下花山影荃灣

白茫茫的天氣就像魔咒一樣揮之不去,都唔理得咁多喇,順便當行吓山啦.

登山入口在港安醫院對面,行到咁上下見到元荃古道指示照行就係,一路都係梯級或者水泥路,實在係非常實在.依家有點怕大難行危險既山路.可是,去到怕攝點原來到最高位既石群係要行一段唔太長,但好多沙既斜路,有啲唔係好想上去,見有個低啲既位其實都唔錯,就喺度試影吓.似乎影wide啲多啲景觀感好啲,但又會有好多雜草入鏡……….

終於決定爬高啲,高咗自然就可以將個景拉高啲,唔駛咁扁長,段路真係頗險要,而事實上高度唔係差太多.依家仲有光上上落落都冇問題,陣間天黑要靠電筒落來有啲膽怯.都係算喇.去翻頭先個位安全啲,為咗唔要啲草只好zoom出啲,構圖有啲迫都冇計喇,反正咁大煙霞遠景都係矇查查.之後再用軟件拉翻直啲大厦又再迫啲 @@

影舉重

舉重好難影到有乜動感.但係我鐘意影未影過既項目.雖然係我唔太喜歡既伊館.

觀眾席都離選手頗遠,坐到第二行用135mm先啱啱夠長.其實影橫度選手又企真晒既話係會出界,不過我唔影企直晒的,因為企直一係未開始,一係舉完,表情經放鬆晒.呀…唔記得講,呢個項目係由企直,蹲下,再企直為之完成.有樣好弊係個評判坐到鬼咁正中,成日入鏡.

影咗一陣就轉項目,叫臥推舉,顧名思義係瞓喺度舉,問題喇,就算舉起相機都唔係好影到塊面.影影下我見有人走咗去後面擔凳在隔板頂伸出來影,我又走去影埋一份,係好啲,但其實都唔多夠高,搞到唔知點算好.

見到有人越走越埋,差唔到在工作人員旁邊用wide鏡影,梗係唔係執輸啦,我都有咁埋走咁埋,用50mm影下睇到側面的畫面.

又有新項目出場,舊鐡是放在地面的,睇怕都有挺舉或者抓舉睇喇呱?咦,原來企直就算架喇,唔緊要,影吓啲人既古怪表情,哈哈,鍚啖先.嗰舊鐡應該都幾重,運動員放低時地下會震一震的.

哈哈,我最鐘意睇到人辛苦,眼都變成一條線,靚女都變咗唔靚添 :P

終於都到男子組出場喇,我要睇挺舉,我要睇抓舉.不過………係冇架.整個比賽就係得呢三種,呢種叫做蹲舉,好啦,唯有集中影表情.Hi, super Mario.陳間唔知有冇草菇呢 :P

啲膚色好似偏紅咗喎,其實白平衡係冇改過架,我睇住運動員塊面由白瞬間即變紅,谷到成隻田雞咁 :P

哎呀,你做乜咁傷心呀?哈哈,架甩底多咗兩隻手成個千手觀音咁 :P

香港大狹谷

之前已去搵過一次,可惜趕唔到日落,差唔多到達之前又有點迷路,最終放棄咗.

今次有人帶路,雖然天氣灰白白,都想去睇吓.終於到達影日落既例位,之前見其他人既相係估唔到個狹谷係咁大的,因為冇人物做比例既關係,我以為只係一個小泥坑扮大景.所以我今次特登影到有個人來做個對比.

 

呢度地形咁特別冇理由影一張相就走,我試咗幾個角度但點都唔夠對正兩個山谷之間靚,除咗例位,應該仲有一個位可以影到接近中間位,就係……….例位既對面喇.唔易去架,就算出動絶招勞工手套,都要好小心翼翼,因為失足真係會粉身碎骨,所以都唔敢去到咁盡,最後只可以側側地影.

 

 

有啲人都好搏架,走到好出影到此一遊,睇見都牙煙,不過呢處冇咁高,跌到都應該唔會渣都冇既 :P

 

 

再影其實都係差唔多.橫掂有腳架,影一張蛇口既夾相,當日好白茫茫架,如果一張過,個海絶對會白晒先見得陸地.

 

 

 

 

 

  

晚上的色溫

一連幾個星期唔係落雨就霧霾,室內又冇咁多嘢影,只好俾錢啦,俾錢就實有.

之前已經來過中環影夜景人像,用過黃色閃燈filter,本來黃街燈配黃filter應該最適合,只驚唔夠街燈黃,不過中環頭呢排排骨光源似係光管多啲,影出來背景好藍,藍都有藍既味道既,不過我想試吓可唔可以準色啲,就用咗錄色filter,我次次用啲人都會好好奇,走來問我想玩乜特別效果,吓……..其實我想最冇效果至真 :P

咁啱又係白光,順理成章又係用錄色filter,唔知點解硬鐘意搵埋啲柱呀,牆呀咁做背景,我覺得好唔夜景.

 

來到用翻最普通既大厦背景,諗住用翻黃燈啦,點知同肉眼比都係偏藍,用錄燈反而近似現場顏色.

呢個位就冇法喇,因為黃燈直照,唔知係咪背景大厦太五顏六色呢?又唔係好覺明顯偏藍喎.今次帶咗兩支燈來,諗住一支主體,一支背景,但我得一個綠色filter……@@
 

再探測量站

大埔滘測量站我只在很多年前去過一次,幾乎點去都唔記得咗,我記得嗰度有隻好合作又大隻既蝶,只要見到佢出現就會有收獲.再睇翻以前影佢既相,真係唔多掂,最近又見到有人出相,於是又燃起要再去既念頭.

路線我已經唔記得咗,幸好記得係要搭的士去龍成堡,行到咁上下轉去上樓梯,之後見到路牌照行就得.呀…呀…原來好遠的,尤其最後一段長命樓梯,行到腳仔軟.上面地方一眼見晒,而且唔會搵錯,因為除咗得一條路之外,仲見到有十幾個攞住相機連長炮既人.佢地話下午小咗人喇,早上有四十幾人圍住一隻蝶影,後排攻擊都要排隊@@.隻蝶真係好合作,就算飛走陣間又翻轉頭,啲人仲郁手將佢搬來搬去,我其實唔讚成不過又唔係好夠薑出聲,唯有只參與影.蝴蝶上芒草邊有咁啱吖.

影咗一輪睇吓有冇其他蝶,呢隻灰蝶都唔多郁,但由上往下影佢係正光,佢又淺色,結果係背景全黑好唔掂.於是我改為由下往上影.立即變咗超級大背光,太陽曬到開唔到眼咁滯之餘,閃光燈要全出先夠力,諗住只有一成機會影到,又真係俾我撞到喎.不過後面嗰片草係避唔到.

仲有好多其他蝶,連綠弄都有,但唔係飛來飛去就係個位唔得,又走翻去影隻乖乖蝶,佢雖然乖但冇乜合翼,偶有一次就變咗十幾人一齊影,我不太善於攝位所以冇收獲.咁影吓正面囉.雖然係背光,但用閃燈真係唔掂,見到眼上的六角形反光就知道唔要得.寧願事後用軟件局部加光個身仲自然.

啲人搬完隻蝶去芒草,今次又搬去嶡度,呢啲構圖唔係擺拍都幾難遇得到 @@

霧鎖濠江

去澳門……呀,我唔鐘意賭錢的,景點我都去得七七八八,冇乜興趣喎.但係老婆叫到,當去食吓嘢囉.臨去前上網搵吓有乜好玩,原來去主教山可以影到旅遊塔加澳氹橋既大景,如果係夜景應該唔錯,可惜………去嗰日能見度幾乎係零,碼頭一味話船有機會延誤,好慘呀,最終腳架都唔帶喇.

 

 

坐老婆最推薦既松山欖車上觀景台影出去,白茫茫一片,都係算把啦.

 

 

相信大家去澳門都去慣去熟,尤其我地行程冇乜特別,冇乜好講,想講吓住既酒店,原本冇乜期望,估唔到個view都唔錯喎.這興起了我想影夜景的念頭,但係........冇腳架 @@

 

 

再過去朋友間房睇睇,望到泳池,老婆知我要影相,佢覺得呢邊靚啲,就叫朋友換俾我地,真係唔好意思.問題喇,冇腳架點影夜景?冇錯係可以開大光圈,高iso手持影,不過一場來到我想影靚啲.其實搵啲枱枱凳凳砌個平台放相機唔難,但變咗只可以水平取景,想相機向下就..........終於我出動我既銀包......咪誤會,唔係去買腳架咁敗家,只係用佢攝斜部相機,加其他雜物調埋個水平,都花頗多氣力.唔敢用到二,三十秒快門,Magic hour得一陣,搞彎咗就弊,最後係用六秒搞掂.

 

 

再影wide小小,其實歪歪斜斜唔係咁好睇,一場來到都照影啦 :P

民族舞攝影

這個表演在文化中心露天廣場,是我覺得最理想的拍攝場地,通常影這類有個舞台既表演都有一個大問題,唔企第一排俾人遮住,但企第一排就變咗低抄影鼻歌窿.就算你唔怕重帶張成個舞台咁高既梯,大會都一定唔俾你擺.呢度最好係有樓梯級,成為天然既高台.

好不幸,大會今日安排咗VIP坐在最前排,本來就冇問題既.不過佢地唔係坐樓梯級,係另外有高椅坐,咁就慘喇,差唔多影親全身都會影埋佢地個頭.已經裁到有啲腳冇咗但係仲見到小小人頭.

影咗一輪,唔係好掂,睇翻相真係唔多想要,侷住影半身.

原本幾壯觀係人陣冇咗前面啲腳硬係有啲唔係好完整.

雖然地方算係幾好(除咗啲人頭),天氣就真係麻麻,天陰之餘,仲耐唔耐整啲毛毛雨你嘆.所以有啲人睇咗一陣就走,我亦都有啲後悔冇帶定焦.初初諗住人貼人用兩部機換來換去撞到人唔方便,依家咁鬆動真有啲意外,再來半身.

呢隊我真係唔想影半身,絲帶咁多變化淨係影半身好嘥.平時見絲帶要手部好大動作先揚起的,但佢地可以淨係郁吓手碗就可以保持絲帶在半空飄揚,很特別.最衰又有啲人頭.　

唔知係咪天神聽到我既禱告,竟然有幾個VIP睇睇吓走咗.中間露出一線空間可以影全身,隊形完整加上美少女,賞心悅目呱?我發覺我其實好多相都係影最尾大合照嗰張最鐘意,中間跳到散晒嗰啲始終冇大堆頭咁靚 :P

呢個唔知係乜民族呢?用頭髮來跳舞的.仲有銀色靴,我估係未來既民族呱 :P

比較娘的扇舞,不過我又覺得幾好睇喎,係我影得最多相既一隊.

呢個服飾真係唔掂,天陰陰搞埋晒啲黑色衫.見彎腰幾特別咋,有啲德古拉feel :P

花展夜攝

花展真係年年一樣,差唔多既花,差唔多節目,幾乎一模一樣既佈置,真係花草樹木都俾佢悶死.但係又超多人喎.基本上係冇可能影到一個乾淨既背景的.聽人講夜晚會小人啲.我未試過而且光線應該幾特別.一於去試試.

 

今次帶咗兩支閃來,其中一個用法係用閃光壓過現場光,影出不失白花紋埋而背景又不會黑媽媽既相.呢招我平時都用開.難度不太大,但最難係花展啲花都擺到密質質,好難搵到個夠遠既背景.開大光圈又到花既景深唔夠.加增距一樣唔掂,話就話夜晚人小,但未至於小到可以用超長焦距遠抄,一來拍攝期間可能有人經過,二來太多人用手機哄到埋一埋影.最後硬係麻麻地 :(

 

 

咁都有辦法既,就係搵啲細朵啲既花影囉.一近背景自然化晒,不過咁又好似冇乜得著,冇乜創意喎.

 

OK,試第二種諗法,就係一支燈打背景,另一枝燈就打個背光,睇吓出唔出到半透明效果.問題係………我得一個引閃,只可以控制一支離機閃燈,要控制兩支的話,只可以用機身內置既無線光引閃功能.夜晚又近距離我試過係可以觸發到的.用於均勻打光亦算可以控制得到.可惜由於只有TTL(過程中只可用曝光補償或閃燈互相輸出比例控制).又背光又閃背景問題就來喇.較極都唔準,只可以一個總閃光補償同移動距離去就,一係背景唔夠光,一係朵花爆晒.最後都係失敗.用翻舊方法影 @@

心有不甘,試吓用現場光搞背光,好似有啲效果,遠背景係欄桿,冇計,搵綠色地下代替.試得兩試又成班手機人埋來,睇來都係搵唔到食.

鬱金香田唔算太多人,但有光既只有一忽,俾人霸咗,月埋全部都未開,好彩其他地方都有 :P

 

 

原本帶咗wide鏡來影景,不過睇吓錶原來已經8點,景都係同往年一樣,夜晚都唔會差太遠,影咗都係delete多,一於影埋盆裝蘭花就收工.睇來花展都唔係影花好地方,要搵吓其他地方先得.

手球攝影

Samsung體育節又開鑼,可以攞正牌去影運動但又唔駛交相,可以遲到早退,實在係好節目.同日有兩個選擇,一係棍網球,室外易影,但只去到兩點,室內手球就去到六點,爛玩的我就揀咗手球.

 

同其他球賽一樣,除非諗住影龍門接波,否則在底線會比較多機會影到正面進攻既畫面.觀眾席對面no good,因為觀眾做背景太花,得翻兩個位,基於大多數人用右手進攻.所以企進攻方向既左手面係冇咁易俾手遮到面.不過超多人喺嗰度練波,球來球往太阻,跟本影唔到相,侷住去次選.撞吓彩都未必遮到面既.我最鐘意表情夠兇悍既運動員 :P

 

 

跳起進攻的畫面其實幾難影,唔夠光對焦慢,快門慢,加上又好易被防守球員阻住,被球證阻住,仲有啲球員係唔跳既……..所以我會影吓容易啲既中場爭奪畫面.不過………今日既隊伍似乎鐘意十零零多啲,一攞失波就全軍退守,由得你射.搞到冇乜得影添.

 

 

影多張跑緊既先.

 

 

等咗一輪,終於等到靚位冇人練波,可以冇咁易被右手遮到面.

除咗遮面既問題,我仲發覺我唔係好影到離地嗰吓,用135mm又爆框,到我換85mm又成日細粒得滯.慢慢我發覺弱隊比較like遠射,較適合用135mm,強隊就鐘意近距離飛身,85mm啱啲.

仲有我成日影到冇咗隻手同個波, 因為扣球需要伸高手,再加埋跳起……搞到成日出晒界,唔知係咪冇影一排退化咗?經過慢慢更正後,終於影到跳起既畫面喇 :P

龍脊攝影

近排唔知點解成日形住會有意外,搞到路徑稍為隠蔽,畸嶇既地方都唔係好敢去,上次行到一半都翻轉頭放棄,決定暫時要行吓啲家樂徑先 :P

龍脊曾經被選為亞洲區最佳市區遠足徑,但係我睇人地影既相我又覺得唔係咁靚咋播,可能最主要係易行呱?大部份路都有梯級,而最重要的是路很闊,又有路牌指示.天黑都唔會迷路.對於成日要靠絲帶既山路來講實在令人放心得多.行咗一個鐘唔夠就到咗呢個影相位,都係白茫茫架喇,好在景都唔太遠,執執都唔太差既,我想盡辦法想兩影埋兩個島,不過硬係好似好多無謂嘢都入咗鏡.

再向左手面行就會到觀景台,啲路變得畸嶇,幸好路依然很闊而且路程不長.如果影翻頭先個景呢度反而有遮擋,另一邊又唔靚.不過就有人玩滑翔傘,今日天陰陰得一個人玩,場面冷清咗啲,如果影到成堆應該幾壯觀.

一路去觀景台既路好多位都見到先前個景,可以搵一個自己認為最好既角度先影,但係我搵來搵去都啱,最後決定放棄一個島,用長鏡拍特寫,隔走啲無謂景物.不過……….原來真係有啲景係要用50-70mm呢段影架.70mm點影都爆框,又唔想用50mm影完crop.算數,再行翻轉頭多啲先影,陣間走仲可以近啲.

終於搵到個位可以用70mm影都唔爆框.過咗冬天越來越晏天黑添,最後搞到6點45分先走得.