順德潑水龍

端午節特別多龍舟活動.原本有人問去唔去影炮仗龍加霧荷,不過好似冇乜動態就作罷,跟住呢個潑水龍幾抵玩,二百幾蚊就搞掂,即日來回仲好,唔駛無無謂謂住一晚酒店.

一早到落馬洲等開關,旅遊車出發兩個鐘多啲就到,去到已經冇乜位,只好夾硬攝入人群,拍攝位置只可以選河兩邊,對正的橋已封,我揀咗橋底側面,希望用長鏡可以影到正面,因為常理計兩條龍舟互相潑水會變咗影背脊,去到已經有龍舟巡來巡去,佢地會搖高搖低特登制做啲波浪,正好係玩慢快門時機.

無無聊聊影吓啲矛人用水喉出術,仲戴埋頭盔唔夠你玩啦,不過點解唔潑水既,下午一點十五分就集合,即係一點就要收嘢去厠所,依家已經十一點半喎.原來又係大牌領導要食埋晏先來,哎.......成村想睇潑水既人等一個最唔想睇既人.

幸好終於開始潑水,戰場在最遠開始,正合我意,可以影到正面.最大挑戰係中間條龍竟然又跳上跳下,又唔可以高速快門因為水花唔好睇,只好瘋狂連拍希望有一張中,仲有最難搞既係身前無數既手機同雨遮,我要幾乎半個人伸咗出欄杆,幸運地最後都有一張影到.

想照辦煮碗影下一隻龍舟?係唔得既.潑完水嗰隻會繼續向前慢慢行,遮晒,最後就搞到成條河都係龍舟,呢個時候只可以影啲混戰場面喇.都唔知邊個話要帶腳架同凳仔,成個過程我都係幾乎被人貼實,想轉角度都難,仲邊有可能放咁多嘢出來?

東區龍舟競渡

由高速快門,到以龍頭清楚為目標既慢快門,再慢快門,今次我想挑戰豉手清楚既慢快門,佢應該係成隻龍舟最定既人,個頭冇咁搖來搖去.

但係......我發覺好多鼓手都係鐘意望住隔離船多過望住自己隊友.影佢地背脊好似怪怪地.

只好改變計劃,向高難度挑戰影第一個爬手,最多唔得就食白果算數,搞咗一輪都有啲收獲,原來都唔係冇可能的.

我有諗過如果離遠見到鼓手唔望隔離可以影佢,實戰起來冇時間搞咁多選擇,個鼓手到最靚位置先望隔離就玩完,三心兩意好易乜都冇.

索性個構圖連鼓手都唔要.

朗屏尋蝶

今年影親蝴蝶都冇乜收獲,又試吓去人稱合歡山既朗屏睇睇.

我就冇人地咁好彩,見到咁多交尾喇,單隻都好,仲要係細灰,記得以前第一次影佢要走到去華富村,不過之後交尾都影過喇,變得唔珍貴了.

哎呀,有蜥蝪,而且個pose好正,可以影晒成條尾但身體唔會太細.

事實上今日都幾多蝶,不過唔係爽飛就係普通蝶,呢隻唔肯定係咪普通料,照影,事後睇翻果然係.

慢快門影曲棍球

冇錯用300mm F2.8影有大入光量同背景虛化的優點,可惜舊鏡對焦鎖實並不出色,一下的涷結還可以,要一直追焦做慢快門係唔多掂,而且佢係定焦,太近會爆框,一場比賽又啱距離又動作好的時間其實不多.

於是我轉用了100-400mm去影,新鏡唔駛加轉接環焦點咬得實,而且變焦也可以多啲機會影,曲棍球唔小得帶波畫面啦.

我發覺大部份成功的相焦距都在200mm內,用300mm應該冇乜幾多張收獲,人多啲氣氛好啲.

為咗要有一定效果,我將快門設定做1/60秒,偶爾玩一張1/50秒.

全部都係盤球唔多掂,也要有交戰畫面,咪以為包頭佬白晒頭髮好論盡,曲棍球差唔多係佢地國技,球員配合得非常好.

呢張有啲失手,唔見咗半個波.

影幼鳥

呢排好多燕子築巢傳宗接代,沙田嗰個人做鳥巢出晒名,HK01都有報導,就連我屋企附近商場屋簷底都有,雖然想去影,但鬧市人來人往會好阻人.見朋友去粉嶺圍影燕子爆水我又去八卦吓,燕子太快我就影唔掂喇,不過無意中發現有燕子築巢,啱晒我呢啲手腳慢既人.

地方空曠而且冇乜人出入,攞大炮去影都唔會太阻人,燕子餵食非常快,一不留神就已經餵完咗,能影到咁大隻草蜢有點幸運.

之後影到燕子媽媽張翼,我都想影到燕子媽媽在空中,一來好難對焦,二來屋簷底唔係好夠光.

最後來個BB大合照.

仲有下集,朋友話帶我去個秘密地方影白鷺BB,其實大埔廣福道都有,不過呢度角度靚啲.