新竹reload

年頭先去完新竹,照計應該去吓其他地方,點知老婆話要去多次.原來係佢想帶佢啲朋友一齊去.收到,即係又係血拚之旅.腳架都可以留翻喺屋企.唔通叫人等我影日落夜景咩.

不過咁,我都安排咗一日去影吓季節限定既柿子海.九月至十二先有,因為有所謂秋天既九降風,嘩,做乜超多人,新竹應該冇咁多人個喎,原來係雙十假期呀,避咗十一黃金週計灟咗雙十.算啦人多熱鬧啲,就係為咗呢個畫面,係咪好奇怪唔見旁邊有路啲人點走人去.謎底就係下面,啲柿子盤係高過人頭的,下面點行都得,園主仲特登安排咗啲梯俾遊客爬高突個頭出來,同埋俾攝影人爬高影朋友.果然有生意頭腦.

跟住就係老婆指定要去既內灣老街,其實都係賣嘢食,有啲遊戲玩咁,似夜市,我地都玩咗射箭,不過女性似乎冇乜興趣,一味叫你地玩啦,我地買咗一日票,95台幣,可以任搭內灣線,所以行完老街就去咗合興車站,呢個別號愛情車站,有個心囉.

仲有小火車玩,車程好短,得一條直路,旨在影吓相,有專人幫你影的,我俾人影完就走去影人.架火車會噴煙都幾得意的.由於一個鐘頭得一班車,搞到未去晒啲景點就趕住走.其他站都唔去.

預咗星期一再去老婆好鐘意既17公里海岸玩電動單車,諗住冇咁多人.真係………..冇人呀.原來已經過咗雙十假期,咁啱魚市場係公休日.好在單車舖有開,一於包場,今次要完成晒17公里,超大風呀,帽都吹甩晒,原來後段都經過好多攝影點,呢度係高尾濕地,可惜唔係日落時間.

仲有我上次計劃咗影夜景既豎琴橋,可惜又唔係Magic hour.

沿路上都會寫住你行咗幾多公里,包唔會行錯路.終點係一座塔,打完卡就係原路掉頭走,冇得繞圈的,由於唔駛爬頭,好快就行晒,但又好似差咁啲挑戰性.

新竹旅行

啲人聽見我話要去新竹都覺得好奇怪,一個連旅遊書都唔多講既地方有乜好去?我覺得旅遊書講既地方都太大路,我依家計劃行程都轉晒上網搵,好小睇旅遊書,而且一個未去過既地方點都有值得見識既方面.

可能真係比較冷門,由機場去市中心要先搭捷運或客運到桃園高鐡站,再搭一個站高鐡,再轉台鐡先得,未搭過台灣高鐡,原來車票寫明自由席要去車尾的,我地大鄉里車頭直入照坐,結果幾次都係坐咗人地個位,後尾索性企吓算,因為只係10分鐘車程.

入到酒店已經3點幾,同老婆去附近shopping一陣就去第一個目標,新竹之心東門城圓環車軌,去到桌球室六樓諗住轉樓梯去天台,老闆問我做乜,我話去影相,佢話影相唔得,之前太多人去,有人踩爛咗水管要佢地夾錢整,決定以後唔俾人上去,咁我唯有咋咋底去翻樓下直接行樓梯上去囉,去到三樓又俾裏面啲人見到截住.慘,一出閘就脫腳,plan B去巨城購物中心,夾硬影張夜景,購物中心係好大,不過價錢都好大,得個睇字.

第二天天陰陰決定去眷村博物館,有啲似韓國嗰個3D藝術館,有好多假嘢俾你玩打咭,例如轟炸機,小船,單車,手拉車送貨,街市,連國旗都有得用來打咭,而且實物成份比3D藝術館多.

冇乜時間等有陽光,下午就去普天官睇大關公.已經計算好晒下午先係正光,而且星期六日博物館係免費.人算不如天算,個天白茫茫,正光都冇用.

無心插柳,個博物館原來幾唔錯,好多展品,而且啲展品好靚,唔同平時嗰啲爛碗爛杯,仲有兩張龍椅可以打咭.仲有時間搵車去頭前溪豆腐岩,雖然係要大雨後去最好,旅行冇可能就到咁啱,點知係………維修,八月才從開,慘,二度脫腳.

都係天陰陰,冇計都要照去南寮漁港,睇地圖都頗遠吓,點知45分鐘車就到.冇食海鮮買咗啲小食就算,跟住要租單車,近車站嗰間係冇電動單車的,要行入啲有間叫港邊租車既,我地租咗二人電動有蓬車,車速都好快, 仲可以出馬路,攞正牌無牌駕駛.首先去風箏比賽場睇吓人地啲巨型風箏,果然有兩隻超大型八爪魚,不過佢飛到咁過要低炒其實冇乜好影,只會變晒剪影,可能個玩家都知我地啲喜好,放一陣又收翻,又放過,搞到大家都狂影,好鬼開心.最衰係個天好多雲,我要勁執先出到小小藍.

跟住開車去著名打咭點魚鱗天梯,不過冇日落,好似冇乜料到,而架車最唔好係冇鎖,老婆要守車,想影張打咭相都唔得.

終於原來係有正式單車徑的,唔駛下下亡命跑馬路,嘩,條單車徑超長,如果冇電動應該好快頂唔順.唔知係咪可以繞一圈,見唔係好對路一個鐘左右就掉頭,老婆話未試過咁爽,要來多次,仲走去買咗條長既單車鎖.

終於都落雨喇,可是今天既行程係去睇人曬米粉,照去啦,酒店十分鐘車就到,付出不多,不出所料,冇人曬米粉,我記得網上搵到東德成米粉廠係歡迎參觀的,去到門口見到老闆娘問咗兩句就請我地入去睇,佢話因為禽流感關係,依家冇人曬米粉架喇,全部改晒烘乾,佢地四點鐘就開始磨米,壓乾水同蒸粉到三成熟增加黐性,現在見到既係用機壓成既米磚.九點鐘左右就可以見到咁多米磚.

之後會用鐡碌將米磚壓成厚片,再捲成圓柱放入有好多窿既模度擠出條狀米粉,之後就係入爐蒸35分鐘至全熟,出爐嗰吓成個室內都係蒸氣好好氣氛,不過就搞到好難對焦,事後真係得呢張OK.

之後就係拍攝重點拋米粉,原來米粉蒸完內藏好多蒸氣,唔整走佢米粉會受熱黐埋一堆,咁做等於用空氣過冷河,一筲箕米粉只有一次機會拍出白色波浪.

之後係切米粉,可以專心影拋出去嗰吓.當中仲可以影吓拉開啲米粉.

整好既米粉會排開等紮好送餐館,一部份會攞去烘乾做零售.等出爐既過程仲請我地飲支裝水同食香蕉,冇理我地係唔係採購部,又叫我地試食新鮮出爐既米粉,咁客氣真係搞到好唔好意思,所以臨走我地都買咗三包一斤压米粉做手信. 最後都分享吓有啲乜好食,有罐頭菠蘿咁甜既新鮮菠蘿,多汁冇渣既愛文芒果同埋奶昔般香滑的木瓜牛奶.