尋找匡湖居

網上見到在尖風山上可以俯瞰整個匡湖居加埋白沙灣既遊艇.真是美妙的構圖.但路線資料就好唔完整,只係知道路徑頗隠蔽難行.都行咗咁多難行既地方,唔差在又冒多次險.搵唔到前人資料唯有就咁開中原地圖睇吓有冇路,白石窩新村前小小該有個登山口,一於出發.

正,果然有樓梯上山,一路都係啲山墳,似乎啲路係方便俾人拜山.我對呢啲嘢冇乜禁忌,不過…….行行吓竟然係掘頭路.橫掂仲有時間,落翻去搵個第二個路口上先得,正想走之際,見到山墳旁邊有一絲帶,原來後面有一條頗斜既上山小徑.俾草遮晒咁滯,又到勞工手襪出動既時候.啲路都幾斜幾跣,行餐死最高處竟然只係一個電線桿,乜都睇唔到.有好多分义路,但試來試去唔係走翻轉頭就係落山既.真係失敗,行得咁辛苦都係食白果.乜都冇得睇又難行既路啲人上來做乜呢?或者係整電線桿呱?可能太着意登頂,下山時竟然發現有啲位可以見到目標,可惜太多雜草阻住,唔理咁多都影咗啲,再行低啲有個位仲好啲,雖然都係有阻,影唔晒成個匡湖居,就咁手持影幾張就走人.

死火,我發覺我行錯路,好在已經望到路邊既光線,最多爬出去,終於出到去,原來只係前咗一個路口,就在璧屋懲教署旁邊.原來咁近不如翻去影埋夜景先走啦.個位其實好窄,只容納到一個人,而且人同腳架要在非常斜的地方立足.仲有……太陽下山後森林既主人………蚊子出來搵食,唯有全身噴勻蚊拍水,嗱嗱聲影完即閃.個景算唔錯但比較遠,煙霞又大,影完白茫茫一片,執餐死 @@

水戰

今年渣打馬拉松啲天氣真係,天文台一早判咗死刑,希望有都唔好咁大啦,但天文台近年越來越準,初時雨勢頗大........

今次被安排在傳媒車拍攝,心諗冇死咯,可以周圍去,分分鐘可以係咁喺堆黑人前面狂影,哎呀…只係一個美麗既誤會.所謂傳媒車只係一架開蓬雙層巴士,而且唔會周圍去,6:50就會直去金鐘就算.唔會跟賽道走的,6:50我坐地鉄都得啦.咁佢除咗可以避雨外,都仲有一個好處既,就係可以喺車頂影吓好多人既起跑畫面.開盡光圈,用到1/80秒都仲係暗,不過真係唔可以再慢架喇.上呢度就係為咗一張相.襯雨唔算好大,用支交通燈做主體,紅,黃,綠各影一張,總共得到四張相 :P

影咗兩輪之後我決定離開把鬼傳媒車去打遊擊,唔知去邊好,就沿住賽道行,夜晚真係好難搞,乜手段都用晒之後只好靠閃光燈亂影一通.我年年啲夜晚相都幾乎炒晒的.

禍不單行,突然超大雨,怕死都咁話,喱埋有蓋巴士站避避先.可惜就咁離遠影又唔掂.冇咗高位,啲欄桿,雪糕筒入晒鏡好核突.侷住擔埋遮夾硬影,都唔知影咗乜,雨天都有個好處既,個地有反光冇咁黑.聽聞拍夜晚戲都會特登扮落雨等地下唔會一片死黑.

終於捱到天光同埋已經行到出旺角,嘩,呢位人兄支腳架,真係連航拍都慳翻.

其實得翻兩轉機會,過埋就可以收工,偏偏啲跑手來嗰陣超大雨,直情係成盆水照頭淋咁大,唔影又會走晒,侷住頂硬上,雨天除咗論盡,仲好黑,開盡光圈影既結果係原本想影埋既街景都矇晒.

死火,啲人跑得太近,爆晒框變咗淨係影人.不過……呢個係呃數量既方法之一 :P

冇計喇,要換wide鏡先影得埋個景,我都估唔到我咁夠勇氣在雨中換鏡,仲要係一隻手擔住遮.咁大雨我腳下既相機袋連雨擋都全濕,極度狼狽,點知啲跑手就好High,叫晒咁.

影後都殺啦,志在影吓景,大雨唔郁得,張張相都差唔多,旺角又未有水站,不過有可能都冇人飲水,張大個口已經搞掂 :P

影完呢浪極速走去街市附近既天橋,因為最後一輪係頭先嗰浪半個鐘後出發,應該差唔多到.好咯,終於有個地方避下雨,唔駛開住遮影,而且高位又可以影吓多人既畫面,好多人呀, 人人人,上到來雖然都係張張差唔多,一於唔同焦距影一堆充吓數.

背後都係咁影法啦,影完可以收工……其實係翻屋企開工整翻乾啲衫同架生 XD

雨天的活動

近排超多雨水,除咗影室內外.搵啲有瓦遮頭既地方都可以暫時滿足吓影相癮.哈哈,其實只係去影model. :P

 

雨落下停下,襯住冇雨,求其搵個地方,不過..........點解咁鐘意搵啲柱架,一支支咁好睇咩?冇計,希望陣間個位會靚啲.

 

 

大概係冇雨既關係,大家係咁影,真悶,天塌都有益人,幸好一陣小雨終於另大家肯轉位.其實新位亦只係一堆花草.不過呢個位可以實踐影到三層,即係前中後景既立體感相片既環境.咁啱model又有生鬼表情,真難得.

 

 

喱入花裏面都有相同效果,有幾個人用飛燈打髮光,我都有飛燈,不過就係要來打光個背景,白色花係好易變黑背景的.可能佢地覺得好怪,不過口味既嘢好個人既.

 

 

轉個個又係好人工化既梯級,其實我鐘意自然景物多啲,冇所謂又影吓.

 

 

雖然我成日影半身,但實際我都喜歡影全身的,不過我鐘意用長鏡,好多時係俾啲wide鏡欺負架喇.

 

 

又落雨,最後係決定喱埋伸手出來玩水,其實冇乜好玩,因為只係細雨,實在係好小水,慢快門直情變咗透明.仲搞到要冒雨走出去影,所以我影咗一陣就收手.

 

 

去到一個有好多四方框既景,本來要影多啲景應該用wide鏡.不過咁樣啲框會前大後細得好交關,去到第二個已經好細,第三個已經唔多覺係框,反之用長鏡遠影就可以得到好密集既框喇.

 

 

回到大自然哦,雖然就係亂啲 :P

黃金海岸攝影

要交通方便既靚景影影吓真係冇乜幾多剩.搵吓搵吓又俾我搵到黃金海岸.一落車就到,唔計車程的話真係超方便.

天陰的關係,一早已經放棄影日落,專心等夜景.之前來都冇留意原來可以上二樓影,用一個較水平角度影,比起下面低抄可以減小變形,可惜呢度係比較近間酒店,唔影到下面街既話,最多可以包到兩隻完整既大船在畫面裏面.今次啲船影到咁大隻,如果矇咗將相會扣好多分,於是又決定夾相.吸收上次的經驗,最好係先影咗長時間曝光嗰張,之後先用大光圈影第二張會好啲,黃昏既光線變化得非常快,只係幾十秒個天已經唔同咗色.兩張相完成既時間相隔越短越好.最後大船係涷結到,細船點都有啲郁,快門再快水面會開始起鄒,比較難夾得自然.

 

其實目的就只係一張相,之後只係襯個天未黑晒順便影吓其他角度.天黑得好快,冇時間再玩夾相,反正全部都係船咁滯,開大光圈F4影晒就算.唔駛擔心唔夠景深的.就算遠景真係矇咪當特登囉.收光圈好多時都係為咗啲星芒.

再影多張左面既就可以收工,坦白講唔多靚,十分亂,如果要埋遠處建築物就更亂,要影得好睇恐怕要搵個高位先得喇.

尋找康樂園

好耐前去過一次九龍坑山,上到好高但景觀其實麻麻,途中都經過康樂園,記憶中係好多樹遮住,影唔到的.但係我又見過人地係影到喎,唔肯定佢係咪用航拍,我決定再去一次搵清楚啲.

經過好多樹遮住既位,一路留心有冇分义路.哈,果然俾我搵到小路,行入去真係冇遮冇擋呀........可惜係超近,就好似上次去黃龍影水池咁.前面啲屋爆晒框,而且高度唔多夠,角度好平,唔靚,不過我都記低咗位置,陳間真係搵唔到其他位就翻來呢度.其實我當時見到後面有啲高啲既路,不過欄住同埋要爬過水管先入到去.樓梯上到既位置又關咗鉄門.

越行得高越唔對路,有樹遮之餘路線離開越來越遠,差唔多天黑都係行翻轉頭,臨去翻原位之前又有條分义路喎,頭先太大意睇唔到.行行吓竟然見到頭先度鉄門,原來鉄門旁邊就係呢條小路.唔係喇,原位影咗都唔慌靚,爬水管搏搏........終於決定冇錯,果然上到高位,景觀似樣好多.

雖然啲屋好早就開咗燈,咁點都要等個天變藍影埋先走得架.OK,差唔多,可以收工.

輕鬆影跳舞

近排頻頻上山下海,襯住天氣唔多好影吓啲室內冇咁辛苦既嘢.

跳舞其實算易影,因為幾乎任何時間都係機會,每一刻都做緊動作,但正正因為咁,好容易拍出見慣見熟既畫面,例如兩個人一人企一邊……標準舞尤其容易,影吓踢腳會冇咁例牌.

當然拍一些例牌交貨相也是必要的 :P.但最好填滿畫面,否則會比普通更普通.

今日好好彩,又影到踢腳,可惜幅度不及之前大.

拉丁舞動作比較豐富,但除非係好高水平賽事,例牌動作還是非常多的.偶爾蹲低一下都幾特別.

踢腿也不錯,今日影到三次踢腿.朋友問我點可以影到兩個人都清,這實在頗困難的事情,縮光圈並唔實際,因為已經唔多夠光.兩個人並排亦都唔係你話平就平,擺拍就可以,正面對住你都已經難求,仲要平排,動作又要靚,有冇咁理想呀?淨翻最後一招就係唔好影咁大頭.不過人太細又唔精彩,都幾蝦人影架.

雖然係森巴舞例牌動作,但都幾難影得靚,因為轉來轉去.正面又啱距離可能得一次機會.真可惜係黑背景配黑衫加埋黑頭髮 @@

大尾篤影星軌

今年年頭做咗一件好愚蠢既事就係1月1日去三門仔影日出.好似旺角咁多人,終於俾人踼到腳架.不過就影咗人生第一次星軌.星軌日日有,搵日冇雲同唔好咁滿月就得.不過原來冇雲係好難,日日陰天等咗好耐先等到.今次去遠小小既大尾篤,再遠搵車走會好麻煩.

現場一邊好黑,星好清,另一邊光害頗大,啲星好高吓.開個星夜行一照, Too bad,正北對正光害嗰邊.冇辦法都要硬幹.一來冬天冇銀河,二來我發覺我部機影一粒粒星始終noise係太大.照舊都係影咗個地景先,一來唔駛驚途中出現意外,二來可以用細小小光圈同低啲Iso影.跟住影個天,真係超勁光害,用翻上次既Iso 400, F1.8, 30秒一張爆晒.你可能會覺得咁咪好囉,可以再減Iso.事實係一減Iso啲星會暗咗.由於星係郁緊,只要曝光時間長過粒星移動一個身位,再長既曝光時間都唔會令星軌變光,而只會劃出更長既星軌.最後我係將曝光時間縮短至15秒.寧可影多一倍相翻去夾.15秒其實都好光吓,但加吓對比,拉吓curve該會差不多.
再提提先影地景既好處,就係個天狂加味精,搞到鬼五馬六都可以有個正常既地景,當時個天其實好淺色,搞到咁地面係好古怪的.人算不如天算,明明朝早一粒雲都冇,影影吓竟然成天都係雲.义滿電都係嘥心機,影咗20分鐘就被迫收工 @@

大井圍攝影

呢排有啲懶.專係想搵啲唔駛行餐死既地方.這地方只有百幾米高,又可近觀漁塘,決定落鎚 :P

上網講話在吳屋村後山,咁咪坐的士去到附近就問吓人囉.頭一個好好人.......呢度上去就係啦,啲先人葬係上面架嘛,吓,嘩,有啲驚喎.再搵多個人問吓.你地去嗰度做乜呀?可能佢以為我地諗住盜墓.不過行行吓真係唔多對路.冇乜明顯路線同要經過啲好陰暗地方.最後終於見到光,但唔多似要搵既地方,雖然啲樹好阻都叫做見到漁塘,點都好,影張到此一遊.

 

死火,搵錯地方點算好,好在朋友話我搵既地方應該係丫髻山山腳.就在冇遠,咁就行過去啦,果然係呢度先啱.可以近距離睇魚塘.可惜唔係日落方向,煙霞也大得看不到深圳對岸.

 

 

望翻頭先過來既山頭,見到好多屋既吳屋村,畫面幾有趣,陣間要影佢夜景先得.

 

再向右邊既景觀就普普通通.

終於等到夜晚來臨.啲屋咁近煙霞既影響唔係咁大.影到預期既效果.

最後就係影埋幾近全黑既魚塘.好彩有間村屋有燈光可以用來對焦.超級暗既環境下,最後曝光時間係兩分鐘.對岸既深圳已經爆晒光,好彩用慣用既技倆影多張夾埋就搞掂.自身發光既大厦穿透煙霞,能見度仲好過朝早.

對面海的啓發

天陰陰又想去影風景最好影夜景啦.只要唔係大煙霞影遠景又或者落出雨,通常好小食白果.驚落雨唔想上山咁冒險.就揀咗近住西貢碼頭既對面海.在山上的教堂可以用遊艇做前景,配襯岸上建築物應該都唔錯既.

碼頭早兩個站落車行過去係超級近.晨咁早來到係咁意影張日景,真係勁多船.可惜個天白茫茫加上天陰啲景物都係冇乜色彩...........

有排都未得天黑,行出去三星灣睇吓有冇位近攝遊艇.咁碼頭咪仲近?有啲唔同,高位影可以影到多啲遊艇,而且有啲山襯吓,碼頭係眼平角度,只會影到亂糟糟黐埋一堆,可惜沿途好多樹遮住.後尾仲遇到幾條狗攔路,被迫近返.咁去碼頭行吓囉.好多食海鮮地方,全部都係福島直送,受輻射影響引至生長至不正常巨大呎吋.真係想影吓,不過冇幫襯驚俾人打.咦,有隻貓表演跳起接食物,主人話佢叫可樂哥,仲出名過忌廉哥.可惜冇晒太陽唔夠快門影佢跳起,只可以影佢肖像.

 

好喇,差唔多天黑要上翻去,搵位試吓景先,走到最前應該冇錯啦.但係似乎後小小可以右面啲影多啲個彎又應該唔錯喎.仲可以唔駛咁wide小啲變形.

 

 

好啦,天色啱.........影.夜景都係收光圈,低iso,長快門咁影啦係咪?最後曝光時間係一分鐘.效果好似OK,景深夠之餘燈光的星茫都出晒.一般夜景成像.

 

 

不過.........唔好話我馬後炮,其實影之前我都有擔心過呢個問題.就係啲船會郁.如果船只係佔畫面一小部份.咁矇矇地都係一種藝術效果,有時仲希望佢畫啲軌跡出來添.但今次啲船都應該係主體,清楚會好啲.

 

 

我其實已經諗定辦法,就係開大光圈影一張前景再夾埋,最後係用到F4, 10秒快門.啲船清好多.不過俾我再揀我會用iso 200將快門再縮短到5秒.至於景深問題嘛,由於冇啲好近既物體,其實F4係夠的,就咁影完唔做夾相都得.但燈光就會變咗一個個波,冇星形咁靚囉.呢個時候發覺一個好大問題...........就係我覺得之前嗰個位原來靚啲,今次真係攞來賤 @@

獨木舟馬拉松

其實……唔係好想影,記得影過都係九里遠,點影都唔靚.不過拍擋話佢眼痛搵我幫手只好捱義氣.

原來今次唔係單純鬥快,仲要鬥耐力,總共要爬8000米.即四個圈,期間仲要每個圈搬艇上岸跑一圈,咁都好喎,影唔到水上嗰啲可以影吓人擔擔抬抬充吓數.襯住未比賽影吓人整艇又充吓數先 :P

 

比賽開始,就係咁要由起點自己抬架艇落水,慢慢行真係點影都得,Hea啲既話呢度都夠相有突 :P

 

 

 

跟住影吓人練習又呃啲 :P

 

 

終於開始比賽喇,呢張一定要打醒十三分精神,呢刻肯定係全日賽艇最密集,可以最近拍攝距離,最似比賽既相,之後肯定散晒,仲有冇機會見到兩隻艇一齊都成問題.

 

 

XYZ,翻來經過嗰程真係經對面岸,仲要貼實咁滯嗰隻,500mm影都好似影蚊咁,零出相可能,咁又係既,唔通原地旋轉180度咩?呢邊出發,好自然就係轉去對面啦.好彩,終點就在起點旁邊.可以影到衝線.竟然可以影到兩隻艇呀,真係要感謝上天.

 

 

搬咗出去,又要搬翻轉頭,已經攰到手震震,仲要做埋啲咁勞改既動作,簡直係收買人命.難得佢仲笑得出……可能係相機對住佢唔衰得 :P

 

 

 河邊冇乜好影,走去影吓人跑圈先.原來有水站,啱晒.不過咪駛旨意可以影到跑步嗰啲粗暴飲水行為,捱完勞改,仲抬住咁大架艇,企都未企得隠啦.呢位女士見佢真係好辛苦,扯晒蝦咁.我真係驚佢中途頂唔順要搵人救.希望佢飲完水之後會好啲.除咗水之外,仲有蕉同朱古力食,搞到我食完晏都想攞翻隻蕉添 :P

 

 

下午既賽事竟然加碼到5個圈,真係悶到嘔電.好彩去到起點原來有得上船影喎,咁又唔同,可以認真影吓比賽.船係停喺對正轉彎90度角既位置.雖則有船,但係要留翻咁上下遠俾比賽既船過,唔可以太近,其實都要用到接近400mm焦距,頭嗰幾位實力接近到無法相信,第一個圈一齊過,到第四個圈都仲係一齊過.灟咗講天氣,係勁陰天,為咗唔想啲水變成全白冇晒紋,個個運動員都變晒非洲人 @@

 

 

今次啲獨木舟冇乜規範,單人又得,雙人又得,仲有呢種叫做C艇,只用一隻槳既都得.可惜睇來係搵自己笨,我見佢已經落後咗一個圈.船夫好識做叫我唔我等,早啲送我上岸走,真係要俾個Like佢.