影捉魚

去西貢都係影飛多,今次轉主題影捉魚.只要唔揀擇,不理鳥種的話,唔難有收獲,不過呢度有個好大問題係有好多魚販掉棄的魚內臟,諗住影中點知又係魚腸,有啲怪怪的感覺.

大白鷺最親民,經常常出撃而且多數有收獲,好彩唔係魚腸.

灰鷺都唔錯,今次條魚就細咗啲.陽光普照,海水藍得很好看.

一講就小氣,忽然變咗陰天,鷹咁大隻應該好好影,但佢俯衝嗰吓好快,好易跟唔切,搵到佢已經爆完水,仲有最衰佢成日假動作,衝到差唔多到海面又飛翻上天空,追得幾追真係好攰.終於畀佢捉到條泥鯭.

好快太陽光被遮住,侷住用慢快門,估唔到都有收獲,但係水面反光跟鳥翼混在一起了.

深圳曼哈頓

這其實只是幾座比較高的深圳地標,但小紅書人人都係咁叫.拍攝地點在文华大廈天台,上天台有一個疑慮,就係好多時會上鎖,去到東座地下搭升降機上到頂樓再行樓梯上天台,果然係鎖咗,唔服氣再去西座,果然這才是正確地方.

好奇怪圍牆前有一行地磚係爛的,放唔到腳架,好彩牆夠厚,可以成支放上去,不過就要打醒十二分精神唔好跌落街.啲人話用105mm影就啱,我已經保守啲用85mm,實際上我覺得再wide小小好啲,冇錯啲高樓會細咗啲,但前面既轉彎車軌可以影埋.日落就冇喇,只得夜景.

大埔滘公園鳥攝

Youtube見到公園有吊芺蓉花配雀仔,但就唔知邊個公園,條片淨係睇到大乜乜公園,記憶中大帽山效野公園有,但字數又唔多啱,上康文署睇公園表只有大埔海濱公園係大字開頭,字數都唔啱喎.終於走去睇Google Map慢慢搵才發現有大埔滘公園,仲好近松仔園.

原本我都係諗住影吓啲呆雀配吊芺蓉為目標.但嗰度啲人都以影太陽鳥定翼為主,咁我又跟吓風,坦白講十分難,佢停留時間好短,搵得佢來已經走咗.但後來發覺佢會同一個地方定幾次,試咗一輪終於給我影到,而且好難得係乾淨既背景.

之後專心影相思,點知又話有藍翅鵗鶥出現,跳來跳去影極都影唔到完整一隻,都好背景算色彩繽紛.

相思就影到成隻呀,背景就雜咗啲喇.

慢快門影武術錦標賽

試過專影騰空動作,今次要挑戰慢快門.

雖然係咁講,我都想影啲騰空動作,唔知點解啲套路全部都係背住觀眾跳,我唯有走去另一邊用長鏡影,其實有一吓打橫飛身的,不過次次都影唔清.

跟住就係慢快門,原本想試1/30秒,成功率幾乎零,上調至1/60秒,其實成功率都係好低.長槍比較多揮動支槍既動作,向前剌嗰啲幾乎好似冇郁咁.

棍都幾多揮動動作,呢張棍郁之餘,手腳都睇到郁緊,唔錯.

刀動感都唔錯的,可惜被個觀眾席背景破壞咗.要快慢都影晒,又係應用咗相機既記憶功能,用高速快門影完跳躍動作,扭一扭轉盤即刻轉作慢快門.