下午錦田河

睇天文台潮汐預告,竟然呢幾個月都冇朝早潮退日子,事實上係有既,不過太陽未出來,下午都一樣,好晏先退潮,難得有一日有小小時間下午退潮,唔好嘥咗佢.

上次都見到佢但係影唔切,今次終於影到,原來佢叫白頸鴉.

灰鷺四處都係,唔係捉魚真係冇乜好影,今次加埋跳起.

水鳥多數都係得黑白灰,玩吓慢快門.

鷺鷥又來喇,光線照落後尾枕真係麻麻,只好用水花做主角.

雨天冰球活動

黃金週期間幾乎日日落雨,幸好有個室內冰球活動連續好多日,日日由朝到晚,Mega Box交通也可以,最緊要有厠所,有餐廳,我都去咗幾日.

賽事多可以玩盡啲慢快門,今次全程1/40秒,成功率好低,一日先得幾張可以,先來最簡單既盤球追續,成功既佔咗好大部份都係呢類.

這一刻很奇怪,盤球的運動員好像靜止了,手腳的模糊也沒有,唔睇背景仲以為係高速快門影的.

 比賽前幾日係青少年賽,之後係成人賽,成人賽速度更快.

淨係盤球太單一,必要影到一啲爭奪畫面.

又到背景靜止,但手腳模糊的爭奪畫面,今次收獲唔錯,以前半桶水既慢快門冰球相可以剷走了.

影蝶變影蟲

去過摩星嶺一次收獲好豐富,最近冇乜聽過有人去,有啲時間就自己去一次.

死火,唔見有蝴蝶飛來飛去,睇真啲係好多灰蝶仔但唔想影,有隻蟲啲色幾靚,而且好定可以慢慢影,佢啲毛都幾靚,係細隻啲.

有甲蟲交尾,乜今日全部都係咁細粒架,朵花仔仲大過佢地,角度唔係好靚想側邊影,點知冇耐就散咗.

哎呀,終於有隻角翅弄蝶,而且小有地攤開得好平,通常都係攤開得勁彎,影唔到翼尖清,而且佢有個特性係好鐘意轉來轉去,好難用景深堆疊,今次佢都係有轉但比較慢,我極速影咗兩張合成.真係多次機會都未必有.

之後係乜蝶都冇喇,不過蜻蜓交尾又見到幾次,都停埋晒啲古古怪怪位,一走近就飛走,好不容易呢對肯停欄杆,走埋啲影幾張,又再走埋啲,如是者最後佢地被風吹散咗我先收手.

呢隻蛾咁啱又停咗個唔錯既位就影埋佢,原來諗住來影蝶,點知變咗影蟲.

為了夜光英歌舞

天后誔巡遊已影到好厭,又係舞龍舞獅,古裝行路,不過今次有全港首次夜光英歌舞所以有啲興趣.

事實上這只是開幕禮,見到有觀眾席就諗住入去坐,原來唔得架喎,要登記咗人士先入得,你地圍欄出面睇啦.好彩我有帶長鏡來,其實後排仲好,可以企高影唔阻人,可惜坐喺度既人都係咁諗,除咗冇理阻唔阻到後面之外,開場係打鼓,勉強影到有腳.

跟住都係打鼓,開始冇腳.

之後係中年好聲音,對鞋遮到應一應.

終於到萬眾期待既夜光英歌舞,觀眾席其實冇乜人,可能係咁,竟然放啲人入去,話只要坐最後面四行就得,我也乘機跟埋入去,啲人係冇坐前面啲座位,不過個個走晒去台前,企晒起身舉起部手機影啫.唔係最前排既話,腳就遮晒架喇,如果唔係夜光既話,其實英歌舞都係冇乜章法,只係係咁郁來郁去.

呢個有碌蛇既成日側埋一面,表演只有十五分鐘,都好夠因為都冇乜變化,最後大合照司儀開咪叫元朗既街坊可唔可以暫時避開等大會攝影影咗先,啲人睬你都傻,大會影唔到冇所謂,最緊要自己影到.好在大會有梯先搞得掂.之後仲有武術,光影等表演,冇興趣早啲走.

影鬥魚

未影過所以好有興趣.宣傳片是黑底,我最唔喜歡既底色.所以我準備晒背景布,支架,雙閃燈去做我既背景.原先好擔心大家會爭位,最後知道原來是一人一個魚缸影,實在太好.

可是......魚缸是黑底的!不透明甚麼背景布都是冇作用,而且驚兩支閃會妨礙到其他人,被迫換成單閃由頂部向下閃......魚本身係好靚既,可惜黑底一來唔靚,二來頂光的關係,下面不受光的位置變咗好易黐底.

大會建議用微距鏡,知道魚身大約長5cm,好尷尬的長度,微距鏡固然係冇問題,但佢自動對焦好慢,啲魚遊得咁快恐怕搞唔掂,100-400mm似乎啱啲,終於我就用咗佢影,魚其實唔係細得咁交關,1:3放大率夠晒用,好彩後面夠位畀我退.

實色背景玻璃仲有個問題係如果條魚遊近背景,閃燈係會有個影的,可能就係咁原因要做黑色,但細心睇係會睇到,只好後期搞搞佢.

魚一共有八條,梗係想影晒啦,結果係唔夠時間的,事實上啲魚好多時係瞓覺沉晒底,大會提供的假魚棒係幾近冇作用的,好難先有機會浮上水,而且唔係知係咪郁得多,魚身既污垢開始搞到啲水好多微粒.

最後玩吓慢快門加閃燈效果,大會指引係用後簾閃燈,呢招多用來影人跳舞,LED燈做殘影,最後一刻閃燈涷結動作,不過影魚係唔同,景深太淺如果條魚向前或後咗小小結果就係會矇,咁用前簾係冇死啦,但條魚係向前游喎,變咗個殘影在條魚前面,我既方法係Pan住條魚用前簾,如果控制得好係可以啲影去晒條魚後面,結果都係差小小.原本可以後期抹走魚頭嗰啲殘影,最後決定原汁原味.