影煙…………花

早兩年話影煙花要中午就去排幾個鐘頭隊已經覺得好誇張,上年已經提早到朝早7點先有位,今年仲誇張,要早一晚排通宵.影張相啫,唔駛去到咁盡呱?我呢啲老人家真係頂唔順,雖然有朋友話幫我霸埋位,唔好意思既,下次搵你幫手排你唔去咩?好好彩有朋友話佢既ICC煙花位票有多,係啲公司禮物,唔去都係嘥,咁又冇所謂,商人知道有需求就會諗計,據聞普通人要消費滿一定金額先換到張票,海運停車場同對面海海港中心都有類似安排.

個位其實麻麻,前面有個花槽頂住,同海運差好遠,要zoom到70mm先唔會影到側邊啲物件,左下角啲草就冇計喇.襯個天仲藍影定個底先,好衰唔衰,隔離位師兄踢到我支腳架,再影已經冇咁藍.之後就係咁吹風吹個幾鐘,比起去文化中心霸位已經好好.終於等到8點.影一張睇吓設定啱唔啱先,都算唔錯.陣間高啲大朵啲既應該更好.

第二張有啲唔同色,冇第一張咁好,翻去先剷走佢.

咪住,做乜忽然間咁多煙?簡直遮晒啲煙花呀,情況越來越嚴重,跟住已經淨係得翻啲煙同埋放堙花既響聲,大家都放晒手等收工,估唔到最初嗰兩張就係唯一既兩張.我估對面海順風會好得多,我原本構圖都冇咁tight預咗影高空既煙花,依家咁空虛,只好裁一裁佢.