影模自由行

參加影會活動係方便.人地搞好晒自己按個Join到時到候出現就搞掂,夠晒即食,可是…..一來會比較多人,多數係8個,有時無端端可能多咗一個.遇着當中有啲冇乜公德心既wide鏡人仲會頗激氣,而且原來一啲都唔平.於是試吓幾個同事自己約model.錢都係俾咁多,不過就係4個人影.

近排天氣熱到溶.幸好同事有車影一陣頂唔順可以上翻車涼冷氣.好多人以為出猛太陽光線充足影相就靚,實則係熱之餘反差又大,model又曬到眯晒眼,所以幾曬都好,始終都要去翻樹陰影.我特登搵咗堆植物做前景.後面有太陽既背景已經白晒.

有時有陽光透過的場面也頗得意的.通常影人加景用wide鏡會比較合理.但我反而喜歡用長小小.景物會合翻原本比例,而且畫面比較夢幻,冇咁機仔feel.當然缺點就係要退好遠,同埋會俾wide鏡蝦死啦,所以人小小係好啲.

如果呢張用wide鏡影,後面既樹會變晒樹BB,用長鏡啲樹感覺好濃密.

有車既另一好處係轉景點唔駛靠行路,咁熱行得遠小小真係會虛脫,再講翻用長鏡,因為距離遠,會開始冇辦法同model溝通,如果唔夠堅持,好多時就會變晒半身,大頭照,效果似將人貼在佈景板上,一兩張會好搶眼,太多就會悶喇.

我其實幾喜歡拍坐的pose,同橫度比較配合.即使用長鏡都可以唔駛走太遠.

唔知點解次次都總係避免唔到要大背光,同事有帶反光板,我唔明個個都話反光板好,講真我覺得白色嗰邊唔夠光,銀色又會光到model睜唔開眼,所以我都唔敢旨意佢,一於閃光燈全出算數.我估反光板應該唔係咁猛太陽用呱?

換翻支短鏡,其實只係50mm影吓景,呢個位85mm太長喇,否則我都會用85mm影,效果夢幻得多.

血拚關西

又冇櫻花,又冇紅葉,又冇落雪,其實有乜好去?咁可能係機票酒店平啲啲拉.我唔知係唔係,不過有一樣旅遊節目係幾乎唔駛理日子既,就係Shopping.今次係陪老婆同佢三個朋友去……想起都驚嚇 @@

可能5日全Shopping真係驚我會發癲,就安排咗去一轉和歌山,首先趕時髦去貴志駅睇貓.只係…但係,佢真係一隻好普通既貓來咋播.有啲搵笨….

除咗貓之外,呢度仲有四架特別列車,貓列車,草莓列車,玩具列車同埋梅列車,內裏有唔同佈置,遊人都爭相同佢地拍照,一場來到梗係諗住坐晒四架車啦,點知…….貓列車同玩具列車係休息架,離遠望吓算啦 :(

時間尚早(我地搭半夜機),趕得切去黑潮市場睇劏魚,早15分鐘到仲霸到頭位影相,我老婆聽到要等咁耐(只係15分鐘)真係啋我都傻,自己去咗Shopping,師傅一路劏魚一路嘰嘢咕嚕唔知講乜,我估係推銷呱?因為佢有間舖喺度的.

黑潮市場另一賣點係有自助燒烤區,不另收費,有人開埋爐,幫襯市場買嘢就可以享用,諗住好似黑門市場咁既規模就會幾失望,實際上得幾間有鮮活食材,飲品更加係得一間,燒烤區望海係有風味,不過咁熱…..旁邊的遊艇城直頭係鬼城,得幾丁人,機動遊戲都熄晒,接駁巴士一個鐘一班,認真麻麻.

仲有時間去埋和歌山城,已經就快關門唔俾入,隨便門口影張相就算.跟住我已經眼瞓到死,但班女人居然晚餐後仲去行葯房,都唔知佢地搞到幾多點喇.

第二日去翻大阪,個個當咗車箱係睡房,梗係,通宵機仲踩到咁夜,但一去到酒店放低行季又即刻生猛翻,黑門市場,心齋橋又搞到三點幾(係半夜),第三日落雨又天神橋筋,梅田,都唔知點解咁多嘢買,終於第四日肯停吓去京都,仲租和服話做model俾我影(實際係我幫佢地影?)佢地啲相唔出得,出張路上踫到既啦.好喇,聽日終於可以走喇 :P

保齡球攝影

影保齡球既機會真係冇乜,公司比賽唔方便出相,可能比較悶攝影會又冇搞,其他比賽混入去影後又冇乜意思,體育節係一個難得的機會,上一年個場暗到打波既都睇唔清楚,去到都放棄,今年唔錯比較光猛.

雖然係攞正牌,都同現場工作人員打個招呼.佢地又幾好人,知道我唔想影後,就容許我在場與場之間練習時間出球道柱後影,但一正式比賽就要入翻來.我當然求之不得.不過原來影出來個底好花,反而唔係咁靚.

到正式比賽,工作人員都容許我在最側面的通道邊影.真係得一個位,頂盡兩個,好彩真係得我一個人來影,現場好暗,又一次要開盡F1.4光圈先有1/320秒.今次有新嘗試,以往我都係在連續對焦時我都係揀對焦優先的.邏輯上好正確,唔中焦影來做乜?但咁暗幾乎十次有九次都係相機覺得唔中焦唔俾影,到中既時候個波已經走咗,我終於試吓釋放快門優先,果然好啲喎,起碼俾我影,雖然都係成日唔中,但.........對焦優先咪又係唔中.

追焦效果始終唔係好理想,失敗率好高.我又諗翻影彈網既手動對焦.不過今次有啲新諗法,一般來講先對焦後構圖係唔建議既,因為部機一轉其實焦點係會前移或者後移,尤其用大光圈影就會失焦.所以我今次試吓特登對前小小,就係對出波嗰舊嘢,跟住轉去開波位置,焦點後移之後就啱啱好喇.我仲可以坐前啲或者坐後啲去調節焦點.

由於用定焦,只可以影死一條球道,相當悶,唔夠光都冇計,要用135mm影吓遠啲既球道,快門下降到1/200秒,唔係好掂,卒之搞到用iso 2000,快門升翻去1/250秒.冇咗對焦既論論盡盡,構圖精準咗好多.平時多數因為用咗左側對焦點會冇咗隻腳,依家可以睇啱先影.

之後我再用翻上次影彈網既方法,務求百發百中,每個運動員都會在同一球道打兩次,只要襯佢第一次打完睇波嗰陣,用十倍放大手動對啱焦,下次佢再打就十拿九穏.不過有啲一打完就走唔切既就冇佢符 @@

紅紅鳳凰木

唔知係咪冇留意呢?往年都唔覺住處附近啲鳳凰木咁紅.一於去影吓佢,仲好過等紅葉.

就咁走到樹底低炒.影到個天白茫茫唔靚.我地特登去咗廣福頓附近天橋,從高度影,希望順手搵啲街景襯吓唔駛咁齋.對面馬路水平角度有棵都幾多花,就搵佢開齋.

 

 

然後就真係高角度,首先用長鏡增加壓縮感,影到好似好多花咁先得.

 

 

之後就用wide鏡影埋街景入鏡.不暪你說,雖然好好天,但光照並不均勻.條街光過啲花好多.都費事用腳架影兩張唔同光暗夾喇.陣間有風吹啲花郁咗仲衰,索性用raw出兩張光暗唔同既夾就算,由於夠光,ISO唔駛太高,暗部都唔會太多雜訊.

 

 

用埋廣福邨做背景.

 

不知是甚麽豪宅呢?用來襯花都幾唔錯.

荃灣龍舟競渡

上年被網頁整蠱咗,搞到摸門釘,今次搵咗住附近既朋友幫手睇吓街上廣告,確定冇甩拖先去.

天文台照舊話咗狂風大驟雨先,又真係俾佢估中咗………一陣間,初初真係要出遮,不過好快已經停雨,這裏的距離算唔錯,影第一條龍的話,70-200都已經夠用.當日大部份相都係用佢影,一來光圈大啲,二來就算同一光圈,同一焦距,大家都用200mm影,70-200既畫質係好明顯好過200-500的.

不過要大頭既話,尤其想影出面嗰幾條龍,200mm就唔多夠.畫質差小小都冇計喇.總唔能夠冇啲特寫呱?

 

 

影多張比較多人既,唔知從幾時開始,個個影龍舟都要慢快門搖拍,我覺得理念係好既,但有效果又成功sharp到個人既,我印象上只在雜誌見過一次.其他全部都係矇晒既,矇晒有乜意思呢?真係藝術就要咁?所以我影嗰啲都好out的 :P

 

 

再多人啲,亂到七彩最啱我口味 :P

 

 

有一件事好困擾就係我啲相成日冇龍頭,龍頭離爬嗰個太遠,除非影到個人好細,次次影完都係覺得唔鐘意唔要的,呢張已經好盡.

 

 

除咗比賽,龍舟去起點時都會經過我地,不過慢慢爬冇乜睇頭,佢地都算識做,整啲水花過我地影吓.

 

 

影得多爬既人都可以影吓鼓手,哈哈,一樣亂到七彩.最後雖然龍舟都係年年差唔多,點都要應吓節嘛,大家端午節快樂.

又撻過

柔道都算係我幾喜歡影既項目,冇錯係有時會好悶,成場都係拉拉扯扯,攬吓瞓吓咁就完咗.但係一有投技成功出現就好似打咗支興奮劑咁即刻精神晒,影到就會好開心,影唔到就會好嘆氣,真係攞來賤 :P

早知唔駛咁早來,朝早原來係小朋友組.人仔細細跟本唔夠氣力做投技,就算有都係係咁意推跌就算.俾人推咗落地仲笑添,唔該認真小小啦.原來柔道都有男女對打架,陣間攞份報名表睇吓先.仲要係揀專教鎖技既先得,呵呵 :P

好不容易捱完小朋友組,終於可以影翻啲有力既畫面,嘩,打翻支嗎啡先.唔知係乜招式呢?似係背負投,但又好似唔係.總之係一本.

影影吓竟然係女子組,呀……….女子組都冇所謂吧?呀……….隔離場男子組喎,呀………越來越多人走晒過隔離場,呀…….都係咪執輸.哈,呢招咁古怪既,好似擰低對手咁既.可能見太多人聚晒呢邊,有個阿伯講依家柔道興撻撻撻.冇人欣賞鎖技,好似話緊我地咁.咁影相來講又確實係投技好睇好多喎….

講開鎖技,上年有一個小朋友俾我好深印象,佢只有一招,就係背負投,但佢其實係唔夠力真係投既,只係夾硬拉對手一齊瞓低.等裁判分開又再拉過,難得佢對手又冇佢符,係咁陪佢重覆呢個動作,悶到抽筋,最後仲因為主動攻擊贏埋,今年又見佢重施故技,不過就冇咁好彩喇,被對手用鎖技搞掂咗.不思進取得到咁結果係遲早既事.講翻現場,本來係好精彩既巴投,可惜隻腳唔知撐咗去邊,結果自然又係兩個攬埋一舊 @@

哈哈,瞓負投 :P

咦,小見喎,竟然有人用肩車,雖然火候差啲,最後失敗咗,呢啲係大隻佬招數,亞洲人一般好小用的,用腰力成份抬起對方喎,就算佢唔反抗我都驚整親腰啦.唔知幾時有人用掬投呢?俾我影到應該興奮到成晚瞓唔着.

曬到死影曲棍球

近排天氣真係搞到唔多敢報名影戶外活動.不過京士柏曲棍球場就唔驚,因為觀眾席有蓋,只要唔好落到唔停,有雨大不了就避入觀眾席最多唔影注.

一早確實係有小小天陰既,但係過咗一陣就陽光普照.天文台明明話狂風大雨喎.好學唔學,學埋財政司咁死人都話落雨,唔落你地咪好開心囉.咁都係既,好在出門口時靈光一閃,攞埋遮陽帽出來,否則肯定變燒豬.大太陽又用到70-200mm,1/1250秒幾乎涷結一切.

即使用長鏡,都仲可以保持到1/800秒,奔跑動作都勉強可以搞掂,球在半空機會不多的.

成堆人既畫面,仲連棍都跌埋,一到這種雜亂場面,細光圈既缺點就出晒來.但唔用佢又唔夠長.

勁曬換來快快門及快對焦,其實我係寧願曬啲既,影唔到幾舒服都冇用.由於在底線,冇乜點影過龍門,哈哈,一影就影到佢呵疍 :P

隨住時間過去,太陽開始下山,又係咁,最勁既隊伍係排在最後.睇樣都知係勁隊,曲棍球最勁唔係鬼佬,係阿差.有半邊場已經陷入陰影,得翻半邊場影,瞓埋一堆都好過冇啦.

雙人彈網攝影

上次影彈網只得單人真係唔知影咗乜.今次影雙人期望畫面可以豐富啲.

影雙人最大好處係個人唔駛影到好大都可以塞滿畫面.較容易影埋張彈床入鐘,咁人地先知係影緊彈網,而唔係跳樓.之前我係單次對焦,今次直情用十倍放大手動對焦,成功率仲高咗,不過有啲趕頭趕命一上彈床就跳既我就唔切對焦喇.一般跳到最高係接近靜止,而動作亦係最大,係拍攝好時機.

這是另一種動作,冇頭先肢體張得咁開,可觀性較低.睇翻上次啲相,其實都係暗咗小小.今次一於用盡F1.4光圈影.好在個場觀眾席係梯級,可以水平影,否則對定焦肯定唔中.

咪以為同步好易,我揀咗好多先有接近的..........這,這也太離譜吧 @@

有一天我們會飛,如果手低啲冇遮面就好喇.

由於用盡F1.4光圈,我唔太敢隨便改變拍攝角度,驚郁得太勁景深會唔夠包,有啲運動跳得幾跳移咗位都冇計,搞到兩個疊埋一齊添.

終於等到男子組出場.不過.....其實女子組好睇啲.男子組只係一味跳得夠高,同步方面係比女子差,一味出蠻力,唔夠幼細囉.

仲有小朋友組,佢地咁細粒我都要走前一行影先掂.我覺得今次好似影陸上跳水咁,都係影彈高嗰吓動作,不過機會多跳水好多 :)

影飛碟

哈哈,並唔係指外星人嗰啲.亦都唔係三文治機做嗰啲,而係平時去沙灘玩嗰啲,不過今次係着運動衫玩的.

同一般球類唔同,個飛盤係會在空中滑翔,停留比較長既時間,所以要影到飛盤在空中其實唔係咁難.

但係要影到好似攬球咁搶飛盤就比較困難,一來用長鏡視角窄,搵目標,構圖慢,二來長鏡對焦慢,變咗乜都慢吞吞,三來原來飛盤跌咗落地係算失手,控盤權會去咗對方度,所以一接唔到就唔會追,而交碟亦傾向十拿九隠先交.短傳佔大部份.

據我觀察,好似冇越位呢樣嘢,只要飛到隻碟俾近底線既隊友,跑兩步就可以得分,係小有會長傳時機,不過影相就冇乜用,得一個人唔好睇,哎呀,今次失敗咗.

仲有一樣嘢好困擾就係背景好亂,雖然焦距係長,但係光圈細令到景深好長,平時用70-200mm可以整矇既背景依家同主體黐一舊.變得好干擾甚至唔知影緊乜.

頭先嗰張原本都成堆人,亂上加亂都唔會相差太多.有啲淨係得翻兩個人既就……….如果入支500mm F4或者300mm F2.8……呵呵.哎呀,好痛,咪打頭……welcome to the real world.