戴口罩既體操

之前都有個室內舞蹈可以影,但疫情下室內活動要戴口罩,睇唔到表情差好遠,今次室外搞應該唔駛戴口罩呱?

估錯咗,都係戴口罩的,既然來咗就照影,先來啲群操,太陽未落山,雖然舞台後面係密封,但反射光都夠照,ISO 400快門已不錯.

小朋友帶操,大會個攝錄影機全遮右手邊台,咁既安排都有,完全唔顧觀眾睇唔睇到.我只好淨係影左面台.

四大項目自然有棒操,除咗大會攝錄機,我發覺有一班影相人成日都係走去前場企起身影,雖然佢地係企大會攝錄機前面,但佢地貼住個台,變咗斜斜地影右面都俾佢地阻埋.

最後係圈操,原本座位之前既人都好識做舖咗地下坐,唔會阻到後面,搞搞下就開始有人舉高部手機影,連中間都遮埋,我呢張相好似好乾淨,其實右下方係有兩個好大人頭連手機,只不過運動員啱啱跳高,冇疊埋一齊,比較容易事後P走佢地.

原來除咗四大項目,仲有呢啲類似跳舞既.太陽落咗山,ISO開始標升,大會仲有樣唔掂就係點解會黑背景架,東方人頭髮黐晒地.

情況越來越失控,個個有樣學樣舉電話影,甚至企埋起身,我原本考慮好唔好帶300mm來後排攻擊,最後怕重冇帶到,睇來決定係正確,一來唔夠大光圈,二來後排都俾人遮晒啦.

情況開始失控,有啲影相人開始企正中間,我都係企正中間,不過我係座位側,佢地係座位前,觀眾都一臉無奈.大會燈光又係搞鬼,唔夠光之餘仲紅紅綠綠.

終於到頒獎喇,諗住走人點知又話頒獎後有彩疍,咁又等多二十分鐘.表演由大姐姐擔旗,情況全面失控,所有人湧晒去舞台前面.我侷住走台側冇人既地方.我唔想同電話爭位之外,亦唔想用wide鏡影到變晒形.同之前小朋友唔同,個個都好高大搞到爆晒框,最後只有一張收獲.呢個時候我明白大會部攝錄點解要擺台前面.

菱角山攝影

知道有呢個位好耐,一直猶豫只因水路太遠,夏天影完夜景落山最快得九點鐘船,出到中環,仲要轉港鐵,翻到屋企夜媽媽,網頁仲話冇乜位放腳架,要早去,終於的起心肝搵咗日平日去.搭四點半香港仔船,臨到開船一刻突然有五個後生仔趕到上船,每人一支腳架...........

好不安,我仲諗住陣間食埋嘢先上山,驚夜晚落山啲茶餐廳收晒工,究竟好唔好唔食嘢同班後生仔鬥快上山呢?點知....茶餐廳係冇開既,正諗住捱餓之際,有間南丫小食有開,仲有麵食添,呢個時候已經見到班後生仔經過小食店向山上出發.冇計,希望攝到位吧.上山途中竟然見到班年青人.原來佢地邊行邊玩慢慢走,二話不說爬咗佢地頭一支箭上山搵咗舊石開支腳架卡定位.個位好窄,頂盡放兩支腳架.但呢個應該唔係最好位,我見人地可以影到成個灣唔會斷開,估計係冇遠望到突出去嗰舊石.襯年青人未到去探吓路,硬係搵唔到路.可能要過咗發射站落一段再上翻來,平時一定搵落去,今日要睇住個位就放棄.估唔到日落有小小燒天,年青人雖然架生好齊,但似乎只係隨意影吓,我叫佢地放支腳架埋來都話唔駛.

影埋夜景趕落山襯未開船再食小小嘢先.年青人未走,佢地原來一心影埋銀河.連南丫小食都收埋工,得啲海鮮酒家,好彩士多有豆腐花頂吓肚,去到中環再去Seven整份三文治先翻屋企.

潛入工厦

朋友通知近觀塘碼頭工厦可影到靚景,絶對好消息,之前見人影過都幾靚,最重要係唔駛上山嘛.從十樓窗門望出去有啲唔係好妥,我見人地可以影到條公路盡頭,但係就算伸部相機出去向橫影都係被大厦牆壁阻住.於是,我走咗上天台.嘩,個景真係無敵,開定腳架等日落.點知.....要鎖門呀,走啦.管理員先生之後仲押我坐電梯落翻地下.

唔服氣再來,不過唔敢上天台喇,十樓就十樓啦.其實都難搞,唔伸部相機出去會影到個窗框,支腳架雖有中軸橫置,但用咗之後自然冇得升中軸,而且中軸長度有限制,腳架全高的話相機只可伸到剛剛腳架邊.好彩牆上面有一級,可以縮短前面兩支腳,變相可以推出啲,夠伸部相機出窗外.影個日落先.

跟住影埋夜景,最後究竟人地係點影到既呢?或者鎖天台只係冇幾耐之前先有?最後都係一個謎.

影軍事模型

影之前有小小掙扎,你知啦,依家啲人乜都拉上政治,陳間影張相都話你係藍絲,起你底都唔出奇,但係微縮展來來去去都係大排擋好悶,有航空母艦影真係唔想錯過就唔理咁多.

當我煩惱緊啲玻璃既反光時,竟然再加上更煩惱的圍欄.即係鏡頭唔可以貼實玻璃.只好硬幹吧,陸上的代表坦克.今次試影到兩架Sharp.

跟住係空中代表,我原本想試吓執到四周冇嘢,真係好似飛緊咁,後來都係冇心機搞,就咁算數.

兩個士兵竟然冇人參觀,嗱嗱啉影張先,呢啲機會要平日來先有.

去睇展覽我好小會翻影人地張相,不過呢張真係我夢想,俾我有機會影一次呢啲場面就好喇.

最後就係海上代表航空母艦.旁邊的軍事迷告訴我,其實呢兩隻母艦係唔夠位停放呢種飛機的.佢地要比較長既起飛同降落距離,我心諗,冇所謂,靚就得啦.

同場另一邊仲有登月展,之前電視睇到話月球石有乜好睇呀?來到都係一樣,排隊入去睇都費事,就咁隔住玻璃門影一張相就算.

拍攝曲棍球

難得又有一次拍攝運動機會.仲要係個場好正既曲棍球,有厠所,有飲水機同埋有瓦遮頭.

一開場係少年賽,竟然係縮細一半個場來打,死火,我得支300mm F2.8,前場爆晒框,只好盡量影後半場,影翻張典形曲棍球比賽相.比賽好短,一陣間就影完,下一場女子賽係......個半鐘頭後.

等到瞓着,我希望盡量唔好影咁多又係兩個人並排追波相,影龍門係最好,咁啱影到佢瞓身救波,放大睇有小小唔清,原來已經用到1/2000秋快門.影運動真係兩難,快門太快又話冇動感,慢又好易冇貨交.

兩個人爭奪個波都冇咁悶.最後係男子賽......又要等一個鐘.

又係兩人平排添,不過男子組動作快太多了,偏偏又開始日落,快門越來越慢添.

ISO開始頂磅,好彩係用300mm F2.8,如果係用200-500mm應該一張都影唔到,只可以坐定定睇波.

影細細粒

見到朋友影蜘蛛仔幾得意,因為佢平時好小影咁細微嘢好奇問吓佢邊度影,原來我屋企附近梅樹坑公園都有,不過蜘蛛仔應該好細粒,網上見人影都係用Canon支五倍鏡影,我得支一倍,裁都唔裁得咁多喎.

橫掂住咁近,姑且一試吧,有水有欄桿的地方就有,果然有,真係超細粒,比想像中仲細.開盡1:1試吓先,嘩,裁到接近100%都仲係好細粒.現場非常暗,咁既放大率用自然光除非目標肯合作俾你用腳架,否則只好靠晒閃燈.幸好欄杆上只要斜斜地構圖閃燈就可以照埋背景唔駛黑媽媽.實際上佢係非常唔合作,知我影佢特登俾個背面我,繞過佢佢又擰轉身,搞到我身水身汗先影到佢一張正面.

出埋1.4x都唔大得幾多,侷住出2x,蜘蛛仔走咗喇,搵到另一個體型差不多的,我唔想出2x既原因係鏡頭焦距變到360mm係會非常震,分分鐘影10張都冇一張中.但有欄杆頂住鏡頭前面又定好多喎.居然可以影三張疊都仲得.長鏡在遠處用機頂閃燈會產生一個明顯陰影在底部.所以微距閃燈會一左一右補咗個影的,閃燈近閃光質亦會冇咁硬.我冇打算買咁多嘢都只好接受個效果啦.事後問翻朋友原來佢係買咗個加在鏡頭前既放大鏡增加放大率.同埋買咗個四百幾蚊既大形柔光罩,差不多成間房咁罩住隻蜘蛛仔咁影的,又長知識了.