一橋三食

襯住小有既有太陽日子,去完成埋影青馬橋迴旋處既目標.上次應該係太早轉右導致冇路落低位,今次唔理三七廿一去到最底先轉右.去到入口突然烏雲密佈,竟然落出雨,唔係呱?唔通要徹退,見個天一邊都幾光,等咗陣真係停雨,天雨路滑都照行啦.

 

原來一路落真係可以落到底,去到馬路路面,而且冇欄杆,可以行到出去,途中好多蜘蛛網,我破壞咗唔小人地屋企,跟住轉右原來仲有好遠水路,最後大約上翻三層左右就到適合高度,當中都有小起伏要上上落落,行行吓竟然又落雨,唔理喇,去到呢度幾大都捱埋,祈禱點都俾埋個日落我先好再落雨.唔算好靚叫做有,不過24mm原來唔夠wide影晒兩個橋墩,翻去睇咗一陣覺得唔三唔四仲裁咗小小,早知就索性影多啲個迴旋處.地面佔既部份比較大,雖然開咗燈(七點十分先日落,七點已開燈)但唔夠太陽光,冇乜睇頭.

 

 

咁就等夜景啦,唔駛等開燈喇,只要等個天夠藍,日落方向的話,個天係黑得比較慢的,成天都係雲,真係麻麻地,可以睇到冇雲既地方都仲係好光.但已經係七點四十分.

 

 

最後一食係要合拚日落同夜景,必須再要等到個天黑過日落先得,終完影成走得已經係八點,但最艱苦既部份現在先開始,要好遠水路行翻去最左手邊既樓梯,然後由山腳行翻上山上入口,通常走人係落山舒服好多架嘛,依家變咗上山辛苦到嘔,行極都仲係樓梯,啲蜘蛛好有效率,又成條樓梯都係蜘蛛網,最後用咗整整一個鐘先去到入口,連牛仔褲都濕晒,水自然係飲晒,好在之後係落山,否則真係脫水,餓到死,好在葵芳有麥記,唔該大可樂加巨無霸加粟米杯……冇喇,我地十點收工,仲有十分鐘,咁你有乜就俾乜我啦,食完都仲係好空虛,再去Seven補多支水加麵包先掂.

影橋的季節

經過漫長既等待,終於等到七點鐘天都未黑齊既日子,點解要等?睇過我的”不是影橋的季節”就會明白,青馬橋係要搭正七點個橋墩先會開燈的,冇錯唔開都可以照影,但上半部黑媽媽始終不是味道………

唔知係咪腦退化,竟然又行錯路,未去到樓梯就捐咗入啲草入面,好彩又搵到個缺口去翻正途,今次穏陣啲影得個入口,下面其實四通八達,N咁多條樓梯連接,行錯咗真係唔知會去咗邊,入黑就更加弊,時間預得太敏,信不信由你,呢張係第一張相.連小休既時間都冇,就係為咗嗰小小光就要來多次,咁又係,當你乜都冇就影到已經好好,但之後你就想完美啲,仲有我覺得中間堆建築物太光,條路唔突出,後期調暗咗一級.

襯天未黑晒,影多張特寫,個天其實黑得好快,只係幾分鐘….已經太黑喇,個天已經需要後期推光,再遲幾分鐘,就算推光都會係灰色而唔係藍色.OK收工,估唔到前後影咗十分鐘都唔夠就走得.最有效率的一次 :P

執相二合一

用Layer Mask夾相最大問題係遇到邊位好岩殘,光暗又完全冇漸變既位置,筆刷一減小就會出現唔自然既夾位,照用大筆刷就會好似用漸變瀘鏡咁某啲地方擦過龍或者擦唔到,應該光既地方暗咗,反之應該暗既地方就光咗.但係佢效果最自然,每一個部份都係真實影出來而唔係經過電腦推光,壓暗.為咗解決呢個問題,我開始結合兩個方法,用推Shadow, Highlight處理最難搞既邊位,再用Layer Mask擦出最大片既真實拍攝部份,效果不錯,但反差太勁會好多noise.馬草壟嗰輯個魚塘就搞到鬼五馬六.

又到影橋的季節,即係過咗七點先天黑,青馬橋要七點先開燈.意外地有日落,重施故技影幾張翻去慢慢夾.Paintshop Pro都有HDR,睇吓夾成點.效果都唔錯,由於冇乜移動物體,鬼影問題唔大,效果就始終有啲卡通.

用翻先前思維,開Layer Mask盡量將真實部份夾翻上去,可能有人會覺得太清淡,不過睇得太多勁橙既日落相之後,反而覺得咁比較自然.天空部份我沒有夾太多,用翻大部份HDR出既部份,因天色不佳,用埋真係會淡如清水,如果當時夠好天,遠處有小小籃既話就一定會搞埋佢.

最後梗係要影埋個夜景啦,我已經觀察咗好耐,呢個時節可以等到七點開燈,最後七點十分影完,走得.有點可惜係旁邊既樹高咗好多,遮咗個迴旋處,又或者行錯路?仲諗住今次影wide啲補翻上次冇影既迴旋處,估唔到都係影唔到,只嘆沒緣份.

不是影橋的季節

青衣自然徑二號觀景亭係出名既青馬橋拍攝地點.咁其他三個觀景台呢?去過一次好似完全冇料到.周圍俾草木遮晒,都唔好講靚唔靚喇,直情景都冇,只可以從樹隙中間睇到小小橋景.但係見人話三號觀景亭都睇到,可能搵吓路都有機........

細心找尋之下原來真係有路,諗住一陣就到,點知原來好遠的.穿過鐡線網唔在講,仲要行斜到死既引水道樓梯.可能冇乜人行既關係,舖滿晒樹葉.一不留神就會跣親.越行越入真係有啲驚出來又迷路.付出係有回報既,對正青馬橋既景真唔錯.可惜煙霞比較大.雖然影到咸疍黃但個天就白茫茫.

再影大小小,然之後就係等天黑影夜景.呢度鬼影都冇隻,有小小恐佈,特別係陣間入黑要搵路走真係有啲驚.不過就唔會悶,因為有無數既蚊陪你.我攞住支蚊怕水好似填色咁塗偏身體每一吋露出既地方@@

死火,天已經越來越藍,做乜橋墪仲唔開燈架.哎呀.....我記得喇,係要七點先開架,越等個天越暗,心中仲存有一絲希望可以夾硬谷光小小個天.終於真係七點先開燈,個天已經黑到墨汁咁,早知唔等啦,成張相得翻黃同黑兩色.藍天沒有了,下次要記得影橋一定要日長夜短既夏天先好來.