減磅

一路用開既Manfrotto 190 pro鋁合金腳架都算好用,夠實淨之餘又有中軸橫置可以影低角度,雖然我都未係年紀大,機器壞咁嚴重.但攞佢其實都有啲負擔,重可以當做運動,不過最麻煩係佢好掗拃.太長上交通工具唔知塞去邊好,旅行的話拖細喼都唔掂,會突咗一段出來,除非拖大喼………

的起心肝走去買翻支旅行腳架. 做過功課鎖定Manfrotto Befree 鋁合金或者炭繊. 好就梗係炭繊好啦,但跟據綱上資料,價錢等餘兩支鋁合金!重量就只差300g.咁好似唔多值,不過捻上手…又真係有啲分別個喎,1.1Kg比起1.4kg,完全唔聚手,幾喜歡…….鋁合金都要1430,嘩,咁炭繊咪要接近3000!鬥爭一輪貴就貴啦,費事買完又唔鐘意.咦,唔知係乜特價,原來只係2030.快快樂樂買咗佢.

同老大哥比,打開後其實唔係差好遠,都可以去到好高吓.不過好意外,就算大家升埋中軸都係差唔多.不過重量就差得多啦.1.1Kg對超過2Kg.

低角度就差好遠喇,老大哥可以完全貼地咁滯.Befree由於中軸頂住....如果影貼地既昆蟲,蝴蝶或者花卉會差啲.不過,其實......影蝴蝶係唔會帶咁大枝腳架去的.影花就會.至於收合就更加冇得比,細兩個碼,可以塞入細拖喼(其實係背包),咁去旅行就真係可以成日帶住支腳架都得喇.不過都有樣嘢唔係好慣.支腳架開合有三個mode,摺合,高及低,黑暗中扭來扭去要操練一下,同埋我好驚我幾粒掣咁搞法會好快蝕.不過都唔驚得咁多喇.架生係買來用,用爛咗只好再買……所以你話有錢多好.

新田村路荷花

在網上睇到呢個荷花池夠長,花又冇咁密容易影到有水的構圖,引起了我的興趣.同埋今次我要試吓早啲去,試吓太陽斜光的效果.

一係唔早,一係早到盡.睇定港鉄同76K巴士頭班車時間,太和港鐡係5:47,而上水巴士係6:00.真係好敏,計埋車程恐怕要跑去巴士站.因為一趕唔到下一班就係6:30.終於趕到,似乎呢班車都係夾定俾頭班港鐡啲人搭的.不過……懶醒累事,一見到新田就落車.點知荷花池係另一邊路尾,行餐死.跟住原來近荷花的位置河對面,又走錯方向搵來搵去搞到七點幾先開始影第一張相.求其影張荷花綠底開吓齋先.

這邊是背光位置,淺色既荷花冇咁易爆光,而且陽光穿過草叢做成一點點光點,就利用佢來襯吓啲花同葉.為咗要晒塊葉,搞到朵花有啲矮添 :P

 

隔得開啲係好啲,可以用水做背景.之前兩張都影花蕾,今次加埋開咗既.

試吓影wide啲即刻覺得好亂,啲花其實唔疏,不過係同對岸有啲距離.

再加埋水影啲wide景,太陽已經開始高,荷葉面白晒.都係時候走喇.

過翻對面再視察吓環境,原來都仲可以影吓倒影,懶得換70-200mm,有啲爆框都算喇,我都係第一次咁影倒影,都幾新奇.

再搵啲低啲既花影多張,開始幾大風吓,等好耐都影唔到一張,而且馬路旁影成日有車經過身後,危險都唔會既,因為啲車實睇到你,但好似唔係好友善,嫌我地阻住佢咁,都係早啲走翻屋企瞓吓算喇.

蝴蝶五弄

我影蝴蝶來來去去都係大埔附近,問吓影開蝶既朋友有冇新地方,知道企嶺有白傘弄影(其實我唔知白傘係點既樣,初初仲以為係鬍鬚仔),不過冇乜所謂,只想去吓新地方,有就有,冇都冇相干.

第一隻遇到既唔係白傘弄,而係馬弄,佢好特別有紅色既眼睛,記得好耐前都遇過一次,唔知係咪習性關係,硬係喱埋晒啲暗位,上一次失敗咗,今次用到F4.5, iso 800, 1/60sec都仲好暗.我從來都未用過F4.5咁大光圈的,1/50sec試咗好多張都唔得,其實依張都有小小鬆,最後軟件推光要去到iso 2000,起晒渣,如果當時有腳架就好喇,不過大熱天時………

一路行先知原來今日目標有三弄,呢隻就係白傘弄喇.可惜佢在葉底,好暗又背光,但都好過剛才,勉強用到F5.6,都要iso 1600.雖然我有帶閃燈,但弄蝶對眼反光,一閃就會有個大光斑,所以唔用得,如果有腳架…

轉頭又有人話搵到綠弄,不過…….又係葉底,仲黑到有腳架都影唔到,一定要閃,算把喇,夾硬用閃影都係盞delete.未失望完又話又黑傘弄,今次…都係葉底呀,唔係呱?要唔要即刻翻屋企攞腳架?好彩佢個位冇咁暗,iso 1000就影到,算係唔駛食白果.

咁搞法唔係路,行出去光啲既地方睇吓有冇機.哎呀,竟然有師兄搵到露天綠弄呀,就算點唔靚位都好過黑暗葉底啦,自己唔爭氣只係影到一張暗底既夠sharp.

最後呢隻我自己搵的,我都唔知係乜弄,搵到綠弄嗰位師兄講我知係雅弄.以上就係今次影到既五弄喇,有四種我都未見過.真係大開眼界.

體驗航拍

近排多咗好多人玩航拍,咁確係幾新奇既,就算你點唔怕辛苦,上山影風景點都有取景限制,唔係話邊個位都去得到.航拍就唔同,基本上去邊都得,而且………唔駛上山呀.用成粒鐘行生行死,成身臭汗先去到既拍攝位置,航拍用一分鐘就去到.而且價錢已經回落咗好多……不過要我買我又唔係好想,屋企又要放多舊嘢,最主要係唔知攞去邊度玩,跌落來會撞死人既地方一定唔敢玩,得翻山旮旯地方可以去,仲有,部機係唔夠力載部單反或者至少無反上去,只可以有DC仔質素……咁唔買點體驗?咁我細佬買咗我可以黐來玩囉.

原來唔係一開機就可以飛的,要先連接咗電話做實時取景,又要在起飛地方搞一輪定咗位,確定識得自己回航先會有顯示允許飛行.搞好晒之後控制好直接吓,左控制桿四個方向係上昇,下降,向左,向右,右控制桿就係左轉,右轉,其餘有啲掣影相,控制鏡頭角度,拍片,回航等.但感覺幾驚吓,要飛到好遠,直情唔見咗架機先影到有啲嘢睇既畫面.

一舊電充飽只可以玩28分鐘,未影之前熱身已經玩咗一半,驚飛得太耐翻唔到來,唯有用第二舊電實拍,在空中轉一轉角度影既嘢已經完全唔同.原本想試吓飛近啲樓,一來驚失事炒埋去,二來驚俾人投訊偷怕就冇試喇.

一場飛到上去,我覺得再高啲將相會更震憾,越飛越高,我細佬開始有啲驚架機翻唔到來,為免嚇親佢,只係飛高小小就算數,按下自動回航按鈕,聽到確認OK才放下心頭大石……….這個時候,意外發生了,咪咁黑心唔係撞機,係在降落途中一隻蝴蝶被吸引了過來,結果就係一隻翼冇咗之餘仲爆埋肚,如果當時唔係蝴蝶而係雀仔應該會上演空中鐡達尼,諗起都覺得恐佈.

體育節壘球

朋友終於忍唔住買咗支150-600mm長鏡.除咗打雀外,影遠距離戶外運動都係試鏡好項目.襯住體育節未完,就帶佢去玩吓.

有影友講過,影戶外活動最正一係曬到爆,夠晒光,一係Touch wood就落狗屎,影泥漿咁話.不過………佢係講緊用定焦F2.8大炮影,150-600mm……落大雨就算唔怕濕水都肯定唔夠光影.就算有舊雲遮遮都差啲.快門變慢最好影捕手,因為在接波嗰陣,大部份時間都唔係好郁既,我試過1/200秒快門都影到.

例牌啲都影埋投手,影捕手或者擊球手都有機會估唔中,但影投手一定唔會估錯,肯定每一球都會掂波,實有相,不過sharp唔sharp就靠自己喇.

自然要影埋擊球,今日啲準繩度真係麻麻,好多全壞球,一唔係就打到唔知飛咗去邊.求其影幾張就算.

其實我最想影係剷壘,難度其一係唔會經常發生.時間充足既話真係未洗過褲咩?就咁跑過去就算啦.

就算發生,仲要估係邊個壘,第一棒唔駛估,打中實係跑二壘,不過二壘通常夠時間,唔多會剷,如果滿壘,即係個個壘都有人,用緊四,五百mm焦距要突然由擊球或者投球位置即係搵剷壘個位,由於視角窄,可能講緊要十秒,八秒時間.zoom翻wide啲搵到再zoom埋去都唔快得幾多.分分鐘已經完事.我個方法就係放棄擊球位置,會爭取到多一點時間,最好係影到個波在空中,防守球員又未接到,跑壘既剷到沙塵滾滾就為之very good喇,我真係影到架,可惜矇咗,接咗波既都算啦,揼爆心口呀.

再接再厲,嘩,剷還剷,睇人呀.要影到被剷個壘啱啱有人接波係可遇不可求的,因為是但一個壘接波都可以Kill到跑壘嗰個.所以頭先真係想死.

再來,今日擊球就真係麻麻,但係啲人又幾肯剷喎,我平時都唔多影到,今日都有幾張喎 :)

悶熱松仔園

天氣熱,即係又到蟲出沒的季節.幾辛苦都要去松仔園朝吓聖.成山都係人,旅遊車越來越多既場面已經無可避免,唯有接受.天氣熱得來好潮濕,我個眼鏡成眼都矇矇,不停要抺.

昆蟲到了發情期,大量竹節蟲在交尾,幾乎梗有對喺左近.不過……….好難影.由於佢地身體好長又多數在雜草中搞嘢,要成隻都入鏡既話畫面簡直亂到不堪,完全唔知影緊乜.開大光圈又sharp唔到兩隻,搞咗一大輪都係冇相,只可以影吓大蚊.

今晚個引閃好似神神地,時得時唔得,嘥咗我好多機會.依家諗翻可能係唔夠電,呢張影完好黑,要事後推光兩級,即實際用咗Iso 1600去影,但對焦又好準就是旦啦.

又到咗另一個爆發區,周圍都係,其實呢種蟲我已經影過,但陪朋友來好似乜都唔影咁唔係幾好,又影吓.

又見到竹節蟲,今次個角度好似好小小,離背景較遠.我決定要用盡一切努力影好佢,於是不斷試垂直角度,唔同光圈咁影咗一大堆相,燃燒閃光燈既壽命及電芯電力.最後叫做勉強可以,光圈結果都係F16.真係大啲啲都唔得.我特登唔影晒啲腳,因為蟲體會太細.搞完一輪成身濕晒.

回歸途中遇見最後一個爆發區,頭先明明經過但走灟咗眼.由於要趕時間,冇心機慢慢影,隨便影咗兩張就走,估唔到景深又剛剛好.

影模自由行

參加影會活動係方便.人地搞好晒自己按個Join到時到候出現就搞掂,夠晒即食,可是…..一來會比較多人,多數係8個,有時無端端可能多咗一個.遇着當中有啲冇乜公德心既wide鏡人仲會頗激氣,而且原來一啲都唔平.於是試吓幾個同事自己約model.錢都係俾咁多,不過就係4個人影.

近排天氣熱到溶.幸好同事有車影一陣頂唔順可以上翻車涼冷氣.好多人以為出猛太陽光線充足影相就靚,實則係熱之餘反差又大,model又曬到眯晒眼,所以幾曬都好,始終都要去翻樹陰影.我特登搵咗堆植物做前景.後面有太陽既背景已經白晒.

有時有陽光透過的場面也頗得意的.通常影人加景用wide鏡會比較合理.但我反而喜歡用長小小.景物會合翻原本比例,而且畫面比較夢幻,冇咁機仔feel.當然缺點就係要退好遠,同埋會俾wide鏡蝦死啦,所以人小小係好啲.

如果呢張用wide鏡影,後面既樹會變晒樹BB,用長鏡啲樹感覺好濃密.

有車既另一好處係轉景點唔駛靠行路,咁熱行得遠小小真係會虛脫,再講翻用長鏡,因為距離遠,會開始冇辦法同model溝通,如果唔夠堅持,好多時就會變晒半身,大頭照,效果似將人貼在佈景板上,一兩張會好搶眼,太多就會悶喇.

我其實幾喜歡拍坐的pose,同橫度比較配合.即使用長鏡都可以唔駛走太遠.

唔知點解次次都總係避免唔到要大背光,同事有帶反光板,我唔明個個都話反光板好,講真我覺得白色嗰邊唔夠光,銀色又會光到model睜唔開眼,所以我都唔敢旨意佢,一於閃光燈全出算數.我估反光板應該唔係咁猛太陽用呱?

換翻支短鏡,其實只係50mm影吓景,呢個位85mm太長喇,否則我都會用85mm影,效果夢幻得多.

血拚關西

又冇櫻花,又冇紅葉,又冇落雪,其實有乜好去?咁可能係機票酒店平啲啲拉.我唔知係唔係,不過有一樣旅遊節目係幾乎唔駛理日子既,就係Shopping.今次係陪老婆同佢三個朋友去……想起都驚嚇 @@

可能5日全Shopping真係驚我會發癲,就安排咗去一轉和歌山,首先趕時髦去貴志駅睇貓.只係…但係,佢真係一隻好普通既貓來咋播.有啲搵笨….

除咗貓之外,呢度仲有四架特別列車,貓列車,草莓列車,玩具列車同埋梅列車,內裏有唔同佈置,遊人都爭相同佢地拍照,一場來到梗係諗住坐晒四架車啦,點知…….貓列車同玩具列車係休息架,離遠望吓算啦 :(

時間尚早(我地搭半夜機),趕得切去黑潮市場睇劏魚,早15分鐘到仲霸到頭位影相,我老婆聽到要等咁耐(只係15分鐘)真係啋我都傻,自己去咗Shopping,師傅一路劏魚一路嘰嘢咕嚕唔知講乜,我估係推銷呱?因為佢有間舖喺度的.

黑潮市場另一賣點係有自助燒烤區,不另收費,有人開埋爐,幫襯市場買嘢就可以享用,諗住好似黑門市場咁既規模就會幾失望,實際上得幾間有鮮活食材,飲品更加係得一間,燒烤區望海係有風味,不過咁熱…..旁邊的遊艇城直頭係鬼城,得幾丁人,機動遊戲都熄晒,接駁巴士一個鐘一班,認真麻麻.

仲有時間去埋和歌山城,已經就快關門唔俾入,隨便門口影張相就算.跟住我已經眼瞓到死,但班女人居然晚餐後仲去行葯房,都唔知佢地搞到幾多點喇.

第二日去翻大阪,個個當咗車箱係睡房,梗係,通宵機仲踩到咁夜,但一去到酒店放低行季又即刻生猛翻,黑門市場,心齋橋又搞到三點幾(係半夜),第三日落雨又天神橋筋,梅田,都唔知點解咁多嘢買,終於第四日肯停吓去京都,仲租和服話做model俾我影(實際係我幫佢地影?)佢地啲相唔出得,出張路上踫到既啦.好喇,聽日終於可以走喇 :P

保齡球攝影

影保齡球既機會真係冇乜,公司比賽唔方便出相,可能比較悶攝影會又冇搞,其他比賽混入去影後又冇乜意思,體育節係一個難得的機會,上一年個場暗到打波既都睇唔清楚,去到都放棄,今年唔錯比較光猛.

雖然係攞正牌,都同現場工作人員打個招呼.佢地又幾好人,知道我唔想影後,就容許我在場與場之間練習時間出球道柱後影,但一正式比賽就要入翻來.我當然求之不得.不過原來影出來個底好花,反而唔係咁靚.

到正式比賽,工作人員都容許我在最側面的通道邊影.真係得一個位,頂盡兩個,好彩真係得我一個人來影,現場好暗,又一次要開盡F1.4光圈先有1/320秒.今次有新嘗試,以往我都係在連續對焦時我都係揀對焦優先的.邏輯上好正確,唔中焦影來做乜?但咁暗幾乎十次有九次都係相機覺得唔中焦唔俾影,到中既時候個波已經走咗,我終於試吓釋放快門優先,果然好啲喎,起碼俾我影,雖然都係成日唔中,但.........對焦優先咪又係唔中.

追焦效果始終唔係好理想,失敗率好高.我又諗翻影彈網既手動對焦.不過今次有啲新諗法,一般來講先對焦後構圖係唔建議既,因為部機一轉其實焦點係會前移或者後移,尤其用大光圈影就會失焦.所以我今次試吓特登對前小小,就係對出波嗰舊嘢,跟住轉去開波位置,焦點後移之後就啱啱好喇.我仲可以坐前啲或者坐後啲去調節焦點.

由於用定焦,只可以影死一條球道,相當悶,唔夠光都冇計,要用135mm影吓遠啲既球道,快門下降到1/200秒,唔係好掂,卒之搞到用iso 2000,快門升翻去1/250秒.冇咗對焦既論論盡盡,構圖精準咗好多.平時多數因為用咗左側對焦點會冇咗隻腳,依家可以睇啱先影.

之後我再用翻上次影彈網既方法,務求百發百中,每個運動員都會在同一球道打兩次,只要襯佢第一次打完睇波嗰陣,用十倍放大手動對啱焦,下次佢再打就十拿九穏.不過有啲一打完就走唔切既就冇佢符 @@

紅紅鳳凰木

唔知係咪冇留意呢?往年都唔覺住處附近啲鳳凰木咁紅.一於去影吓佢,仲好過等紅葉.

就咁走到樹底低炒.影到個天白茫茫唔靚.我地特登去咗廣福頓附近天橋,從高度影,希望順手搵啲街景襯吓唔駛咁齋.對面馬路水平角度有棵都幾多花,就搵佢開齋.

 

 

然後就真係高角度,首先用長鏡增加壓縮感,影到好似好多花咁先得.

 

 

之後就用wide鏡影埋街景入鏡.不暪你說,雖然好好天,但光照並不均勻.條街光過啲花好多.都費事用腳架影兩張唔同光暗夾喇.陣間有風吹啲花郁咗仲衰,索性用raw出兩張光暗唔同既夾就算,由於夠光,ISO唔駛太高,暗部都唔會太多雜訊.

 

 

用埋廣福邨做背景.

 

不知是甚麽豪宅呢?用來襯花都幾唔錯.