山寮影蝶

之前有見人在山寮影到蝶我又自己去,結果槓龜而回.今次跟人去睇吓有冇搞錯位置.

冇錯搭車都係嗰個地方,不過影相嗰個位原來要爆小小林入去,唔怪得我搵唔到.藍嶺之後,個個都預備啲料引蝶.仲要係發過烤既,真係好臭,搞到好似入咗公厠咁.但好有效,冇耐隻目標蝶忘憂蛺就出現,而且停定享受飲料,大家可以慢慢影.

啲人影到唔影,我又試吓影倒影,不過水唔多夠,效果麻麻地.

影影吓地下嗰啲都開始來,不過………係來好多,冇得食會肚餓,太多就變咗食滯.搞到去咗動漫展咁亂到七彩.而且叭地壓住心口唔係好頂得順.

搞搞吓大家發現可以走落下面水面踩住啲石塊,咁就可以唔駛叭地,企喺度影,不過要隻蝶停啱距離,停啱方向先得.我都走落去影咗隻小黃粉,水向低流.嘩,實在太臭,都係唔好影咁耐,橫掂中午咁熱,早啲收工算喇.

動漫展攝影

已經冇去好耐喇.係就係好多嘢影,但多人之餘現場環境硬係好雜亂,影完啲相冇幾多張要得,今次要留意吓,太亂寧可唔影當睇吓展覽.預早一個鐘到都要排到上橋,室外都幾悶熱,侷一個鐘應該會中暑或者脫水.好彩條龍係一路有得郁,結果去到入咗裏面先停,有冷氣涼.期間有人搭的士去到門口,唔好意思,唔該行翻上橋慢慢搵龍尾.

 

終於入到場,襯住啲人未入齊叫做行得郁,繞場一圈搵啲影相位,可惜呢度已經開始爆人,而由於佢採用排隊入去睇方法,條龍又啱啱喺正Ironman旁邊,想影唔到人只有兩個方法,一係排隊到旁邊用wide鐘近低抄,一係用長鏡影半身,我就選咗後者,背景依然係雜,只可叫做冇人阻.

 

 

蜘蛛俠呢個位最想影,真人大小唔駛唔夠景深,好彩又冇人要影到此一遊,好順利就影咗,唯一唔好係側邊有啲欄桿,幸好呢個世界有PS.

 

 

叮噹有新戲上,好大個宣傳公仔,呢個同Ironman一樣,太多電話黨,只好影一忽.

 

 

大既影完去影吓細既,Ban Dai既高達其實真係正絶全場,種類多又靚,可惜啲場景係背對背,影出來亂到七彩,只好就就角度影一忽,冇乜場景既直情影唔到,嘥晒.

 

 

Transformer就最好,一個大場景,有背景,後面唔會見到人,放晒啲公仔落去,乜位影都唔會穿崩,高位仲有架直昇機,可惜太高,襯唔到啲機械人,如果高逹咁擺就正啦.

 

 

龍虎門同埋風雲啲公仔其實好靚,係第一次除咗漫畫同刀刀劍劍之外既真人模型.老祖宗萬毒心經出招同聶風腳搭火麒麟既模型真係勁靚.可惜又係開四面台,亂之餘又反晒光,終於都搞唔掂,又嘥咗.影翻個聶風頭好過冇.

 

 

咸疍超人有太空場景要影.

 

 

龍珠個場景都好大好靚,不過只得下半部啱影相,上半部又係開四面台,原本第一代七龍珠條龍好靚,又係穿崩累事.

 

 

我最喜愛的Batman,我係指電影,雖然係英雄電影,但Batman係常人,武器勁都係常規.唔似其他超能力英雄好似超人,神奇女俠咁,基本上係無敵,Batman要用比較多腦力去解決問題.

 

 

Marvel個場景又係好靚,不過我唔係太鐘意佢啲電影,唔同能力既角色越來越多,基本上好似Jo Jo奇妙冒險咁已經失咗控.尤其玩埋聯盟之後,好難塑做到同級數既敵人,基本上只係淨翻原子彈炸完都絲毫無損,郁吓隻手就可以爆地球嗰啲敵人.冇晒戲味.

 

年青的回憶哦,我只玩過家用機,我比較怪,係用E.Honda的,砌低過好多Ryu同Ken.呢個角式家用機未有,但係我好鐘意佢既場景,唯一唔好係啲透明支架,個公仔就算啦,連舊氣都有太礙眼,要P走佢,其實想P走埋個公仔既支架,不過搞唔掂.

 

 

動漫展入場票包埋一張唔知甚麼同人祭門票,諗住係影Cosplay位啦,因為動漫個場平時個位冇咗,點知只係賣嘢既,諗住收工啦,原來冇遠有個Cosplay區,仲係免費既,即係唔去動漫都可以來玩.照例人多到爆,事實上我都冇諗過會點影相,背景實係超花,專登睇吓貼牆位有冇機,等咗一陣終於有收獲,影唔到全身喇.可惜佢地打扮比較普通.

 

 

呢個位啲人支鏡幾乎掂到個model.我都試吓迫去最前面睇吓係點,結果zoom到24mm勉強影到全身,不過變咗大腳八.而且後面都係亂七八糟,算數,走翻出來在旁邊高抄一下.就啱手腳冇黐到嘢就影,翻去P走晒啲垃圾.

斜炮頂攝影

越來越唔知去邊影風景喇,淨係得啲山,得啲草就無謂去啦,朋友又話腳有事唔可以太操勞,只可以小行,呢度景唔算好靚,不過勝在唔高,人算不如天算,朋友咁啱有事又唔得閒,咁有兩個人都照去啦.

山就唔高,不過車程就幾遠水路,由新界北去到港島南,好在西灣河搭14號到總站一落就係登山入口.城巴個apps真係好廢,總站寫赤柱廣場.半粒鐘唔駛就登頂,原本想去搵好出名既犀牛石,不過條路好似頗崎嶇就放棄咗,行前小小就到達影相位,日落又係冇行,估唔到太陽搞搞吓又係啲雲度出翻來.但一啲力量都冇,天又冇雲,我反而喜歡金光四射嗰種.而且太陽好側,只可以用一小忽島做前景.

 

 

之後有冇好似虎山既火燒雲呢?係有既,不過得啲啲.只照紅了一小部份海面.好過冇.

 

 

之後等夜景,其實我一向都知道向太陽的方向會比較慢暗小小,如果有兩個景就應該影咗正光嗰邊先,但次次都驚影唔切就放棄一邊,專心影最靚個位,今次下定決心影咗另一邊先,呀……其實真係麻麻,叫做多一張相囉.

 

 

 最後係全日終極目標影個彎位夜景.雖然都係麻麻,等極個天都唔黑,但個海就越來越黑,有啲似去南朗山咁.終於我明白嗰啲係光害,點等個天都係會好光.好啦,用3分鐘快門影光個前景,之後靠後制整翻暗個天算數.

愛笑的model

連日落雨,搞到原本去石澳影都要臨時改做室內, 室內又唔駛俾場租,領隊諗到賽馬會藝術中心,我之前同同事去過一次,冇乜特別靚景,不過就唔驚落雨,算啦好唔好都一餐.臨出發領隊話佢有事要早走,問我可唔可以頂佢個位,都冇乜特別嘢做,安排吓位置就可以,冇所謂啦,不過去到門口貼住話不準攝影團體在此影相,點算……

中伏唯有偷偷摸摸搵地方,參考臥底電影,第一時間諗到天台,原先估計落雨仲驚天台有冇頂,點知曬到燶,要搵有陰影地方先掂,否則唔頂得幾耐.啱啱有啲枱凳,可以叫model坐下,佢幾好笑容,消耗咗唔小電力.

天台周圍白牆好單調,侷住要轉位,唔敢去到樓下咁揚,夾硬搵啲走廊位就算,希望撞唔到食蕉,Model又擺出招牌笑容,背景就雜咗啲,但大家都影得幾高興.

有來過既人知道7樓有塊小草地可以去,政府地方就係咁奇怪,會有個唔用來收租既空間,唔理咁多又可以影到model既笑容.

仲加埋鬼馬動作.

通常每次活動model都會換一次衫,一來唔駛咁悶,二來順便休吓息.不過今次model帶咗成喼衫,咁就換多套啦,事實上都冇乜地方好影,打發吓時間,結果又係走翻去草地.今次坐住笑.

時間差唔多,走去走廊影多幾張就收工,最後都要整個鬼馬動作.

影手球

手球其實好難影,睇翻以前啲相幾乎全部係垃圾,近排成日落雨,咁啱又睇到呢個活動,決定再向難度挑戰.

九龍公園比賽多數冇王管,攞支135mm喺場側影咗一陣,死火,唔係好夠長,而且由於要影正面既關係,好多時都被背住既運動員遮咗,就算影守門員都係同樣問題,變咗只可以影中場爭奪,龍門後面又落晒網.影影吓我見有人在網格中隊支鏡出去影,我自然有樣學樣,好彩支85mm拆咗遮光罩都夠細.蒙古隊幾肯飛吓,雖然最後係大比數輸咗.

手球難影係好難估邊個最終會攻門,佢地會不停將個波交來交去擾亂對方,失驚無神就起手.但真係睇到起手先影多數已經攻完,所以只係估估吓.佢呢吓動作比較慢我先影到.

最後我決定只捕一個位,對焦點亦縮窄到一點擴展至5點,開始冇咁亂,另外一個難度就係飛起既動作好快,快門用到1/500秒,甚至1/640秒都成日矇,最後我開到F1.6光圈,ISO 2000去爭取到1/800秒快門.如果舊機再配支70-200mm F2.8得嗰1/160秒快門真係有機會一張相都冇.不過70-200mm咁大支都隊唔到出去影啦.韓國仔好勁,喺呢個位攞好多分,我幾次都影到呢個位進攻,證明死守一個位方法有效.

去到女子組,香港對日本,又係強弱縣殊,日本隊基本上每個球員都可以有能力射門,就算底線都可以出翻來起手,好彩我預咗,唔係都影唔到.反之香港隊嘛….最邊嗰兩個我唔知佢地作用係乜,只係好機械化咁人地俾波佢佢就回傳,基本上鏡頭同埋對方球員都完全可以無視佢地.

唔夠人快最好夾手夾腳,團結就是力量,一於俾波過唔俾人過.搞搞吓有啲似打攬球.

跟住又係香港對日本,係男子組,不過香港命運都係一樣被人數,技術基本上唔同班,呢吓連我都被佢呃咗,原來唔係射波,只係假動作引守衛失位,我影完掛住睇相佢先真係射波.不過射嗰吓應該都被龍門擋住影唔到.

除咗技術,身形其實都輸埋,我見日本仔成日都可以人群中夾硬爆入去起手,反之香港隊想夾硬來就成個彈開.之後仲有比賽,不過要趕翻屋企食飯就早啲收工喇.

大電視戲院

一向戲院都係用投影機技術,以前商場或者會議廳要大畫面都一樣,唔好處就係要熄燈,不過咁又會搞到黑媽媽,睇唔到手上既嘢,開會就真係好唔方便,所以好多時都夾硬開小小燈,搞到畫面淡晒色.亦越來越多地方改用大電視代替投影機.原來不知不覺間Samsung已經整咗塊大LED屏幕俾戲院用.上年首爾裝咗第一塊,估唔到今年香港已經有,我呢啲貪新鮮既人自然要去感受吓.

乜依家啲戲票咁貴,兩個人連埋手續費要270蚊.租碟可以睇到16隻.貪新鮮冇計,冇錯平時商場都有啲好大個LED屏幕,不過用佢來播戲就死得,是關好粗睇到一粒粒.新城市廣場呢間戲院用既係2.5mm間距既LED,4K解像度,坐最尾第三行,完全睇唔到一粒粒,計一計數就知道屏幕闊10.24米.據我所知暫時全部都係咁.實際上係好細吓,只合迷你戲院.事實上間戲院都好細.來到最重要既畫質,無需多解釋,就等於一部4K OLED電視.優點係超高亮度及對比度,理論上開燈睇都得,最深刻就係開場做Demo既放烟花畫面,由於係自發光的關係,黑色係純黑,用投影機的話點都有小小灰.來到真正電影畫面,原來最大限制並唔係顯示技術,反而係拍攝技術,黑白分明既畫面就睇到光位同暗位分開得好好.暗位細節完全唔受高光位影響,但如果本身成個畫面都暗,拍既時候已經拍到灰晒,咁顯示既畫面一樣係灰晒,開場嗰一幕就係咁.至於4K解像度睇落去其實同屋企差唔多,唔好誤會,我屋企冇4K器材,只有全高清.可能係屏幕呎吋關係,我一向都覺得戲院睇係矇過屋企睇.今次個畫面就真係夠sharp喇.

南嶺,天井山影蝶

上年春季去南嶺雖然大部份時間落雨但都影咗幾個新品種,今年知道有人搞6月尾去第一時間就報名.

吸收咗上年假期出發趕唔到高鐡既經驗,今次寧可請多一日假早一日去,順利趕及中午前到達,食完晏就可以影蝶,呀,講灟咗,南嶺其實宣布咗封山,所以呢半日只可以在公園外圍影吓,好不容易見到隻枯葉,搞來搞去啲位都係麻麻,最後呢個超遠位,加咗2x增距都仲係好細粒.夾硬影,最後只可以係咁,其實都見到有幾種未見過既,但啲位總係好衰,頭一日就咁就冇咗.

來呢啲山旮旯地方食真係唔好太高要求,估唔到住都好慘,因為橙屋關閉咗,要求其搵間,個冷氣…搞到我要棵睡,今日原本要去天井山,不過導遊話試吓搏大霧睇吓得唔得,實情係佢識得看門口既人,打個招呼就入咗去,不過有攝像頭既地方例如好正既停車場就唔可以落車,今日有啲運,一大早就遇到好罕有既黑紫蛺,仲要停定人人有份.

之後離群去搵食就見到佢,其實第一日都見到,但太遠影唔到,估唔到今次係太近,景深太淺,想調節一下但已經俾佢飛走咗.

呢隻叫飛龍,個名好猛,但其實好cheap,周圍都係,同東方菜粉咁上下常見度.

呢隻叫素色蛺蝶,算罕有,多數見到係開翼,從頭頂影落去,認真麻麻,唔講唔知,有太陽曬蝴蝶係會合翼,所以團長出動佢既熱能電筒,真係work,大家都影到合翼.之後就係開車去天井山,住既地方靚得多,最緊要係夠冷氣,不過,老闆娘搵我地笨.唔客氣坐埋來食飯不特止,仲係咁同我地劈酒,唔夠再來兩Jar,完全冇問過我地,之後睇翻張單原來係要收錢的.

滿懷希望入天井山,不過好靜,就只見到呢隻豹紋盛,呢個位個個都覺得唔好,我又覺得幾特別,之後又換咗位,影完又影,影完又影.......

最後決定出出面水氹影吓就翻南嶺,再搏多次,呀….其實除咗熱能電筒仲有一招,就係飲完水之後會產生既肥料,導遊仲帶咗一枝一年既珍藏,果然十分有效,倒咗一陣就有蝴蝶來吸,呢隻平時好活躍,好難影得清的,依家可以慢慢影到好為止.

又來多隻有尾既,估唔到水氹收獲仲多過公園裏面.之後就係翻南嶺,因為導遊識既人明天唔當值,用翻舊方法係唔得,所以要走山路由後門偷渡,條山路超級崎嶇,有兩次落咗坑唔夠力過,要推車先脫險,萬一都唔得都唔知點算,最後冇事,不過今晚住既民宿真係,冇冷氣,冇水沖厠,要自己搬盤水去沖厠,冇士多,冇厠紙,連毛巾牙刷都係一次压,房燈膽壞咗要拆門口嗰個用住先,總之就係乜都冇.基本上係民居臨時借間房你住.

其實有兩間房有冷氣,不過唔夠分,咁一於晏啲瞓去黐啲冷氣涼吓,順便捉咗隻蜉蝣入房影透光.喜歡影蟲呢度就正喇.隨便屋外既牆已經有十幾種物種,我地放隻蜉蝣在電視機面set腳架影,搞到成點幾鐘,雖然冇冷氣,但山區入夜又唔熱喎,仲有小小涷添.

昨晚冇乜點瞓,雖然唔熱,但啲床單好似唔多乾淨,同房嗰張仲有啲漬,今日就帶住熊貓眼去偷入南嶺,一早出發,後門冇人,搞掂,冇錯係見到目標,但硬係唔停同位唔靚.出埋肥料都唔掂,可能上天聽到我地既心聲,搞咗一輪之後居然來咗大量仲要肯停,人人都影到,同房仲開埋Live view慢慢影,好可惜,我影的時候陽光直射,眼上留低不好看的光點.

仲有呢隻最後都稍肯停下,襯機影埋佢,實在太暗不得不用閃光燈.要留意呢個品種對光好敏感,用TTL的話預閃佢會跳一跳,影出來就會矇.要手動輸出閃燈,一閃就影咗,佢跳都唔怕,歡樂既時過得特別快,又係時候趕高鐡翻香港喇.

華富雞疍仔

一直都好想去呢度影日落,事實上今次係第三次來,頭一次諗住華富村有幾大吖,乜資料搜集都冇做就盲中中走去,結果係搵唔到.第二次確定咗位置一樣都係搵唔到,原來係要水退先會露出來.真係好難架,又要水退,又要好天,又要唔駛翻工,夾咗幾個月先夾到.

多得電視台講一講,去到已經有十幾人卡咗位.好在放腳架位置係亂石,總會有啲唔係咁好放既位冇人,如果係沙灘應該就會腳架貼腳架冇晒位,不過想放前啲低角度就唔得喇,會入咗其他人畫面.今次水退係到極點,得0.7米,成舊雞疍仔露晒出來,反而覺得浸多小小會好啲,或者一米高左右,日落又係冇乜睇頭,最後就只可以係咁.

冇乜好搞,影多啲個天,都係唔靚,早啲收工.終於還咗心願,事實上個景只係普普通通,一次就夠.

荃灣龍舟競渡

唔知幾時開始,影運動等於慢快門,等於Pan鏡,最後呢樣先鬼異……等於可以矇.我呢啲老派人係唔識得咁高深既嘢.幾有動感都好,起碼都要有個位sharp.就好似件食物買相幾好都要食得入口先叫食物呱?

上年被誤導搞到影唔到,今年再來去過. 帶咗70-200mm同埋200-500mm去肯定包晒所有焦距.實際用起來係200差小小,換咗200-500mm都只係用到二百幾就夠.人玩我又玩,我都試吓慢快門,為咗隆重其事,仲帶埋支超笨重既鋁合金腳架來.大太陽的關係,又冇減光鏡,最慢只係做到1/50秒.

 

 

要個人sharp其實幾高難度,因為個頭除咗爬完嗰吓停一停,大部份時間都係上上下下咁郁的,於是我諗到影sharp個龍頭,我發覺龍舟移動其實幾慢,1/50秒唔係好有移動既感覺,不過都冇計喇,一來太光慢唔到,而且再慢失敗率太大喇.不過出來效果好似都唔係咁出,只係啲人矇咗.

 

到大龍出場我才終於知道原因,原來係啲人爬得唔夠快,只要夠快就會見到後面啲人嗰種充滿力感既效果,但係全部矇晒我覺得冇意思,所以我安排一條有龍頭既船喺前面,龍頭比較容易影sharp佢.

 

 

較了全片幅之後發現一個問題,唔係原廠鏡既話外圍對焦點唔俾用,好似頭先大龍嗰張相係影唔到,要侷住影細啲再裁.又或者好似呢張咁只可以對焦較中間物體.玩咗半朝收獲麻麻,下午又背光,出年再見.