敗走觀景山夜

之前去觀景山搖拍飛機,由於日光日白,飛機又白,光圈收到好細都降唔到快門,效果麻麻,於是盟生夜晚去影的想法.

初初諗得好理想,300mm F2.8加個1.4X增距都仲有F4,又係慢快門,最多ISO 800都夠喇呱?終於快門1/40秒唔夠光,下降到1/20秒,影機場停泊啲機就夠光既,但係起飛既機係冇燈光的,結果係ISO 6400,原本好暗既天都變光埋先睇到架機.

只有更衰,隨住天色進一步變暗,連對焦都拉風箱,為免錯失只有幾秒的機會,變成要手動大約對焦,ISO 亦變成12800,有點不堪入目.天已全黑,再磨落去都係冇乜好結果,只好徹退了.

再探山寮

上次下午先到山寮收獲麻麻地,今次上午去睇吓係咪好啲.

天陰陰的關係,睇怕都係冇乜嘢影,未去到聖壇之前遇到呢對小情侶,無論位置,光線都不甚理想,平時多數放棄,不過驚入到去都可能冇嘢影,就決定用小小時間玩吓.佢地知我影緊係咁轉來轉去,估唔到由原本黑底變咗綠底,我把握住佢地一刻既停頓,影咗兩張來疊,實在太細粒我個位又冇乜支撐,再影大啲應該搞唔掂,事後睇翻我以為係下面飄蟲隻眼原來係頭上一粒唔知乜傢伙,好在景深勉強都包到隻眼.

正想離開之際,就在旁邊的地方發現一堆蚜蟲,影到清晒就冇乜可能,照舊都係疊兩張,景深有幾多得幾多.

最後入聖壇,一如所料好冷清,只有幾乎每次都見到既鈕灰,以前影得唔多靚,今次花多小小時間較正焦平,影翻個倒影.

影搶火

平時經過大排檔見人抄餸抄到火燄沖天都想影低,奈何爐頭多數圍晒擋板好難同時影得到隻鑊同個厨師,有朋友話俾我知深水埗愛文生可以,於是就出動.

原本諗住咁影會唔會俾人趕,原來係冇事既,有好多人都用手機走到好近影,我用135mm遠遠影唔阻佢,不過執料嗰個人喺正中間就成日阻住視線,啱啱搶火佢又擋住就影唔到喇.另外佢有兩個厨師,疊埋一齊又係唔靚,經過多次嘗試先影到呢張比較大火既.

之後轉去前面影反轉上菜,要對正會阻止行人,只好側側地攝咗自己入樓梯度,好難得影到有一張個鑊度仲有火的,記得成晚好似就得一次,一時冇睇清楚佢究竟炒緊乜餸.

後來留意度炒菜係會好多煙,見炒菜就好準備定喇.影影吓見到有同道中人來,我都影咗一輪就讓個樓梯位俾佢啦.

山寮開齋

今年冇一過驚蟄就去影蝴蝶,唔知去邊好就求其去一轉山寮.

一時唔記得咗山寮係凹咗落去,下午先去應該好快冇光,直到其他人走我都未有收獲,諗住食白果點知又真係有蝶飛出來,呢隻仲要係我未見過既,佢只停留咗好短時間,只容許我影咗幾張,幸好都有一張係清楚既.

除咗新蝶,仲有網絲蛺蝶,不過就冇合翼咁好彩喇,只係平時咁變成一塊,位置好啲唔係地下,叫做係正光,增加一張普通收獲.好快就冇陽光要收工喇.

臺南旅遊

防疫措施解除,係時候要報復式旅遊,今次揀了臺南,純粹係因為未去過.之前臺南有直飛,依家冇咗,連套票都冇,要酒店機票分開訂,其實臺南唔係咁難去,高雄機場搭捷運加台鐵已經去到.

酒店首選係近車站,台南大飯店好方便,另一個揀佢原因係我睇中佢天台可以影到車站前圓環,另一個選擇係鐡路大飯店,但只有二星同聽講比較雜,嗰度天台仲高但貼近圓環,相信部機要伸出去欄杆先唔會阻住,聽講管理好求其,外人其實都可以博矇上到天台.24mm始終唔夠wide,有啲嘥.

襯好天去遠啲,買一日西濱快線可以無限次搭,但實際只有去程三班及回程三班,去三個景點都好盡,首先去高跟鞋教堂,可惜側邊啲樹遮住,影唔到有個人去突顯教堂大小.

原本諗住跟Youtube講租單車踩去井仔腳瓦盤鹽田,老婆怕曬就跳過一個景點直接搭車,呢度係影日落好地方,不過路程遠唔搞咁晏,就咁影吓算.

有人採鹽,又係好題材.

落雨關係改到室內.影咗個明信片取景位先,夜晚好靚,不過又係唔想咁晏.

裏面有動物館,武器館,樂器館展出實物同藝術館展出油畫.港紙五十幾蚊都算抵睇,仲有啲場景可以影吓.

這是全球交通燈最高密度的街道,1.5公里內有32盞.如果盞盞紅都幾大鑊,原本諗住帶135mm加1.4應該足夠,最後冇帶135改咗帶200因為85加1.4可以代替135.但好可惜冇帶2.0增距,只好靠裁

撞啱九重葛花季,好多人排住隊打卡,要影冇人既基本上冇乜可能,轉個方法,利用佢地做免費Model.佢個Friend被我裁走咗.

影完花行冇遠就可以影埋大魚的祝福,諗住好易,點知好多人打卡,唔想近炒又唔好意思叫人避開,等咗好耐先影到,幸好個天未黑晒.

最後去埋四草綠色隧道,睇網頁話平日只開兩場,好在有人話我知其實夠儲夠30人就會照開,幾乎走咗去食嘢錯過咗班船添,視野最佳自然係第一行,其次係最尾一行,拍照先唔會拍到人頭,由於不設劃位我地又排十幾,諗住只可以爭船尾,點知個個都唔坐第一行,無端端有個靚位影相.

影攬球賽

朋友通知有攬球賽.........不過係最迫人既15人,見冇乜地方好去,都去玩吓啦.

一共只有三場比賽,首先出場係男子賽,影個最容易影既攬人畫面.個動作唔難影,最難係佢地唔好先攬埋一堆.

要襯光線夠,盡量影啲跳躍畫面.

第二場係女子賽,亦係最容易攬埋一舊既比賽,加埋雜亂既背景,真係冇眼睇.

好難得有個啱啱好射程影到既界外球,好多時一係爆框,一係太遠,今次幾乎唔駛裁,到呢度發現Sony改咗機背對焦掣,以前可以一按停咗個追焦,依家冇咗,搞到唔可以對定焦等,幾乎嘥咗個咁好機會.

最後一場打夜戰,光線超暗,志在參與,慢快門都有慢快門好,可以見到隻腳既動感.

呢張有啲幸運成份,對到焦又啱啱跳到最高,快門慢啲都唔矇.

鷹巢山自然教育徑

又去懶人地方,入口就在石梨貝水塘附近,全程容易行.

不過影相位得一個,而且好普通,淨係得啲樓.

添馬公園發光玫瑰

花展太迫人,走去影吓死物.這個景其實之前出過,當時冇影.

五點半就開燈,不過唔多睇唔到,天太光,之後天色變暗就開始明顯但天空依然太光,所以先影吓冇天空嗰邊.

終於等到天夠暗,就影張有紅又有藍,最多花既構圖.啲花發光會有光差太大既問題,唔係花爆光就係周圍黑晒,而且因為近既花太近,會有景深唔夠既問題.於是要HDR再加景深合成去處理.由於HDR要不停改光圈快門,好易郁到部相機,我設定咗用包圍曝光同電子快門,要郁既只有對焦環,果然事後連對正都唔駛.

紅色花似乎好易爆飽和度,決定走出啲只影藍花,花小咗但確係易啲出到啲紋.

長征長排頭天池

這個計劃了很久,要好天又要大水退,仲要係星期六或日.總係好難滿足晒所有條件,等了又等,卒之等到九星連珠,龍穴大開之時先成行.網上資料由鹿頸出發來回要五個鐘.加埋我唔識爆林,靠綑邊嗰段要多三倍時間,最後連埋開餐,用咗六個鐘先搞掂.網上話一路跟住荔枝窩方向路牌就得,去到榕樹凹村我都係咁做,越行越唔對路,但手機冇訊號,冇得靠Google map,直至去到高位先發覺去咗鎖羅盆方向,要行翻轉頭,白白浪費咗時間同體力.過程中我係直情搵唔到爆林入口,只係一直綑邊,不過.......都係要爆林,綑邊路線有啲位個地係林林地,除非諗住對鞋行完就唔要,否則都係要爆入側邊小小在樹叢中穿插,唔同既係睇住海岸線,唔會迷路.

好不容易見到架生锈剷泥車,即係冇行錯路同就快到.死火,24mm唔夠wide,唔想玩駁相,終於斜斜地搵到個高位影得晒個天池.因為網上見到既構圖都好扁,我特登帶咗支單腳諗住進一步升高部機.不過睇來唔需要,係好咗啲啲,相信平地用效果會明顯得多,但唔值得攞咁重.影完就好快啲走,要襯住水漲前離開綑邊位.

放相後有去過既人問我係咪水小咗,我估係我影得細咗,再放多張有人比對既,我估都要50人先夠圍一個圈.

公庵山食風

得知要影西部通道全景要上公庵山.搭小巴老人院落車好快就到登山口.路一點唔難行,有人用木板做晒樓梯級,山也不高只係二百多米,但最後一段應該係越野電單車賽道,好多碎沙,頗跣,要小心慢行,最好有勞工手套萬一跣到都唔駛擦傷手.

風好大仲要用到200mm,試咗一陣發覺搞唔掂,快門一長就矇.幸好搵到個草堆凹咗入去擋到風先解決到.Magic hour大約六點四十五分,一般橋樑都係捱到七點就開燈,西部通道係衰啲要七點半,唔係做定功課我都以為佢唔會開燈,肯定七點就走人,依家要捱多半粒鐘.呢四十五鐘都幾難捱,屈在草堆對腳會屈壞,出面又超大風,沙地亂咁走動又危險,侷住係咁郁對手等冇咁涷,時間一到嗱嗱聲影咗就落山.出大馬路的小巴班次好密,等咗一陣就有.