新山頂纜車

剛剛冇耐前新山頂纜車終於重開,又係時候去紀念吓.網上攻略話紅棉道天橋可以影到橫向既纜車,有耐性的話甚至可以挑戰搖鏡,紅棉道係搵到喇,亦都上了天橋,可惜連纜車毛都見唔到.

罷了,只好就咁行纜車徑吧.之前傳聞會有幕門設計,變咗睇唔到架纜車,好在係流既,依然可以在路軌旁邊見到成架車,第一站就去到起點附近,啱啱有車駛入站,可以用新買既Minolta 200mm去影,唔駛用135mm裁,天陰陰,真係要全開光圈先掂.

轉個方向影埋啲人上車.

一路行上山頂既位置舊車時都影過,所以直奔白加道車站影今日主菜.參考上次經驗,今次要用更高ISO同更慢快門去等車廂裏面唔好咁黑.我仲準備多一支閃燈打算離機照亮車箱側面.咁黑自動對焦好易拉風箱,所以係手動對準個滑輪,見車幾乎到就狂影,但閃燈電力有限,加上要加顏色瀘紙,最多閃三次,事實上一張就夠,不過失手要等好耐先有第二班車.事後發覺側面嗰支燈幾乎冇用,反而增加咗欄杆既陰影.變咗阿茂整餅.影完原本可以等纜車落山,不過梗係經濟啲上山頂搭小巴啦.又係搞搞震冇幫襯.