西邊街

好耐冇影過風景,近近地影吓市區景.唔駛上山,去阿活食個早鳥晚餐先慢慢去,初初擔心會唔會被地面既車遮住,原來拍攝位置是在天橋上,唔驚車之餘仲可以在正中拍攝,路面就無可避免要側側地.

由於構圖裏面沒有天空,唔駛遷就天色,不過教堂後面嗰堆草如果唔想黑晒,都係早小小影會好啲.另外兩旁既樓幾乎係完全冇開燈的,教堂又非常光,就咁影就會得翻教堂夠光,周圍漆黑一片,所以HDR加筆刷合成係必要.之後等一張靚既車軌咁就完成了.

現代舞

無意中見到呢個表演,宣傳唔多覺,肯定又係極小型規模,不出所料,表演地方仲細過大館舞龍,舞者大啲動作都幾乎碰到觀眾.

原來現代舞係由芭蕾舞演變過來,但服裝好求其,舞步都係舞者自創,多數都係盡量扭曲身體表達出柔軟度.

或者力量,例如成個人抱起轉.

之後見佢地全部都係郁吓手郁吓腳咁就開始玩慢快門,這隻舞是樣都唔駛出的.其實離開左牆呢個距離右面走廊已經穿崩,啲書係我補上去的.

甚麽都可以是道具,水桶,厠所泵都有.

褲都可以玩一餐,我以為係慳成本啦,但之後有一場係劇院裏面,晨早就應該係咁啦,諗住好好影,點知啲燈光太玩嘢,好似的士高咁,九成都照唔到人個樣.

再找褐班鳳蝶

原來上一次影到佢已經係十年前,兩年前影係失敗咗,見有人影到再去過.

上測量站前經一經松仔園先,已經有幾位同好在場,居然話褐班鳳蝶出現在此,咁又好呀,唔駛嘥腳骨力上測量站,仲有好靚既白花襯佢,搵咗一輪都係冇,正準備上山既時候佢突然出現,不過硬係停到古古怪怪,影係影到不過冇用.結果都係要上山,搞咗大半日終於完成任務.

再搵吓其他蝶,呢隻應該係細灰,佢花紋有啲怪,冇咗出面一圈,可能係好嘢,唔理咁多影咗先.

回程時再去松仔園睇吓,出了太陽的關係,白花樹簡直係蝴蝶大爆發,肯定有超過一百隻以上,仲有罕見蝶例如綠弄,不過都係爛既,呢隻壇方其實都係爛既,事後補補佢.

又到紅棉季節

春天又到,紅棉盛開,又係時候搵啲雀仔配吓啲花,最好就梗係顯徑停車場啦,交通方便,附近有嘢食,有厠所,仲有瓦遮頭,落雨都唔怕,其實落大雨仲好,如果啲雀仔仲肯出來 :P

但係雀仔種類就普通啲,只係一般公園雀,首先大山雀來暖場.

然後係被人唾棄既紅耳鵯.

卒之有隻比較小見既黃眉柳鶯,佢仲好鐘意鑽花芯搵食,增加一點動感.

普通得來都有啲色既相思仔.

以為都差唔多,居然有赤紅山椒,成班人瘋狂走去影佢,可惜佢企個位又唔係幾好,都好過冇.

豐順舞火龍

拖延了多年之後終於成行,搭咗四個幾鐘頭車幾乎屈到血管栓塞,唔止,要食完晏就霸位到夜晚八點,晚餐都要草地上食飯盒,唔止,日日都唔落雨,偏偏完宵節正日就落雨.唔止,聽講話有啲高層要遲到,結果九點半先開始,等到痴線咁滯.

幾經艱苦終於開始,拍攝位置有三個選擇,有錢人可以畀500人仔上私家樓上層影,不過我聽講價格唔係一致,最正中既低層,即係相龍頭上面係1800人仔.中產可以租膠凳在圍欄外面影,20人仔,但第一排要早上一早先有,我地去到得翻第二排,至於平民百姓好似我咁就可以免費上外圍斜玻影喇.

爆火前先同大家混成一片,開吓燈咁,我揀山玻係有原因,富貴樓頂係太貴,租凳原本都正路,不過第二行會被第一行遮住,有租咗既團友反映,第一行直情企在凳上影,有租咗第一行既話其實第一行唔企高都影唔到,會有啲唔知乜人開始前入咗圍欄入面遮住第一排,佢地係博矇入埋去先影到.另一個原因係wide鏡近影會搞到前面既人好大個,錯覺條龍係好矮.

先有魚仔蝦毛暖場,落雨既關係,下面係一片傘海,頭兩條龍基本上乜都影唔到,呢條魚毛係第三條龍既,好彩上天放一條生路,兩稍細小咗好多傘.爆火嗰吓係好震撼既,基本上就係喺正面前放煙花.

斜玻當然也有缺點就係會被前面遮住,圍欄前既傘係最攞命,所以前兩條龍都影唔到,仲有中間好多人企凳,甚至有人攞埋可以油天花版咁高既梯來.我原本打算影圍欄對面咁就可以避開圍欄前既人,但超大煙,呢張啱啱開始都要勁執.

龍要去到近圍欄先影得清楚,只有三次機會,好彩都有時間準備.搞咗成日得半個鐘頭影,超慘之後寄望明天既跳火蹾,點知係廢既,個個幾乎貼實個火墩,幾乎要魚眼先影得晒,影到都唔靚,只好等回程.

漢文化節

估到係啲小型節目,勝在地點方便,附近有嘢食,有厠所.仲有地方坐住等唔駛捱太陽,覺得熱又可以入商場嘆嘆冷氣.

同把鬼潑水節一樣,排練時間冇王管,可以隨便走入巡遊區,呢張小有可以用85mm都影到全身既相.

睬排後開心合照時間,本來我冇乜興趣影啲咁亂既畫面,不過見到名人.除咗大會攝影,原來有好多自己友只要攞張貼紙就可正式巡遊時留在圍欄內,我見派得好隨便,基本上只要伸手攞就有,不過無謂咁衰仔.

圍欄外其實都好多位,但走動冇咁方便,新年嘛,梗係財神先行,背景實太亂,我企圖用85mm打散佢,結果搞到得翻半身.

頂唔順換翻50mm,成日最值得影就係千手觀音,圍欄外就有呢個問題,冇辦法對正影,穿咗崩.

齋行同唱歌既唔影喇,文民族舞其實都好求其,長長頭髮加翻啲分.