,一定要zoom出小小先唔會搞到窗框入鏡,原本都冇問題,我都諗住影大啲維園,但嗰日超幸運地有火燒天,咁又wide啲好喎,我見旁邊啲人開始收貼兩隻腳等相機可以貼窗,如果只係曝光時間長小小,單張過其實都可以,但我要夾相,不單要等半個鐘以上,途中仲要搞光圈,快門,白平衡係非常高危,十之八九會郁到.再一次好運,中軸橫放之後居然啱啱高過隻窗小小,可以用一個非常穏定既狀態伸部相機向前.正猶豫究竟影晒個天放棄維園定係要埋維園但影小啲個天好呢?卒之,支腳架幫我揀咗,原來中軸橫向後係頂住唔可以向上較角度的,終於用到28mm就啱啱影晒維園同咁既天.


之後梗係要順便影埋夜景,亦係我最初既構思,zoom到35mm維園可以大翻啲.


最後就係大特寫個維園啦.真係多人到爆,好彩我只係影唔係行.

2019年2月6日 星期三

佛光普照

撞啱星期日又係初一,有人約去影大佛開燈,唔係就咁喺寶蓮寺影而係上山,雖然天氣麻麻地,都引起咗我興趣,未試過高位影大佛開燈,如果陣間好彩有埋日落或者雲海更加不得了.


現實總係同想像有出入,日出雲海都預咗冇,最壞既情況都出現埋,就係落雨,初初毛毛雨諗住夾硬擔遮影,點知越落越大,能見度仲要降到接近零,個大佛咁遠得翻個烘,勉強冇幸福,決定去寶蓮寺近距離影吓就算,近距離都好矇,就建議不如走啦,但係又有人想堅持,咁就堅持啦,雨好密,咁反而同燈光出咗啲物理變化,雨成了投影幕,形成四周金光圍繞大佛,如來神掌第一式佛光初現.


影咗幾張襯個天未黑晒去影埋正面啦,嗱嗱聲跑去起壇,掛住影相機完全冇遮冇擋就咁淋雨,都係趕唔切,天已黑齊,金光範圍擴大到成個畫面咁滯,如來神掌第六式佛光普照,外圍唔多夠藍,不過PS好易搞掂,原本可以再藍啲光啲,都係適可而止好喇,一齊去影既人睇到穿煲就唔好啦.瘦田冇人耕,原本廣場一個人都冇,我地影影吓多咗十幾二十人.好在我已經影完,啱啱夠時間趕得及搭尾班車走.

2019年2月1日 星期五

倉底貨

睇翻硬碟,原來有個微縮展未出過相,因為只係隨便去影所以幾乎唔記得咗.

 
一入門口就見到最受歡迎既摩天輪,影呢類大景有兩個問題,玻璃既反光肯定搞唔到,就算貼住玻璃影,對面塊玻璃既反光都一定避唔到.其二就係進擊的巨人,要俾啲耐性等對面冇人先好影,唔一定做得到,但做唔到我會索性唔影.


影完大景又到續忽影細景,真係冇乜新意,又係人仔,今次係士多場景,正如上次發現,啲人仔已經係3D打印做再打磨.


戲院賣飛場景,坦白講都算做得迫真,起碼唔會個個排隊既人一模一樣,多得3D打印,用電腦改一改又有第二個人,如果倒模就好難咁大變化.起得一套矽膠模起碼倒翻十幾廿件啦.


都算係中景啦,冇辦法,真係搞唔掂啲進擊的巨人,而且用到咁wide啲樓變晒形都唔多真實.


上次影呢類嘢好似係有啲遠嘢影唔大,今次攞埋微距來,坦白講,180mm仲要係室內,仲要收光圈,仲要唔俾用腳架,基本上係不可能的任務,當然你可以開iso 6400,甚至iso 102400影.但係貼住玻璃係可以定好多,最後我用1/20秒完成咗呢張相.效果係幾特別既,不過似乎都幾無謂.


咦,原來仲有一間房,裡面有中環全景,玩咗一陣航拍覺得唔靚,決定只係特寫吓立法會大樓,現場光係超大反差的,基本上要影到啲窗同埋背景爆晒先睇到牆身上既紋,幸好我有帶埋LED燈,要開盡火力先做到呢個效果.