超得閒七人攬球賽

 除了七人攬球,那些傳統十人,十五人真係唔好搞我,悶到核爆.

就算七人都到咗瓶頸冇乜進步,慢快門好難試,其實唔係咁多機會影,一場比賽個波去到射程範圍都係得十次八次,仲玩慢快門分分鐘乜都冇影到.所以啲相都好例牌,例牌既界外球.

攬埋一舊太普通,攬到飛起應該好啲,可惜塊面向下有點黑.

要影到波在空中,交波有點普通都照影.

另外最容易就係高空搶波啦.唔記得咗講點解係超得閒,比賽分三段,比賽每場只係二十分鐘,三場之後既休息時間竟然個半鐘,又未食飯都唔知做乜好,食飯時間嗰段又係個半鐘都算合理,點知又話天氣太熱要等多半個鐘,差得幾遠呀?史上最hea攬球賽.

北區公園打飛

鴨腳木加上相思已經影過很多次,今次要增加難度打飛.FB見到北區公園有得影.

要影凌空既相思必定要高速快門,所以必定要是陽光普照的日子.由1/1600秒快門試起,卒之要去到1/3200秒先叫做冇咁易矇,相思移動時會跳跳吓咁,撞得中既話就可以影到在空中喇.

但只係跳躍好似有啲呃人,點都要影到張翼飛行先得,自從高階機有預拍之後,網上多咗好多雀鳥起飛的相片.我部老爺機係冇,唯有靠撞,見到郁先影一定已經飛走咗,我係見相思想郁就開始打空炮.例如佢企定定望遠處或者郁完停一停就要行動.

忽然有雲遮一遮個太陽,快門被迫降至1/2500秒,但極好運有隻相思在空中定咗一定,反而影得最清楚.

你會發現所有相思清既啲花都清,基本上要對焦隻相思我部機係唔夠快,只能夠應付到橫向移動既情況,相思往前或後飛就會對焦失敗,臨尾好好運有相思打交.又執多張.

青衣公園大小翠

呢排FB日日被小翠炸版,我見有啲人似乎係日日去,影極都唔厭.誓要影遍小翠在公園每一角落.既然咁常出,我又去八卦吓.

午餐後出發,多人到嚇死人,除咗曝曬既地方,幾乎成個湖邊都企滿人,見到餐廳老闆出來同啲人講唔可以放腳架喺啲枱旁邊,會影響做生意,小翠選擇最窄嗰個位爆水,個位就算第三排都逼到爆,所以我就放棄咗,跟住一路都靜英英,等到四點諗住走,小翠居然出來同大家打招呼,正正就係去中間冇人既地方,仲要係最近嗰個蓮蓬,全世界一擁而上,啲腳架攞唔切,個個手持影反而有啲空位,我都執翻張.

陽光冇咗,柔和既光線本來係好,但快門下降到好危險既水平,尤其小翠分分鐘一陣間就飛走,太博可能冇相,果然飛走,好在係停在另一個蓮蓬上,死就死啦,照博,好彩都影到.

有收獲正想走人之際,大翠居然出埋來,距離就遠好多喇,但有荷花同蓮蓬豐富構圖.

再挑戰慢快門影劍道

上次首試效果唔係太理想,啲比賽咁密又去影多次.

今次再減慢快門至1/80秒希望動感更強,係好啲雖然失敗率更高,另外中焦既唔係主動進攻都差啲.

上次我發現有個問題係即使一見到郁已經影都太遲,我部老爺機又冇預拍,唯有見佢想郁已經影,有時係會放空槍,不過反而命中多咗,兩個一齊郁都算可以,但背景搞到把劍好似唔見咗.

終於影到中焦既都有動作.

再高景界梗係搖拍,可惜好難影到正側面,個乞人憎裁判永遠都企正你前面.背景只有小小效果.而且只有面罩嗰幾條鐡線係清既.

個個都想影到既就係中劍嗰吓把劍變咗形,好彩撞中一次,有點不足係進攻嗰個塊面有啲遮咗.

塱原的紅藜

之前去塱原就留意到燕崗入口附近有一堆鮮紅色的植物,如果配上雀鳥會是很好的畫面.於是又出發去一趙.

真係好彩,雖然只係麻雀,至小係有,影咗一陣之後更好運,有啲比較冇麻雀咁普通既雀,仲停到好近,把握機會紀錄這難得的畫面.旁邊原來仲有啲紅高樑,顏色反而只係啡啡地,唔夠鮮色.

一去到就達到目標,再睇吓有乜影,見人地在種百日菊嗰度影到好多蝴蝶,但係我就只見到普通到死既蛇目蛺,比較小見佢開翼,我又玩咗好耐,雖然最後覺得都唔多靚.

黑翅長腳鷸到處都是,但要影佢飛行恐怕要好長鏡頭,咁啱見佢地打交,啱晒,沒有更好的機會可以近影,可惜背景有點近,鏡頭光圈又係得咁多,比較花.

蜻蜓交尾一齊出現唔知影得邊樣,正打算搵個啱焦平啲既位佢地就散咗喇.

靜英英山寮

天氣咁熱真係唔想去咁遠,冇想太多又去咗山寮.

到神壇的路爆咗水管,想入去要由另一端踏石誇過河面,有啲危險,一係就澗水,兩個選擇都唔多妥當,反正裏面好似唔見有蝴蝶,就唔入去住,點知係路上見到小東西交尾,要在水邊窄路攞架生真係有啲驚,萬一有人要入去就好論盡,唔理得咁多,垂直佢地既位置剛啱有條衰草遮住,只好斜斜地影咗先,之後剪草失敗嚇走咗佢地.

踏破鐵鞋都冇蝶,終於河對面見到蚜灰仔,上次都差唔多位置影過,今次位向比較好,呢邊不受歡迎係因為好暗,400mm焦距但用到1/40秒先夠光,搞好耐先影到一張OK.

之後就乜蝶都見唔到喇,回家路上見到獵殺畫面,龍眼雞屍骸都冇咗一大忽,但背景靚都照影啦.

尾波滑水

上一次影已經係早期單反年代,效果並不理想,經過咁多年,器材進步了,係時候去影翻好啲.

今次比賽既距離好似近咗,記得之前APS-C都要用盡500mm,而且我也不追求要影到個運動員滿框,反而想影埋旁邊既水花,出猛太陽,快門幾快都得.

又未必下下有水花既,有啲動作需時較耐先完成到,水花已經散去.只好影吓個形態.

有人同我講佢話應該係快艇拉到咁上下就會鬆手跳,我證實咗佢係錯的,可能佢見到有人甩手以為係咁.

淨係影個人交代得唔全面,嘗試走遠啲側側地影埋架快艇,快艇實在太大.搞到個人好細,又似乎唔係咁靚.

速度滑冰

去影花式滑冰原本目標係用慢快門影小朋友集體花式,點知原來係速度滑冰,仲正因為未影過.

其實同滾軸溜冰差唔多,但冰面較滑,速度比較快,而且滑行較多,頭部,手腳擺動比較小,冇咁易矇.快門可以慢啲都得.

小有從外圍爬頭.

呢張真係奇怪,竟然影到四個人都清,證明速度係完全一樣.

追逐山東艦

 山東艦訪港,襯熱鬧去影吓,嘩,七點幾就封海咪要好早起身?

前一晚夜瞓咗,趕到去已經見到隻開路既救火船入港,快速拔機都趕唔切喇.好彩有朋友通知我機位,趕到第一艘驅逐艦,可以配埋南丫島三個煙窗.

華富村呢度超近,又剛好正光,話咁快第二艘驅逐艦又到,同第一艘其實差唔多.

咦,竟然又有救火船,失而復得,影佢一定係移動中先有,泊定咗就冇得影.

又係驅逐艦,呢艘比較細,尾部連直昇機都冇.

終於遠處見到主角,死喇,一路都用100-400影得好開心,主角咁長會唔會爆框架?終於證實咗係會,冇計只好影一忽大隻啲.只有更豬,事後打開相機袋原來我有帶24-70,唔夠瞓忘記咗換鏡.

收機去厠所之後走人啦,行行吓見到原來仲有一艘包底的,好在攞得切機影埋.呢艘仲應該係最大的.之後碰到同路中人佢話有個住客帶佢上18樓影好正,甲板飛機都影埋,真係恨死我,之後發覺停車場樓上都好正,又高啲又遠啲,早啲搵到就唔駛爆框啦.

北區微型藝術展

這個說是專做成北區的事物,睇宣傳會有新展品,而且地點十分近,就在上水站旁邊上水滙,快閃一吓冇乜成本.

有好多新展品係影唔到好的,包括細細個膠箱包住個大警崗,要離遠影反光到爆及背景變晒巨人,特寫個警察又冇乜意思,大埔火車站博物館都係相同情況,寶芝林勉強可以影,其實背景都係穿崩.

花檔唔係好代表到北區啦,但係比較易影.

北區真係咁多舞獅嗎?今次我改變咗策略,唔追求所有物件清晒,只著重主體近距離的物件,咁嗰圈圍住主體既模糊會冇咁嚴重,事後用印章工具印走佢都比較唔需要咁精準.以呢張相為例,如果後面幅牆要清埋就會好多地方穿崩.唔係大作唔值得花咁多功夫.

玩具店呢啲真係冇心代表性,區區都有啦,只係易影.

今次最想影係呢個魚燈舞,啲安排係怪怪地,影埋條欄杆,而且同真既一樣,係冇乜章法的,求其走來走去就算係跳咗舞 :P