影廟街

呢度我一路都冇去影,因為我其實唔係太喜歡用直度影風景.不過聽講過多兩年油麻地停車場就會拆,即係就冇可能喺呢個位影到廟街.反正唔遠就去影咗佢.

網頁教人去三或四樓影,但跟據我經驗應係越高越好.於是去頂樓,一定要搭電梯,樓梯聽講有啲係封咗行唔到.或者行車路都得,不過就會遠啲.同埋係要用長鏡,否則條街會好幼,我用到135mm,襯住兩邊既樓未黑晒就影,不過事後好多人都話兩邊黑啲會好啲喎.

剛才係我比較喜歡既角度,因為有一邊大厦係直線,但見網上個個都係對正中間,咁我又影埋佢囉.

時機不對

見人影到上環文武廟有啲光射入去好靚,想去依樣影翻張.

我估中午正頭頂入光最正呱?事實上好似唔係,廟頂正中係有一片帆布擋住,冇計喇,只好就咁影吓好多塔香.廟內其實好窄,我呢張用盡24mm同埋貼牆用埋反mon先有咁效果.

冇咗斜射光,我都冇心機再影啲香,就隨便影吓啲燈.

再影埋一行佛,就完工.

離開時見到門口有架人力車加上好多假櫻花,都唔錯,就順便影埋,此行冇乜滿意收獲,但勝在唔駛點行.當消磨吓時間.

就來冇得玩

最近網上睇到原來2020年(即係今年)第四季就會立法規管航拍機,到時重過250g既機型都要實名登記,要考牌及買第三者保險.我地玩吓啫,攞幾千蚊一年買第三保太破費呱?而且聽個考個牌都唔平.所以如果仲想玩只可以鎖定Mavic mini,重249g,啱啱夠輕.

咁轉用Mavic mini就掂晒?最多抗風能力差啲.但原來現行指引都好辣.機場五公里範圍自然唔俾飛,連維港兩岸,大嶼山北部沿岸,大攬涌至荃灣沿岸及青衣一帶,人多擠迫既上空,都係唔俾飛的.夜晚又唔俾飛,我一路以為高度限制係三百米都搞錯咗,係300呎,即係得90米.咁去到大帽山飛出去又如何?原來係唔可以水平飛既,要一路跟住山勢向翻下,保持到地面係90米以內.到時如果法例真係咁,睇怕都冇乜地方好飛,所以有得玩好玩.

北角村攝影

呢個地方交通十分方便,有船由香港仔直到,係去榕樹灣既中途站.可惜船期真係,一係四點半, 一係就五點五十分,照計五點五十分都趕得切影日落既,但由於未去過,唔知要行幾耐,就決定四點半啦.

半個鐘就到,搞到要等二個幾鐘.影相位好近,不過入去條路都幾崎嶇,要柔繩咁滯.呢個地方係以前景有好多突出既石塊出名,明明都睇咗係水退日先來,都好似唔係好多石,太陽又衰啦,一早就俾雲遮住,水都未退到最低,日落就變得好普通囉.

想早走都冇用,要八點十分先有船,個夜景麻麻都侷住影埋佢,但我部機唔知做乜鬼個B快門用唔到,搞得幾搞日落嗰邊個天居然變紅,咁就轉方向啦.叫做唔駛得一張相咁齋.

悶熱企嶺下

記得之前去企嶺下影蝶都係水浪窩落車,咁就照舊,原來條路直去就係榕樹澳,不過我會轉左去企嶺下老圍及新圍,原本諗住條斜路都有啲蝶,結果係冇乜,就算有都好難影,因為超多車.有蝶都嚇走晒.

直到轉彎冇遠就見到十幾個人,嗰度有棵唔知乜果樹有好多蝴蝶,原來佢地目標係 穆蛺蝶,仲見到幾隻,我都未影過,好想影,但棵樹幾乎全係高位,九里遠影肚腩,只有一個位係比較理想,但等咗好耐都唔見有蝶停,啲人高位照影但我決定去旁邊暗位影吓散紋盛就算喇,真係超暗,仲要影完先知係斷咗鬚,虛耗光陰.

想走之際,欄杆有隻來自非洲既黑媽媽蝶,未開齋都照殺.影光小小都OK啦.

一路去到一片好似紅樹林咁既地方先再有啲蝶,更加暗,影咗都唔要得,幸好外圍有隻青班幾定.咁普通既蝶原來我係未影過成隻的,之前都係掛住爆大頭,咁今次就影全身囉.

經過咗紅樹林暗位,出面又見到隻咁既蝶,都唔記得有冇影過,唔理咁多照影,呢個時候一公升水亦都飲得八八九九,係時候收工.原來我已經行到去企嶺下新圍既巴士站.

河背水塘

大雨除咗屋企樓下Pan吓車之外,仲可以去水塘影排洪.大潭篤係最好,壩頂有燈光啱夜晚影,不過己經去過,除非影得好差,我係好小去同一個地方影翻差唔多既相的,所以今次去新地方河背水塘.

雖然唔係好長途,但都唔小斜路,大熱天時都幾係,冇燈光相對簡單,朝早來就得喇,雖然有樓梯可以去下面,但都係要斜影,冇乜特別,可能係咁既關係,條樓梯旁邊啲草已經生到遮咗條樓梯咁滯.搞咗一陣去翻上面影,普普通通咁啦.

其實冇乜好影,走到正上方影個流水向下奔騰既畫面就完工.

咁快收工?梗係唔會啦,其實我主要目標係影港鐡八鄉車廠,行翻轉頭冇幾遠就係.睇地圖比例應該135mm就啱,但係又驚會太爆所以帶埋85mm同1.4X.勁重但安心啲.最後都係用135mm.

痛苦既事情翻到屋企先開始,嗰四堆電纜真係搞餐矒.

航拍鯉魚門

有小小時間又唔想行餐死,近近地去鯉魚門航拍一下.

之前經常來鯉魚門體育館影劍道,已經對旁邊一堆船仔有啲興趣,但冇乜高位影落去只會影到一堆好亂既物體.咁既情況航拍就啱晒.今次仲有一個目的就係練習掌中起飛同降落.雖然係平地,我都用掌中起飛,跟翻上次位師兄做法,好順利就成功咗.一堆船始終係幾靚.

轉個角度見到啲大厦冇乜特別.

至於船仔既側面係一座山,都係冇乜特別.

好啦,飛去另一面睇吓燈塔既地形.原來係有好多矮屋仔.再飛遠啲好似都係差唔多,日落對住個海太多空位又冇乜好影,早啲回航.最後就係掌中降落,上次受傷並沒有太大陰影,冷靜啲捉住架機就搞掂,成功降落.

黃雨的活動

其實我有呢個想法好耐,就係落雨Pan車,仲實行過一次,我平時已經搵定地方,打算一落雨就出去,最後鎖定咗太和消防局對出馬路,因為有個小頂可以遮雨,但有兩個問題,首先行出去都要一段時間,可能雨勢有變,另外個嗰度係半透明窗,裏面既人會好奇做乜有個人長時間停喺度,試過一次影咗一陣就走咗.

前排一起床就聽到叮叮噹噹雨點聲,原來係正在黃雨,即刻早餐都唔食就去我發掘既第二個地點………我樓下,露天,要單手擔遮.但呢度有啲距離,可以用135mm影,而且最緊要係近,就算落到去即停雨都損失有限.相信我,最好既裝配就係拖鞋,短褲,整定塊布喺門口,翻屋企抺乾腳先入屋,呢啲雨勢甚麼Gore-tex都冇用,連相機袋都唔好帶,就算落晒雨檔都一定裝滿水翻來.最多帶條毛巾放相機面擋一擋水花,左手面來既車比較易影,因遠遠就睇到佢.

右面來既就難得多,有嘢擋住條路,一出現就要即影,冇時間準備,雨天車速比較慢,要1/50秒先開始有效果.下次影一定要先設定做嘥電模式,即係長著個EVF,依家見到車舉機要先等畫面由黑變有嘢,再拉一拉風箱對焦,右面來既車搞得來都走咗.

的士係最多,新界既路去水實在太好,落到咁大先影到小小水花,如果住土瓜灣應該影得好開心,不過又可能好危險,有機會俾水沖走.

由於我住既地方比較山旮旯,冇乜車,真係嘥晒,嘩,有大貨車,雖然佢唔係好快,但佢既體型好震撼,淨係啲雨打落佢身上彈起既水霧都已經好正,可惜定焦既關係,爆晒框,而且佢又係右手面出來,手忙腳亂,有小小失手,但係張相又好鐘意唔捨得唔要.呢個時候我同時擔遮同扶住鏡頭既左手指已經接近抽筋狀態,再唔走可能會出事.

對抗白色

有時見到啲婚宴相新娘婚紗白晒,酒樓枱布白晒,以現今科技來講其實好易搞掂.

數碼界一路都有派理論係寧under,莫over.因為數碼一爆咗光就冇得救.理論正確但就忽略咗推光會增加雜訊既問題.就好似呢張相咁,跟理論影要避免白色位冇晒細節就係咁,不過model就會黑媽媽,後期推翻光其實光位一樣爆,只推陰影係可以,但會增加雜訊之餘膚色仲會好淤.

俾我影就會影到咁.光位看似爆晒,不過就保證皮膚夠光,膚色不會變淤.

其實光位只係看似爆咗,影raw的話再推暗高光位就出得翻晒啲細節.我相信出面真係幫人影婚宴都最多係咁搞.效果都算正正常常.

不過我覺得齋搞高光位都會令膚色有啲淤,相唔多既話我會搵翻原相疊上去再擦翻皮膚嗰部份出來,理論上擦過界應該都冇影響,實際上係有,但都唔駛好準,覺得唔自然可減低一點透明度就冇咁容易起邊.最後就可以既有白色細節,又有亮麗膚色.商業攝影應該唔會咁搞喇,太嘥時間.上次幫朋友影擺大壽我就係咁樣搞啲枱布.當然唔會咁仔細,但二百幾張相都搞到想死.

手持景深堆疊再練習

要搵一個唔多郁既目標做練習,最好就係夜攝,主體多數瞓咗覺,全閃燈操作亦沒有手震問題,鳳園最多就係蜘蛛,蜻蜓同菜粉蝶.蜘蛛唔係好啱用,因為蜘蛛太細隻,而且小小風都好易令蜘蛛移位.菜粉本身好平,除非影大頭,否則都冇乜需要,影大頭難度又太高.最好就係影蜻蜓.

冇耐就搵到目標,蜻蜓最難搞就係非常突出既大眼睛,我今次準備影四張,一張對焦眼,要出到所有格仔,第二張係眼睛後的鼻哥,再之後係較後既第二個鼻哥,最後係身體.翻去一合成好順利,完全冇之前影珍蝶既古怪嘢.最驚喜係隻眼其實一張景深係唔夠,係兩張夾出來.而球面上竟然冇乜破綻.出奇地好運.

跟住係快啲走,出奇地多蚊,周身痕得好緊要,點知又見到好大隻竹節蟲.次次淨係影個頭,今次要試吓影成隻.影完翻到屋企身上多咗好多紅點,起碼要一個星期先好得翻.

榕樹澳生態攝影

呢個地方好小人去影蝴蝶,見旅遊書講呢度有全港最細既侏儒鍔弄蝶,而且可以影船尾海鷗食魚,路途唔算遠就扑鎚.馬料水碼頭坐半個鐘船就到,郊遊一定有既問題,唔戴口罩又大聲講嘢既飛沬人.坐正我同朋友後面,我同朋友講,陣間落船一定要搵厠所抺抺個背脊,肯定好多口水.

落船唔係即到的,仲要行半個鐘,途中發見呢隻未見過既蝶,可惜個位真係好暗,光圈,快門同ISO都用到好盡,影咗好多都唔係好得,直至...一堆人行過,冇得影,揀來揀去得呢張好小小.

話咁快就到咗,村口地上見到網絲蛺蝶,呢種蝶碰過幾次,唔係開翼就係停埋啲亂草,從來冇一張影得可以既,今次終於停定定俾我影好佢.

好彩朋友眼力好,原來細細隻既係疑波灰蝶,俾我又會睇唔到錯過咗.好細隻而且背光,到我想加支閃光燈影佢已經唔知去咗邊度.再走入村後有一大片花海,但奇怪地冇乜蝶.要趕兩點半船否則要等到六點十五分,只好回程.

原來有一間士多假日會開,好多嘢食,豆腐花豆漿,連白切雞,泥鯭粥都有,早知唔駛捱麵包.節目並未完,另一個主菜就係影船尾既海鷗,螺旋槳打起水花會令啲魚浮上水面,引來海鷗搶食,唔知搞乜鬼來來去去得一隻.大太陽又正光打飛冇難度.

終於有捕魚喇,不過太遠影得好細粒,而且好難對焦.爆水嗰啲唔中焦.得翻咁.

跟住又靜晒,無聊到影人滑水.

個個收晒機咁滯,突然間有幾隻由不同地方飛埋來,但飛得比較疏,冇乜視覺衝擊力.

影兩隻好似好啲,一上一下.最後都影唔到一個畫面好多海鷗或者捉魚添.

豐樂圍鳳眼藍

今次撞啱開花期有時間可以去影,鳳眼藍花期超短,大約只有兩三日,禮拜頭見到有人出相諗住禮拜尾去通常都謝得七七八八.其實我好怕要霸位,尤其郊外草叢,太長時間俾蚊抽乾啲血都似,所以諗住用航拍的方法........

入去池塘邊既路好窄,跟本搵唔到平地起飛,只好走翻出外面靠飛機自己飛入來,不過........搞唔掂,啲花好細粒,飛太高影出來跟本唔知道有花,只係睇到啲白點.但樹叢裏面低飛以我駕駛技術係好危險.炒埋樹度最多唔見錢,最驚炒埋啲人度都唔知點算,算啦,飛翻出來影吓個魚塘景.

例牌動作影埋另一個方向.

就咁走好似好嘥,而且我見到裏面有飛機飛,唔通有人帶埋個小型起飛台來,最多問佢地借囉.問問先知原來係掌心起飛.嘩,嗰啲螺旋槳雖然細,但斬一下都幾恐佈,得兩隻手,一隻托飛機,得翻一隻手,真係要出埋腳先有手起飛喎.終於位師兄幫埋我起飛,果然要出埋大肶托住部電話,單手撥個Mon.原來係有呢個功能,螺旋槳啓動後唔駛向上飛,放手佢就會定在空中,這就是低角度的效果,其實同池邊影差唔多高度,航拍並沒有太大優勢.

拍攝途中聽得最多就係唔該飛高啲,因為架飛機會入鏡,所以低飛嗰啲我都飛到好側先冇俾人鬧,高飛就係咁,角度係靚但已經睇唔到係花,不過個水氹倒影都幾靚.掌中起飛自然要掌中降落.因為降落架飛機係好小心的,好慢都未落到手掌,一時情急用手指捉實部機就中招,手指公腫咗,好在冇流血,睇來要多多練習.另外郊外人群中地上起發另一個問題係會揚起大量灰塵,會俾人鬧的.

飛機齊放冇薪假

疫情的關係,好多航班都取消,飛機被迫停晒喺停機坪,形成有趣的畫面.是攝影好題材.計距離最近係觀景山,但太矮,而且頗多遮擋,影唔成變咗影油庫日落,夜景.今次問清楚人,原來係360救援徑先啱.

行行吓我先知道原來我之前來過喇.仲有帶長鏡添,不過嗰次係影吊車,冇帶腳架,今次攞埋腳架,長鏡關係仲要係重嗰支,真係行到腳軟.經過一輪試影,我決定咗有四個構圖,首先影最近嗰排.真係黑仔,未入黑前明明有五架機的,竟然走咗一架.

跟住就係影一張最多飛機既,我揀咗光線最好既時刻影呢個構圖,我相信比較有代表性,可惜跑道比較闊,令飛機群睇起來比較疏.

之後係特寫其中一個機群,我揀咗個最水平嗰堆,睇來上下比較多空位,不過我係專登既,因為我預咗裁成16:9做個鎖機畫面,裁完啱啱好.

天色越來越暗,影埋最後一個比較差既位置,空位多之餘亦多數只影到機尾.只係撈埋啲餸汁.

大角咀航拍

記起以前出過一號銀海對出影日落,景係麻麻,但航拍可能好啲,同埋都想試吓影日落.

奧運站落車已經望到海邊,但香港啲路係咁,硬係擋住過唔到去的,卒之行咗好遠先搵到天橋入去,搵唔到冇人既空地,唯有在緩跑徑起飛,又有警告,私人地方禁飛,後果自負.冇咁誇張呱?我都見到頭頂有另外一架航拍機,坐監都有人陪,一於照飛.影吓啲貨船先.

原來配件之中係有一個加強訊號既鑊仔,今次加埋,但冇耐又話訊號弱,好以冇乜用,唯有續小慢慢飛.其實唔係飛好遠咋喎,可能因為週圍都係鐡絲網干擾到啲訊號.來個比較大既景.

之後就係最大挑戰影日落,呢日好好彩有火燒雲,我見人地既相好壯觀,不過唔知點解呢度就只係咁.原本諗住可唔可以影幾張夾,原來飛機在天上係郁得好緊要的,差唔多同影小花子咁上下.反正光差又唔係十分大,就決定單張拉下光暗就算數,自動對正都冇搞.