全片幅第一擊

上次去長洲北眺亭用咗50mm影夜景,事後總覺得空位太多,買咗新機就一於再去用長鏡影翻Tight啲.其實上次我都已經想用長鏡影,唔知係唔係支70-200mm曾經由凳度跳過落地下,光軸有所偏移定係支鏡本身就係咁,硬係冇辦法影到成個畫面都sharp.即使收到F8,甚至F10.今次我決定用定焦鏡影.睇翻上次啲相計計數,需要焦距大約係110mm左右.我冇支咁既鏡,最後方法係用支85mm加個1.4x增距鏡,雖然加增距鏡會令畫質有所下降,但收到咁細光圈應該影響好微.........

影風景其實唔係多試到部相機性能,可以手動焦慢慢影,純粹試畫質.果然定焦係Sharp到整個畫面.整體畫質亦係比用APS-C好.可能係片幅大咗同埋冇低通濾鏡呱?暗位亦比較乾淨.APS-C的話暗位始終有小許顆粒感.執相的感覺更明顯,咪以為淨係推光暗位先會增加雜訊,事實上加對比度,飽和度等都一樣會增加雜訊.全片幅呢方面承受力似乎比較大,落味精可以重手啲.

原本呢一張顏色比較討好,可惜有隻船在畫面中間劃出一條橫線破壞咗.影景有時就係咁.試完影景試乜好呢?要試一試最重要的對焦性能先得.