影跳繩

之前只影過一次.穏陣起見我有好多都係sharp咗搖繩嗰個人,亦太多單人跳起,比較沉悶的畫面,今次希望盡量影跳起既人,增加一點難度希望有較好既作品.

 

今次好好運,冇單人項目,只有三個團隊,全部都係群揪,啱晒我.簡簡單單先來個多人就咁跳,對到面反而冇咁好,影得多人會好疏落,側側地用長小小焦距反而影到密的感覺.難度也不高,由於係原地跳,其實可以對咗焦先,一心撞跳到最高嗰吓就得,出奇地容易.

 

 

自己單獨跳太容易喇,兩個人Fing,一個人跳一樣冇問題.

 

 

用坐姿又跳吓,但求增加新鮮感.

 

 

手都用埋,實際上之後係仲有個人跳上佢地上面一齊跳的,可惜我影矇咗.

 

 

可能大家都意識到齋離地跳已經太悶,所以開始搞吓新花臣.呢招除咗兩個人同時跳之外,仲要玩埋繩中繩.對我來講簡直係冇可能做到.

 

 

繩中繩都玩埋仲可以點呢?就係一個人Fing,兩個人跳喇.我覺得真係好迫呀,肥小小都唔掂.

 

 

仲有一招就係同時係Fing,又同時係跳,簡直亂晒大籠,好混亂呀  @@

轉會

對影相人來講,這是個蝕大本的決定,不過今次只係手機 :P

一路用開既Note 2終於出事,無端端成日自己reboot.尤其係入Facebook,極不便.本來用開Samsung都想用翻佢,但就算唔驚爆炸,新機已經再冇得換電,我呢啲古老人唔係咁like.今時今日仲有得換電既得翻LG.V20好正,上網睇睇,原來仲有部Stylus 2竟然有我以為要放棄既觸控筆.(可以玩翻烹飪發燒友).最緊要唔係好貴.4K mon,影相影片等對我來講都係可有可無,可以慳翻啲錢.
同佢影翻張相,明明抺乾淨喎,乜影出來咁多塵,新機乜都快,但玩Game竟然有時會lag.算啦,只係偶爾,同埋影相真係.....只有全自動,除咗冇手動對焦外,仲係光暗,白平衡,甚至連解像度都冇得較既 @@

充電方面有驚喜,竟然有好耐冇見過既义電座,以前換咗電為咗要保證士啤電係100%滿電,义完又要換翻舊用過既入機,依家义完就可以放埋一便,人性化得多喇.為咗跑數,啲大廠越做越賤,冇得換電,冇得插咭,冇聽筒插,自家插頭.務求吸盡你既血,實在係.......

大欖角機場多普勒天氣雷達站

個名真係夠晒長氣,做乜要改個咁難讀既名,不去研究,由於佢外形係一個波,幾特別,而且聽講全水泥路,易行,下定決心去一轉.

確實真係全車路,好耐未試過咁輕鬆,去到上埋護土牆,有啲唔對路…….點解好似都係要低抄咁既.好彩細心搵吓原來有泥路可以再上高啲,不過就有啲後悔冇帶勞工手套.幸好唔駛行好耐.個位原來仲係日落方向,但今日啲雲…….終於又變咗等夜景.後面其實仲有好多景,但為咗避開長條形既構圖,搞到太多無無謂既天同地,我只揀咗一忽來影.雷達站光管同後方街燈形成雙色溫,就到街景雷達站變到好藍,不過都幾好睇,就由得佢.前方土地再加shadow就完成.

金色波浪

一直都打算去谷埔影蘆葦草海,但……打波先來落雨,影相先來扭親腳,拗柴搞到我唔係好行得路.幾個星期過去熱情都冷卻了,亦擔心蘆葦草已枯死,結果不了了之.早前同朋友駕車咁啱經過鹿頸,隨便走走,竟然發現有個位唔駛點行,不過當時天陰陰又冇帶偏光鏡,顏色唔係好出,有水面既畫面都死白,就決定好天再去多次.

有陽光果然唔同,蘆葦由一片死白變得金黃色.水亦由死白反光變得碧綠,就算唔用偏光鏡都綠,有就更加綠到發黑.一般諗法都係加埋藍天綠山,綠水就最豐富啦,實情係我覺得佢地既形太平版,反而好一般.

影翻tight啲,成個畫面都係草,仲唔係金色波浪.如果有啲風吹到一層層咁仲好.

行入小小有個凹位可以影到多啲水既構圖,唔駛獨孤一味蘆葦呀,蘆葦呀咁.好彩對面農場有間屋仔,否則都幾單調.所以我都唔打算大特寫,影啲淨係得蘆葦,乜都冇既畫面.

再行入啲去到農場屋仔嗰度仲可以影到背光畫面,如果唔係山比較高會遮住太陽,甚至可以影到日落.不過實際上呢度係私人地方,終於搞到有人帶住三條狗埋來.幸好佢幾有禮貌,只係話我地會阻住佢地做嘢,你地不如出翻出面影,雖然出面都係私家路,但冇咁阻佢地.咁我地都明白既,反正已經影完 :P

冷清鳳園

本來天氣咁涷我應該一早收咗爐唔影蝴蝶昆蟲.但個個都話有蚜灰出沒,橫掂又近,卒之又去一轉.

人黑冇藥醫,明明朝早都仲幾好陽光,下午竟然變咗天陰陰,一冇陽光啲蝴蝶喱埋晒,靜英英,正想走之際見到有飛鳳,呀......陰天又飛緊,好高難度喎,ISO 800,快門得1/100秒,唔理咁多,亂槍打鳥,最後都有張勉勉強強啦.實在太兵慌馬亂,影得太中間,一向唔喜歡裁相既我都要裁翻側佢.其實陰天都有陰天好,起碼影到朱古力眼,又唔駛驚光差太大影到黑媽媽.

諗住應該收爐但又有人話去,姑且再搏一次,黑開就黑,今次仲落埋雨.真係蝶毛都冇條,數數吓手指見到有蚜蟲,冇蚜灰,蚜蟲都殺啦.有腳架,又冇風諗住冇死,可以影2:1都得啦?但硬係好震,應該係支腳唔多夠力.諗住用引閃帶咗A700去,咁就出事,又唔記得帶快門繩,2秒延遲都係震,10秒仲衰,冇反光鏡預鎖.終於影咗好多先有一張勉強得.事後諗翻我做乜要擺腳架個波頭咁蠢,應該用腳架環轉角度嘛.而且我有兩支閃,點解唔好似夜攝咁影?一時腦閉塞 @@

落雨都有落雨既玩法,有人建議影水珠.我仲以為係就咁有棵花上面有啲水珠咁啦,原來係花後有花,要影到水滴裏面見到後面朵花.雖然離好近,但半圓既水珠就好似魚眼鏡咁超大視角.所以會影得晒成朵花,不過會有啲技術上既問題,就係唔夠景深.其中一個做法係特登影細啲然後裁翻大佢.我唔係幾鐘意裁相同記得雜誌講過可以影兩張夾埋,一張對焦水滴,一張對焦水滴裏面既花.Focus stacking既軟件我冇,只係用圖層方法.影既時候我已經察覺到其實改動對焦位置係會同時稍微郁咗個構圖.一扭對焦環放大率已經唔同咗,而花枝並不是在正中央,所以會移咗位.實際操作起來,成朵花見到既一定冇問題.上面嗰行黐住花枝既放大佢慢慢擦都可以.下邊又黐住花枝既係搞唔到.因為一擦得貼就會出現對焦後面既花枝,所以只可以用漸變擦小小,貼邊既地方冇得搞.不過影到咁大,嗰粒水珠都已經跌出景深,朵花清反而唔自然.就當佢本來係咁囉 :P

溜冰嘉年華

又一城一連三日舉辦聖誕溜冰嘉年華,由溜冰班學生及導師表演,又係影相好機會.

 

來過又一城影溜冰既人都會知道,呢度既燈光係超級恐佈的暗,肉眼望落去都已經係暗,基本上啲相係唔會好理想的,但聖誕節會有射燈呱?都係搏一搏,好彩搏到,射燈超光,有望影到啲快動作,小朋友動作慢自然冇問題.

原本企正面的距離比較遠,但估計溜冰班會玩多人,側面斜咗唔好睇.而且見大會攝影個位都係正面,所以都企埋一份,確實都有啲好處.三個人剛好塞滿畫面.

不過越影越唔妥當,唔知點解好多表演者都鐘意後排攻擊,變咗影得好細粒,導師的精彩表演搞到要裁相,其實有啲唔係好想要,不過動作又幾靚.

都係試吓走翻去側邊影先,寧可角度冇咁好.咁細個小朋友技術應該冇乜,唯有玩可愛,雖然係好大堆人,但一字排開要影晒都會好細粒,通常我都係影其中幾個就算.點知後尾竟然玩舞夜光龍,只係玩咗一陣,想換鏡都換唔切,爆晒框 @@

冰上芭蕾舞表演,原本應該好正,可惜好散,走到成個場都係,打燈既又打到亂晒籠,經常都係打落冇人既地方.淨係企定定既佢先搞得掂.不過呢個係好多習體班既通病,冇乜舖排,各自各學咗乜就搵個地方做咗佢.

呢隊其實都唔好得幾多,總算有啲集體花式,儘管係比較簡單的繞圈.計埋係在冰上做,對小朋友來說也是有點難度了.

夠膽單拖表演的技術都有翻咁上下,會有啲跳躍,高速轉圈等動作,坦白講,我未影過一次轉圈動作係理想的,一般室內光線根本冇足夠快門凍結動作.今次有射燈幫忙,快門達到不能相信的1/800秒 :P

歡樂既時光過得特別快,整個表演只歷時45分鐘左右,臨尾聖誕老人同聖誕小妹妹跟大家說聲聖誕快樂,新年進步,恭喜發財 :P

荃灣體育節舞蹈比賽

這種公開俾街坊參與的比賽水準肯定唔會太高,但通常對去影相既人比較冇乜所謂.朋友說想影吓其他活動,咁帶佢去應該就唔會出問題,你知啦,陣間話唔俾影會好唔好意思的.

睇賽程表已經知道上午全部係單人舞,而且仲係比較小年紀既,肯定悶到爆,決定下午先去,但依然有加插單人舞,單人舞係乜?就係一個假裝有partner,但其實同空氣跳舞,十分怪異的@@

幸好之後來了一場青年組標準舞決賽,連司儀也說是全日最精彩,但我看來也只是普普通通吧,算吧地區賽不能要求太高.原本橫邊比較近距離,但長邊對正佈景版,背景唔會全係觀眾,所以遠啲都要呢邊影.朋友去咗橫邊一陣都翻翻過來.

之後終於有雙人舞,不過.......係兩個女仔.跳舞界一向都係女仔多過男仔.這也是舞可奈何的辦法.呢個位真係唔錯,我比較小影全身相因為實在太花,這個背景實在難得,不過小朋友服裝就齋啲.

啲花式都真係冇乜變化,來來去去都係基本步.

唯有試吓影一群人增加小小變化.

影單車比賽要用慢快門係常識,不過原來都幾多人認為慢快門就係一切.咁又係既,一係唔影,一係就影到最靚.影運動就係要有動感嘛.不過….如果講完出唔到相咁都只係紙上談兵.會有咁既觀念其實多得好多攝影比賽,好多時冠軍都係慢快門,連主體都矇埋既作品.我就唔識欣賞喇.所以都冇人搵我做評判囉.

機場觀景台

其實係第二次來,上次已經係好多年前,當時係為咗近距離影升降既飛機,冇諗過影風景,連腳架都冇帶,今次反而想影吓風景,不過梗係早啲去影埋飛機啦.今次我要試吓pan飛機先得,呵呵.觀景台係要收錢的,分15蚊同40蚊兩種.40蚊係全日票,相信係可以隨意進出呱?15蚊只可進出一次,裏面係完全冇補給的,而最重要係………冇厠所.想磨爛蓆就要有大容量膀胱 :P

天氣唔錯呀,日落該有希望,不過……飛機就冇喇,全部去晒遠嗰邊起飛.大背光,又遠,又同地面冇互動.諗住專影飛機就死得.唯有等日落啦.今日啲雲彩幾靚.但最後一刻係滿天雲,好彩未落得好低之前已經影咗啲.地面光差非常大,影兩張夾埋都唔掂,終於影咗三張夾,一張最前面既機場大樓裏面同地面,一張屋頂同後面地面,一張天空先搞掂.

跟住等夜景,光差細過日落,易影好多.雖然等到個天藍晒會好啲,但屋頂會變到全黑,冇晒紋理,比較妥當都係早小小襯屋頂未黑晒影咗地景先,之後再夾個天上去.你見我呢張個天都唔係好藍,事實係衰貪心想襯個天未黑晒影多兩個景 :P

首先係呢排光管.個天已經幾勉強先谷得光.仲有光管跟四周街燈既色溫相同光差都極大,終於又影咗三張相.天空的色溫跟右邊街燈環境一樣,但就要影光啲.至於光管,影暗啲之餘仲要白平衡都唔同,否則會變晒藍色.

九秒九跑去最後一個景點,就係影車軌喇.乜都唔好理,先影咗個天先,下面慢慢搞都冇問題.應該都係最後機會喇.再遲的話個天點谷光都會係灰色,唔會係藍.車流都係好疏落,用翻上次在火車站的技倆,影咗15張相夾埋就有呢個車來車往既感覺喇.

小小小灰蝶

放假下午天陰陰又大煙霞提不起興趣影風景,之前聽人講元洲仔公園唔知有隻咩弄黃黃地色幾得意,橫掂咁近我,一於去望望.

呢個公園點睇都似係公公婆婆食完飯冇嘢做走來透涼既地方,唔似會有蝴蝶,行咗一個圈好似蝶毛都冇條,就連蟻都冇隻,正打算走嗰陣有隻豆豉咁大既灰蝶停落啲紅花度,應該係灰蝶呱?咁細隻.都好,唔駛食白果,弊,咁細隻又天陰,快門好慢,Iso又已經去到800.又唔想用淨係用閃搞到黑底.唉,上次帶腳架俾人鬧搞得耐,今次獨家又居然冇帶腳架.仲有第二招,就係搵個攝影背包借吓力.快門下降到1/40秒影咗幾張終於搞掂.再慢就真係搞唔掂,影極都係矇.

同嗰隻蝶玩咗好耐,想走之際,見到隔離盤草有啲嘢飛飛吓,原來有好多只有半粒豆豉咁大既蝶仔.呀,挑戰難度呀,差唔多影到1:1咁滯,自然光,仲要係陰天,手持自然光影1:1我都係第一次.白色蝶好處可以增加一點入光量,副作用就係黑底.麻麻地都叫做影咗.底又唔係好黑喎.諗住食白果結果有兩張收獲都算係咁囉.

又身痕

用開既Sony 50mm F1.8又平,又輕,畫質都算幾好.全開係差小小,縮到F2.8就超sharp,點都好過zoom鏡既F2.8.但人既欲望係無止境既.Sigma支50mm F1.4講到好正,F1.4就用得.想要好耐,但Sony又好似已經放棄咗A mount,仲買A mount鏡有啲掉錢落咸水海感覺.

點知突然話出A99 II,即係A mount起碼仲有幾年玩呱?又燃起咗我既擁有欲.走去問吓價啦,有冇搞錯,Sony版要貴一千蚊.間間都係咁,又猶豫咗一陣,一日見到有水貨同其他牌子同價,就立即扑鎚.老細仲問我你用Sony要加轉接環,係咪買埋,我好肯定答佢我係用A mount. Sony搞到人人都以為A mount已經摺埋咗.支鏡比想像中大支好多.E mount機真係會頭重尾輕.

來個合照比較吓,最細既肯定係Sony 50mm F1.8啦.最意外係支50mm F1.4竟然係大支過支85mm F1.4.大家一樣光圈,短焦距既竟然仲大支係第一次見.

接下來要睇睇表現,這個在酒店內的跳舞比賽,光線真係差到地獄一般,Iso 1600, F1.4既快門只有1/200秒,如果只有F1.8,就係1/125秒快門,幾乎到咗係冒險玩效果既地步.結果我全程都係全開F1.4影,Sigma黑科技真不頼,F1.4真係就用得.

夜晚影人都好正,縮到F1.6多小小景深,畫質絶對係放心.唔駛下下谷到咁高Iso.

朝早用更加冇問題啦.就算暗小小都可以用Iso 100影.咁支Sony 50mm F1.8係咪放咗佢?咁又唔係喎,因為支Sigma實在太大支,有時只係驚zoom鏡唔夠光帶個保險,未必會用,咁細支啲係好啲.