失驚無神有蝶影

天寒地涷,蝴蝶照計去晒冬眠,支微距已經收埋咗好耐.點知忽然間有消息話細灰大爆發,仲要係諗都冇諗過有蝴蝶影既華富村,去搵雞疍仔日落就去過幾次,影蝶就未試過,因為都幾遠水路.

晨咁早去到,已經有成十幾人喺度,聽講昨日仲誇張,有成四十幾人,可惜天陰陰,有啲危,幸好等咗個零鐘開始有太陽.真係有細灰出,不過嗰度啲路好窄,啲人又好似唔多鐘意排隊,塞埋一舊,搞來搞去都搵唔到焦平位,幾經辛苦先影到一張.

差唔多到中午都真係冇乜收獲,啲人開始走,人小咗唔駛爭爆頭,可以慢慢影,可惜個位大正光,隻蝶又白,搞到背景好暗.只好事後搞搞佢.

唔緊要,機會多的是,環境就係雜啲,都叫做可接受啦,呢種蝶好衰,好鐘意不停咁轉身,夾硬就位你都未影佢又轉咗身,只好守株待兔等佢轉啱焦平.

其實蝶好多,唔駛全世界去晒影一隻,呢個位咁正都冇乜人爭真係好.終於搞到三點幾先去食飯.

又影場地單車賽

來緊就係世界盃場地單車賽,粒粒星,高水準梗係想去影啦,不過…………要俾錢買票,咁都唔係好貴,但係驚好多人冇得揀位影,我之前話最靚位置影出彎有四個,我要更正,圓孤兩邊圍欄超高,係影唔到既,所以實際係得兩個位,要世界賽呢兩個位冇人坐前面仲要冇人阻機會我唔知,應該唔會大.

結果我選擇咗本地賽,幾乎包場咁濟,觀眾加埋我地都唔夠10個人,鐘意邊度影就邊度影,我當然就係去翻我最鐘意既位影啦,呢個位目的係要影到一條車龍仲要有小小彎尾的,只有剛出彎位先影到,要補充,因為我用定焦85mm,所以得一個位,如果用變焦或者較短焦距定焦,係可以前一行影都得.但短焦會影到前車大後車好多,我唔係咁鐘意.

瘦田冇人耕,可能啲人見我一路都喺呢個位唔走,佢地又走埋來影,仲要出wide鏡企我前面,估唔到影model會俾wide鏡恰,連影單車都會,好在我仲有一個位可以揀,有時未必要所有車都黐埋一齊,頭車帶離咗視覺都OK的.

之前都冇影過凱林賽帶位既電單車,呢項比賽係電單車帶幾圈後啲車先開始衝的,之前用汽油車真係肺積塵,依家已經轉咗用電車.

影完群揪,得翻啲單打獨鬥或者小車三四架,咁就影直路啦,呢個時候可以換135mm,直路由於有充足時間對焦,成功率係多過彎路好多.但最盡影到三架車,再多就會好細架,好空虛.

雨天大埔海濱公園

我覺得大埔海濱公園係幾好影人像地方,有幾個位都幾靚,又近我,冇乜特別節目就揀咗呢日去影model.

天氣麻麻,下着毛毛雨,好正既廣場位又俾人用咗來搞婚禮,冇計,唯有去都叫做有頂既四方框位影陣搏佢停雨.實質上係不停滴水,次次影呢個位我都有個想法,如果有張梯可以升高model等佢喺正四方框中間就好喇,不過影會活動當然係冇可能.

雨一直下,完全冇意思會停,個位影到啲平時好爛影既人都開始停手,侷住冒雨去彎橋位,影相位要冒雨,好在仲有個有蓋位可以放架生.哈,model又來個鬼馬表情.

Model都要避吓雨,等佢走入有蓋放架生位置,直接喺裡面影會好黑,要靠晒閃光燈,又都冇乜好影,於是就在外面影,有水流吓,當影瀑布咁用慢快門先.

雨冇停之餘仲越來越密,結果去埋晒啲有蓋黑媽媽既地方,開盡F1.8光圈都要用ISO 400先得1/100秒,同室內差唔多.

呢個綠色隧道本來好正,但先model坐在後面級位,用135mm影,可惜落雨既關係,所有坐低既pose都冇晒,變咗企前面,用135mm會爆框,85mm都幾乎爆,亦都冇咗綠色模糊前景效果.

為咗避雨,搞到走埋堆亂草度影,算把喇,我收機早啲走,你地慢慢影.

奇力山攝影

要出差唔想咁勞累就揀咗呢個近山頂只要行一陣就到既景點.網頁說大個位要游繩先落到去,如果選擇唔落去難度變超低.好容易就搵到游繩位入口,作者太誇張喇,係就係崎嶇小小,不過好多難過佢既位都冇游繩,基本上係冇乜難度.再行前小小可以上到山頂,上面既位更加開揚.

山頂可以看到日落,但好多樹阻,而且當天能見度……專心影個夜景就算,仲話豪宅添,都唔多開燈既,等來等去個天都仲係光過地面太多.最後都要夾硬事後整暗個天,算啦,當作出來行行山,效遊吓.

魚眼影高鐡站

友儕間有人提供高鐡站用魚眼靚位,交通方便,唔駛上山,仲要有蓋,落雨都唔怕,一於去馬.

事實上高鐡站都唔細架,要搵翻嗰個位要靠啲蛛絲馬跡,首先肯定係室外,而且有欄桿,經過一輪搜尋,終於搵到係巴士站附近,在有欄桿地方用魚眼經常會遇到因三腳架要攤開,相機申唔到出欄桿外面而影到欄桿背面的問題.有人會夾硬唔撐開其中兩隻腳,不過咁會好唔穏陣,長快門有機會拍攝失敗,為此我做咗兩手準備,第一招係帶支可以橫置中軸既腳架,缺點係有機會唔夠高,如果欄桿又太密伸唔到部機出去就會廢咗武功,第二招就係欄桿腳架,直接碼部機上欄桿.但如果欄桿係密籠又係無用武之地.終於,我既擔心係多餘既,呢度既欄杆好怪,係向內伸的,普通腳架就搞掂.之後就係天氣問題,當日天陰,甚至有小小微雨,本來有蓋都冇乜所謂,個天一樣都會變藍,即使冇咁藍.但市區光害射上啲雲度就搞到個天白晒,好似過曝咁,幸好雲間還有小小藍至冇咁差.

影完馬路順便影埋個天,雲太多實在搞唔掂,只好當做個紀綠啦.

冬日幻彩詠香江

朋友間講開12月有幾日有特別版幻彩詠香江,除咗激光外,仲會加入取消咗好耐既烟花.於是計劃上筆架山影影佢.

點解要去筆架山呢? 因為我見過其他人影到晚上激光由水平角度射過來很特別.可我有更多的諗法,首先要用提早開燈大法保留藍天,而且我唔拍特寫,要拍大景加激光烟花.可惜.......想法歸想法,執行起來才知錯遲百出,首先激光跟本唔夠藍天光,合成後變得非常短,另外激光範圍對於大景來講也實在太小,由於被提早開燈大法既想法限制,我又唔想臨時用長焦距影,結果就係搞到兩頭唔到岸,激光唔夠光,唔夠大,最後侷住用黑天既相合成,再勁裁,好失敗.

死心不惜再去海運停車場影多劑,今次知道唔駛夾藍天,食埋飯差唔多8點鐘先上去.先用低ISO,細光圈,慢快門影咗個底景,之後開大光圈,高ISO影激光,有烟花就影暗小小,之後合成晒就搞掂.15分鐘就收得工.