紅綿的季節

最近處處紅綿,一於搵日去顯徑停車場睇下有冇松鼠可以影靚啲,之前角度唔係咁好同背景好花.

明明處處紅綿都生得好靚,呢度只係好稀疏,先來迎客普通雀,就算乜雀都冇,佢總會出現,花疏唯有大特寫多啲.

叫大山雀但係好細隻,我要慢慢潛行先影到唔會太細粒,想搵朵花襯吓佢都冇.

松鼠就冇喇,啲人話上年都冇,估唔到有超大隻既紅咀藍,有位師姐用400mm定焦爆晒框影唔到,我都係定焦呀,不過係300mm,啱啱影到仲用到佢既大光圈虛化能力,如果一般zoom鏡個底會好花.

影水缸

西營盤美人魚館剛開幕時已經有人搞過活動叫我參加,但價錢實在咋舌,最後不了了之.今次有其他人搞平一半有多,仲話送後制教學,冇乜用但價錢可接受就算數

場景就係有個透明水缸,模特兒在水上做動作,都估到地方淺窄,個水缸真係得一片,影相地方都真係退無可退,50mm都幾乎爆框,仲要企10個人,可能呢個就係價錢可以低既原因,初初模特兒就只係企在平台上郁吓手腳,心諗成程都係咁就死得,好彩熱身後有淩空動作.屋頂有兩盞大LED燈做照明,有好有唔好,呢吓啱啱中面搞到好爆光吓.

企定定嗰啲我最後剷晒,留翻淩空同有道具既,琵琶係海綿做的,放手會浮,呢張啲光冇直打塊面冇咁爆.教學指引係用變焦鏡方便構圖,用F4等景深多啲冇咁容易對唔中焦,但快門又要最好有1/250秒唔驚郁咗,咁安全既設定ISO係3200.我梗係唔會聽佢講,用定焦開盡F1.8影.

水中有水泡會真實好多.啲人問點解唔喺下面做條喉出氣泡,主持人話驚會吹亂啲裝飾,其實我又唔係好介意,不過啲泡控制得唔好古古怪怪仲衰.

模特兒主動做氣泡最好,原來有柔光設定的.光差冇咁大反而可以光好多,不過如果跟教學設定ISO應該要5000先掂.

追逐印支綠鵲

今次大陣象,為咗要影呢隻印支綠鵲,特登上深圳瞓咗晚,朝早一早去仙湖植物園既化石森林等佢.事實上係老婆覺得即日走好趕,咁就順便.

早餐店一開就去買早餐,搭地鐡到仙湖值物園好近,但之後要行30分鐘上山,好在全部係車路,見到成堆炮陣知道冇去錯地方.隻雀果然出來,原來啲人擺咗嘢食引佢,初初見白雪雪以為係麵包,原來係肥豬肉,天色好灰,ISO 800,開盡光圈F5.6居然得1/40秒快門.唔可以再高ISO喇,因為我得支100-400mm,要裁得好盡吓.後來光翻啲,幾經辛苦先影到幾張清,可惜位唔多靚,背景好亂.

可惜隻雀飛走咗,啲人又再擺豬肉,等咗幾耐吓佢又出來,今次終於停翻個靚位,瘋狂連拍希望慢快門下有幾張清,呢個時候可以用ISO 500都有1/80秒快門.

同一個位,今次影埋佢開冠,任務完成,隔離樹原來係影朱背,見到佢出呀,但喺樹頂好細隻,無奈只好放棄.

天水圍公園reload

上次太晏去,好多目標鳥影唔到,襯住好天再去多次.

明明上午好好天個喎,乜解來到又變到滿天密雲.300mm加咗2x增距得翻F5.6,而且開晒有啲鬆散,正常要收到F8先夠sharp,冇計太暗只收到F6.3,ISO 800既快門係1/80秒.呢隻黑鳥厡來出名的,但最靚就只係隻紅眼.

目標鳥紅咀藍鵲出現了,市區成日見到但好小有靚位,佢郁來郁去慢快門實在搞唔掂,好幸運地有一張影到佢在半空,快門係恐佈既1/125秒.

驚喜不斷,啲人話呢隻起碼三點先出來,啲花紋好特別,原來係頭先隻黑鳥雌性.

雖然天陰陰,好多雀仔來玩水.

紅咀藍都玩,功德完滿.

打小人

驚蟄又到,又係蛇蟲鼠蟻開始活動既日子,不過今次先影打小人.仲擔心會唔會生意小冇乜機會影,結果去到係排晒大隊,乜原來香港人咁迷信.

咁多人一樣好難搞,人來人往搵個位企定定都難,現場有警察係咁叫啲人唔好阻路,今次主要目的係慢快門影拖鞋,呢位阿婆好勁,係持有香港牌照架,乜原來打小人都有牌攞.

背景雜到開盡光圈都虛化唔到,本來驚大光圈快門會太快,已經帶埋減光鏡來,實際上現場超暗,開盡光圈都仲要加高ISO.

除咗就咁打,仲有好多儀式,例如玩火,咁先係架嘛,着晒道袍睇落專業啲.價錢要五十蚊一個,幾分鐘就搞掂,真係發達.

現場係好灰,好多檔主都搞搞吓頂唔順要戴翻口罩.