又影場地單車賽

來緊就係世界盃場地單車賽,粒粒星,高水準梗係想去影啦,不過…………要俾錢買票,咁都唔係好貴,但係驚好多人冇得揀位影,我之前話最靚位置影出彎有四個,我要更正,圓孤兩邊圍欄超高,係影唔到既,所以實際係得兩個位,要世界賽呢兩個位冇人坐前面仲要冇人阻機會我唔知,應該唔會大.

結果我選擇咗本地賽,幾乎包場咁濟,觀眾加埋我地都唔夠10個人,鐘意邊度影就邊度影,我當然就係去翻我最鐘意既位影啦,呢個位目的係要影到一條車龍仲要有小小彎尾的,只有剛出彎位先影到,要補充,因為我用定焦85mm,所以得一個位,如果用變焦或者較短焦距定焦,係可以前一行影都得.但短焦會影到前車大後車好多,我唔係咁鐘意.

瘦田冇人耕,可能啲人見我一路都喺呢個位唔走,佢地又走埋來影,仲要出wide鏡企我前面,估唔到影model會俾wide鏡恰,連影單車都會,好在我仲有一個位可以揀,有時未必要所有車都黐埋一齊,頭車帶離咗視覺都OK的.

之前都冇影過凱林賽帶位既電單車,呢項比賽係電單車帶幾圈後啲車先開始衝的,之前用汽油車真係肺積塵,依家已經轉咗用電車.

影完群揪,得翻啲單打獨鬥或者小車三四架,咁就影直路啦,呢個時候可以換135mm,直路由於有充足時間對焦,成功率係多過彎路好多.但最盡影到三架車,再多就會好細架,好空虛.